ប្រទេសអាស៊ានទាំង១០ ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន ១ម៉ឺន ៨ពាន់៤៣៨ករណី និងការ ស្លាប់ថ្មីមានចំនួន៣៧៩នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសារុបចំនួន៦៥០ករណី ដែលសុទ្ធិតែជាការឆ្លងក្នុងសហគមន៍ទាំងអស់។ ចំណែកការស្លាប់ថ្មីនៅថ្ងៃនេះមាន៤នាក់ដែលនាំឲ្យការស្លាប់សរុបមានចំនួន១១៤នាក់។

រោងចក្រដែលស្ថិតក្នុងតំបន់មិនមានការប្រឈមហានិភ័យខ្ពស់ ត្រូវគេរាយការណ៍ថា បានចាប់ដំណើរការសារឡើងវិញហើយ នៅថ្ងៃទី៦ឧសភានេះ។ មន្ត្រីជាន់ខ្ពស់ក្រសួងការងារ នៅជាមួយគ្នានេះបានស្នើសុំយកថ្ងៃដំបូង នេះពិនិត្យការរៀបចំវេនកាត់បន្ថយចំនួនមនុស្សនិងការរៀបចំពិនិត្យប្រព័ន្ធសង្វាក់ផលិតកម្មនិងអនាម័យ ដើម្បីបង្កលក្ខណៈល្អ សម្រាប់កម្មករចូលធ្វើការ។

យុទ្ធនាការចាក់វ៉ាក់សាំងបង្ការជំងឺកូវីដជូនពលរដ្ឋនៅតំបន់ក្រហម ក្នុងខណ្ឌឫស្សីកែវ គ្រោងនឹងចាប់ផ្តើមនៅ ថ្ងៃទី៧ ខែឧសភាស្អែកនេះហើយ។ យុទ្ធនាការចាក់វ៉ាក់សាំងលើពលរដ្ឋក្នុងតំបន់ក្រហមនាពេលនេះ ទើបបានធ្វើ ក្នុង៤ខណ្ឌនោះទេ គឺខណ្ឌមានជ័យ, ខណ្ឌដង្កោ, ខណ្ឌកំបូល និងខណ្ឌ ពោធិ៍សែនជ័យនេះ ដែលមានចំនួន ពលរដ្ឋសរុប៥២ម៉ឺន៥ពាន់៤៣៩នាក់។

យុទ្ធនាការចាក់វ៉ាក់សាំងនៅតំបន់ក្រហម ក្នុងរយ:ពេល៥ថ្ងៃ ចាក់បានលើពលរដ្ឋប្រមាណជិត២០ម៉ឺននាក់ក្នុង ចំណោមជាង៥២ម៉ឺននាក់។ របាយការណ៍បានបង្ហាញថាក្នុងរយៈពេល២៤ម៉ោងនៃថ្ងៃទី៥ឧសភា ក្រុមការងារ បានចាក់លើពលរដ្ឋក្នុងតំបន់ប្រឈមហានិភ័យនៃខណ្ឌចំនួន៤ បានចំនួន ៤ម៉ឺន៨ពាន់៨៤៨នាក់ ក្នុងនោះស្រី ចំនួន ២ម៉ឺន៥ពាន់៣៨១ នាក់។

ភូមិចំនួន១៣ក្នុងរាជធានី ត្រូវបានគេរកឃើញការឆ្លងជំងឺកូវីដ-១៩ ក្នុងរយៈពេល២៤ម៉ោងចុងក្រោយនេះ។ កាលពីម្សិលមិញ ភូមិដែលមានការឆ្លងកូវីដ១៩ ក្នុងរាជធានី ត្រូវគេរកឃើញ១០ភូមិ និងនៅថ្ងៃព្រហស្បតិ៍នេះទៀត ភូមិ ដែលរកឃើញមានការឆ្លង បានកើនដល់១៣ភូមិ។

អភិបាលរងរាជធានីភ្នំពេញ បានថ្លែងជុំវិញមូលហេតុពាក់ព័ន្ធខ្លះដែលមានមនុស្សស្ថិតក្នុងតំបន់ក្រហមដែលមាន ហានិភ័យមិនមានកិច្ចសហការជាមួយនឹងអាជ្ញាធរសុខាភិបាលក្នុងវិធានការស្វែងរកនិងកំចាត់នូវឫសគល់នៃការឆ្លងមេរោគកូវីដ១៩។ រាជធានីភ្នំពេញ ក្នុងរយៈពេលដែលមានការបិទខ្ទប់កន្លងមកនេះ តួលេខនៃការឆ្លងត្រូវគេ កត់សម្គាល់ថា បានកើនខ្ពស់រហូតដល់៥០០ករណី, ឬពេលខ្លះឡើងដល់៦០០និង៧០០ករណីថែមទៀត ដោយសារតែមានមនុស្សមិនសហការជាមួយនឹងអាជ្ញាធរសុខាភិបាល។

រដ្ឋបាលរាជធានី បានធ្វើសន្និសីទកាសែតមួយក្រោយការកំណត់តំបន់ក្រហម, តំបន់លឿងទុំ និងតំបន់លឿង សាជាថ្មីក្រោយសេចក្តីសម្រេចបន្តបិទតំបន់ប្រឈមហានិភ័យឆ្លងទាំងនោះ រយៈពេល៧ថ្ងៃបន្តទៀត។ តំបន់ ក្រហមដែលបានគូសបញ្ជាក់ដោយរដ្ឋបាលរាជធានី ត្រូវគេឃើញថាមាននៅក្នុងភូមិនិងសង្កាត់ខ្លះ ក្នុងខណ្ឌ ចំនួន៦ គឺខណ្ឌ៧មករា, ខណ្ឌទួលគោក, ខណ្ឌមានជ័យ, ខណ្ឌឫស្សីកែវ, ខណ្ឌពោធិ៍សែនជ័យ និង ខណ្ឌច្បារអំពៅ។

សម្ដេចតេជោនាយករដ្ឋមន្ត្រី បានបញ្ចប់ការធ្វើចត្តាឡីស័ករយៈពេល១៤ថ្ងៃ នៅថ្ងៃព្រហស្បតិ៍ទី៦ឧសភានេះ និង សម្តេចបានសរសេរបញ្ជាក់ក្នុងបណ្តាញសង្គមហ្វេសប៊ុកថា សម្តេចមិនមានការឆ្លងកូវីដ១៩នោះទេ។ សម្តេចនាយករដ្ឋមន្ត្រី បានតម្រូវផ្តល់សំណាកធ្វើតេស្តនិងការធ្វើចត្តាឡីស័ករយៈពេល១៤ថ្ងៃ ក្រោយការវិលត្រឡប់មកពី ចូលរួមកិច្ចប្រជុំកំពូលអាស៊ាន ក្នុងក្រុងហ្សាកាតានៃប្រទេសឥណ្ឌូណេស៊ីកាលពីយប់ថ្ងៃទី២៤មេសាឆ្នាំ២០២១។

ការតម្រូវធ្វើចត្តាឡីស័ក១៤ថ្ងៃរបស់ខេត្តខ្លះ ដោយគ្រាន់តែមានការធ្វើដំណើរឆ្លងកាត់ ឬលេងកំសាន្តនោះ ត្រូវសម្តចនាយករដ្ឋមន្ត្រីបានប្រៀបប្រដូច នឹងការបង្កើតរដ្ឋ នៅក្នុងរដ្ឋ។ រាជធានីភ្នំពេញនិងក្រុងតាខ្មៅ ទើបនឹង បានរួចពីការបិទខ្ទប់នៅថ្ងៃទី៦ឧសភានេះ និងសេចក្តីសម្រេចបញ្ចប់ការបិទខ្ទប់នោះ ត្រូវបានអបអរសាទរដោយ ប្រជាពលរដ្ឋ។

កងកម្លាំងការពារព្រំដែនខេត្តបាត់ដំបង បានឃាត់ខ្លួនមេខ្យល់២នាក់ ដែលបំរុងនាំពលករប្រុសស្រីនិងកូនចៅ ចំនួន១០នាក់ បំរុងឆ្លងដែនខុសច្បាប់ចេញទៅប្រទេសថៃ។ ការឃាត់ខ្លួនមេខ្យល់ទាំង២ជាប្តីប្រពន្ធរួមនឹងពលករ ទាំងនោះ បានធ្វើក្នុងភូមិសាស្ត្រចំណុចស្ពានបី ភូមិអូរអន្លក់ ឃុំតាសែន នៃស្រុកកំរៀងនាព្រឹកថ្ងៃទី៤ឧសភា។