ខេត្តកំពង់ឆ្នាំងដែលមានការឆ្លងកូវីដ១៩ចំនួន១៦ករណី បានប្រកាសការរកឃើញអ្នកឆ្លងកូវីដ១៩ថ្មីម្នាក់ទៀត ដែលជាកម្មករធ្វើដំណើរមកពីរាជធានី មកលេងស្រុកកំណើតនៅស្រុករលាប្អៀរ។

ខេត្តបន្ទាយមានជ័យ ត្រូវបានកំណត់ជាខេត្តមួយបន្ថែមទៀតក្នុងការអនុវត្តកាត្វកិច្ចពាក់ម៉ាស និងកាតព្វកិច្ច រក្សាគម្លាតសុវត្ថិភាព។ រហូតមកទល់ពេលនេះ ខេត្តនិងរាជធានីសរុបចំនួន៧ហើយ ដែលជាតំបន់ត្រូវអនុវត្ត កាត្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព។

ខេត្តកណ្ដាលគ្រោងនឹងយកទីតាំងវិទ្យាល័យមួយកន្លែងទៀត ធ្វើជាមណ្ឌលសម្រាប់ព្យាបាលអ្នកផ្ទុកមេរោគ កូវីដ១៩នៅក្រុងតាខ្មៅ។ នៅក្នុងខេត្តកណ្ដាល តួលេខករណីរកឃើញអ្នកឆ្លងជំងឺកូវីដ១៩ កាន់តែកាន់ឡើង។ នៅថ្ងៃទី៤ឧសភានេះ ការឆ្លងថ្មីក្នុងខេត្តនេះ មាន១៧៥ករណី ដែលនាំឲ្យខេត្តកណ្តាលមានការឆ្លងសរុបចំនួន ១ពាន់៣៨៧ករណីហើយ។

មនុស្ស២នាក់ ដែលបានបន្លំធ្វើជានគរបាលជាតិ ដើម្បីការរត់គេចចេញពីតំបន់ក្រហមនៅខេត្តព្រះសីហនុ ត្រូវបានសមត្ថកិច្ចឃាត់ខ្លួន។ ស្នងការនគរបាលខេត្ដព្រះសីហនុលោកឧត្តមសេនីយ៍ទោ ជួន ណារិន្ទ បានឲ្យដឹងថាមនុស្សបន្លំទាំង២នាក់នោះ មានម្នាក់ជាជនជាតិចិន និងម្នាក់ជាជនជាតិខ្មែរ បម្រុងគេចចេញពីតំបន់ក្រហម ស្ថិតក្នុងសង្កាត់លេខ៣ ក្រុងព្រះសីហនុ។

ក្រសួងការងារបានបើកមណ្ឌលចាក់វ៉ាក់សាំង១ទីតាំងបន្ថែមទៀតនៅថ្ងៃទី៤ឧសភានេះ ដើម្បីការចាក់ជូនកម្មករ និយោជិត។ ទីតាំងថ្មីបើកបន្ថែមទៀតសម្រាប់ការចាក់វ៉ាក់សាំងស៊ីណូវ៉ាក់ដូសទី២ដល់់កម្មករនិងនិយោជិត គឺ ស្ថិតនៅរោងចក្រ ស្ព័រតិច Sportex ស្ថិតនៅសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។

សកម្មភាពដឹកជញ្ជួននិងការចែកស្បៀងអាហារដល់ពលរដ្ឋក្នុងតំបន់បិទខ្ទប់ បានបន្តថែមទៀតជាមួយនឹងកិច្ច សហការរវាងអាជ្ញាធរខណ្ឌជាមួយកម្លាំងកងយោធា។ សេចក្តីរាយការណ៍រដ្ឋបាលរាជធានី បានបញ្ជាក់ថារយៈ ពេល២ថ្ងៃចុងក្រោយ គឺថ្ងៃទី៣និង៤ឧសភា ពលរដ្ឋជិត៤ម៉ឺនគ្រួសារក្នុងតំបន់បិទខ្ទប់នៅរាជធានី បានទទួល ស្បៀងអាហារជាង២០ម៉ឺនកញ្ចប់ដែលជាអំណោយរបស់រាជរដ្ឋាភិបាល។

គ្រួសារនិវត្តន៍ជនចំនួន១១១គ្រួសារ នៅក្នុងខណ្ឌ៧មករា ដែលកំពុងរងការខ្វះខាត ក្នុងដំណាក់កាល ជម្ងឺកូវីដ កំពុងរាតត្បាត បានទទួលអំណោយជាស្បៀងអាហារនៅថ្ងៃនេះ។

រាជធានីភ្នំពេញ ដែលកំពុងផ្ទុះឆ្លងខ្លាំងនូវជម្ងឺកូវីដ១៩ បានទទួលម៉ាសនិងបរិក្ខាបង្កាកូវីដ១៩ដែលជា អំណោយរបស់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស។ ពិធីប្រគល់និងទទួល ម៉ាស ចំនួន២០ម៉ឺននិងបរិក្ខាពេទ្យបានធ្វើនៅព្រឹកថ្ងៃទី៤ខែឧសភា នៅសាលារាជធានីភ្នំពេញ ក្រោមវត្តមាន អភិបាលរាជធានីភ្នំពេញ លោក ឃួង ស្រេង និង រដ្ឋលេខាធិការ ក្រសួងការបរទេស លោក ញឹម ខេមរា។

ការធ្វើសកម្មភាពផ្សាយផ្ទាល់ប្រដេញតាមថតរថយន្តសង្គ្រោះបន្ទាន់ ជាមួយនឹងការធ្វើ អត្ថាធិប្បាយហេតុការណ៍ពាក់ព័ន្ធផ្នែកបច្ចេកទេសសុខាភិបាល ដោយគ្មានជំនាញ បានប្រញាប់ឲ្យក្រសួងព័ត៌មានបានចេញលិខិត ព្រមាននិងហាមការធ្វើសកម្មភាព។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន៥ពាន់៩៥៩ ករណី និងការស្លាប់ថ្មីមានចំនួន៣៣៦នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុប ចំនួន៩៣៨ករណី ដែលសុទ្ធតែជាការឆ្លងចូលក្នុងសហគមន៍ទាំងអស់។ ចំណែកការស្លាប់ថ្មីនៅថ្ងៃនេះ មានម្នាក់ ដែលនាំឲ្យ ការ ស្លាប់សរុបមានចំនួន១០៧នាក់។