មនុស្សចំនួន២នាក់ បានស្លាប់ដោយសារជំងឺកូវីដ១៩ ក្នុងរយៈពេល២៤ម៉ោងចុងក្រោយនេះ ដែលនាំឲ្យការស្លាប់ សរុបដោយសារវីរុសនេះ បានកើនឡើងដល់ចំនួន៩៣នាក់ហើយ គិតត្រឹមថ្ងៃទី៣០មេសានេះ។

សំណួរទី១៖ ថ្ងៃទី១ឧសភា គឺជាថ្ងៃចាប់ផ្តើមរបស់កងកម្លាំងពេទ្យយោធាក្នុងយុទ្ធនាការចាក់វ៉ាក់សាំងលើពលរដ្ឋ ក្នុងតំបន់ក្រហម។ អ្នកស្រីមេបញ្ជាការរង គឺជាផ្នែកមួយនៃអ្នកដឹកនាំក្នុងកម្លាំងយោធាដើម្បីចូលរួមក្នុងយុទ្ធនា ការនោះ។ ខ្ញុំសូមអនុញ្ញាតសាកសួរថាតើការរៀបចំចូលចាកវ៉ាក់សាំងនឹងរៀបចំធ្វើយ៉ាងណា ជាពិសេសផ្នែក របស់កម្លាំងអ្នកស្រីឧត្តមសេនីយ៍មេបញ្ជាការរងបាននិងកំពុងត្រៀមនាពេលនេះ?

យុទ្ធនាការជាតិចាក់វ៉ាក់សាំងនៅក្នុងភូមិសាស្ត្ររាជធានីភ្នំពេញ ជាពិសេសតំបន់ក្រហម ត្រៀមចាប់ផ្ដើម នាប៉ុន្មាន ម៉ោងខាងមុខទៀតនេះ។ រដ្ឋមន្ត្រីក្រសួងការពារជាតិសម្ដេចពិជ័យសេនា ទៀ បាញ់ នៅព្រឹកថ្ងៃទី៣០មេសា ឆ្នាំ ២០២១ បានប្រកាសការបើកយុទ្ធនាការចាក់វ៉ាក់សាំងការពារជំងឺកូវីដ-១៩ ក្នុងទ្រង់ទ្រាយធំជូនប្រជាពលរដ្ឋក្នុង ខណ្ឌចំនួន៤ ដែលជាខណ្ឌមានការឆ្លងរីករាលដាលជំងឺកូវីដ-១៩ ច្រើនជាងគេ។ ខណ្ឌទាំង៤នោះ គឺរួមមាន ខណ្ឌដង្កោ, ខណ្ឌមានជ័យ, ខណ្ឌពោធិ៍សែនជ័យ និងខណ្ឌកំបូល។

រាជរដ្ឋាភិបាលកម្ពុជា បានរំលឹកខួប២២ឆ្នាំ ដែលកម្ពុជាបានចូលជាសមាជិកអាស៊ាន។ ទំព័រហ្វេសប៊ុកផ្លូវការ របស់ សម្ដេចតេជោ ហ៊ុន សែន បានសរសេរថា ថ្ងៃទី៣០មេសានេះគឺជាខួប២២ឆ្នាំ ដែលកម្ពុជាបានក្លាយជាសមាជិក សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន។

សេចក្តីរាយការណ៍របស់អធិការស្រុកកំរៀង បានអោយដឹងថាករណីគ្រោះធម្មជាតិរន្ទះបាញ់នោះ បានកើតឡើងកាលពីល្ងាចថ្ងៃទី ២៨ ខែមេសា ឆ្នាំ ២០២១ ក្នុងភូមិសាស្ត្រភូមិផ្លូវប្រាំមួយ ឃុំតាក្រី ស្រុកកំរៀង ខេត្តបាត់ដំបង។

ប្រជាពលរដ្ឋដែលធ្លាប់ទៅទទួលសេវានៅមន្ទីរពេទ្យសង់ត្រាល់ ក្នុងរាជធានីភ្នំពេញត្រូវប្រញាប់ធ្វើចត្តាឡីស័ក និងតាមដានសុខភាព។ មន្ទីរពេទ្យសង់ត្រាល់ មានទីតាំងស្ថិតនៅផ្ទះលេខ ៨២ A, ផ្លូវលេខ ១៥៤ សង្កាត់ផ្សារថ្មី ៣ នៃខណ្ឌដូនពេញ។

ការរកឃើញប្ដីប្រពន្ធ២នាក់ មានវិជ្ជមានជំងឺកូវីដ១៩ នៅស្រុកត្រាំកក់ ខេត្តតាកែវ បានជម្រុញឲ្យរដ្ឋបាលស្រុកចេញប្រកាសព័ត៌មានស្វែងរកអ្នកជាប់ពាក់ព័ន្ធ។

នៅក្នុងខេត្តព្រះសីហនុដដែល ជនជាតិចិនម្នាក់ដែលផ្គើននឹងកាតព្វកិច្ចពាក់ម៉ាស ត្រូវរដ្ឋបាលខេត្តព្រះ សីហនុ បានបណ្ដេញចេញពីកម្ពុជា។ យោងតាមរដ្ឋបាលខេត្តព្រះសីហនុថ្ងៃទី២៩មេសា អភិបាលខេត្តព្រះសីហនុលោក គួច ចំរើន បានបញ្ជាឱ្យកម្លាំងសមត្ថកិច្ចរៀបចំនីតិវិធីស្នើការបណ្តេញចេញជនជាតិចិនម្នាក់ និងថែមទាំងមិន អនុញ្ញាតឱ្យចូលទឹកដីប្រទេសកម្ពុជាជារៀងរហូត។ ការត្រៀមបណ្ដេញចេញនោះ បន្ទាប់ពីជនជាតិចិនរូបនោះ ត្រូវគេរាយការណ៍ថា បានផ្គើននឹងបំរាមណែនាំ និងមិនអនុវត្តកាតព្វកិច្ចពាក់ម៉ាស។

ភូមិមួយនៅក្នុងស្រុកព្រៃនប់ នៃខេត្តព្រះសីហនុ មានអ្នកឆ្លងកូវីដ១៩ ចំនួន១៨៧នាក់។ យោងតាមរដ្ឋបាលខេត្ត អ្នកឆ្លងជម្ងឺកូវីដ១៩ទាំង១៨៧នាក់នោះ រស់នៅក្នុងភូមិចំណោតរាម, ឃុំបិតត្រាង នៃស្រុកព្រៃនប់។ អ្នកឆ្លងកូវីដ ក្នុងភូមិចំណោតរាមនោះ គឺជាអាជីវករ និងប្រជាពលរដ្ឋដែលស្នាក់នៅក្នុងភូមិនោះ។

នៅក្នុងខេត្តសៀមរាបនោះវិញ តំបន់មួយចំនួននៅមុខបរិវេណមន្ទីរពេទ្យបង្អែកខេត្ត និងនៅបរិវេណជុំវិញផ្សារ កណ្តាលក្នុងក្រុងសៀមរាប ត្រូវបានបិទបណ្តោះអាសន្ន ក្រោយរកឃើញអ្នកវិជ្ជមានជំងឺកូវីដ-១៩ ថ្មីម្នាក់ទៀត។