ខេត្តកំពង់ធំ បានបិទបណ្តោះអាសន្នក្នុងភូមិមួយ ក្រោយការរកឃើញមានករណីឆ្លងកូវីដ១៩ លើអ្នកភូមិជាង ១០នាក់។ យោងតាមរដ្ឋបាលខេត្ត ភូមិលាបទង, ឃុំកំពង់ចិនត្បូង នៃស្រុកស្ទោង ត្រូវអាជ្ញាធរបានបិទការចេញ ចូលក្រោយការធ្វើតេស្តរហ័ស Rapid Test បានរកឃើញការឆ្លងលើមនុស្ស១៣នាក់់ក្នុងចំណោម១០៤នាក់។

អាជ្ញាធរខេត្តកំពង់ចាម បានរកឃើញមនុស្ស៣៩នាក់ ឆ្លងជម្ងឺកូវីដ១៩ បន្ថែមទៀត ក្នុងរយៈពេល២៤ម៉ោងចុង ក្រោយនេះ។ យោងតាមរដ្ឋបាលខេត្ត អ្នកឆ្លងកូវីដទាំង៣៩នាក់ចុងក្រោយនេះ គឺមាន៣៨នាក់ជាកម្មកររោងចក្រ និងម្នាក់ទៀតជាកុមារីអាយុ៤ឆ្នាំ។

កម្មករ និងនិយោជិតប្រមាណជិត៣ពាន់នាក់ នៃរោងចក្រចំនួន១០ នៅស្រុកអង្គស្នួល នៃខេត្តកណ្ដាល ត្រូវអាជ្ញាធរចុះយកសំណាក ធ្វើតេស្តរកមេរោគកូវីដ១៩ ។

នៅថ្ងៃដំបូងដែមានចំណាត់ការជាលើកទី២ នៃការបិទខ្ទប់រយៈពេល៧ថ្ងៃនេះផងដែរ យើងបានធ្វើការសាកសួរបន្ថែមជុំវិញពលរដ្ឋដែលស្ថិតក្នុងតំបន់ក្រហមមួយកន្លែងក្នុងរាជធានីភ្នំពេញ។ យើងបានសាកសួរកញ្ញា គង់ សុផុល ដែលជាបុគ្គលិកកម្មវិធីអប្សរាណិតរបស់យើងដែលបានស្ថិតក្នុងភូមិមួយក្នុងតំបន់ក្រហមរាជធានីភ្នំពេញ។

អភិបាលរាជធានីភ្នំពេញ លោក ឃួង ស្រេង បានចុះពិនិត្យការអនុវត្តច្បាប់ ក្នុងថ្ងៃដំបូង នៃជំហានទី២ ជុំវិញការបិទ ខ្ទប់រយៈពេល៧ថ្ងៃ នៅក្នុងរាជធានីជាពិសេសតំបន់ក្រហម និងតំបន់លឿងទុំ។ អភិបាលរាជធានីភ្នំពេញ បានថ្លែង មុននេះដែរថា រាជធានីភ្នំពេញនឹងអាចបន្តការបិទថែមទៀត យោងតាមភាពវិវត្តន៍នៃជម្ងឺឆ្លង និងការចូលរួមពីប្រជាពលរដ្ឋ។

ថវិកាចំនួន៥ម៉ឺនដុល្លារ ឧបត្ថម្ភដោយអ្នកឧកញ៉ា គិត ម៉េង បានប្រគល់ជូនរដ្ឋបាលរាជធានីភ្នំពេញ ដើម្បីការ ចាត់ចែងក្នុងការងារបង្ការ និងទប់ស្កាត់ជម្ងឺកូវីដ១៩។ ថវិកាឧបត្ថម្ភនេះ បានផ្តល់នៅថ្ងៃទី២៩មេសានេះ ដែលជា ថ្ងៃចាប់ផ្តើមអនុវត្តជំហានទី២ នៃការបិទខ្ទប់រយៈពេល៧ថ្ងៃ នៅក្នុងរាជធានី និងក្រុងតាខ្មៅ។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន៣៥៣ករណី និងការស្លាប់ថ្មីមានចំនួន៣៦០នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុបចំនួន ៨៨០ករណី ដែលជាការឆ្លងចូលក្នុងសហគមន៍ទាំងអស់។ ចំណែកការស្លាប់ថ្មីនៅថ្ងៃនេះមានចំនួន៣នាក់ ដែល នាំឲ្យការស្លាប់សរុបមានចំនួន៩១នាក់។

ទូរទស្សនិកជន នៅវេលានេះ កម្មវិធីអប្សរាណិតរបស់យើង នឹងធ្វើកិច្ចសម្ភាសន៍តាមទូរស័ព្ទជាមួយនឹងអ្នកយក ព័ត៌មានរបស់យើង លោក សម វិច្ឆិកា ដែលបានចុះតាមដានយកព័ត៌មានតាមកន្លែងនានាក្នុងរាជធានី។

ការឆ្លងចូលក្នុងសហគមន៍ក្នុងនៅថ្ងៃព្រហស្បតិ៍នេះ មានចំនួន៨៨០ករណី ដែលនាំឲ្យការឆ្លងរយៈពេល៤៨ម៉ោង ចុងក្រោយមានចំនួន១ពាន់៥៧៨ករណី។ រាជធានីកំពុងស្ថិតក្នុងរយៈកាលបិទខ្ទប់នៃដំណាក់កាលទី២រយៈពេល ៧ថ្ងៃ។ អាជ្ញាធរបានថ្លែងថាការបិទខ្ទប់និងមិនបិទខ្ទប់ នឹងអាស្រ័យលើភាពវិវត្តន៍នៃស្ថានភាពជម្ងឺឆ្លង និងកិច្ចសហការចូលរួមពីប្រជាពលរដ្ឋ។

មនុស្សចំនួន៣នាក់ បានស្លាប់ដោយសារជំងឺកូវីដ១៩ នាវេលា២៤ម៉ោងចុងក្រោយនេះ ដែលនាំឲ្យការស្លាប់សរុបដោយសារវីរុសនេះ បានកើនឡើងដល់ចំនួន៩១នាក់ហើយ គិតត្រឹមថ្ងៃទី២៩មេសានេះ។