ជនជាតិចិន២នាក់ ដែលបម្រើការនៅរោងចក្រផលិតកាបូប «PV» នៅក្នុងខេត្តតាកែវ ត្រូវគេរកឃើញមាន វិជ្ជមានជំងឺកូវីដ១៩ ។ យោងតាមក្រសួងសុខាភិបាល ខេត្តតាកែវគិតត្រឹមថ្ងៃទី២៧មេសា ចំនួនមនុស្ស ដែលកំពុង សម្រាកព្យាបាលដោយសារជំងឺកូវីដ១៩ មានចំនួន៧១នាក់។

ខេត្តព្រៃវែង បានសម្រេចបិទការចេញចូលភូមិចំនួន២ ក្នុងឃុំពានរោង នៃស្រុកស្វាយអន្ទរ ក្រោយរកឃើញមាន អ្នកឆ្លងជំងឺកូវីដចំនូន៦នាក់ ។ អភិបាលខេត្តព្រៃវែងលោក ជា សុមេធី នៅថ្ងៃទី២៨ ខែមេសា ឆ្នាំ២០២១នេះ បានចេញសេចក្ដីជូនដំណឹងស្ដីពីការផ្អាកបណ្ដោះអាសន្ននូវការចរាចរណ៍ចេញ-ចូល ក្នុងភូមិសាស្ដ្រភូមិត្រពាំងធំ និង ភូមិឆ្អឹងពស់ នៃឃុំពានរោង ក្រោយភូមិទាំង២នោះ ត្រូវគេរកឃើញមានអ្នកឆ្លងជំងឺកូវីដ១៩។ ខេត្តព្រៃវែងគិតត្រឹម ថ្ងៃទី២៧មេសា មនុស្សដែលកំពុងសម្រាកព្យាបាលកូវីដ១៩ក្នុងមន្ទីរពេទ្យ មានចំនួន២៩ករណី។

រដ្ឋមន្ដ្រីក្រសួងព័ត៌មាន បានជូនដំណឹងពីការបន្ដសុពលភាពលិខិតអនុញ្ញាតធ្វើដំណើរ ក្នុងពេលបិទខ្ទប់ភូមិ សាស្ដ្ររាជធានីភ្នំពេញ និងក្រុងតាខ្មៅ រយៈពេល៧ថ្ងៃទៀត។ យោងតាមសេចក្តីប្រកាសព័ត៌មានរបស់ក្រសួងព័ត៌មាន នៅព្រឹកថ្ងៃទី២៨ ខែមេសា ឆ្នាំ២០២១នេះ បានបន្ដសុពលភាពលិខិតអនុញ្ញាតិធ្វើដំណើរ ក្នុងអំឡុងពេលអនុវត្តវិធានការបិទខ្ទប់ ភូមិសាស្ដ្ររាជធានីភ្នំពេញ និង ក្រុងតាខ្មៅ នៃខេត្តកណ្ដាល ។

រាជធានីភ្នំពេញ និងក្រុងតាខ្មៅ បានចាប់ផ្តើមអនុវត្តជំហានទី២ នៃការបន្តបិទខ្ទប់រយៈពេល៧ថ្ងៃជាមួយនឹងការ បែងចែកច្បាស់លាស់តំបន់ក្រហម, តំបន់លឿងទុំនិងតំបន់លឿង។ ការចាប់ផ្តើមអនុវត្តជំហានទី២នៃការបិទខ្ទប់ រាជធានីភ្នំពេញ និងក្រុងតាខ្មៅរយៈពេល៧ថ្ងៃ នឹងចាប់ផ្តើមពីថ្ងៃស្អែកទី២៩មេសាទៅ។

តុលាការបានបង្គាប់ឱ្យចាប់ខ្លួន ទណ្ឌិត សម រង្ស៉ី ក្រោយសម្តីញុះញង់ពលរដ្ឋ ឱ្យងើបបះបោរប្រឆាំង វិធានការបិទខ្ទប់រដ្ឋាភិបាល ។ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាថ្ងៃទី២៦មេសា បង្គាប់ការចាប់ខ្លួន ទណ្ឌិត សម រង្ស៉ី ដែលជាមេក្រុមឧទ្ទាមក្រៅច្បាប់ញុះញង់ ឱ្យប្រជាពលរដ្ឋងើបបះបោរប្រឆាំងនឹង វិធានការបិទខ្ទប់របស់រាជរដ្ឋាភិបាល។

ការរកឃើញមានព្រះសង្ឃឆ្លងកូវីដ១៩ បានជម្រុញឲ្យគណសង្ឃនាយក ចេញការណែនាំឲ្យគ្រប់វត្តអារាម បង្កើនការអនុវត្តតាមវិធានការរបស់ក្រសួងសុខាភិបាល។ សេចក្ដីជួនដំណឹងរបស់គណៈសង្ឃនាយកនៃព្រះរាជាណាចក្រកម្ពុជាថ្ងៃទី២៨មេសាឆ្នាំ២០២១ បានឲ្យដឹងថា ព្រះភិក្ខុមួយអង្គព្រះនាម ប៊ូ ផាត គង់នៅវត្តស្ទឹងហាវ ខេត្តព្រះសីហនុ ត្រូវគេរកឃើញមានវិជ្ជមានកូវីដ-១៩។ ព្រះសង្ឃអង្គនោះ កំពុងសម្រាកព្យាបាលនៅមន្ទីរពេទ្យ បង្អែកខេត្តកែប។

កម្ពុជាបានបំបែកកំណត់ត្រាព្យាបាលអ្នកអ្នកជំងឺកូវីដ-១៩ ដោយក្នុងរយៈពេល២៤ម៉ោងចុងក្រោយនេះ មានអ្នកជាសះស្បើយជាង៨០០នាក់ ដែលកម្ពុជាមិនធ្លាប់មាន។ ហ្វេសប៊ុករបស់លោកស្រី ពេជ ចន្ទមុន្នី ហ៊ុន ម៉ាណែត ដែលជាអនុប្រធានក្រុមប្រឹក្សាភិបាលសមាគមគ្រួពេទ្យយុវជនស្មគ្រ័ចិត្តសម្ដេចតេជោ TYDA បានសរសេរកាលយប់ថ្ងៃទី២៧មេសា ដែលជាថ្ងៃមួយរោចខែពិសាខឆ្នាំឆ្លូវពុទ្ធសករាជ ២៥៦៥ បញ្ជាក់ថា « ក្នុងរាត្រីដែលមានព្រះ ច័ន្ទរះពេញវង់នេះ គឺជាថ្ងៃដែលល្អ ពីព្រោះអ្នកជំងឺដែលកំពុងព្យាបាលនៅមណ្ឌលព្យាបាលកូវីដ កោះពេជ្រចំនួន ៨៣៤នាក់ បានជាសះស្បើយ»។ អ្នកជម្ងឺទាំងនេះ នឹងតម្រូវការធ្វើចត្តាឡីស័កបន្តតាមផ្ទះរយៈពេល១៤ថ្ងៃថែម ទៀត។

កម្ពុជាបានជម្រុញការចាក់វ៉ាក់សាំងបន្ថែមទៀតទន្ទឹមនឹងវ៉ាក់សាំងនៃជំនួយរបស់ប្រទេសចិន បានដឹកមកដល់បន្ថែមទៀតនៅយប់ថ្ងៃទី២៨មេសា។ សម្តេចនាយករដ្ឋមន្ត្រីបានដាក់បញ្ជាក់ត្រូវចាក់លើពលរដ្ឋទាំងអស់ក្នុង តំបន់ ក្រហមដែលមានចំនួន៤ខណ្ឌក្នុងរាជធានី។

វ៉ាក់សាំងស៊ីណូហ្វាម ចំនួន៤០ម៉ឺនដូស ដែលជាជំនួយរបស់ប្រទេសចិន នឹងដឹកមកដល់កម្ពុជាវេលាយប់ថ្ងៃទី ២៨មេសានេះ។ នេះគឺជាការទទួលវ៉ាក់សាំងជំនួយចិនជាលើកទី៣ហើយ បន្ទាប់ពីជំនួយវ៉ាក់សាំងស៊ីណូហ្វាម ជើងទី១ បានដឹកមកដល់កម្ពុជានៅថ្ងៃទី៧ ខែកុម្ភៈ ចំនួន៦០ម៉ឺនដូស, និងលើកទី២ ចំនួន៧០ម៉ឺនដូស ដែលបាន ដឹកមកដល់ថ្ងៃទី៣១ខែមីនា។

ការនិយាយជាសារសម្លេងរបស់ប្រមុខដឹកនាំរាជរដ្ឋាភិបាល ក្នុងពេលកំពុងហាត់ប្រាណ បាននាំឲ្យមានចម្ងល់ ជាសំណួរនូវសម្លេងដែលបង្ហាញសភាពហត់។ សម្តេចនាយករដ្ឋមន្ត្រីក្នុងសារសម្លេងមួយទៅកាន់រដ្ឋមន្ត្រីក្រសួងការពារជាតិ និងរដ្ឋមន្ត្រីក្រសួងសុខាភិបាលនាយប់ថ្ងៃទី២៧មេសា សម្លេងរប​ស់សម្តេចបានបង្ហាញនូវសភាពហត់។