យុទ្ធនាការចាក់វ៉ាក់សាំងទូទាំងប្រទេស បាននិងកំពុងសម្រុកធ្វើយ៉ាងខ្លាំងក្លាទន្ទឹមនឹងសន្ទុះឆ្លងរាតត្បាត នៅតែបន្តវាយលុកឥតឈប់ឈរក្នុងសហគមន៍។ ចំនួនមនុស្សដែលបានទទួលការចាក់វ៉ាក់សាំងក្នុងដូសលើក ទី១នៅទូទាំងប្រទេស បានសរុបមានចំនួនជាង១លាន២៩ម៉ឺននាក់ ។ ចំណែកការចាក់វ៉ាក់សាំងក្នុងដូសលើក ទី២នោះវិញមានចំនួនសរុបជាង៧៧ម៉ឺន៧ពាន់នាក់។

វ៉ាក់សាំងស៊ីណូហ្វាម ចំនួន៤០ម៉ឺនដូស គ្រោងនឹងដឹកមកដល់កម្ពុជានៅថ្ងៃទី២៨ មេសាស្អែកនេះ។ រដ្ឋលេខាធិការក្រសួងសុខាភិបាលលោកស្រី យក់ សម្បត្តិ បានថ្លែងនៅថ្ងៃអង្គារ៍នេះថា វ៉ាក់សាំងស៊ីណូហ្វាមដែលនឹង មកដល់វេលាយប់ថ្ងៃទី២៨មេសា គឺជាវ៉ាក់សាំងជំនួយរបស់សាធារណរដ្ឋប្រជាមានិតចិន។

ការកំណត់នូវតំបន់ក្រហម, តំបន់លឿងទុំនិងតំបន់លឿង សម្រាប់ការសម្គាល់នូវភូមិសាស្ត្រដែល មានការឆ្លង រាលដាលជម្ងឺកូវីដ១៩ បានបង្កភាពងឿងឆ្ងល់ខ្លះដល់ប្រជាពលរដ្ឋដែលមិនទាន់បានដឹងនូវខ្លឹមសារនិងចំណាត់ ការរដ្ឋបាលតាមតំបន់នីមួយៗទាំងនោះឡើយ។ អង្គភាពប្រតិកម្មរហ័សនៃទីស្តីការគណរដ្ឋមន្ត្រី បានបញ្ចេញ នូវ វិដេអូមួយថ្ងៃនេះ ដែលនឹងរៀបរាប់ខ្លឹមសារសំខាន់ជុំវិញការកំណត់នូវតំបន់ក្រហម, តំបន់លឿងទុំនិងតំបន់លឿង ។ តើអត្ថន័យនិងខ្លឹមសារនៃតំបន់ទាំង៣នោះ មានអ្វីខ្លះ?

ការឆ្លងចូលក្នុងសហគមន៍ រយៈពេល២៤ម៉ោងចុងក្រោយនេះ មានចំនួន៥០៨ ករណី ដែលនៅតែជាចំនួនខ្ពស់ គូរឲ្យកត់សម្គាល់បើទោះបីជាមានការធ្លាក់ចុះ៧១ករណីបើប្រៀបធៀបនឹងម្សិលមិញ។ ការឆ្លងចូលក្នុងសហគមន៍ទាំង៥០៨ករណី នារយៈពេល២៤ម៉ោងចុងក្រោយនេះ បានកើតក្នុងរាជធានីនិងខេត្តចំនួន៧។ កាលពី ថ្ងៃច័ន្ទការឆ្លងចូលក្នុងសហគមន៍មាន៥៧៩ករណី ក្នុងនោះរាជធានីភ្នំពេញតែមួយមានការឆ្លង៣៣៧ករណី ប៉ុន្តែ នៅថ្ងៃនេះការឆ្លងចូលក្នុងរាជធានី មានចំនួន២៤៨ករណី។

មនុស្សចំនួន៣នាក់ បានស្លាប់ដោយសារជំងឺកួវីដ១៩ នាវេលា២៤ម៉ោងចុងក្រោយនេះ ដែលនាំឲ្យការស្លាប់ សរុបដោយសារវីរុសនេះ បានកើនឡើងដល់ចំនួន៨២នាក់ហើយគិតត្រឹមថ្ងៃទី២៧មេសានេះ។ យោងតាមសេចក្តីប្រកាសព័ត៌មានរបស់ក្រសួងសុខាភិបាល មនុស្សស្លាប់ទាំង៣រួមមានស្រ្តីជាតិខ្មែរអាយុ ៣៩ ឆ្នាំរស់នៅខណ្ឌពោធិ៍សែនជ័យដែលបានបាត់បង់ជីវិតមុនពេលមកដល់មន្ទីរពេទ្យហ្លូងម៉ែ, ស្រ្តីជាតិខ្មែរអាយុ ៥២ ឆ្នាំ រស់នៅស្រុកគីរីវង្ស ខេត្តតាកែវ ដែលបានស្លាប់មុនពេលចូលមកដល់មន្ទីរពេទ្យមិត្តភាពខ្មែរសូវៀត, និងបុរស ជាតិខ្មែរអាយុ៧៧ឆ្នាំរស់នៅខេត្តព្រះសីហនុ បានស្លាប់នៅក្នុងខេត្តព្រះសីហនុ។ មនុស្សទាំង៣ ត្រូវក្រុមគ្រូពេទ្យ បញ្ជាក់ថាបានស្លាប់ដោយសារការរលាកសួតទាំងសងខាង។

បេសកកម្ម៥១ថ្ងៃ របស់ក្រុមការងារលោក ហ៊ុន ម៉ាណែត បានជួយរៀបចំរួចរាល់នូវមន្ទីរពេទ្យនិងមណ្ឌលព្យាបាលកូវីដ-១៩ ចំនួន៥ ដែលអាចដាក់អ្នកជំងឺបាន៤ពាន់៣០០គ្រែ។ លោក ហ៊ុន ម៉ាណែត ដែលជាអនុគណៈកម្មការគ្រប់គ្រងសន្តិសុខនៅតាមតំបន់ចត្តាឡីស័ក បានសរសេរក្នុងទំព័រហ្វេសប៊ុកនៅថ្ងៃទី២៧មេសា ថា ក្នុងរយៈ ពេល៥១ថ្ងៃ ក្រុមការងាររបស់លោកបានរួមគ្នារៀបចំមន្ទីរពេទ្យ និងមណ្ឌលសម្រាប់ព្យាបាលជំងឺកូវីត១៩ កម្រិតស្រាលចំនួន ៥ រួមមានមណ្ឌលព្យាបាល The Great Duke, មន្ទីរពេទ្យហ្លួងម៉ែ, មណ្ឌលព្យាបាលកូវីដ-១៩កោះ ពេជ្រ ទី១និងទី២, និងមណ្ឌលព្យាបាលកូវីដ-១៩ ទួលពង្រ ដែលអាចរៀបគ្រែសរុបប្រមាណ ៤ពាន់៣០០គ្រែ ដើម្បីព្យាបាលប្រជាពលរដ្ឋដែលឆ្លងជំងឺកូវីដ-១៩។

កម្លាំងកងទ័ពជើងគោក ចំនួន ២០៦នាក់ បានដាក់ពង្រាយជាមួយនឹងរថយន្តយោធាចំនួន៦២ គ្រឿង ដើម្បីជួយដឹកជញ្ជួនស្បៀងដល់ប្រជាពលរដ្ឋដែលស្ថិតក្នុងតំបន់បិទខ្ទប់ ដើម្បីការកាត់ផ្តាច់ការឆ្លងកូវីដ១៩។ សេចក្តីរាយការណ៍បាន បង្ហាញថាក្នុងរាជធានីភ្នំពេញ មានពលរដ្ឋស្ថិតក្នុងតំបន់បិទខ្ទប់ចំនួន២ម៉ឺន២ពាន់គ្រួសារ។

ព្រះមហាក្សត្រ និងសម្តេចម៉ែ បានប្រោសព្រះរាជទានព្រះរាជអំណោយជូនដល់រដ្ឋបាលខេត្តកណ្ដាល សម្រាប់ចែកជូនប្រជាពលរដ្ឋជួបការលំបាកនៅតំបន់ដែលបិទខ្ទប់ខ្លាំង។ ព្រះរាជអំណោយ រួមមាន អង្ករ៦៥តោន ទឹក សុទ្ធចំនួន៦៥០កេស, មីចំនួន២ពាន់៣០០កេសតូច, ម៉ាស់ ចំនួន ១ម៉ឺន២ពាន់បន្ទះ និងត្រីខ ចំនួន ២ពាន់៣០០ យួរ ត្រូវបានប្រគល់ជួនរដ្ឋបាលខេត្តកណ្តាលកាលពីថ្ងៃទី២៦មេសា តាមរយៈសម្ដេចចៅហ្វាវាំង គង់ សំអុល។ ប្រធានក្រុមប្រឹក្សាខេត្ត លោក ម៉ៅ ភិរុណ និង អភិបាលខេត្តកណ្ដាល លោក គង់ សោភ័ណ្ឌ បានថ្លែងអំណរព្រះរាជគុណយ៉ាងជ្រាលជ្រៅចំពោះព្រះរាជហឫទ័យ ប្រោសព្រះរាជទានព្រះរាជអំណោយដល់រដ្ឋបាលខេត្ត ដើម្បី ជួយដល់ប្រជាពលរដ្ឋក្នុងក្រុងតាខ្មៅ ដែលកំពុងជួបការលំបាក ។

ក្រុងប៉ោយប៉ែត ខេត្តបន្ទាយមានជ័យ នឹងត្រូវបិទការធ្វើដំណើរចរាចរណ៍ពេលយប់រយៈពេល២សប្តាហ៍ ក្រោយការរកឃើញការឆ្លងចូលក្នុងសហគមន៍។ ខេត្តបន្ទាយមានជ័យនៅថ្ងៃនេះ មានសេចក្តីរាយការណ៍ការឆ្លងចំនួន ៩១ករណី ដែលជម្រុញឲ្យអភិបាលខេត្តលោក អ៊ុំ រាត្រី ត្រូវប្រញាប់ចាត់វិធានការទប់ទល់។

រមណីយដ្ឋានអង្គរ ត្រូវបានបើកឲ្យចូលទស្សនាឡើងវិញហើយ ក្រោយសេចក្តីសម្រេចរបស់រាជរដ្ឋាភិបាលថ្ងៃ ទី២៥មេសា បញ្ចប់ការហាមឃាត់ការធ្វើដំណើរ និងការ បញ្ចប់ការបិទរមណីយដ្ឋានទេសចរណ៍នៅទូទាំងប្រទេស។ អាជ្ញាធរជាតិអប្សរា និងគ្រឹះស្ថានអង្គរ បានបិទការចូលទស្សនាប្រាសាទបុរាណនានាក្នុងតំបន់ប្រាសាទ អង្គរ ចាប់ពីថ្ងៃទី៧មេសា ឆ្នាំ២០២១ មក ដើម្បីការចូលរួមទប់ស្កាត់ការឆ្លងរាលដាលនៃជំងឺកូវីដ-១៩។