ខេត្តតាកែវ ទើបនឹងរៀបចំកន្លែងឈាបនដ្ឋាន សម្រាប់បូជាអ្នកស្លាប់ដោយសារកូវីដ១៩ ក្រោយលិខិតរបស់ទីស្តីការគណរដ្ខមន្ត្រី បានបញ្ជាក់ការយល់ព្រមលើសំណើសុំដី២ហិកតា ស្ថិតក្នុងស្រុកទ្រាំង។ យោងតាមលិខិតទីស្តីការ ទៅកាន់អភិបាលខេត្តតាកែវ និងរដ្ឋមន្ត្រីក្រសួងកសិកម្ម ដីទំហំ២ហិកតា ស្ថិតក្នុងស្ថានីយផ្សព្វផ្សាយ និងស្តារ ព្រៃឈើត្រពាំងធំ ក្នុងភូមិតាសែន, ឃុំខ្វាវ នៃស្រុកទ្រាំង ត្រូវបានយល់ព្រមប្រគល់ជួនរដ្ឋបាលខេត្ត ដើម្បីសាងសង់ជាឈាបនដ្ឋានបូជាសពអ្នកកើតជំងឺកូវីដ-១៩។

អភិបាលខេត្តកណ្ដាល បានជំរុញឱ្យអាជ្ញាធរក្រុងតាខ្មៅ ត្រូវបន្តផ្សព្វផ្សាយជូនពលរដ្ឋ ពីវិធានការសុខាភិបាល ដើម្បីការពារជំងឺកូវីដ-១៩ បន្ថែមទៀតគ្រាដែលតួលេខនៃការឆ្លងក្នុងខេត្តកណ្តាលបានថយចុះជាច្រើន។ ក្នុងរយៈពេល២៤ម៉ោងចុងក្រោយនេះ ខេត្តកណ្តាលមានការឆ្លងតែ ៥ករណីទេ ដែលថយចុះ១៦ករណីបើប្រៀបធៀប នឹងម្សិលមិញ។

ប្រជាពលរដ្ឋ ដែលធ្លាប់ទៅចាក់វ៉ាក់សាំង នៅមន្ទីរពេទ្យជប៉ុន នៅថ្ងៃ១៧មេសា ត្រូវធ្វើចត្ដាឡីស័ក។ មន្ទីរពេទ្យស្រឡាញ់ទារក ឬពេទ្យជប៉ុន ជាមន្ទីរពេទ្យដែលមានទីតាំងនាខាងជើងវត្តភ្នំ មានអាស័យដ្ឋាន៣១អា, វិថីប្រទេសបារាំង រាជធានីភ្នំពេញ។ អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ នៅថ្ងៃសុក្រនេះ បានជូនដំណឹងថា មានអ្នកជំងឺកូវីដ-១៩ បានទៅចាក់វ៉ាក់សាំងនៅមន្ទីរពេទ្យស្រឡាញ់ទារក ឬពេទ្យជប៉ុននោះកាលពីថ្ងៃទី១៧មេសាឆ្នាំ២០២១។

ខេត្តកំពង់ស្ពឺ បានបិទបណ្តោះអាសន្នផ្សារចំនួន ២ ក្នុងស្រុកភ្នំស្រួច បន្ទាប់ពីររកឃើញមនុស្សពីរនាក់ មានវិជ្ជមានកូវីដ១៩ ។ យោងតាមក្រសួងសុខាភិបាល ការឆ្លង២៤ម៉ោងចុងក្រោយនេះ ក្នុងខេត្តកំពង់ស្ពឺមានមួយករណី ដែលនាំឲ្យការឆ្លងចូលក្នុងខេត្តកំពង់ស្ពឺបានកើន៨ករណី។

មនុស្ស៣៨នាក់ ត្រូវឃាត់ខ្លួនក្នុងហេតុការណ៍២ផ្សេងគ្នា ក្នុងពេលដែលកម្ពុជាកំពុងអនុវត្តបំរាម ហាមធ្វើដំណើរ ឆ្លងកាត់ខេត្តនិងរាជធានីដើម្បីកាត់ផ្តាច់ការឆ្លងកូវីដ១៩។ មនុស្ស៣៨នាក់ ក្នុងនោះរួមជនបរទេស៣៤នាក់ ត្រូវបានបង្ក្រាបនៅក្នុងខេត្តកំពង់ស្ពឺ នៅថ្ងៃទី២០និង២៣មេសា។ ស្នងការនគរបាលខេត្ដកំពង់ស្ពឺ លោកឧត្ដមសេនីយ៍ទោ សម សាមួន បានថ្លែងនៅថ្ងៃនេះបញ្ជាក់ថា ក្នុងចំណោមជនបរទេស៣៤នាក់នោះ រួមមានជនជាតិឥណ្ឌូណេស៊ី ១៦នាក់ និងជនជាតិចិន ១៨នាក់។ ជនជាតិខ្មែរបួននាក់ទៀតដែលបានចាប់ខ្លួន គឺជាអ្នកបើកបរដឹកជញ្ជូន ។

ប្រជាពលរដ្ឋ ដែលធ្លាប់ទៅក្រុមហ៊ុនដឹកជញ្ជួន វីរៈប៊ុនថាំ ផ្សារចាស់ ត្រូវធ្វើតេស្តនិងចត្ដាឡីស័ក។ អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ នៅថ្ងៃទី២៣មេសាឆ្នាំ២០២១ បានជូនដំណឹងថា មានអ្នកជំងឺកូវីដ-១៩ ដែលជាបុគ្គលធ្វើការនៅក្រុមហ៊ុន វីរៈប៊ុនថាំ សាខាផ្សាររាត្រី (ផ្សារចាស់) ផ្នែកបញ្ញើឥវ៉ាន់ ចាប់ពីថ្ងៃទី១០ និងថ្ងៃទី ១៩ មេសា ឆ្នាំ២០២១។ ។

អាជ្ញាធរ សម្រេចបិទកន្លែងចំនួន៦ទីតាំង ក្នុងក្រុងក្រុងប៉ោយប៉ែត ខេត្តបន្ទាយមានជ័យ បន្ទាប់ពីរកឃើញវិជ្ជមានកូវីដ១៩ ឆ្លងទៅលើបុរសជនជាតិឥណ្ឌូនេស៊ីម្នាក់។ បុរសជាតិឥណ្ឌូណេស៊ី ដែលគេបានបញ្ជាក់ការ ឆ្លងកូវីដ១៩ កាលពីថ្ងៃទី២២មេសា គឺជាពលរដ្ឋដែលបានស្នាក់នៅក្នុងបុរីដួងច័ន្ទ ផ្ទះលេខ ១៣៤B ស្ថិតនៅក្នុង ភូមិសាមគ្គីមានជ័យ សង្កាត់ប៉ោយប៉ែត, ក្រុងប៉ោយប៉ែត នៃខេត្តបន្ទាយមានជ័យ។

ខេត្តកំពង់ចាម បានប្រកាសរកឃើញមនុស្សមានវិជ្ជមានកូវីដ ចំនួន៣នាក់ នៅថ្ងៃនេះ និងបានប្រកាសបិទភូមិចំនួន ៤ ដែលជាប់ពាក់ព័ន្ធ។ ភូមិទាំង៤នោះ គឺជាភូមិដែលស្ថិតក្នុងស្រុកចំនួន៣ គឺស្រុកស្រីសន្ធរ, ស្រុកបាធាយ និងស្រុកកងមាស។ យោងតាមរដ្ឋបាលខេត្ត ក្នុងស្រុកស្រីសន្ធរ ភូមិចំនួន២ត្រូវបិទ គឺភូមិកំផ្លាស់នៃឃុំបារាយ និងភូមិទ្រានៃឃុំស្វាយពោធិ៍, ស្រុកបាធាយ បានបិទភូមិចំនួន១ គឺភូមិសំបូរនៃឃុំសំបូរ, ចំណែកស្រុកកងមាស បានបិទភូមិថ្មីខ នៃឃុំរកាគយ។

យ៉ាងហោចកម្មករ, កម្មការីនី ២១នាក់ នៃរោងចក្រមួយកន្លែង ក្នុងស្រុកអង្គស្នួល ខេត្តកណ្តាល ត្រូវគេរកឃើញឆ្លងកូវីដ១៩ នៅថ្ងៃនេះថែមទៀត។ សេចក្តីរាយការណ៍ដកស្រង់មន្ទីរសុខាភិបាលខេត្តកណ្តាលបានបញ្ជាក់ថា កម្មករ និងកម្មការីនីទាំង ២១នាក់នោះ បំរើការនៅរោងចក្រ Master and Friend បន្ទាប់ពីការធ្វើតេស្តលើកម្មករ ចំនួន ១២២នាក់រួចមក។ ការឆ្លងនោះ ត្រូវគេបន្ទោសលើមនុស្ស ២នាក់ ដែលជាមិត្តភក្តិរបស់មនុស្សទាំង២១នាក់នោះ មកពីរាជធានីភ្នំពេញ។ អាជ្ញាធរកំពុងស្វែងរកមនុស្សជាប់សង្ស័យដទៃទៀត ដែលបានប៉ះពាល់កម្មករនិង កម្មការីនីទាំង ២១នាក់នោះ។

រដ្ឋបាលខេត្តព្រះសីហនុ បានប្រញាប់បង្ហាញអត្តសញ្ញាណអ្នកកើតជំងឺកូវីដចំនួន ៨៥នាក់ ដែលទើបរកឃើញឆ្លងថ្មីនៅថ្ងៃទី២៣មេសានេះ។ យោងតាមរដ្ឋបាលខេត្តថ្ងៃទី២៣ ខែមេសា ឆ្នាំ២០២១នេះ មនុស្សដែលឆ្លងថ្មី ទាំងនោះ រួមមានពលរដ្ឋជាអាជីវករផ្សារលើ និងក្រុមគ្រួសារផងដែរ។