ចំនួនមនុស្សដែលបានទទួលការចាក់វ៉ាក់សាំងទូទាំងប្រទេសក្នុង ដូសលើកទី១ គិតត្រឹម២៤ម៉ោងចុងក្រោយនេះ មានចំនួនជាង១លាន២២ម៉ឺននាក់ហើយ។ យោងតាមក្រសួងសុខាភិបាល ចំនួនមនុស្សដែលទទួលបានការចាក់ វ៉ាក់សាំងដូសលើកទី២ មានចំនួនជាង២៨ម៉ឺន៥ពាន់នាក់ ។ កម្ពុជាបានចាប់ផ្តើមទទួលការចាក់វ៉ាក់សាំងដំបូង គឺនៅថ្ងៃទី១០កុម្ភៈឆ្នាំ ២០២១ដែល ការចាក់នៅថ្ងៃដំបូងនោះ រួមមានទាំងពលរដ្ឋស៊ីវិលនិងកងកម្លាំង ប្រដាប់អា វុធ។ វ៉ាក់សាំងដែលកម្ពុជាបានទទួលរហូតមកទល់នឹងពេលនេះ មានចំនួនបីប្រភេទ គឺវ៉ាក់សាំងស៊ីណូ ហ្វាម, វ៉ាក់សាំងស៊ីណូវ៉ាក់ និងវ៉ាក់សាំង AstraZeneca។

ក្រសួងព័ត៌មាន បានជូនដំណឹងថាអ្នកមកចាក់វ៉ាក់សាំងកូវីដ១៩នៅបរិវេណមណ្ឌលក្រសួង កាលពីថ្ងៃទី១៣ មេសាទាំងអស់ ត្រូវធ្វើចត្តាឡីស័ករយៈពេល១៤ថ្ងៃ។ ការជូនដំណឹងនេះ បានធ្វើឡើងក្រោយអ្នកសារព័ត៌មាន ម្នាក់ដែលបានមកទទួលការចាក់វ៉ាក់សាំងនៅថ្ងៃទី១៣មេសានោះ ត្រូវគេរកឃើញមានវិជ្ជមានកូវីដ១៩។ អ្នកសារព័ត៌មានឆ្លងកូវីដ១៩ឈ្មោះ ជិន បញ្ញា ដែលជាអ្នកធ្វើការនៅអង្គភាពទូរទស្សន៍ស៊ីធីអិន បានមកចាក់ វ៉ាក់សាំងនៅក្រសួងព័ត៌មានកាលពីថ្ងៃទី១៣មេសា។

ខេត្តកណ្តាល បានសម្រេចការបិទខ្ទប់ក្រុងតាខ្មៅទាំងមូល ក្នុងស្ថានការណ៍ដែលរាជធានីភ្នំពេញ បាននិងកំពុងអនុវត្តដូចគ្នាមកនេះ។ អភិបាលខេត្តលោកគង់សោភ័ណ្ឌ បានថ្លែងថាក្នុងរយៈពេលបិទ១៤ថ្ងៃនេះចាប់ផ្តើមពីថ្ងៃ នេះទៅ ពលរដ្ឋនឹងមិនឲ្យចាកចេញពីផ្ទះមួយទៅផ្ទះមួយ និងពីភូមិមួយទៅភូមិមួយឡើយដើម្បីការទប់ស្កាត់ការ ឆ្លងកូវីដ១៩។

ផ្សារកសិផលធម្មជាតិ ឡេង ណាវ៉ាត្ រាប្រកាសការលក់អង្ករក្រោមថ្លៃដើម ដើម្បីជួយប្រជាពលរដ្ឋក្នុងអំឡុងពេល រាតត្បាតនៃជំងឺកូវីដ-១៩។ ហ្វេសប៊ុករបស់លោកឧកញ៉ា ឡេង ណាវ៉ាត្រា នៅថ្ងៃ១៥មេសាបានបញ្ជាក់ថា ក្រុមហ៊ុនមួយចំនួន ដូចជា City Rice Import Export Co., Ltd. ជាដើម បានសម្រេចផ្គត់ផ្គង់អង្ករម្លិះបាយទន់លេខ២ មកផ្សារកសិផលធម្មជាតិឡេងណាវ៉ាត្រាតម្លៃ ៤២០ដុល្លារអាមេរិកក្នុងមួយតោន ហើយ ផ្សារកសិផលឡេង ណាវ៉ាត្រា នឹងលក់ចេញវិញក្នុងតម្លៃ៣៨០ដុល្លារក្នុងមួយតោន ពោលគឺលក់ខាត៤០ដុល្លារក្នុងមួយតោន ដើម្បីជួយសម្រួលដល់ជនរួមជាតិក្នុងគ្រាដ៏លំបាកនេះ។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន ៤១៧ករណី និងការស្លាប់ថ្មីមានចំនួន២៨០នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុបចំនួន២៦២ករណី ដែលសុទ្ធតែជាការឆ្លងចូលក្នុងសហគមន៍ទាំងអស់។ ចំណែកការស្លាប់ថ្មីនៅថ្ងៃនេះមានចំនួន២នាក់ដែលនាំឲ្យ ការស្លាប់សរុបមានចំនួន៣៨នាក់។

រាជធានីភ្នំពេញ នៅតែមានករណីឆ្លងច្រើនជាងគេដដែលក្នុងរយៈពេល២៤ម៉ោងដែលមានការ ឆ្លងក្នុងរាជធានីនិងខេត្តចំនួន១២។ ក្នុងចំណោមការឆ្លងក្នុងសហគមន៍ថ្ងៃនេះសារុប២៦២ករណីនោះ, រាជធានីភ្នំពេញ មានការឆ្លង២៣២ករណី, ខេត្ត ព្រះសីហនុមានចំនួន១២ករណី, ខេត្តកណ្ដាលមានចំនួន៤ករណី, ខេត្តព្រៃវែង មាន២ករណី, ខេត្តពោធិ៍សាត់មាន២ករណី, ខេត្តសៀមរាបមាន២ករណី, ខេត្តតាកែវមាន២ករណី, ខេត្តកំពង់ ចាមមាន២ករណី, ខេត្តត្បូងឃ្មុំមាន១ករណី, ខេត្តកំពង់ស្ពឺមាន១ករណី, ខេត្តកំពង់ធំមាន១ករណី, និងខេត្ត ស្វាយរៀងមាន១ករណី។ ការក្នុងឆ្លងសហគមន៍រយៈពេល២៤ម៉ោងចុងក្រោយនេះ មានការឆ្លងលើជនជាតិខ្មែរ ចំនួន២៥៣នាក់, លើជនជាតិចិន៧នាក់, លើជនជាតិវៀតណាមម្នាក់, និងលើជនជាតិអាមេរិកម្នាក់។

មនុស្ស២នាក់បានស្លាប់ដោយសារកូវីដ១៩ក្នុងរយៈពេល២៤ម៉ោងចុងក្រោយនេះ ដែលក្នុងនោះអ្នកបាត់បង់ ជីវិតម្នាក់គឺជារដ្ឋលេខាធិការក្រសួងព័ត៌មានលោក ម៉ៅអាយុទ្ធ។ លោករដ្ឋលេខាធិការម៉ៅអាយុទ្ធអាយុ៧៧ឆ្នាំ គឺជាអតីតព្រឹទ្ធាចារ្យផ្នែកសិល្បៈ មួយរូប ដែលមានឈ្មោះល្បីល្បាញក្នុងស្រទាប់វិស័យសិល្បៈ។ លោកម៉ៅ អាយុទ្ធ គឺជាអតីតអ្នកនិពន្ធខ្សែភាពយន្តខ្មែរដ៏ល្បីល្បាញ ដែលការបាត់បង់ជីវិតរបស់លោក បាននាំឲ្យមានការសោក ស្តាយនូវការបាត់បង់ធនធានមនុស្សដ៏សំខាន់មួយក្នុងស្នាដៃសិល្បៈខ្មែរនៃវិស័យថតខ្សែភាពយន្ត។

វ៉ាក់សាំងចិន Sinovac ចំនួន៥០ម៉ឺនដូសដែលកម្ពុជាបានបញ្ជាទិញ នឹងមកដល់នៅថ្ងៃស្អែកនេះហើយ។ វ៉ាក់សាំងចំនួន ៥០ម៉ឺនដូស ដែលនឹងដឹកមកដល់ព្រលានយន្តហោះអន្តរជាតិភ្នំពេញនៅថ្ងៃទី១៧មេសាស្អែកនេះ គឺជាផ្នែកមួយនៃវ៉ាក់សាំងបញ្ជាទិញបន្ថែមចំនួន៤លានដូសក្នុងគម្រោងរបស់កម្ពុជា ដើម្បីចាក់លើពលរដ្ឋរបស់ខ្លួន យ៉ាងហោចចំនួន១០លាននាក់

ការបិទខ្ទប់រយៈពេល២៤ម៉ោងចុងក្រោយនេះ បាននាំឲ្យចំនួនមនុស្សឆ្លងបានធ្លាក់ចុះ១១ករណីនៅក្នុងរាជធានីភ្នំពេញ។ អភិបាលរាជធានីភ្នំពេញលោក ឃួង ស្រេង បានថ្លែង រំពឹងថាការបិទខ្ទប់រាជធានីភ្នំពេញនិងក្រុងតាខ្មៅ រយៈពេល១៤ដែលបាននិងកំពុងប្រព្រឹត្តទៅនេះ នឹងមានការធ្លាក់ចុះនូវចំនួនអ្នកឆ្លងកូវីដ១៩ ប៉ុន្តែលោកបាន ព្រមានវិញថាការបិទខ្ទប់នឹងធ្វើបន្តថែមទៀតបើសិនជាចំនួន មនុស្សឆ្លង មិនបានធ្លាក់ចុះនោះទេ។ ប្រសាសន៍ របស់អភិបាលរាជធានីភ្នំពេញ បានធ្វើកាលពីយប់ថ្ងៃទី ១៥មេសា ដែលជាថ្ងៃដំបូងនៃការអនុវត្តសេចក្តីសម្រេច។

សម្ដេចតេជោ ហ៊ុន សែន បានបញ្ជាក់ជុំវិញការនឹងធ្វើដំណើរទស្សនកិច្ចចេញទៅក្រៅប្រទេសជាលើកដំបូងក្នុង ឆ្នាំ២០២១ បើទោះបីជាមានការគំរាមដោយជម្ងឺរាតត្បាតកូវីដ១៩ក្នុងពិភពលោក។ សម្តេចនាយករដ្ឋមន្ត្រីនៅថ្ងៃទី ១៦មេសានេះ បានសរសេរបញ្ជាក់ក្នុងបណ្តាញសង្គមហ្វេសប៊ុកថា សម្តេចនឹងអញ្ជើញទៅកាន់ប្រទេសឥណ្ឌូនេស៊ី នៅថ្ងៃទី២៤មេសា សប្តាហ៍ក្រោយ ដើម្បីចូលរួមប្រជុំក្នុងក្រុងហ្សាកាតានៃប្រទេសឥណ្ឌូណេស៊ី។