គ្រោះធម្មជាតិខ្យល់កន្រ្តាក់ និងរន្ទះបាញ់ បានបណ្តាលអោយស្ត្រីម្នាក់បានស្លាប់ និងផ្ទះ៤ខ្នងរងការខូចខាតនៅខេត្តចំនួន២។ សេចក្តីរាយការណ៍បានបញ្ជាក់អោយដឹងថាខេត្តទាំង២នោះ គឺខេត្តខេត្តឧត្តរមានជ័យ និងខេត្តបាត់ដំបង។

ឃ្លាំងស្តុកសម្ភារៈទូរស័ព្ទ និងឆ័ត្រ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ បានរងការឆេះវេលា ព្រឹកថ្ងៃទី១៥មេសានេះ ប៉ុន្តែមិនមានមនុស្សរងគ្រោះថ្នាក់នោះឡើយ។ នាយការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក ព្រហ្ម យ៉ន បានបញ្ជាក់ថា ហេតុការណ៍ ឆេះឃ្លាំង នៅចំណុចផ្ទះលេខ១៩E0, ផ្លូវលេខ១៩៦, ភូមិ៨ នៃសង្កាត់វាលវង់ គឺដោយសារការឆ្លងចរន្តអគ្គិសនី។ នេះគឺជា ការឆេះលើកដំបូងហើយក្នុងឳកាសបុណ្យឆ្នាំក្នុងរាជធានីភ្នំពេញ។ មិនមានសេចក្តីរាយការណ៍បញ្ជាក់ អំពីទំហំខូចខាតនោះឡើយ។

ខេត្តមួយចំនួន បានប្រកាសផ្អាកការលក់គ្រឿងស្រវឹង និងការជួបជុំគ្នារយៈពេល១៤ថ្ងៃ។ ខេត្តដែលប្រកាសនៅថ្ងៃទី១៥មេសា បញ្ជាការផ្អាកលក់គ្រឿងស្រវឹងនោះ រួមមានខេត្តព្រៃវែង, ត្បូងឃ្មុំ, ខេត្តកំពង់ធំ និងខេត្តព្រះសីហនុ ដែលមានការចូលក្នុងព្រឹត្តិការណ៍សហគមន៍។ រដ្ឋបាលខេត្តទាំង៤ នៅបានណែនាំប្រជាពលរដ្ឋ ត្រូវស្ថិតនៅតាមផ្ទះរៀងៗខ្លួន ថែមទៀត។ រដ្ឋបាលខេត្ត បានបញ្ជាក់បន្ថែមថាចំពោះការជួបជុំប្រមូលផ្ដុំគ្នាច្រើន ពីផ្ទះមួយទៅផ្ទះមួយ, ការពិសារគ្រឿងស្រវឹង និងការចាក់បាស់រាំកម្សាន្តតាមផ្ទះត្រូវហាមជាដាច់ខាត។

ខេត្តស្ទឹងត្រែង បានដាក់បម្រាមគោចរផ្អាកសកម្មភាពធ្វើដំណើរនៅពេលយប់ ដើម្បីការទប់ស្កាត់ការឆ្លងកូវីដ១៩ ក្នុងសហគមន៍។ ខេត្តស្ទឹងត្រែង គឺជាខេត្តមួយក្នុងចំណោមខេត្ត៤ ដែលមិនទាន់មានការឆ្លងរាលដាលកូវីដ ១៩ចូលក្នុងសហគមន៍។

អ្នកធ្លាប់ទៅទទួលសេវា និងអ្នកពាក់ព័ន្ធជាមួយបុគ្គលិក ធនាគារ Mega International Commercial Bank នៃសាខាអូឡំពិក ត្រូវប្រញាប់ទៅធ្វើតេស្ដ។ ធនាគារ Mega International Commercial Bank គឺជាធនាគារ ដែលមានទីតាំងស្ថិតនៅផ្ទះលេខ៣៨បេ, ផ្លូវ២១៧ ព្រះ មុន្នីរ៉េត។

ក្រសួងសុខាភិបាល បានណែនាំនូវរបៀបតាមដានរោគសញ្ញាអ្នកសង្ស័យឆ្លង និងមិនឆ្លងកូវីដ១៩ ក្នុងស្ថានភាព ដែលរាជធានីភ្នំពេញ មានចំនួនមនុស្សឆ្លងកាន់តែច្រើន។ រាជធានីភ្នំពេញនៅថ្ងៃនេះ មានការឆ្លងចូលក្នុងសហ ២៤៣ករណី ដែលជាករណីឆ្លងខ្ពស់ គួរឲ្យព្រួយបារម្ភ។ តើរបៀបតាមដានរោគសញ្ញាអ្នកឆ្លងនិងអ្នកមិនទាន់ឆ្លង កូវីដ១៩នោះ មានអ្វីខ្លះ?

ខេត្តក្រចេះ បានបញ្ចេញអត្តសញ្ញាណអ្នកឆ្លងកូវីដ១៩ថ្មី នៅថ្ងៃនេះ ដើម្បីការស្វែងរកមនុស្សសង្ស័យជាប់ពាក់ព័ន្ធ។ ខេត្តក្រចេះ ក្នុងរយៈពេល២៤ម៉ោងកន្លងមកនេះ បានរកឃើញមនុស្ស២នាក់ឆ្លងកូវីដ១៩។ រដ្ឋបាលខេត្ត បានបញ្ចេញអត្តសញ្ញាណមនុស្សឆ្លងទាំង២ រួមមានឈ្មោះ យាម ដានី ភេទស្រី អាយុ២៩ឆ្នាំ និងឈ្មោះ ស៊ីម សារុំ ភេទស្រី អាយុ៣៤ ឆ្នាំ ដែលអ្នកទាំង២ មានទីលំនៅភូមិវាលបីចក្រីហេង, ឃុំគ្រញូងសែនជ័យ នៃស្រុកស្នួល។ រដ្ឋបាលខេត្តក្រចេះ បានអំពាវនាវដល់ប្រជាពលរដ្ឋជាប់ពាក់ព័ន្ធដោយផ្ទាល់ជាមួយអ្នកជំងឺ សូមរួសរាន់មក ជួបក្រុមគ្រូពេទ្យ ដើម្បីយកសំណាកទៅពិនិត្យ និងធ្វើចត្តាឡីស័កអោយបានត្រឹមត្រូវ។

អ្នកដែលធ្លាប់ទៅទទួលសេវា និងអ្នកពាក់ព័ន្ធជាមួយបុគ្គលិក ក្រុមហ៊ុនទូរស័ព្ទ OPPO ក្នុងទីតាំងមួយលើផ្លូវព្រះ មុនីវង្ស ត្រូវប្រញាប់ទៅធ្វើតេស្ដ។ ក្រុមហ៊ុនទូរស័ព្ទ OPPO លើផ្លូវមុនីវង្សនោះ ស្ថិតនៅផ្ទះលេខ ៣៣៥ ផ្លូវមុនីវង្ស សង្កាត់អូរឫស្សី ៤, ខណ្ឌ៧មករា រាជធានីភ្នំពេញ។

ផ្សាររស្មីមានជ័យ នៅសង្កាត់ស្ទឹងមានជ័យ ត្រូវបានដាក់ក្នុងកម្រិតហានិភ័យ ដោយសារមានអ្នកជំងឺកូវីដ-១៩ បានចេញចូលទៅក្នុងផ្សារនោះ។ អនុគណៈកម្មការស្រាវជ្រាវជំងឺកូវីដ-១៩ បានឲ្យដឹងថា អ្នកជំងឺកូវីដ-១៩ បានទៅដើរផ្សារនៅទីតាំងផ្សាររស្មីមានជ័យ ដែលមានទីតាំងស្ថិតនៅផ្លូវលំ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ចាប់តាំងពីថ្ងៃទី៦មេសាឆ្នាំ២០២១មក។

អ្នកដែលធ្លាប់ទៅទទួលសេវា និងអ្នកពាក់ព័ន្ធក្នុងធនាគារចិន សាខាអូឡាំពិក ត្រូវប្រញាប់ទៅធ្វើតេស្ដ។ អនុគណៈកម្មការស្រាវជ្រាវជំងឺកូវីដ-១៩ បានថ្លែងថាថា នៅធនាគារចិនសាខាអូឡាំពិកនោះ គឺមានអតិថិជន ឆ្លងកូវីដ១៩ បានធ្វើដំណើរចេញចូលនៅថ្ងៃទី៨ និងទី៩មេសាឆ្នាំ២០២១ ដែលគេបារម្ភជុំវិញករណីឆ្លង នៅទីនោះ។ ធនាគារ ចិន សាខាអូឡាំពិក គឺជាធនាគារមានទីតាំងស្ថិតនៅ ផ្លូវលេខ ២៧៤ សង្កាត់វាលវង់ ខណ្ឌ ៧មករា នៅថ្ងៃទី៨ និងទី៩មេសាឆ្នាំ២០២១។