ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន៦ពាន់៧៧៣ ករណី និងការស្លាប់ថ្មីមានចំនួន២៧០នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសារុប ចំនួន១៨១ករណី ក្នុងនោះការឆ្លងចូលក្នុងសហគមន៍មានចំនួន១៧៨ករណី, ការឆ្លងលើអ្នកដំណើរមកពីក្រៅ ប្រទេសចំនួន២ករ ណី, និងឆ្លងលើពលករមកពីប្រទេសថៃចំនួន១ករណី។ កម្ពុជានៅក្នុងរយ:ពេល២៤ម៉ោង ចុងក្រោយនេះ មានការ ស្លាប់ថ្មីចំនួន៣នាក់ដែលនាំឲ្យការស្លាប់សារុបមានចំនួន៣៣នាក់ហើយ។

រដ្ឋបាលខេត្តកណ្ដាល បានប្រកាសដាក់ចេញវិធានការរដ្ឋបាលជាបណ្ដោះអាសន្ន រយៈពេលមួយសប្តាហ៍ចាប់ពី ថ្ងៃទី១២មេសាដល់ថ្ងៃទី១៨មេសាឆ្នាំ២០២១ ដើម្បីការទប់ស្កាត់ការឆ្លងរាលដាលជំងឺកូវីដ-១៩។ វិធានការនោះ តម្រូវឲ្យផ្អាកជាបណ្ដោះអាសន្នការលក់គ្រឿងស្រវឹងគ្រប់ប្រភេទនៅគ្រប់ផ្សាររដ្ឋ, ផ្សារទំនើប, ផ្សារម៉ាតនិងកន្លែង នានាតាមតូបនិងស្តង់លក់គ្រប់កន្លែង

ខេត្តព្រៃវែងដែលមានការឆ្លង៦ករណីនៅថ្ងៃនេះ ត្រូវបានគេបន្ទោសថា គឺដោយសារតែមានជនល្មើសបម្រាមចំ នួន៦នាក់ ដែលបានធ្វើដំណើរមកពីរាជធានីភ្នំពេញនិងមកពីខេត្តព្រះសីហនុ។ រាជធានីភ្នំពេញនិងខេត្តព្រះសីហនុ គឺជាតំបន់ដែលមានការផ្ទុះឆ្លងខ្លាំងក្នុងព្រឹត្តិការណ៍សហគមន៍។

កម្ពុជា បានចាប់ផ្តើមចាក់វ៉ាក់សាំងកូវីដ-១៩ ជូនបុគ្គលិកអង្គការមិនមែនរដ្ឋាភិបាល ទាំងជនបរទេស និង ជនជាតិខ្មែរផងដែរចាប់ផ្តើមពីថ្ងៃអង្គារនេះទៅ។ យោងតាមសេចក្ដីជូនដំណឹងរបស់ក្រសួងការបរទេសរាជរដ្ឋាភិបាលកម្ពុជា ចាប់ផ្តើមរៀបចំចាក់វ៉ាក់សាំងកូវីដ-១៩ ជូនបុគ្គលិកបរទេស ព្រមទាំងគ្រួសារ និងបុគ្គលិកខ្មែររបស់ អង្គការមិនមែនរដ្ឋាភិបាលបរទេស ចាប់ពីថ្ងៃទី១៣ ដល់ថ្ងៃទី១៨ ខែមេសា ឆ្នាំ២០២១

អាគារមួយចំនួននៅមជ្ឈមណ្ឌលកោះពេជ្រ ត្រូវបានរៀបចំជាកន្លែងសម្រាប់ព្យាបាលអ្នកជម្ងឺកូវីដ១៩ ក្រោមការរៀបចំយ៉ាងសកម្ម និងយកចិត្តទុកដាក់រយៈពេល៨០ម៉ោង។ មជ្ឈមណ្ឌលថ្មីសម្រាប់ព្យាបាលកូវីដ១៩នេះ បានដាក់គ្រែចំនួន១ពាន់៨០០គ្រែ។

ចំនួនមនុស្សដែលបានទទួលការចាក់វ៉ាក់សាំងក្នុងរយៈពេល២៤ម៉ោងចុងក្រោយនេះ ក្នុងដូសលើកទី១ មានចំនួន៨ម៉ឺន១ពាន់២០៦នាក់ ដែលនាំឲ្យចំនួនមនុស្សដែលទទួលបាន ការចាក់វ៉ាក់សាំងដូសលើកទី១ សរុបកើនជាង ១លាន៩ម៉ឺននាក់ហើយ

រាជធានីភ្នំពេញ បានបន្តពន្យារការអនុវត្តច្បាប់បំរាមគោចរ និងវិធានការរដ្ឋបាលបណ្តោះអាសន្នចំនួន២សប្តាហ៍ បន្តថែមទៀតក្រោយស្ថានភាពផ្ទុះក្នុងរាជធានី នៅតែមានសភាពខ្លាំងគួរឲ្យកត់សម្គាល់។ សេចក្តីសម្រេចបន្ត បំរាមគោចរនិងវិធានការរដ្ឋបាលរយៈពេល២សប្តាហ៍ទៅមុខទៀតនេះ បានធ្វើឡើងតាមរយៈសេចក្តីសម្រេចមួយ របស់រដ្ឋបាលរាជធានីថ្ងៃទី១៣មេសានេះ។

អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកដែលធ្លាប់ទៅធនាគារ ABA ក្បែរស្ថានីយរថភ្លើង ក្នុងរាជធានីត្រូវប្រញាប់ទៅធ្វើតេស្ដ។ ធនាគារ ABA ក្បែរស្ថានីយរថភ្លើង គឺជាទីតាំងដែលស្ថិតនៅ ផ្លូវអាស៊ាន សង្កាត់ស្រះចក នៃខណ្ឌដូនពេញ។

រាជធានីភ្នំពេញ នៅតែមានការឆ្លងខ្លាំងជាងគេក្នុងសហគមន៍ដដែលក្នុងរយៈពេល២៤ម៉ោងដែលមានការ ឆ្លងក្នុងរាជធានីនិងខេត្តចំនួន៩។ ក្នុងចំណោមការឆ្លងក្នុងសហគមន៍ថ្ងៃនេះសរុប១៧៨ករណី, រាជធានីភ្នំពេញ មានការឆ្លង១៤០ករណី, ចំណែកខេត្តស្វាយរៀងមាន ចំនួន១៤ករណី, ខេត្ត ព្រះសីហនុមានចំនួន៨ករណី, ខេត្តព្រៃវែងមានចំនួន ៦ករណី, ខេត្តសៀមរាបមានចំនួន ៤ករណី, ខេត្តកណ្ដាលមានចំនួន ៣ករណី, ខេត្តតាកែវ មានចំនួន១ករណី, ខេត្តក្រចេះមានចំនួន ១ករណី, និង ខេត្តព្រះវិហារ ចំនួន១ករណី។

រដ្ឋាភិបាលចិន បានប្រកាសផ្ដល់ជំនួយវ៉ាក់សាំងចំនួន៤០ម៉ឺនដូសបន្ថែមទៀត ដល់រាជរដ្ឋាភិបាលកម្ពុជា ក្នុងស្ថានភាពដែលព្រឹត្តិការណ៍សហគមន៍២០កុម្ភៈ នៅតែបន្តការឆ្លងច្រើនរយករណីក្នុងមួយថ្ងៃៗ។ ឯកអគ្គរដ្ឋទូតចិន លោកវ៉ាង វិនធាន បានមានប្រសាសន៍បញ្ជាក់មុននេះថា បើសិនជាការផ្ទុះជំងឺកូវីដ-១៩នៅកម្ពុជា នៅតែបន្ត គំរាមកំហែងមិនឈប់ឈរនោះ ភាគីចិននឹងនៅបន្តជួយការកម្ចាត់ជាមួយគ្នានូវមេរោគកាចសាហាវនោះជាមួយគ្នា ដោយចិនចាត់ទុកថាការលំបាករបស់កម្ពុជា គឺជាការលំបាករបស់ប្រទេសចិនជាមិត្តផងដែរ។