គណៈកម្មាធិការជាតិរៀបចំការបោះឆ្នោតបានឱ្យដឹងថាគេបានផ្សព្វផ្សាយនៅថ្ងៃនេះជុំវិញ ការបិទផ្សាយបញ្ជីបេក្ខជនជាផ្លូវការ, ការចាប់ឆ្នោតដើម្បីកំណត់លំដាប់លេខរៀងគណបក្ស នយោបាយលើសន្លឹកឆ្នោត និងការចែកបណ្ណព័ត៌មានអ្នកបោះឆ្នោតនៅតាមភូមិក្នុងឃុំសង្កាត់ ។

បុរសម្នាក់បានស្លាប់ ខណៈកំពុងបើកត្រាក់ទ័រព្យួរដីកិនមីនតោននៅក្នុងស្រុកអន្លង់វែង ខេត្ត ឧត្តរមានជ័យ។ ហេតុការណ៍បានកើតឡើង នៅថ្ងៃទី២២ ខែមេសា ឆ្នាំ២០២២។

សង្គ្រាមឈ្លានពានរុស្ស៊ីក្នុងប្រទេសអ៊ុយក្រែន បានឈានចូលថ្ងៃទី៥៧ហើយ ខណៈដែល រុស្ស៊ីបានប្រកាសជ័យជំនះលើក្រុងម៉ារីយូប៉ូល។ សេចក្តីរាយការណ៍ខ្លះសន្និដ្ឋានថា សង្គ្រាម នឹងអាចបញ្ចប់នាពេលខាងមុខនេះ នៅពេលដែលរុស្ស៊ីនឹងរៀបចំទិវាជ័យជំនះ៩ឧសភារបស់ ខ្លួនដែលតែងធ្វើជារៀងរាល់ឆ្នាំ និងក្នុងពេលនោះរុស្ស៊ីអាចនឹងប្រកាសការឈ្នះសង្គ្រាមនិង ការបញ្ចប់សង្គ្រាមឈ្លានពានរបស់ខ្លួន។

ប្រធានសភាតំណាងរាស្ត្រនៃប្រទេសកម្ពុជាបានជួបពិភាក្សាជាមួយប្រធានសភាជាន់ទាប ឥណ្ឌាក្នុងរាជធានីភ្នំពេញ ក្នុងឱកាសនៃដំណើរទស្សនកិច្ច លោក អំ បឺរឡា ដែលទើបធ្វើ ទស្សនកិច្ចលើកដំបូងក្នុងប្រទេសកម្ពុជា។

សម្តេចនាយករដ្ឋមន្ត្រីកម្ពុជា កំពុងស្ថិតនៅក្នុងប្រទេសជប៉ុន ដើម្បីចូលរួមកិច្ចប្រជុំកំពូល ស្តីពីបញ្ហាទឹកតំបន់អាស៊ី-ប៉ាស៊ីហ្វិកលើកទី៤ ។ កិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិកលើកទី៤ នឹងប្រារព្ធធ្វើនៅទីក្រុង Kumamoto ប្រទេសជប៉ុន រវាងពីថ្ងៃទី២៣ដល់២៤ មេសាដែលនឹងមានការអញ្ជើញចូលរួមពីថ្នាក់នាយករដ្ឋមន្ត្រី, ប្រមុខរដ្ឋនិងតំណាងអង្គការ អន្តរជាតិនានាម​កពីតំបន់អាស៊ីប៉ាស៊ីហ្វិក។

កម្ពុជានាំចេញត្បូងនិងលោហធាតុមានតម្លៃ៩១លានដុល្លារក្នុងត្រីមាសទី១ឆ្នាំ២០២២ ខណៈ ការនាំចេញឆ្នាំ២០២១ក្នុងរយៈពេលដូចគ្នានេះ មានតម្លៃត្រឹមជាង៦លានដុល្លារតែប៉ុណ្ណោះ។

កម្ពុជា គ្រោងនឹងដាក់ឱ្យប្រើប្រាស់ជាផ្លូវការនូវប្រព័ន្ធវាយតម្លៃហានិភ័យអ្នកដំណើរតាម ផ្លូវអាកាស។ យោងតាមក្រសួងសេដ្ឋកិច្ចនិងហិរញ្ញវត្ថុ ការប្រកាសដាក់អនុវត្តជាផ្លូវការនូវការ ប្រើប្រាស់ប្រព័ន្ធវាយតម្លៃហានិភ័យអ្នកដំណើរតាមផ្លូវអាកាសនេះ គ្រោងនឹងប្រពឹត្តទៅ នៅថ្ងៃ ទី២២ ខែមេសា ឆ្នាំ២០២២ ស្អែកនេះហើយ។

ប្រេងសាំង បានបន្តកើនឡើងតម្លៃ សម្រាប់ការលក់រយៈពេល១០ ថ្ងៃខាងមុខនេះ។ សម្តេច នាយករដ្ឋមន្ត្រីបានថ្លែងកាលពីថ្ងៃម្សិលមិញថាតម្លៃប្រេងសាំងដែលកើនឡើងនេះ មិនមែន តែចំពោះកម្ពុជាតែមួយនោះទេក្នុងពេលដែលពិភពលោកកំពុងមានសង្គ្រាមអ៊ុយក្រែនជាមួយ នឹងការដាក់ទណ្ឌកម្មលើរុស្ស៊ីដែលជាប្រទេសផលិតប្រេងធំជាងគេបង្អស់មួយលើពិភពលោក។

ស្នងការដ្ឋាននគរបាលរាជធានីភ្នំពេញ បានរៀបចំនូវផែនការដើម្បីការពារពង្រឹងសន្តិសុខ ថែរក្សា សណ្តាប់ ធ្នាប់ ខណៈដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ នឹងឈាន មកដល់នាពេលខាងមុខនេះ។ ការបោះឆ្នោតជ្រើសរើសក្រុមប្រឹក្សាឃុំនិងសង្កាត់ នឹងឈាន មកដល់ក្នុងរយៈពេលជាង៤០ថ្ងៃទៅមុខទៀតនេះ។

មន្ត្រីនគរបាល២នាក់ត្រូវបានជនល្មើសបាញ់សម្លាប់ ក្នុងក្នុងពេលចុះបង្ក្រាបគ្រឿងញៀន នៅក្នុងស្រុកអង្គស្នួល ខេត្តកណ្តាលនៅថ្ងៃទី២១មេសានេះ។ ជនល្មើសម្នាក់ត្រូវបាន គេបាញ់ រងរបួសធ្ងន់ និងម្នាក់ទៀតត្រូវបានចាប់ខ្លួន ក្នុងហេតុការណ៍ដែលកំពុងប្រយុទ្ធតទល់គ្នា នៅ ចំណុចភូមិចន្ទ្រាថ្មី, ឃុំទួលព្រេច នៃស្រុកអង្គស្នួល។