អូស្ត្រាលីគ្រោងនឹងផ្ដល់ហិរញ្ញប្បទាតម្លៃសរុបចំនួន ១០៧លានដុល្លារអាមេរិកដល់កម្ពុជារយៈពេល៨ឆ្នាំ ដែលផ្តោតលើវិស័យកសិកម្ម, ពាណិជ្ជកម្មនិងវិនិយោគ។

មេបញ្ជាការកងទ័ពជើងគោកកម្ពុជានិងចិន បានចុះហត្ថលេខារួមគ្នាលើកិច្ចសហប្រតិបត្តិការ រវាងកងទ័ពនៃប្រទេសទាំង២។ ការចុះហត្ថលេខានេះ បានធ្វើឡើងតាមប្រព័ន្ធអនឡាញកាល ពីថ្ងៃទី៣១មីនាឆ្នាំ២០២២។

គណរដ្ឋមន្ត្រីបានអនុម័តសេចក្តីព្រាងច្បាប់ស្តីពីសុវត្ថិភាពម្ហូបអាហារនៅថ្ងៃទី១មេសានេះ ខណៈដែលសុវត្ថិភាព ចំណីអាហារ គឺជាបញ្ហាមានសារៈ សំខាន់បំផុតទាក់ទងនឹង អាយុ ជីវិតជាពិសេស ក្នុងស្ថាន ភាពបច្ចុប្បន្ន ដែលពិភពលោកកំពុងរងនឹងការផ្ទុះឡើង ដោយ ជម្ងឺរាតត្បាតបង្ក ឡើង ដោយ សារចំណីអាហារមិនស្អាតនិងការគ្មានអនាម័យ។

សង្គ្រាមឈ្លានពានរុស្ស៊ីក្នុងប្រទេសអ៊ុយក្រែនបានឈានចូលថ្ងៃទី៣៧ហើយនៅជាមួយនឹង នយោបាយការទូតលើតុនិងក្រោមតុ បាននឹងកំពុងធ្វើដើម្បីអូសទាញប្រទេសដែលមានឥទ្ធិ ពលក្នុងតំបន់ដើម្បីធ្វើការគាំទ្រភាគីពាក់ព័ន្ធរៀងៗខ្លួន។

សេចក្តីព្រាងច្បាប់ស្តីពីវិសោធនកម្មមាត្រា១៤០ ដែលបង្កើនចំនួនគណៈអភិបាលរាជធានី ខេត្ត ក្រុង ស្រុក ខណ្ឌ ត្រូវគណរដ្ឋមន្ត្រីអនុម័តនៅថ្ងៃ១មេសានេះនិងបញ្ជូនបន្តទៅកាន់ ស្ថាប័នរដ្ឋសភា។ យោងតាមមាត្រាចាស់ គណៈអភិបាលរាជធានីអនុញ្ញាត ឱ្យមានចំនួន យ៉ាងច្រើន៧រូប,  គណៈអភិបាលខេត្តមានចំនួនពី ៣ទៅ ៧រូប, គណៈអភិបាលក្រុង ស្រុក ខណ្ឌមានចំនួនពី ៣ទៅ ៥រូប។

រដ្ឋសភាបានបើកបវេសនកាលរប​ស់ខ្លួនវិញនៅថ្ងៃទី១មេសានេះ ជាមួយការយកចិត្តទុកដាក់ នឹងការអានព្រះរាជសាររបស់ព្រះមហាក្សត្រខ្មែរដែលមានព្រះរាជបន្ទូលពាក់ព័ន្ធនឹងកិច្ចការ របស់រាជរដ្ឋាភិបាលនិងកិច្ចការអ្នកតំណាងរាស្ត្រធ្វើច្បាប់ទាំងឡាយ។

តួលេខឆ្លងកូវីដ១៩ ក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះ មានចំនួន ១៤ម៉ឺន ២ពាន់ ៨០៤ករណី និងការស្លាប់ថ្មីមានចំនួន ៣៧០នាក់ ។ តួលេខឆ្លងនៅថ្ងៃនេះ មានការថយចុះចំនួន ២ពាន់ ២១២ករណី និងការស្លាប់កើនឡើងចំនួន ៤១នាក់ផងដែរ បើ ប្រៀបធៀបនឹងការឆ្លង និងការស្លាប់កាលពីម្សិលមិញ ។ កម្ពុជាគឺជាប្រទេសដែលមានការឆ្លងតិចជាងគេ, ចំណែកវៀតណាមគឺជាប្រទេសដែល ដែល មានការឆ្លងច្រើនជាងគេក្នុងរយៈពេល២៤ម៉ោងកន្លងមកនេះ។

តួលេខអ្នកចាក់វ៉ាក់ សាំងដូសទី៣ ក្នុងរយៈពេល២៤ម៉ោង កន្លងមកនេះ មានចំនួន ១ម៉ឺន ៦ពាន់ ៤៨៤នាក់ ដែលជាតួលេខចាក់តិចជាងម្សិលមិញចំនួន ៥០៨នាក់ ។ គិតត្រឹមថ្ងៃនេះតួលេខអ្នកចាក់វ៉ាក់សាំងដូសទី៣ បានសរុបចំនួន ៧លាន ៩៤ម៉ឺន ៣ពាន់ ៥៤៦នាក់ ។

តួលេខឆ្លងជំងឺកូវីដ១៩ក្នុងប្រទេសកម្ពុជា មានចំនួន៤០ករណីដែលកើនឡើង ៧ករណីបើប្រៀបធៀបនឹងម្សិលមិញ។ សម្តេចនាយករដ្ឋមន្ត្រីបានថ្លែងនៅថ្ងៃនេះ ចាត់ទុក ការឆ្លងនេះ ជាតួលេខធ្លាក់ចុះគួរឱ្យកត់សម្គាល់។

កម្មករចំនួន៦៨នាក់បានរងរបួសធ្ងន់ស្រាលដោយសារហេតុការណ៍ក្រឡាប់រថយន្តដឹក កម្មករនៅខេត្តស្វាយរៀង។ សមត្ថកិច្ចបានបញ្ជាក់ថាហេតុការណ៍បានកើតឡើងវេលាយប់ ថ្ងៃទី៣០មីនា លើផ្លូវលេខ៣៣៤ ក្នុងភូមិត្រពាំងកំពឹស, ឃុំខ្សែត្រ នៃស្រុកកំពង់រោទិ៍ គ្រាដែល រថយន្ត Hyundai ដឹកកម្មកររោងចក្រនោះ បានព្យាយាមបើកវ៉ាជែងរថយន្តមួយគ្រឿងប៉ុន្តែបែរ ជារថយន្តត្រូវធ្លាក់ចេញពីផ្លូវបណ្តាលឱ្យក្រឡាប់និងធ្វើឱ្យមានមនុស្សរងរបួសធ្ងន់ស្រាល។