យោងតាមរដ្ឋបាលខេត្ត ការឆ្លងថ្មីទាំង១២នាក់នោះ រួមមានកម្មកររោងចក្រ៥នាក់, អ្នកប៉ះពាល់នឹងអ្នកជំងឺកូវីដ-១៩ចំនួន៥នាក់, ពលករមកពីប្រទេសវៀតណាមម្នាក់ និងពលករមកពីប្រទេសថៃម្នាក់។ ចំណែកអ្នកស្លាប់គឺ បុរសអាយុ៦៩ឆ្នាំ នៅស្រុករមាសហែក។ ខេត្តស្វាយរៀង មានអ្នកឆ្លងជំងឺកូវីដ-១៩សរុបចំនួន៥ពាន់៣៩៥នាក់, ព្យាបាលជាសះស្បើយចំនួន៤ពាន់៩៨៥នាក់ និងមានអ្នកស្លាប់សរុបចំនួ១២៥នាក់។

យោងតាមរដ្ឋបាលខេត្តការឆ្លងថ្មីទាំង៦៤នាក់ថ្ងៃនេះ រួមមាននៅក្រុងព្រៃវែង៤នាក់, ស្រុកព្រះសេ្ដច១៤នាក់, ស្រុកស្វាយអន្ទរ៨នាក់, ស្រុកកំចាយមារ៦នាក់, ស្រុកពោធិ៍រៀង៦នាក់, ស្រុកកំពង់ត្របែក៥នាក់, ស្រុកមេសាង៥នាក់, ស្រុកពារាំង៥នាក់, ស្រុកពាមរក៍៥នាក់, ស្រុកបាភ្នំ៣នាក់, ស្រុកពាមជរម្នាក់, ស្រុកស៊ីធរកណ្ដាលម្នាក់ និងមកពីខេត្តកណ្តាលម្នាក់។ ចំណែកអ្នកស្លាប់ទាំង៤នាក់រួមមាន ទី១ បុរសអាយុ៧០ឆ្នាំនៅស្រុកកំពង់ត្របែក, ទី២ បុរសអាយុ៥២ឆ្នាំនៅស្រុកកំពង់ត្របែក, ទី៣ ស្ត្រីអាយុ៦៣ឆ្នាំនៅស្រុកពារាំង និងទី៤ ស្ត្រីអាយុ៥៧ឆ្នាំនៅស្រុកពាមរក៍។ ខេត្តព្រៃវែងមានអ្នកឆ្លងជំងឺកូវីដ-១៩សរុប៥ពាន់៣៣៩នាក់ ក្នុងនោះបានជាសះស្បើយចំនួន៤ពាន់៦០៦នាក់ និងស្លាប់១០០នាក់។

ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នាថ្ងៃទី ១៧ ខែសីហា ឆ្នាំ២០២១ បានសម្រេចផ្តល់ថវិកា ១០ម៉ឺនដុល្លារ ជូនកាកបាទក្រហមមីយ៉ាន់ម៉ា ដើម្បីបំពេញបេសកកម្មមនុស្សធម៌ ជួយដល់ប្រទេសមីយ៉ាន់ម៉ា ដែលកំពុងជួបការលំបាកដោយសារការរាតត្បាតនៃជំងឺកូវីដ-១៩។ សូមបញ្ជាក់ថា កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន កាលពីថ្ងៃទី ៩ ខែកក្កដា ឆ្នាំ២០២១កន្លងទៅ បានផ្តល់ថវិកា ៥ម៉ឺនដុល្លារ ជូនកាកបាទក្រហមនេប៉ាល់ តាមរយៈសហព័ន្ធអន្តរជាតិ ដើម្បីទិញសម្ភារបរិក្ខារពេទ្យ និងស្បៀង ក្នុងប្រតិបត្តិការប្រយុទ្ធប្រឆាំងជំងឺកូវីដ-១៩ នៅប្រទេសនេប៉ាល់។ ដោយឡែក កាលពីថ្ងៃទី ១៩ ខែកក្កដា ឆ្នាំ២០២១កន្លងទៅ កាកបាទក្រហមកម្ពុជា ក៏បានផ្តល់ថវិកាចំនួន ១០ម៉ឺនដុល្លារ ជូនកាកបាទក្រហមវៀតណាម តាមរយៈ ស្ថានទូតនៃសាធារណរដ្ឋសង្គមនិយមវៀតណាមប្រចាំនៅកម្ពុជា ដេីម្បីចូលរួមក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩…

យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី១៧សីហាឆ្នាំ២០២១ កម្ពុជាបានចាក់វ៉ាក់សាំងជូនប្រជាពលរដ្ឋបានចំនួន៩លាន១សែន៥ម៉ឺន៧ពាន់២៤៥នាក់ហើយ។ ក្នុងនោះបានចាក់វ៉ាក់សាំងទី២ដូសរួចមានចំនួន៧លាន៤សែន៧ម៉ឺន៩ពាន់១១០នាក់។ ចំណែកការចាក់វ៉ាក់សាំងសម្រាប់កុមារ និងយុវវ័យចន្លោះពី១២ទៅ១៨ឆ្នាំ ក្នុងរយៈពេល១៧ថ្ងៃចាក់បាន៦៣ម៉ឺន៤ពាន់២៨០នាក់ ស្មើនឹង៣២,២៥%នៃអ្នកដែលត្រូវចាក់ជិត២លាននាក់។ ដោយឡែក របាយការណ៍ក្រសួងការពារជាតិបានឲ្យដឹងថា ការចាក់ដោយក្រុមគ្រួពេទ្យយោធានៅក្នុងខេត្តគោលដៅចំនួន៨គឺសៀមរាប, បន្ទាយមានជ័យ,ខេត្តតាកែវ, កំពង់ស្ពឺ, ខេត្តព្រះសីហនុ, ខេត្តកោះកុង, កំពង់ចាម និងស្វាយរៀង បានចំនួនមនុស្ស១លាន៣សែន៥ម៉ឺន៤ពាន់៧០នាក់ ក្នុងនោះបានចាក់លើកទី២រួច មានចំនួន១លាន២សែន៦ម៉ឺន៤ពាន់២៥៣នាក់។ យោងតាមក្រសួងសុខាភិបាល គិតមកដល់បច្ចុប្បន្ននេះ ក្នុងចំណោមប្រជាជនសរុបជាង១៦លាននាក់នៅទូទាំងប្រទេស មានប្រជាពលរដ្ឋប្រមាណ៥៧,២៣%ហើយ បានទទួលវ៉ាក់សាំងកូវីដ-១៩ ។ រីឯការចាក់ដូសទី៣ ឬដូសជម្រុញវិញ គិតមកដល់ថ្ងៃទី១៧សីហាឆ្នាំ២០២១ ចាក់បានចំនួន៣១ម៉ឺន៦ពាន់៩១៣នាក់។

គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩នៅថ្ងៃទី១៨សីហាបានជូនដំណឹងថាលទ្ធផលអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល សម្រាប់ថ្ងៃទី១៧សីហា ឆ្នាំ២០២១ គឺគេបានអនុវត្តវិធានការច្បាប់មានចំនួន១ពាន់១០៩ករណី។ ក្នុងនោះ ឃាត់ខ្លួនមនុស្សចំនួន២ពាន់២៩០នាក់ ដើម្បីអប់រំ និងផាកពិន័យ។ ជាមួយគ្នានោះ បុគ្គល៦នាក់ ត្រូវបានបញ្ជូនទៅតុលាការផងដែរ។ ក្នុងការអនុវត្តច្បាប់នោះ សមត្ថកិច្ចបានឃាត់យានយន្តចំនួន១ពាន់១៣២គ្រឿង, និង ពិន័យជាប្រាក់ចំនួ៣៤លាន៤សែនរៀលផងដែរ។ យោងតាមច្បាប់ បទល្មើសមិនគោរពវិធានការដ្ឋបាល ត្រូវផាកពិន័យអន្តរការណ៍ពី១លានទៅ៥លានរៀល។ ត្រូវផ្ដន្ទារទោសដាក់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី២លានទៅ១០លានរៀល បើអំពើនោះបានបណ្ដាលឲ្យមានការចម្លងជំងឺកូវីដ-១៩ដល់អ្នកដទៃ និងត្រូវផ្ដន្ទារទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៥លានទៅ២០លានរៀល បើអំពើនោះបានបណ្ដាលឲ្យប៉ះពាល់ធ្ងន់ធ្ងរដល់សុខភាពសាធារណៈ។

សូមអានព័ត៌មានលំអិតខាងក្រោម ៖

រតនគិរី ៖ នៅថ្ងៃទី១៧ ខែសីហា ឆ្នាំ ២០២១ ក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្តរតនគិរី បានស្រាវជ្រាវ ធ្វើតេស្ដរហ័ស(Rapid-Test) លើមនុស្សចំនួន ៦២៣នាក់ រកឃើញវិជ្ជមានជំងឺកូវីដ-១៩ ចំនួន ០២នាក់ និងករណីមេរោគបំប្លែងថ្មី(Delta) ចំនួន ០១ករណី ។ សូមបញ្ជាក់ថា គិតត្រឹមថ្ងៃនេះ នៅទូទាំងខេត្តរតនគិរី មានករណីវិជ្ជមានជំងឺកូវីដ-១៩ សរុប ៨៨៦នាក់(ករណីDelta ១០នាក់) ព្យាបាលជាសះស្បើយចំនួន ៦៧២នាក់ និងស្លាប់ចំនួន ០៧នាក់ ៕ ដោយ គតិ យុត្ត

តាមរយៈការធ្វើតេស្តរហ័ស Rapid Test ក្នុងព្រឹត្តិការណ៍សហគមន៍២០កុម្ភះ ស្ថិតនៅក្នុងភូមិសាស្ត្រខេត្តស្ទឹងត្រែង បានបន្តរកឃើញអ្នកវិជ្ជមានកូវីដ-១៩ថ្មី ចំនួន ៥៧នាក់ ស្រី ៣៥នាក់បន្ថែមទៀត និងមានអ្នកជាសះស្បើយ ១០នាក់ ស្រី០៤នាក់ នៅថ្ងៃទី១៧ខែសីហាឆ្នាំ២០២១។ គិតត្រឹមម៉ោង៥ល្ងាចថ្ងៃនេះ ខេត្តស្ទឹងត្រែង បានរកឃើញអ្នកឆ្លងកូវីដ-១៩ សរុប ៧៦៥នាក់ ស្រី ៣៧៤នាក់ ក្នុងនោះមានប្រភេទ Delta ចំនួន០៩នាក់ ស្រី ០៦នាក់ ,អ្នកជាសះស្បើយ ៤៩៥នាក់ ស្រី ២២១នាក់ និងកំពុងសម្រាកព្យាបាល ២៦៤នាក់ ស្រី ១៥១នាក់ និងសរុបករណីស្លាប់ ០៦នាក់ ស្រី ០២នាក់ ៕