តាកែវ៖ ឯកឧត្តម អ៊ូច ភា អភិបាលខេត្តតាកែវ លោក ខាន់ សុខា អភិបាលរងខេត្ត ព្រមទាំងអាជ្ញាធរពាក់ព័ន្ធ នៅយប់ថ្ងៃទី០៣ ខែសីហានេះ បានបន្តចុះត្រួតពិនិត្យការអនុវត្តបំរាមគោចរនៅស្រុកត្រាំកក់ ស្រុកទ្រាំង និងស្រុកក្រុងដូនកែវ ក្នុងភូមិសាស្ត្រខេត្តតាកែវ។ នាឱកាសនោះ ឯកឧត្តម អភិបាលខេត្ត បានធ្វេីការណែនាំដល់អាជ្ញាធរមូលដ្ឋាន និងសមត្ថកិច្ចពាក់ព័ន្ធទាំងអស់ត្រូវអនុវត្តនូវបំរាមគោចរ ជាពិសេសគឺអនុវត្តនូវវិធានការរដ្ឋបាលដែលបានដាក់ចេញដោយរដ្ឋបាលខេត្តតាមការណែនាំរបស់រាជរដ្ឋាភិបាលឱ្យបានម៉ឺងម៉ាត់បំផុត ហេីយត្រូវណែនាំដល់ប្រជាពលរដ្ឋឱ្យចូលរួមទាំងអស់គ្នា ធ្វេីយ៉ាងណាទប់ស្កាត់ និងកាត់ផ្តាច់ការឆ្លងរាលដាលជំងឺកូវីដ-១៩ បំលែងថ្មីប្រភេទដែលតា DELTA មកក្នុងសហគមន៍របស់យេីង ។ គួរបញ្ជាក់ថា តាមការណែនាំរបស់រាជរដ្ឋាភិបាល រដ្ឋបាលខេត្តតាកែវបានចេញសេខក្តីសម្រេចកាលពីថ្ងៃទី២៩ ខែកក្កដា ឆ្នាំ២០២១ ស្តីពីការអនុវត្តវិធានការរដ្ឋបាលនៅក្នុងភូមិសាស្ត្រខេត្តតាកែវ ដែលមានរយៈពេល ១៤ថ្ងៃ គឺចាប់ពីថ្ងៃទី២៩ខែកក្កដា ឆ្នាំ២០២១ ដល់ថ្ងៃទី ១២ ខែសីហា ឆ្នាំ ២០២១ ដោយក្នុងនោះរួមទាំងហាមឃាត់ការជួបជុំ ហាមឃាត់ការលក់ដូរគ្រឿងស្រវឹង ព្រមទាំងដាក់បំរាមគោចរចាប់ពីម៉ោង ៩យប់ ដល់ម៉ោង ៣ទៀបភ្លឺជាដេីម៕ដោយ-រ៉ាវុធ

កំណើនអត្រាអ្នកបានចាក់វ៉ាក់សាំងបង្ការជំងឺកូវីដ-១៩ នៅកម្ពុជា គិតត្រឹមថ្ងៃទី៣ ខែសីហា ឆ្នាំ២០២១ មាន ៧៤,៨៤% ធៀបជាមួយចំនួនប្រជាជនគោលដៅ ១០លាននាក់។ កុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ បានចាក់វ៉ាក់សាំងបង្ការជំងឺកូវីដ-១៩ មាន ៦,៣១% ធៀបជាមួយនឹងចំនួនគោលដៅ ១,៩៦៦,៩៣១ នាក់៕

ស្ថានទូតកម្ពុជាប្រចាំប្រទេសថៃ សូមជូនដំណឹងដល់បងប្អូនពលរដ្ឋខែ្មររស់នៅប្រទេសថៃជ្រាបថា តំបន់គ្រប់គ្រង់ស្ថានភាពជំងឺកូវីដ-១៩ និង វិធានការរឹតត្បិតដើម្បីទប់ស្កាត់ការរីករាលដាលនៃជំងឺកូវីដ-១៩ នៅថៃ ដែលនឹងចាប់ផ្ដើម អនុវត្តចាប់ពីថ្ងៃទី៣ ខែសីហា ឆ្នាំ២០២១ សម្រាប់រយៈពេល ២ សប្ដាហ៍។ សមបងប្អូនខ្មែរនៅថៃមេត្តាចូលរួមអនុវត្តតាមវិធានការរបស់រាជរដ្ឋាភិបាលថៃ និងវិធានការ ៣ ការពារ ៣ កុំ ឲ្យបានខ្ជាប់ខ្ជួនទាំងអស់គ្នា ដើម្បីការពារខ្លួនពីការរាតត្បាតជំងឺដ៏កាចសាហាវនេះ។

យោងតាមរដ្ឋបាលខេត្ត ការឆ្លងថ្មីទាំង៤៧នាក់នោះ រួមមានកម្មកររោងចក្រម្នាក់, ធ្វើតេស្តលើអ្នកសង្ស័យរកឃើញ១៦នាក់, ៧នាក់ជាអ្នកប៉ះពាល់នឹងអ្នកជំងឺកូវីដ-១៩, និង២២នាក់ជាអ្នកដំណើរចូលខេត្តស្វាយរៀង។ ចំណែកអ្នកស្លាប់ទាំង២នាក់ រួមមានទី១ ស្ត្រីអាយុ៥៩ឆ្នាំនៅស្រុកចន្ទ្រា និង ទី២ ស្ត្រីអាយុ៦៩ឆ្នាំ នៅក្រុងស្វាយរៀង ខេត្តស្វាយរៀង។ ខេត្តស្វាយរៀង មានអ្នកឆ្លងជំងឺកូវីដ-១៩សរុបចំនួន៤ពាន់៩៥២នាក់, ព្យាបាលជាសះស្បើយចំនួន៤ពាន់៣៤៣នាក់ និងមានអ្នកស្លាប់សារុបចំនួ១០២នាក់។

យោងតាមរដ្ឋបាលខេត្តការឆ្លងថ្មីទាំង៩៨នាក់ថ្ងៃនេះ រួមមាននៅក្រុងព្រៃវែងចំនួន៦នាក់, ស្រុកពាមជរ៣៣នាក់, ស្រុកព្រះសេ្ដច១៧នាក់, ស្រុកពាមរក៍១៦នាក់, ស្រុកមេសាង៩នាក់, ស្រុកកំពង់ត្របែក៥នាក់, ស្រុកស្វាយអន្ទរ៤នាក់, ស្រុកបាភ្នំ២នាក់, ស្រុកកំចាយមារ២នាក់, ស្រុកកញ្ជ្រៀចម្នាក់, ស្រុកពារាំងម្នាក់, ស្រុកស៊ីធរកណ្តាលម្នាក់ និង មកពីរាជធានីភ្នំពេញ ម្នាក់។ ខេត្តព្រៃវែង គិតមកដល់ថ្ងៃទី៣សីហាឆ្នាំ២០២១ មានអ្នកឆ្លងជំងឺកូវីដ-១៩សរុប៤ពាន់៥៦៦នាក់ ក្នុងនោះបានជាសះស្បើយចំនួន៣ពាន់២៩៥នាក់ និងស្លាប់៨០នាក់។