ក្នុងនាមតំណាងដ៏ខ្ពង់ខ្ពស់ សម្ដេចក្រឡាហោម ស ខេង អ្នកតំណាងរាស្ត្រ និងជាប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានខេត្តបាត់ដំបង នៅថ្ងៃទី១ ខែសីហា ឆ្នាំ២០២១នេះ ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំក្រុមក្រឡាហោមមនុស្សធម៌នាំយកអំណោយសម្តេចក្រឡាហោម ស ខេង និងលោកជំទាវ ផ្ដល់ជូនប្រជាពលរដ្ឋដែលស្ថិតក្នុងតំបន់បិទខ្ទប់ដើម្បីបង្ការការឆ្លងរីករាលដាលជំងឺកូវីដ-១៩ សរុបចំនួន១៨៥គ្រួសារ។ ប្រជាពលរដ្ឋដែលអញ្ជើញមកទទួលអំណោយសម្ដេចក្រឡាហោម ស ខេង និងលោកជំទាវ នាឱកាសនោះរួមមាន មកពីឃុំតាលាស់ ស្រុកមោងឬស្សីចំនួន១៣៥គ្រួសារ និងសង្កាត់រតនៈក្រុងបាត់ដំបងចំនួន៥០គ្រួសារ ដោយក្នុង១គ្រួសារទទួលបានអង្ករ១ការ៉ុង មី១កេស ត្រីខ១យួរ ទឹកស៊ីអ៊ីវទឹកត្រី១យួរ ទឹកសុទ្ធ៤យួរ ព្រមទាំងម៉ាស់ និងអាល់កុលមួយចំនួន។ មានប្រសាសន៍នាឱកាសនោះ ឯកឧត្តម ខាន់ ម៉ាណេរ អមដំណើរដោយឯកឧត្តម ព្រួញ រិទ្ធថា ទីប្រឹក្សាសម្ដេចក្រឡាហោម និងជាប្រធានមន្ទីរសាធារណៈការ និងដឹកជញ្ជូនខេត្តបាត់ដំបង ក៏បាននាំនូវប្រសាសន៍របស់សម្តេចក្រឡាហោម សាកសួរសុខទុក្ខ និងជូនពរពលរដ្ឋឱ្យបានឆាប់ជាសះស្បើយ និងសូមឱ្យអ្នកដែលនៅក្នុងផ្ទះឬតំបន់បិទខ្ទប់ថែររក្សាសុខភាព ហើយអ្នកសម្រាកនៅមន្ទីរព្យាបាល ក៏សូមឆាប់បានជាសះស្បើយផងដែរ។ ប្រជាពលរដ្ឋដែលអញ្ជើញមកទទួលអំណោយ ក៏បានសម្ដែងនូវសេចក្ដីរីករាយ និងគោរពថ្លែងអំណរគុណយ៉ាងជ្រាលជ្រៅបំផុត ជូនសម្ដេចក្រឡាហោម…

របាយការណ៍របស់ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី០២ ខែសីហា ឆ្នាំ២០២១នេះ បានបញ្ជាក់ថា កាលពីយប់ថ្ងៃទី០១ ខែសីហា អាជ្ញាធរមានសមត្ថកិច្ចរបស់រាជធានីភ្នំពេញ បានអនុវត្តន៍បម្រាមគោចរ ដោយឃាត់ម៉ូតូ និងរថយន្តចំនួន ៣០៤គ្រឿង ក្នុងនោះរថយន្ត ៨៨គ្រឿង និងម៉ូតូ ២១៦គ្រឿង។ អាជ្ញាធរបានប្រើប្រាស់យន្តការផាកពិន័យ អប់រំ និងរក្សាទុកយានយន្ត ចំពោះម្ចាស់ឃាត់យានយន្ត ដែលល្មើសបម្រាមគោចរនេះ។សូមជម្រាបថា សាលារាជធានីភ្នំពេញ បានដាក់ចេញបម្រាមគោចរ សម្រាប់រយៈពេល ១៤ថ្ងៃ គិតចាប់ពីម៉ោង ២៣៖៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១។ រយៈពេល៣ថ្ងៃ ចាប់ពីថ្ងៃទី៣០ ខែកក្កដា ដល់ ថ្ងៃទី០១ ខែសីហា ឆ្នាំ២០២១ អាជ្ញាធរមានសមត្ថកិច្ចរបស់រាជធានីភ្នំពេញ បានឃាត់យានយន្តសរុបចំនួន ៨៩២គ្រឿង ក្នុងនោះរថយន្ត២៥៤គ្រឿង និងម៉ូតូ៦៣៨គ្រឿង៕