យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី២៧ កក្កដា ឆ្នាំ២០២១ កម្ពុជាបានចាក់វ៉ាក់សាំងជូនប្រជាពលរដ្ឋបានចំនួន ៦លាន ៩សែន ៤ម៉ឺន ១ពាន់ ២៨៥នាក់ហើយដែលស្មើនឹង ៦៩,៤១%នៃចំនួនប្រជាជនដែលគ្រោងនឹងចាក់ជាង ១០លាននាក់។ ក្នុងនោះបានចាក់វ៉ាក់សាំងទី២ដូសរួចមានចំនួន៤លាន៥សែន៨ម៉ឺន៦ពាន់៩៧៩នាក់។ ដោយឡែក របាយការណ៍ក្រសួង ការពារជាតិថ្ងៃ២៧កក្កដា បានឲ្យដឹងថា ការចាក់ដោយក្រុមគ្រួពេទ្យយោធានៅក្នុងខេត្តគោលដៅចំនួន៨គឺសៀមរាប, បន្ទាយមានជ័យ,ខេត្តតាកែវ, កំពង់ស្ពឺ, ខេត្តព្រះសីហនុ, ខេត្តកោះកុង, កំពង់ចាម និងស្វាយរៀង បានចំនួនមនុស្ស១លាន២សែន៧ម៉ឺន៥ពាន់៦៣៤នាក់ ក្នុងនោះបានចាក់លើកទីរួច មានចំនួន៦៥ម៉ឺន៣០៩នាក់។

បន្ទាយមានជ័យ ៖ គម្រោងមណ្ឌលព្យាបាលអ្នកជម្ងឺកូវីដ១៩ កម្រិតស្រាល ១កន្លែងទៀតដែលបាននឹងកំពុងរៀបចំទាំងថ្ងៃ ទាំងយប់ស្ថិតនៅភូមិខ្លាកូនថ្មី សង្កាត់កំពង់ស្វាយក្រុងសិរីសោភ័ណ ខេត្តបន្ទាយមានជ័យអាចដាក់ចំណុះបានជាង ៣.០០០នាក់ ។នេះបើតាមការអោយដឹងពីឯកឧត្ដម អ៊ុ រាត្រី អភិបាលខេត្តបន្ទាយមានជ័យកាលពីថ្ងៃទី២៧ ខែកក្កដា ឆ្នាំ២០២១ ។ឯកឧត្ដម បានបន្តថា៖ មណ្ឌលព្យាបាលអ្នកជម្ងឺកូវីដ១៩ កម្រិតស្រាលនៅភូមិខ្លាកូនថ្មីនេះ មានផ្ទៃដី២ហិចតា ហើយមានរោង២ ដែលមានទំហំ១ហិចតា ។ ក្រុមការងាររបស់នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាប្រធានអនុគណៈកម្មការសាងសង់នៃគណៈកម្មការជាតិប្រយុទ្ធនឹងជំងឺកូវីដ១៩ បាននឹងកំពុងសម្រុកសាងសង់និងជួសជុលអតីតសំណង់រោងចក្រមួយនេះ ទាំងថ្ងៃទាំងយប់ ។ជាមួយគ្នានោះដែរ គណៈកម្មការប្រយុទ្ធនឹងជម្ងឺកូវីដ១៩ ខេត្តបន្ទាយមានជ័យនិងបានការគាំទ្រពីថ្នាក់លើ បាននឹងកំពុងបន្ថែមមណ្ឌលចត្តាឡីស័ក២កន្លែងទៀត។ លោកឃូ ពៅ អភិបាលស្រុកព្រះនេត្រព្រះបានអោយដឹងថា ក្នុងស្រុកនេះ បាននឹងកំពុងរៀបចំមណ្ឌលចត្តាឡីស័កថ្មី១កន្លែងទៀតនៅវិទ្យាល័យហ៊ុន សែន ទឹកជោរ ឃុំទឹកជោរ សម្រាប់ទទួលពលករខ្មែរដែលបញ្ជូនត្រឡប់ពីប្រទេសថៃ ។ វាអាចដាក់ចំណុះបានជិត ២.០០០នាក់ដែរ ។ ពោលគឺក្នុងស្រុកនេះ មានមណ្ឌលចត្តាឡីស័កចំនួន ៣កន្លែងគឺ ១/នៅវិទ្យាល័យហ៊ុន សែន ជប់វារី ឃុំជប់វារី(ទីរួមស្រុក) ។…

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន៩ម៉ឺន៦ពាន់២២៩ករណី និងការស្លាប់ថ្មីមានចំនួន២ពាន់៨៨១នាក់។ ប្រទេសដែលមានការឆ្លងថ្មីក្នុងរយៈ ពេល២៤ម៉ោងចុង ក្រោយ នេះនៅ អាស៊ាន មាន១០ប្រទេស។ ប្រទេសដែលមានការស្លាប់ថ្មីរយៈពេល២៤ម៉ោងចុងក្រោយនេះ មានចំនួន ៦ប្រទេស ។ ការឆ្លងថ្មីនៃវីរុសកូវីដ១៩ក្នុងប្រទេសអាស៊ានទាំង១០នៅក្នុងរយ:ពេលនេះ២៤ម៉ោងចុងក្រោយនេះមានចំនួន៩ម៉ឺន៦ពាន់២២៩ករណី និងការស្លាប់ថ្មីមានចំនួន២ពាន់៨៨១នាក់។ការឆ្លងថ្មីនៅថ្ងៃនេះបានកើតឡើងលើប្រទេសចំនួន១០គឺប្រទេសឥណ្ឌូនេស៊ី, ហ្វីលីពីន, ម៉ាឡេស៊ី, មីយ៉ាន់ម៉ា,សឹង្ហបុរី, ថៃ, កម្ពុជា, វៀតណាម, ឡាវ, និងប្រទេសប្រុយណេ។ ប្រទេសដែលមានការស្លាប់ថ្មីមាន៦ប្រទេស គឺប្រទេសឥណ្ឌូណេស៊ី, មីយ៉ាន់ម៉ា, ថៃ, ម៉ាឡេស៊ី, ហ្វីលីពីន, និងប្រទេសកម្ពុជា។ប្រទេសឥណ្ឌូនេស៊ីនៅក្នុងរយ:ពេល២៤ម៉ោងចុងក្រោយនេះមានការឆ្លងថ្មីចំនួន៤ម៉ឺន៥ពាន់២០៣ករណីដែលនាំឲ្យការឆ្លងសារុបមានចំនួន៣លាន២៣ម៉ឺន៩ពាន់៩៣៦ករណី។ ចំណែកការស្លាប់ថ្មីវិញមានចំនួន២ពាន់៦៩នាក់ដែលនាំឲ្យការស្លាប់សារុបមានចំនួន៨ម៉ឺន៦ពាន់៨៣៥នាក់។ ប្រទេសឥណ្ឌូនេស៊ីគឺ ជាប្រទេសដែលមានការឆ្លងនិងការស្លាប់ច្រើនជាងគេក្នុងចំណោមប្រទេសអាស៊ានទាំង១០។ចំណែកប្រទេសម៉ាឡេស៊ីនៅក្នុងរយ:ពេល២៤ម៉ោងចុងក្រោយនេះមានការឆ្លងថ្មី ចំនួន១ម៉ឺន៦ពាន់១១៧ករណីដែលនាំឲ្យការឆ្លងសារុបចំនួន១លាន៤ម៉ឺន៤ពាន់៧១ករណី។ ចំណែកការស្លាប់ថ្មីវិញ មានចំនួន២០៧នាក់ដែលនាំឲ្យការស្លាប់សារុបមានចំនួន៨ពាន់៤០៨នាក់។ប្រទេសថៃមានការឆ្លងថ្មីចំនួន១ម៉ឺន៤ពាន់១៥០ករណីដែលនាំឲ្យការឆ្លងសារុបមានចំនួន៥២ម៉ឺន៦ពាន់៨២៨ករណី។ ចំណែកការស្លាប់ថ្មីមានចំនួន១១៨ករណីដែលនាំឲ្យការស្លាប់សារុបមានចំនួន៤ពាន់២៦៤នាក់។នៅក្នុងប្រទេសហ្វីលីពីនមានការឆ្លងថ្មីចំនួន៧ពាន់១៨៦ករណីដែលនាំឲ្យការឆ្លងសារុបមានចំនួន១លាន៥៦ម៉ឺន២ពាន់៤២០ករណី។ ចំណែកការស្លាប់ថ្មីមានចំនួន៧២នាក់ដែលនាំឲ្យការស្លាប់សារុបមានចំនួន២ម៉ឺន៧ពាន់៣១៨នាក់។ប្រទេសមីយ៉ាន់ម៉ាមានការឆ្លងថ្មីចំនួន៤ពាន់៦៣០ករណីដែលនាំឲ្យការឆ្លងសារុបមានចំនួន២៧ម៉ឺន៤ពាន់១៥៥ករណី។ ចំណែកការស្លាប់ថ្មីមានចំនួន៣៩៦នាក់ដែលនាំឲ្យការស្លាប់សារុបមានចំនួន៧ពាន់៥០៧នាក់។ប្រទេសវៀតណាមមានការឆ្លងថ្មី៧ពាន់៩៣៨ករណីដែលនាំឲ្យការឆ្លងសារុបចំនួន១០ម៉ឺន៩ពាន់១១១ករណី។ប្រទេសកម្ពុជាមានការឆ្លងថ្មីចំនួន៦៨៥ករណីដែលនាំឲ្យការឆ្លងសារុបមានចំនួន៧ម៉ឺន៤ពាន់៣៨៦ករណី។ ចំណែកការស្លាប់ថ្មី១៩ដែលនាំឲ្យការស្លាប់សារុបមានចំនួន១ពាន់៣២៤នាក់។ប្រទេសសឹង្ហបុរីមានការឆ្លងថ្មីចំនួន១៣៩ករណីដែលនាំឲ្យការឆ្លងសារុបមានចំនួន៦ម៉ឺន៤ពាន់៤៥៣ករណី។ប្រទេសឡាវមានការឆ្លងថ្មីចំនួន១៦៩ករណីដែលនាំឲ្យការឆ្លងសារុបមានចំនួន៥ពាន់១៥៤ករណី។ប្រទេសប្រុយណេមានការឆ្លងថ្មីចំនួន១២ករណីដែលនាំឲ្យការឆ្លងសារុបមានចំនួន៣៣៣ករណី។គិតសារុបរួមនៃប្រទេសទាំង១០អាស៊ាននាពេលនេះ មានការឆ្លងសារុបមាន៦លាន៩០ម៉ឺន៨៤៧ករណី, និងការស្លាប់មាន១៣ម៉ឺន៦ពាន់២២៥នាក់។បើគិតសារុបនៅលើសាកលលោកនោះវិញការឆ្លងវីរុសកូវីដ១៩សារុបមានចំនួនជាង ១៩៥លានករណី, និងការស្លាប់មានជាង៤លាន១៨ម៉ឺននាក់។

នៅថ្ងៃទី២៧ ខែកក្កដា ឆ្នាំ ២០២១ ឯកឧត្តម ជា សុមេធី អភិបាលខេត្តព្រៃវែង បានអញ្ជើញចុះពិនិត្យវឌ្ឍនភាព និងទីតាំងនៃការចាក់វ៉ាក់សាំងជំងឺកូវីដ-១៩ ជូនប្រជាពលរដ្ឋ ដើម្បីបង្កើននូវសុវត្ថិភាព បង្ការទប់ស្កាត់ជំងឺចូលក្នុងសហគមន៍អោយកាន់តែមានប្រសិទ្ធភាពខ្ពស់តាមការណែនាំរបស់ក្រសួងសុខាភិបាល ក្នុងភូមិសាស្ត្រស្រុកកំចាយមារ ស្ថិតក្នុងឃុំចំនួន៣គឺ ឃុំដូនកឹង ឃុំក្រញូង និងឃុំក្របៅ ដោយមានការអញ្ជើញចូលរួមពី លោកអភិបាលរងខេត្ត អាជ្ញាធរស្រុកកំចាយមារ លោកប្រធានមន្ទីរ អង្គភាព កងកម្លាំងប្រដាប់អាវុធទាំងបីប្រភេទ និងអ្នកពាក់ព័ន្ធ។ ជាថ្មីម្តងទៀត ឯកឧត្តមអភិបាលខេត្ត បានមានប្រសាសន៍គោរពថ្លែងអំណរគុណចំពោះរាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្ត្រី ដែលបានយកចិត្តទុកដាក់ខ្ពស់លើសុខុមាលភាពប្រជាពលរដ្ឋ និងបានកសាងខឿនការពារសុខុមាលភាពប្រជាពលរដ្ឋខ្មែរប្រឆាំងនឹងជំងឺឆ្លងកូវីដ-១៩ តាមរយៈការស្វះស្វែងរកវ៉ាក់សាំងមកចាក់ជូនប្រជាពលរដ្ឋនាពេលនេះនិងពេលកន្លងផងដែរ។ ឆ្លៀតឱកាសនេះដែរ ឯកឧត្តមក៏បានថ្លែងអំណរគុណដល់អាជ្ញាធរថ្នាក់មូលដ្ឋានដែលបានបំពេញតួនាទីស្របតាមគោលការណ៍ណែនាំរបស់រាជរដ្ឋាភិបាល និងបម្រើប្រជាពលរដ្ឋបានត្រឹមត្រូវក្នុងពេលផ្តល់សេវាសាធារណៈ ដូចជា ការចេញប័ណ្ណចាក់វ៉ាក់សាំងជូនប្រជាពលរដ្ឋ ខណៈដែលបានស្ម័គ្រចិត្តចាក់វ៉ាក់សាំងយ៉ាងកុះករនៅក្នុងយុទ្ធនាការចាក់វ៉ាក់សាំងនេះតាមវិធានណែនាំរបស់សម្ដេចតេជោ នាយករដ្ឋមន្រ្តី គឺ ៣ការពារ ៣កុំ៕ដោយ-រ៉ាវុធ

យោងតាមសេចក្ដីណែនាំរបស់ក្រសួងសុខាភិបាល នៅថ្ងៃទី២៧ កក្កដា ឆ្នាំ២០២១ បានឲ្យដឹងថា ដើម្បីជំរុញឲ្យមានការចែកចាយ និងលក់ឧបករណ៍តេស្ដរហ័សរកអង់ទីហ្សែនកូវីដ-១៩ ឲ្យបានទូលំទូលាយ និងធានាបាននូវគុណភាពដល់អ្នកប្រើប្រាស់ក្នុងការចូលរួមចំណែកទប់ស្កាត់ការឆ្លងរាលដាលនៃជំងឺកូវីដ-១៩ ក្រសួងណែនាំដូចតទៅ៖ ទី១- ចំពោះគ្រឹះស្ថានអាហរ័ណ នីហរ័ណឳសថ ត្រូវធ្វើការចែកចាយតេស្ដរហ័សរកអង់ទីហ្សែនកូវីដ-១៩ ដែលមានលេខបញ្ជិកាពីក្រសួងសុខាភិបាលជូនឳសថស្ថាន ឳសថស្ថានរង មន្ទីរពេទ្យឯកជន មន្ទីរពហុព្យាបាល មន្ទីរសម្រាកព្យាបាល និងគ្លីនិក។ ទី២- ចំពោះឳសថស្ថាន ឳសថស្ថានរង ត្រូវទិញតេស្ដរហ័សរកអង់ទីហ្សែនកូវីដ-១៩ ដែលមានលេខបញ្ជិការពីក្រសួងសុខាភិបាល ហើយលក់បន្តជូនអ្នកប្រកបវិជ្ជាជីវៈសុខាភិបាល និងប្រជាជនទូទៅដើម្បីប្រើប្រាស់ និងហាមឃាត់ការលក់ និងទិញតេស្ដរហ័សនោះតាមប្រពន្ធ័អនឡាញគ្រប់ប្រភេទ។ ទី៣- ចំពោះអ្នកប្រកបវិជ្ជាជីវៈសុខាភិបាល និងប្រជាពលរដ្ឋ ត្រូវទិញតេស្ដរហ័សរកអង់ទីហ្សែនកូវីដ-១៩ ដែលមានលេខបញ្ជិការត្រឹមត្រូវពីឳសថស្ថាន ឳសថស្ថានរងស្របច្បាប់ ហើយត្រូវចៀសវាងការទិញតេស្ដរហ័សនោះ តាមប្រពន្ធ័អនឡាញគ្រប់ប្រភេទ ព្រោះឧបករណ៍តេស្ដនោះតម្រូវឲ្យមានការទុកដាក់ត្រឹមត្រូវ និងត្រូវមានប្រភពច្បាស់លាស់ បើមិនដូច្នោះទេ អាចនឹងប្រឈមជាមយយតេស្ដរហ័សដែលមានគុណភាពមិនត្រឹមត្រូវ ឬអាចជាផលិតផលក្លែងក្លាយផងដែរ។

យោងតាមសេចក្ដីជូនដំណឹងរបស់ក្រសួងសុខាភិបាលនៅថ្ងៃទី២៧កក្កដាឆ្នាំ២០២១ បានឲ្យដឹងថា ក្នុងគោលបំណងសំដៅទប់ស្កាត់ការឆ្លងរាលដាលនៃជំងឺកូវីដ-១៩ ក្រសួងសុខាភិបាលនឹងអនយញ្ញាតឲ្យគ្រឹះស្ថានអាហរ័ណ នីហរ័ណ ឳសថ អាចធ្វើការស្នើរសុំនាំចូលវ៉ាក់សាំងកូវីដ-១៩ដែលត្រូវបានទទួលស្គាល់ដោយអង្គការសុខភាពពិភពលោក ដើម្បីចែកចាយតាមទីកន្លែងផ្ដល់សេវាសុខាភិបាលឯកជនស្របច្បាប់ ក្នុងក្របខណ្ឌទូទាំងប្រទេស។ ប៉ុន្តែក្រសួងបានណែនាំឲ្យ ប្រតិបត្តិឲ្យបានត្រឹមត្រូវតាមស្ដង់ដារបច្ចេកទេសក្នុងការដឹកជញ្ជូន ការថែរក្សា និងការស្ដុកវ៉ាក់សាំងកូវីដ-១៩ នៅក្នុងឃ្លាំង ដើម្បីធានាឲ្យបាននូវសុវត្ថិភាព និងប្រសិទ្ធភាពខ្ពស់។ ក្រសួងសុខាភិបាលបានអំពាវនាវដល់ប្រធានគ្រឹះស្ថានអាហរ័ណ នីហរ័ណឳសថ ដែលមានបំណងនាំចូលវ៉ាក់សាំងកូវីដ-១៩ ត្រូវរៀបចំឯកសារសុំនាំចូលតាមបែបបទបច្ចេកទេសរបស់ក្រសួងសុខាភិបាល។