យោងតាមស្ថានទូតអាមេរិកប្រចាំកម្ពុជានៅថ្ងៃទី២៣ កក្កដា ឆ្នាំ២០២១ បានឲ្យដឹងថា សហរដ្ឋអាមេរិកនឹងផ្តល់វ៉ាក់សាំង Johnson & Johnson ចំនួនជាងមួយលានដូសដល់ប្រជាជនកម្ពុជា។ ស្ថានទូតបានបន្តថា គេកំពុងតែធ្វើការយ៉ាងជិតស្និទ្ធ ជាមួយរាជរដ្ឋាភិបាល យន្តការ COVAX អង្គការសុខភាពពិភពលោក និងអង្គការ UNICEF ដើម្បីបញ្ជូនវ៉ាក់សាំងទាំងនោះមក ក្នុងពេលឆាប់ៗខាងមុខ។ កម្ពុជាគិតត្រឹមថ្ងៃទី២២កក្កដា ឆ្នាំ២០២១ ទទួលបានវ៉ាក់សាំងប្រមាណ១៧លានដូសហើយ ដែលភាគច្រើនបំផុតគឺវ៉ាក់សាំងជំនួយ និងការទិញមកពីប្រទេសចិន។ តាមរយៈវ៉ាក់សាំងនោះបានជួយឱ្យកម្ពុជាសម្រេចបាននូវការចាក់វ៉ាក់សាំងជូនប្រជាពលរដ្ឋជាង៦លាន៤លាននាក់រួចហើយ ដែលស្មើនឹង ៦៤.៥៥% ធៀបនឹងគោលដៅចំនួនប្រជាពលរដ្ឋត្រូវចាក់ប្រមាណ១០លាននាក់។ សម្ដេចតេជោនាយករដ្ឋមន្ត្រីធ្លាប់បានបញ្ជាក់ថា កម្ពុជាក៏មានផែនការចាក់វ៉ាក់សាំងសម្រាប់កុមារ និងយុវជនអាយុចន្លោះពី១២ទៅ១៧ឆ្នាំ ក្នុងពេលឆាប់ៗផងដែរ។

ភ្នំពេញ ៖ យោងតាមរបាយការណ៍ព័ត៌មានដែលក្រុមការងារទូរទស្សន៍ អប្សរា ទើបទទួលបាននៅថ្ងៃទី២៣ ខែកក្កដា ឆ្នាំ ២០២១នេះ រដ្ឋបាលសង្កាត់ទឹកល្អក់ទី២ ខណ្ឌទួលគោក បានបិទខ្ទប់«ភោជនីយដ្ឋានម៉ុនឡាយ» ដែលស្ថិតនៅលើផ្លូវលេខ១៥៦ ដោយសារតែមានបុគ្គលិក៥នាក់ ស្រី៣នាក់ បានឆ្លងជំងឺកូវីដ១៩ កាលពីថ្ងៃទី២២ ខែកក្កដា ឆ្នាំ២០២១។ ជាមួយគ្នានោះ ដើម្បីសុវត្ថិភាព សូមបងប្អូនទាំងអស់គ្នា មេត្តាយកចិត្តទុកដាក់ តាមដានសុខភាពរបស់ខ្លួនរយៈពេល១៤ថ្ងៃ ចាប់ពីថ្ងៃដែលអ្នកបានប៉ះពាល់ឬបានទៅ «ភោជនីយដ្ឋានម៉ូនឡាយ» នេះផងដែរ ៕ដោយ ៖ ភារ៉ា និងប៊ុនធី

នៅព្រឹកថ្ងៃទី២៣ ខែ កក្កដា ឆ្នាំ២០២១ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានដឹកនាំក្រុមការងារចម្រុះខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ អញ្ជើចុះសួរសុខទុក្ខបងប្អូនប្រជាពលរដ្ឋ កម្មករ និយោជិត និងបាននាំយកអំណោយរបស់រដ្ឋបាលខេត្ត ផ្តល់ជូនដល់ក្រុមការងារចាក់វ៉ាក់សាំងកូវីដ-១៩ ក្នុងយុទ្ធនាការនៃការចាក់វ៉ាសាំងការពារជំងឺកូវីដ-១៩ ជូនដល់ប្រជាពលរដ្ឋ កម្មករ និយោជិត ជំហាន២ ដូសទី២ ប្រមាណជាង ២៨មុឺននាក់ ដោយឥតគិតថ្លៃ នៅក្នុងស្រុកជើងព្រៃ និងស្រុកបាធាយ ខេត្តកំពង់ចាម។ ឆ្លៀតក្នុងឱកាសនោះឯកឧត្តមក៏បានផ្តាំផ្ញើដល់បងប្អូនប្រជាពលរដ្ឋទាំងអស់គ្នា ត្រូវបង្កើនការប្រុងប្រយ័ត្ន ថែរក្សាសុខភាព និងអនុវត្តឲ្យបានខ្ជាប់ខ្ជួននូវវិធានការអនាម័យតាមការណែនាំរបស់ក្រសួងសុខាភិបាល។ ទន្ទឹមនឹងនោះដែរ ទោះបីប្រជាពលរដ្ឋយើង បានទទួលវ៉ាក់សាំងបង្ការជម្ងឺកូវីដ១៩ រួចហើយក្ដី ក៏ត្រូវចូលរួមទាំងអស់គ្នា បង្កើនការប្រុងប្រយ័ត្នថែមទៀត នូវវិធានការពារ ៣ការពារ និង ៣កុំ ជាពិសេស អនុវត្តការពាក់ម៉ាស់ ការលាងសម្អាតដៃ ការរក្សាគម្លាតសុវត្តិភាពបុគ្គល និងគម្លាតសង្គម ដើម្បីកាត់ផ្តាច់ខ្សែចម្លងពីមេរោគដ៏កំណាចមួយនេះ ឲ្យជៀសឆ្ងាយពីសហគមន៍កម្ពុជាយើង ៕

ភ្នំពេញ៖ សម្តេចអគ្គមហាសនេបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នឹង អញ្ជើញជាអធិបតីដ៏ខ្ពង់ខ្ពស់ ក្នុងពិធីទទួលវ៉ាក់សាំង AstraZeneca ប្រមាណ១លានដូស ដែលជា ជំនួយរបស់រដ្ឋាភិបាលជប៉ុន នៅវេលាម៉ោងប្រមាណ ២០យប់ ថ្ងៃទី២៣ ខែកក្កដា ឆ្នាំ២០២១ នៅ ព្រលានយន្តហោះអន្តរជាតិភ្នំពេញ ។ សូមជម្រាបថា គិតមកត្រឹមថ្ងៃទី២២ ខែកក្កដា ឆ្នាំ២០២១ កម្ពុជា ទទួលបានវ៉ាក់សាំងសរុប ១៧លាន ២ម៉ឺន៤០០០ដូស ភាគច្រើនបំផុតជាវ៉ាក់សាំងជំនួយ និងទិញពីប្រទេសចិន ។ វ៉ាក់សាំង ដែលកម្ពុជា ទទួលបានរួចមកហើយ ក្នុងនោះរួមមានវ៉ាក់សាំងស៊ីណូហ្វាម (Sinopharm) ជាជំនួយរបស់រដ្ឋាភិបាល ចិន ចំនួន ២,២លានដូស, វ៉ាក់សាំងស៊ីណូហ្វាម ៤លានដូស ទិញពីក្រុមហ៊ុនស៊ីណូហ្វាម, វ៉ាក់សាំង ស៊ីណូវ៉ាក់ (Sinovac) ទិញពីប្រទេសចិនចំនួន ១០លាន៥សែនដូស និងវ៉ាក់សាំងអាស្ត្រាហ្សេនីកា (Astra Zeneca) ជំនួយរបស់ខូវ៉ាក់ (Covax Facility)…

យោងតាមរដ្ឋបាលខេត្តការឆ្លងថ្មី ទាំង៦៧នាក់ថ្ងៃនេះ រួមមាននៅក្រុងកំពង់ចាម៨នាក់,ស្រុកកងមាស៥នាក់, ស្រុកកោះសូទិន២នាក់, ស្រុកជើងព្រៃ៥នាក់, ស្រុកកំពង់សៀម១២នាក់,ស្រុកចំការលើ៧នាក់, ស្រុកបាធាយ៣នាក់, ស្រុកព្រៃឈរ៩នាក់, ស្រុកស្រីសន្ធរម្នាក់,ស្រុកស្ទឹងត្រង់១៣នាក់, និងមកពីខេត្តត្បូងឃ្មុំ២នាក់ ។ ចំណែកអ្នកស្លាប់ដោយសារ ជំងឺកូវីដ-១៩ទាំង៤នាក់រួមមានទី១ បុរសអាយុ៧៣ឆ្នាំនៅស្រុកព្រៃឈរ, ទី២ ស្ត្រីអាយុ៤៦ឆ្នាំនៅស្រុកកងមាស, ទី៣ បុរសអាយុ៧៣ឆ្នាំនៅស្រុកព្រៃឈរ និងទី៤ ស្ត្រីអាយុ៥៥ឆ្នាំ នៅស្រុកស្ទឹងត្រង់ ខេត្តកំពង់ចាម។