យោងតាមក្រសួងសុខាភិបាលនៅថ្ងៃទី៩កក្កដាឆ្នាំ២០២១បានឲ្យដឹងថា នៅថ្ងៃទី៨កក្កដា គេបានរកឃើញករណីឆ្លងជំងឺកូវីដ១៩ចំនួន៩៨៨នាក់ ក្នុងនោះករណីឆ្លងក្នុងសហគមន៍ចំនួន៧៨៩នាក់ និងអ្នកដំណើរមកពីបរទេសចំនួន១៩៩នាក់។ ក្រសួងសុខាភិបាលបានបញ្ជាក់ដែរថា នៅថ្ងៃនេះ មានអ្នកជំងឺកូវីដ១៩ចំនួន៨៩៧នាក់បានជាសះស្បើយ និងមានអ្នកស្លាប់ចំនួន៣០នាក់។ កម្ពុជាគិតត្រឹមថ្ងៃទី៨កក្កដាឆ្នាំ២០២១ មានអ្នកឆ្លងជំងឺកូវីដ១៩សរុបចំនួន៥ម៉ឺន៩ពាន់៤៥នាក់ មានអ្នកជាសះស្បើយចំនួនចំនួន៥ម៉ឺន៩១៧នាក់ និងមានអ្នកស្លាប់កើនដល់៨៥៥នាក់នោះហើយ។

លោក ហោ សេរីវឌ្ឍន៍ ប្រធានយុវជនក្រៅប្រព័ន្ធ នៃយុវជនគណបក្សប្រជាជនកម្ពុជាថ្នាក់កណ្តាល តំណាងឲ្យលោកហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល នៅថ្ងៃទី៩កក្កដាឆ្នាំ២០២១ បានទទួលម៉ាស់ចំនួន ៥ម៉ឺនម៉ាស ដែលជាការបរិច្ចាគរបស់លោក Jackie Chan តារាសម្តែងហុងកុងដែលគេស្គាល់ថា ឈិនឡុង ដើម្បីចាត់ចែងបន្តដល់ប្រជាពលរដ្ឋដែលត្រូវការចាំបាច់ក្នុងយុទ្ធនាការប្រយុទ្ធប្រឆាំងជម្ងឺកូវីដ-១៩។ ម៉ាស់ទាំងនោះ ត្រូវបានប្រគល់ជូនក្រុមការងារតាមរយៈ ស្ថានទូតចិននៅកម្ពុជា ដែលតំណាងដោយលោក Winston Wang។

យោងតាមរដ្ឋបាលខេត្តការឆ្លងថ្មីទាំង៨២នាក់នោះ រួមមាន៥៦នាក់ជាកម្មករ កម្មការិនីនៅតាមរោងចក្រនានា, ១៣នាក់ជាអ្នកប៉ះពាល់នឹងអ្នកជំងឺកូវីដ១៩, ក្រៅពីនោះមាននៅស្រុកក្រុងមួយចំនួនទៀត ប្រមាណ៨នាក់, ៣នាក់ទៀតជាអ្នកដំណើរ ចូលពីរាជធានីភ្នំពេញ និងម្នាក់ទៀតជាពលករមកពីប្រទេសថៃ។ នៅថ្ងៃទី៨កក្កដា ខេត្តស្វាយរៀង មានអ្នកជំងឺកូវីដ១៩ចំនួន១១៥នាក់ បានជាសះស្បើយ និងមានអ្នកស្លាប់បន្ថែម្នាក់ ដោយសារជំងឺកូវីដ១៩។ អ្នកស្លាប់ជាបុរសអាយុ៧២ឆ្នាំ នៅភូមិច្រកលាវ សង្កាត់បាវិត ក្រុងបាវិត ខេត្តស្វាយរៀង។ ខេត្តស្វាយរៀងរហូតដល់បច្ចុប្បន្ន មានអ្នកឆ្លងជំងឺកូវីដ-១៩សរុបចំនួន៣ពាន់២១២នាក់, ព្យាបាលជាសះស្បើយចំនួន២ពាន់១៦នាក់ និងមានអ្នកស្លាប់សារុបចំនួន៤០នាក់។

យោងតាមអភិបាលខេត្តកំពង់ស្ពឺលោក វ៉ី សំណាង បានឲ្យដឹងថា នៅថ្ងៃទី៨កក្កដា ឆ្នាំ២០២១ ខេត្តកំពង់ស្ពឺមានអ្នកជំងឺកូវីដ១៩ ចំនួន៣នាក់ បានស្លាប់បាត់បង់ជីវិត។ ជាមួយគ្នានោះ លោកអភិបាលខេត្ត បានអំពាវនាវដល់ប្រជាពលរដ្ឋទាំងអស់ ក្នុងករណីសង្ស័យថាខ្លួនមានអាការស្រដៀងនឹងជំងឺកូវីដ១៩ ត្រូវប្រញាប់រត់រកសេវាសុខភាពរបស់រដ្ឋដែលនៅជិតលោកអ្នកបំផុត ដើម្បីអាចគេចផុតពីជំងឺធ្ងន់ធ្ងរ ឬក៏សេចក្តីស្លាប់បាន។ គិតត្រឹមថ្ងៃទី៨កក្កដាឆ្នាំ២០២១ ខេត្តកំពង់ស្ពឺបានរកឃើញអ្នកឆ្លងជំងឺកូវីដ១៩ចំនួន២ពាន់៩៧០នាក់។ ក្នុងនោះបានជាសះស្បើយចំនួន២ពាន់២៣០នាក់ កំពុងសម្រាកព្យាបាលចំនួន៦៧១នាក់ និងមានអ្នកស្លាប់សរុបចំនួន៦៣នាក់។