រដ្ឋបាលរាជធានីភ្នំពេញចេញសេចក្ដីជូនដំណឹង ស្ដីពីការក្រើនរំលឹកចំពោះប្រជាពលរដ្ឋមានអាយុពី ១៨ឆ្នាំឡើងទៅ ដែលមិនទាន់អញ្ជើញមកទទួលវ៉ាក់សាំងការពារជំងឺកូវីដ-១៩ ទាំងដូសទី១ និងដូសទី២ តាមកាលបរិច្ឆេទកំណត់ចុងក្រោយ សម្រាប់ភូមិសាស្ត្ររាជធានីភ្នំពេញ សូមរួសរាន់អញ្ជើញមកទទួលវ៉ាក់សាំងការពារជំងឺកូវីដ-១៩ រៀងរាល់ម៉ោង ៨:០០នាទីព្រឹក ដល់ម៉ោង ៥:០០នាទីរសៀល ត្រឹមថ្ងៃទី០៨ ខែកក្កដា ឆ្នាំ២០២១។

ភ្នំពេញ៖ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញកាលពីល្ងាចថ្ងៃទី០៥ ខែកក្កដា ឆ្នាំ២០២១ បានអញ្ជើញចូលរួមប្រជុំតាមរយៈការបញ្ជូនរូបភាព និងសម្លេង ( Video Conference ) ដើម្បីពិនិត្យ និងពិភាក្សាលើរបៀបវារៈ ស្ដីពីការចាត់ចែងជំរុញការអនុវត្តយុទ្ធសាស្ត្រទាំង៦ចំណុច របស់សម្ដេចតេជោនាយករដ្ឋមន្ត្រី ក្នុងការប្រយុទ្ធទប់ស្កាត់នឹងជំងឺកូវីដ-១៩ ។ កិច្ចប្រជុំនេះធ្វើឡើង ក្រោមអធិបតីភាព ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ១៩ (គ.ប.ក) ដោយបានពិនិត្យ ពិភាក្សា និងការចាត់ចែងជំរុញការអនុវត្តយុទ្ធសាស្ត្រទាំង៦ចំណុច របស់សម្ដេចតេជោនាយករដ្ឋមន្ត្រី ក្នុងការប្រយុទ្ធទប់ស្កាត់នឹងជំងឺកូវីដ-១៩ និងសេចក្ដីព្រាងគោលនយោបាយស្ដីពីតេស្ដរហ័សរកអង់ទីហ្សែនកូវីដ-១៩ រៀបចំដោយអនុគណៈកម្មការវាយតម្លៃ ផែនការយុទ្ធសាស្រ្ត ,សេចក្ដីព្រាងគោលការណ៍ណែនាំសម្រាប់ការប្រើប្រាស់តេស្ដរហ័សរកអង់ទីហ្សែនកូវីដ-១៩ រៀបចំដោយអនុគណៈកម្មការសេវាមន្ទីរពិសោធន៍។ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ក្នុងកិច្ចប្រជុំនោះ បានជំរុញឲ្យអាជ្ញាធរ ស្ថាប័នពាក់ព័ន្ធនិងសមត្ថកិច្ចយកចិត្តទុកដាក់ពិសេស គឺការអនុវត្តយុទ្ធសាស្ត្រទាំង៦ចំណុច របស់សម្ដេចតេជោនាយករដ្ឋមន្ត្រីដើម្បីទប់ស្កាត់ការរីករាលដាលនៃជំងឺ-១៩ ។ឯ ឧ បន្តថា ៖ការធ្វើតេស្តរហ័សរកអង់ទីហ្សែន កូវីដ-១៩ ជាកិច្ចការងារមួយក្នុងចំណោមយុទ្ធសាស្ត្រទាំង៦…

យោងតាមរដ្ឋបាលខេត្ត អ្នកឆ្លងថ្មីទាំងនោះ គឺនៅស្រុកកំពង់សៀម៦នាក់, ស្រុកជើងព្រៃ២នាក់, ក្រុងកំពង់ចាមម្នាក់, ស្រុកស្រីសន្ធរ២នាក់, ស្រុកបាធាយម្នាក់, ស្រុកកងមាស១៩នាក់, ស្រុកព្រៃឈរ៧នាក់ ស្រុកចំការលើ៣នាក់ និងមកពីខេត្តត្បូងឃ្មុំម្នាក់។ ជាមួយគ្នានោះ ខេត្តកំពង់ចាមបានជូនដំណឹងថា នៅថ្ងៃទី៥កក្កដា មានអ្នកជំងឺកូវីដ១៩ចំនួន៤នាក់បានជាសះស្បើយ។ ចំណែកអ្នកស្លាប់ទាំង៥នាក់ គឺទី១ ស្ត្រីអាយុ៤៤ឆ្នាំ នៅភូមិបឹកជ្រោយ ឃុំសូទិប ស្រុកជើងព្រៃ។ ទី២ បុរសអាយុ៧០ឆ្នាំ នៅភូមិបឹកជ្រោយ ឃុំសូទិប ស្រុកជើងព្រៃ។ ទី៣ ស្ត្រីអាយុ៦៩ឆ្នាំ នៅភូមិស្រឡៅ ឃុំអំពិល ស្រុកកំពង់សៀម។ ទី៤ ស្ត្រីអាយុ៧១ឆ្នាំ នៅភូមិភ្នំដិល ឃុំតាំងក្រាំង ស្រុកបាធាយ និងទី៥ ស្ត្រីអាយុ៥៥ឆ្នាំ នៅភូមិអកទៀង ឃុំតាំងក្រាំង ស្រុកបាធាយ ខេត្តកំពង់ចាម។

យោងតាមក្រសួងសុខាភិបាលនៅថ្ងៃទី៦ កក្កដា ឆ្នាំ២០២១ បានឲ្យដឹងថា នៅថ្ងៃទី៥ កក្កដា គេបានរកឃើញករណីឆ្លងជំងឺកូវីដ-១៩ ចំនួន៩៣៥នាក់ ក្នុងនោះករណីឆ្លងក្នុងសហគមន៍ចំនួន ៧៨០នាក់ និងអ្នកដំណើរមកពីបរទេសចំនួន ១៥៥នាក់។ ក្រសួងសុខាភិបាលបានបញ្ជាក់ដែរថា នៅថ្ងៃនេះ មានអ្នកជំងឺកូវីដ១៩ចំនួន៦៥៤នាក់បានជាសះស្បើយ និងមានអ្នកស្លាប់ចំនួន៣១នាក់។ កម្ពុជាគិតត្រឹមថ្ងៃទី៥កក្កដាឆ្នាំ២០២១ មានអ្នកឆ្លងជំងឺកូវីដ១៩សរុបចំនួន៥ម៉ឺន៦ពាន់១២២នាក់ មានអ្នកជាសះស្បើយចំនួនចំនួន៤ម៉ឺន៨ពាន់៤០នាក់ និងមានអ្នកស្លាប់កើនដល់៧៧៩នាក់នោះហើយ។

សៀមរាប ៖ ក្រោយពីបានតាមដានយ៉ាងយកចិត្តទុកដាក់ពីស្ថានភាពវិវត្តន៍យ៉ាងលឿននៃការរីករាលដាលឆ្លងនៅក្នុងសហគមន៍នៃជំងឺកូវីដ១៩រួចមក នៅរសៀលថ្ងៃទី៥ខែកក្កដាឆ្នាំ២០២១ ក្រុមការងារនៃរដ្ឋបាលស្រុកបន្ទាយស្រីបានសម្រេចបិទផ្សារព្រះដាក់ ព្រមទាំងកំណាត់ផ្លូវសងខាងបរិវេណផ្សារជាបណ្តោះអាសន្នសិន ដើម្បីកាត់ផ្តាច់ហានិភ័យនៃការឆ្លងធ្ងន់ធ្ងរនៅក្នុងសហគមន៍។ អាហារដ្ឋាន និងតូបលក់នំបញ្ចុកដែលមានទទួលភ្ញៀវបរិភោគនៅនឹងកន្លែងទាំងអស់ក៏ត្រូវបានតម្រូវឱ្យផ្អាកអាជីវកម្មក្នុងដំណាក់កាលនេះផងដែរ។ គ្រាន់តែអំឡុងពេល២សប្តាហ៍ ចំនួនអ្នកវិជ្ជមានកូវីដនៅក្នុងស្រុកបន្ទាយស្រីបានហក់ឡើងរហូតដល់ទៅ២១នាក់ និងស្លាប់១នាក់ ហើយអ្នកពាក់ព័ន្ធដោយផ្ទាល់និងដោយប្រយោលជិត៣០០នាក់ ត្រូវបានហ៊ុមព័ទ្ធធ្វើចត្តាឡីស័កនៅស្ទើរគ្រប់ឃុំទាំងអស់របស់ស្រុក ក្នុងនោះអ្នកពាក់ព័ន្ធថ្មីជាមួយនឹងម្តាយកូនវិជ្ជមានដែលជាអ្នកលក់ដូរនៅក្នុងផ្សារព្រះដាក់ចន្លោះពី៥០ទៅ១០០នាក់ផ្សេងទៀតនឹងត្រូវធ្វើតេស្តយកសំណាកនៅក្នុង៦ខែកក្កដាឆ្នាំ២០២១នេះ។ បើតាមផេកហ្វេសប៊ុក ផ្លូវការរបស់លោក ឃឹម ហ្វីណង់ អភិបាលស្រុកនិងជា គណៈបញ្ជាការឯកភាពស្រុក ថា៖រដ្ឋបាលស្រុក បានរៀបចំឱ្យមានការបាញ់ថ្នាំសម្លាប់មេរោគនៅក្នុងផ្សារ និងតំបន់សំខាន់ៗនៅក្នុងឃុំ ហើយនឹងអនុវត្តការផាកពិន័យយ៉ាងតឹងរ៉ឹងបំផុត ចំពោះរាល់ការបំពានវិធានការរដ្ឋបាល ជាពិសេសការតម្រូវឱ្យពាក់ម៉ាស់ជាកំហិតនៅក្នុងទីសាធារណៈ និងការហាមឃាត់ជាដាច់ខាតមិនឱ្យមានការប្រមូលផ្តុំជួបជុំគ្នាពិសារគ្រឿងស្រវឹង។ ជាមួយគ្នានេះ រដ្ឋបាលស្រុកក៍សុំការយោគយល់ចំពោះផលប៉ះពាល់ដែលកើតចេញពីវិធានការបន្ទាន់នេះ ហើយបងប្អូនប្រជាពលរដ្ឋក្នុងឃុំព្រះដាក់អាចប្រើប្រាស់ផ្សារបន្ទាយស្រី និងផ្សារស្រះស្រង់សម្រាប់បំពេញតម្រូវការប្រចាំថ្ងៃក្នុងចន្លោះពេលនេះបាន។ រដ្ឋបាលស្រុកសូមរអំពាវនាវដល់បងប្អូនប្រជាពលរដ្ឋនៅក្នុងស្រុក ជាពិសេសអ្នករស់នៅក្នុងឃុំព្រះដាក់ ដែលគិតថាខ្លួនមានជាប់ពាក់ព័ន្ធជាមួយករណីខាងលើ សូមមេត្តាដាក់ខ្លួនឲ្យនៅដាច់ដោយឡែក ហើយប្រសិនបើមានអាការៈមិនស្រួលខ្លួនឬសង្ស័យ សូមប្រញាប់ទៅធ្វើតេស្តរកមេរោគជាប្រញាប់។ នៅក្នុងពេលដ៏ខ្លីខាងមុខនេះ ក្រុមការងារនឹងរៀបចំឱ្យមានកន្លែងធ្វើតេស្តយកសំណាកនៅក្នុងស្រុកបន្ទាយស្រីផ្ទាល់តែម្តងផងដែរ ៕