ខេត្តព្រះសីហនុ៖ ថ្ងៃអង្គារ ទី២២ ខែមិថុនា ឆ្នាំ២០២១ ឯកឧត្តម ទៀ សុខា អមដំណើរ ឯកឧត្តម នាយឧត្តមនាវី ទៀ វិញ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងទឹក និងជាអគ្គលេខាធិការ នៃគណៈកម្មាធិការជាតិសន្តិសុខលម្ហសមុទ្រ ចុះត្រួតពិនិត្យសកម្មភាពក្រុមគ្រូពេទ្យជួរមុខ របស់កងទ័ពជើងទឹក ដែលកំពុងបំពេញបេសកកម្មក្នុងយុទ្ធនាការចាក់វ៉ាក់សាំង បង្ការជំងឺឆ្លងកូវីដ១៩(Covid-19) ដូសទី១ ជូនប្រជាពលរដ្ឋ រស់នៅក្នុងស្រុកព្រៃនប់ និងស្រុកកំពង់សិលា នៃខេត្តព្រះសីហនុ។

រដ្ឋបាលខេត្តសៀមរាប សូមជម្រាបជូនសាធារណជនឱ្យបានជ្រាបថា៖ ក្នុងព្រឹត្តិការណ៍ ការឆ្លងរាលដាលជំងឺកូវីដ-១៩ ចូលក្នុងសហគមន៍២០កុម្ភៈ នេះ រដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ថ្មី ចំនួន៣៨នាក់ និងស្លាប់ចំនួន១នាក់ នៅថ្ងៃទី២១ ខែមិថុនា ឆ្នាំ២០២១។ នៅថ្ងៃនេះដែរ មានករណីស្លាប់អ្នកវិជ្ជមានជំងឺកូវីដ-១៩ ចំនួន១នាក់ ឈ្មោះ ភូ វ៉ូច ភេទស្រី អាយុ៨០ឆ្នាំ អាសយដ្ឋាននៅភូមិវត្តដំណាក់ សង្កាត់សាលាកំរើក ក្រុងសៀមរាប ដែលវិជ្ជមានជំងឺកូវីដ-១៩ កាលពីថ្ងៃទី១៩ ខែមិថុនា ឆ្នាំ២០២១ និងបានស្លាប់ នៅថ្ងៃទី២១ ខែមិថុនា ឆ្នាំ២០២១ វេលាម៉ោង១១៖០០នាទី ដោយជំងឺរលាកសួត បង្កដោយមេរោគកូវីដ-១៩។ មកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន៦២៥នាក់ បានព្យាបាលជាសះ-ស្បើយចំនួន១៦៦នាក់ ស្លាប់៦នាក់ និង៤៥៣នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។

យោងតាមសេចក្ដីជូនដំណឹងរបស់រដ្ឋបាលខេត្តកំពង់ចាមបានឲ្យដឹងថា ក្នុងថ្ងៃទី២១មិថុនា រដ្ឋបាលខេត្តបានចាត់មន្ទីរសុខាភិបាលខេត្តយកសំណាកធ្វើតេស្ដរហ័សកូវីដ-១៩ លើអ្នកសង្ស័យចំនួន៦៩៤នាក់ ដោយទទួលបានលទ្ធផលវិជ្ជមានកូវីដ-១៩ចំនួន៥០នាក់។ ក្នុងនោះចំណោមអ្នកឆ្លងទាំងនោះមាននៅក្រុងកំពង់ចាមម្នាក់, ស្រុកកំពង់សៀម១០នាក់, ស្រុកព្រៃឈរ១៥នាក់, ស្រុកបាធាយ៨នាក់, ស្រុកស្រីសន្ធរ៧នាក់, ស្រុកជើងព្រៃ៧នាក់ និងស្រុកចំការលើ២នាក់។ រដ្ឋបាលខេត្តកំពង់ចាមបានអំពាវនាវឲ្យអ្នកដែលពាក់ពន្ធ័នឹងអ្នកជំងឺកូវីដ-១៩ទាំងនោះ ត្រូវទៅពិនិត្យសុខភាព និងយកសំណាកនៅមន្ទីរពេទ្យបង្អែកដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់។ ខេត្តកំពង់ចាមនៅថ្ងៃទី២១មិថុនា ក៏មានអ្នកជំងឺកូវីដ-១៩ចំនួន៥០នាក់ បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យផងដែរ។ ខេត្តកំពង់ចាមគិតត្រឹមថ្ងៃទី២១មិថុនាឆ្នាំ២០២១ មានអ្នកឆ្លងជំងឺកូវីដ-១៩សរុប១ពាន់៦១៤នាក់ ក្នុងនោះបានជាសះស្បើយចំនួន១ពាន់១១៤នាក់ និងនៅសល់៥០០នាក់កំពុងទទួលការព្យាបាល។

យោងតាមក្រសួងសុខាភិបាលនៅថ្ងៃទី២២មិថុនាឆ្នាំ២០២១ បានឲ្យដឹងថា នៅថ្ងៃ២១មិថុនា គេបានរកឃើញអ្នកវិជ្ជមានកូវីដ-១៩ចំនួន៦៧៨នាក់ ដែលក្នុងនោះអ្នកដំណើរមកពីបរទេសចំនួន៥៨នាក់។ ជាមួយគ្នានេះ ក្រសួងសុខាភិបាលប្រកាសថា នៅថ្ងៃ២១មិថុនា មានអ្នកជាសះស្បើយពីជំងឺកូវីដ-១៩ ចំនួន៧៦៣នាក់។ យោងតាមរបាយការណ៍របស់ក្រសួងសុខាភិបាល គិតមកដល់ថ្ងៃទី២០មិថុនាឆ្នាំ២០២១ កម្ពុជាមានអ្នកឆ្លងជំងឺកូវីដ-១៩ ចំនួន៤ម៉ឺន៤ពាន់១២៤នាក់ ក្នុងនោះបានព្យាបាលជាសះស្បើយចំនួន៣ម៉ឺន៨ពាន់៧៦៦នាក់ ។ ជាមួយគ្នានោះ ក្រសួងសុខាភិបាលបាននៅថ្ងៃនេះ មានអ្នកស្លាប់ចំនួនថ្មីចំនួន១៨នាក់ ដែលនាំឲ្យ កម្ពុជាមានអ្នកស្លាប់ដោយសារជំងឺកូវីដ-១៩ចំនួន៤៥៩នាក់ហើយ។

អ្នកដែលធ្លាប់បានទៅឬមានទំនាក់ទំនងជាមួយបុគ្គលិក ធ្វើការនៅ ធនាគារ ឈីប(CHIEF Bank) សាខាច្បារអំពៅត្រូវប្រញាប់ធ្វើចត្តាឡីស័ក និងតាមដានសុខភាព។ ធនាគារ ឈីប(CHIEF Bank) សាខាច្បារអំពៅ មានទីតាំង ស្ថិតនៅតាម បណ្ដោយផ្លូវជាតិលេខ១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។ អនុគណៈកម្មការស្រាវជ្រាវជំងឺកូវីដ-១៩ បានជូនដំណឹង ថាមាន អ្នកជំងឺកូវីដ-១៩ បានចូលទៅប្រើប្រាស់សេវានៅទីតាំងធនាគារ ឈីប(CHIEF Bank) សាខាច្បារអំពៅនេះ បន្ទាប់ពីធ្វើតេស្ដលើកទីមួយ ទៅលើអ្នកប៉ះពាល់នៅទីនោះរួច ជាលទ្ធផលរកឃើញអ្នកឆ្លងម្នាក់ទៀត។ សរុបទីតាំងនេះ មានអ្នកឆ្លងចំនួន ២ នាក់ គិតត្រឹមថ្ងៃទី២១ មិថុនា។ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវដល់ ប្រជាពលរដ្ឋ ដែលធ្លាប់បានទៅទីកន្លែងនិងពេលវេលានោះ ត្រូវដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ។