ក្រសួងសុខាភិបាលហាម ឃាត់ការចែកចាយ លក់ និងធ្វើតេស្តរហ័យរកអង់ទីគ័រ ការពារ ជំងឺកូវីដ-១៩ ដោយប្រើប្រាស់ តេស្តរហ័ស គ្មានលេខបញ្ជិកា និងគ្មាន ការទទួលស្គាល់ពីក្រសួងសុខាភិបាល។

រដ្ឋបាលខេត្តសៀមរាប បានជូនដំណឹងថា រដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ថ្មី ចំនួន ១១នាក់ នៅថ្ងៃទី២០មិថុនា ឆ្នាំ២០២១។ ក្នុងចំណោមអ្នកឆ្លងថ្មីទាំងនោះ ជាអ្នករស់នៅស្រុកសូទ្រនិគម២នាក់, ក្រុងសៀមរាប៦នាក់, ស្រុកប្រាសាទបាគងម្នាក់, និងមកពីប្រទេសថៃ២នាក់។ រដ្ឋបាលខេត្តសៀមរាប បានអំពាវនាវឲ្យប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ ត្រូវរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនោះ។ ប្រសិនបើមានការប្រែប្រួលសុខភាព ត្រូវផ្តល់ព័ត៌មានទៅអាជ្ញាធរមូលដ្ឋានជាបន្ទាន់ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។ គិតមកទល់នឹងថ្ងៃទី២០មិថុនាឆ្នាំ២០២១ ខេត្តសៀមរាបមានអ្នកឆ្លងជំងឺកូវីដ-១៩សរុប ចំនួន៥៨៧នាក់ បានព្យាបាលជាសះស្បើយចំនួន១៦៦នាក់ ស្លាប់៥នាក់ និង៤១៦នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។

រដ្ឋបាលខេត្តដំបងបានឲ្យដឹងថា នៅថ្ងៃទី២០មិថុនា ខេត្តបានរកឃើញមនុស្សករណីវិជ្ជមានកូវីដ-១៩ចំនួន១២នាក់បន្ថែមទៀត។ អ្នកឆ្លងថ្មីនោះ មាន៦នាក់ជាករណីឆ្លងក្នុងសហគន៍ និង៦នាក់ជាអ្នកមកពីប្រទេសថៃ។ ក្រោយការរកឃើញវិជ្ជមាន ពួកគេត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកនានាក្នុងខេត្តបាត់ដំបង។ ខេត្តបាត់ដំបងនៅថ្ងៃទី២០មិថុនាក៏មានអ្នកជាសះស្បើយពីជំងឺកូវីដ-១៩ចំនួន១២នាក់ និងមានអ្នកស្លាប់ម្នាក់បន្ថែមទៀត។ ខេត្តបាត់ដំបង គិតមកដល់ថ្ងៃទី២០មិថុនាឆ្នាំ២០២១ មានអ្នកឆ្លងជំងឺកូវីដ-១៩ សរុបចំនួន៦៤៤នាក់ ក្នុងនោះបានព្យាបាលជាសះស្បើយចំនួន៣៤៤នាក់ មានអ្នកស្លាប់៤នាក់ និងកំពុងសម្រាកព្យាបាលនៅតាមមន្ទីរពេទ្យនានាចំនួន២៩៦នាក់៕

កម្លាំងកងរាជអាវុធហត្ថរាជធានីភ្នំពេញ បានអន្តរាគមន៍ឃាត់ខ្លួនបុរសជនជាតិបរទេសម្នាក់ឡើងរថយន្ត ទៅកាន់ទីតាំងសម្រាកព្យាបាលជំងឺកូវីដ-១៩ វិញ បន្ទាប់ពីបុរសរូបនោះ បានរត់ចេញពីមណ្ឌលសម្រាកព្យាបាលជំងឺកូវីដ-១៩ នៃមន្ទីរពេទ្យព្យាបាលរោគរបេង ស្ថិតនៅក្នុងខណ្ឌបឹងកេងកង រាជធានីភ្នំពេញ។តាមប្រភពមន្រ្តីកងរាជអាវុធហត្ថ បានឲ្យដឹងថា ក្រោយទទួលសេចក្តីរាយការណ៍ពីក្រុមគ្រូពេទ្យថា ជនបរទេសម្នាក់ខាងលើបានរត់ចេញពីមណ្ឌលសម្រាកព្យាបាលជំងឺកូវីដ-១៩ នៅថ្ងៃទី២០ ខែមិថុនា ឆ្នាំ២០២១ ហើយសមត្ថកិច្ចក៏បានធ្វើការឃាត់ខ្លួនបញ្ជូនត្រឡប់មកមជ្ឈមណ្ឌលសម្រាកព្យាបាលជំងឺកូវីដ-១៩វិញបានភ្លាមៗផងដែរ៕

រដ្ឋបាលខេត្តព្រៃវែងបានបង្ហាញអត្តសញ្ញាណករណីអ្នកវិជ្ជមានកូវីដ-១៩ ចំនួន២៤នាក់បន្ថែមទៀតតាមរយៈការធ្វើតេស្តរហ័ស (Rapid Test) នៅថ្ងៃទី២០មិថុនាឆ្នាំ២០២១។ ក្នុងចំណោមអ្នកឆ្លងថ្មីទាំងនោះ មាននៅក្រុងព្រៃវែងចំនួន២នាក់, ស្រុកបាភ្នំ១១នាក់, ស្រុកពារាំង៤នាក់, ស្រុកពាមជរ២នាក់, ស្រុកកំពង់ត្របែក២នាក់, ស្រុកកញ្ជ្រៀច២នាក់ និង ស្រុកស្វាយអន្ទរ ម្នាក់។ បច្ចុប្បន្ន អ្នកវិជ្ជមានជំងឺកូវីដ-១៩ ទាំង២៤នាក់នោះ កំពុងសម្រាកព្យាបាលនៅមន្ទីរពេទ្យបង្អែកខេត្តនិងតាមមន្ទីរពេទ្យបង្អែកស្រុករបស់ពួកគេនីមួយៗ។ ក្នុងនោះដែរ រដ្ឋបាលខេត្តព្រៃវែង បានអំពាវនាវដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ឬប្រយោល ជាមួយបុគ្គលវិជ្ជមានកូវីដ-១៩ ខាងលើ និងដាក់ខ្លួនដាច់ដោយឡែកតាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក (៣ការពារ ៣កុំ)។ គិតមកដល់ថ្ងៃទី២០មិថុនាឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ចំនួន១ពាន់១៩០នាក់ ក្នុងនោះបានព្យាបាលជាសះស្បើយចំនួន៧១៣នាក់ មានអ្នកស្លាប់ចំនួន១៣នាក់ និងនៅសល់៤៦៣នាក់កំពុងទទួលការព្យាបាល។

យោងតាមលទ្ធផលនៃការវិភាគវត្ថុសំណាកដោយធ្វើតេសរហ័ស (Rapit Test ) រកឃើញជំងឺកូវីដ-១៩ នៅថ្ងៃទី២០មិថុនាឆ្នាំ២០២១ គេបានរកឃើញអ្នកឆ្លងជំងឺកូវីដ-១៩ចំនួន៦១នាក់។ អ្នកឆ្លងទាំង៦១នាក់នោះ រស់នៅស្រុកមណ្ឌលសីមា,ក្រុងខេមរភូមិន្ទ ខេត្តកោះកុង។ អ្នកជំងឺកូវីដ-១៩ទាំងនោះ ត្រូវបានបញ្ជូនទៅកាន់មន្ទីរពេទ្យបង្អែកខេត្តកោះកុង និងកន្លែងព្យាបាលមួយចំនួនទៀត។ ជាមួយគ្នានោះ អាជ្ញាធរខេត្តកំពុងបន្តស្វែងរកអ្នកពាក់ព័ន្ធជាមួយអ្នកវិជ្ជមានបន្ថែមទៀត។ អាជ្ញាធរខេត្តក៏បានបញ្ជាក់ថា នៅថ្ងៃទី២០មិថុនា មានអ្នកជំងឺកូវីដ-១៩ចំនួន២នាក់ បានាជាសះស្បើយផងដែរ។

ងាយស្រួល និងចំណេញពេលវេលាដល់អ្នកដំណើរ! ខេត្តសៀមរាប ╏ ចាប់ដំណើរការកម្មវិធីចុះឈ្មោះដោយខ្លួនឯងនៅច្រកព្រំប្រទល់ខេត្ត

យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី២០មិថុនាឆ្នាំ២០២១ កម្ពុជាបានចាក់វ៉ាក់សាំងជូនប្រជាពលរដ្ឋបានចំនួន៣លាន៣សែន៦ម៉ឺន៦ពាន់២០៧២នាក់ហើយដែលស្មើនឹង៣៣,៦៦%នៃចំនួនប្រជាជនដែលគ្រោងនឹងចាក់ជាង១០លាននាក់ ក្នុងនោះបានចាក់វ៉ាក់សាំងទី២ដូសរួចមានចំនួន២លាន៧សែន៣ម៉ឺន២ពាន់៣៧៧នាក់។ ដោយឡែក របាយការណ៍ក្រសួងការពារជាតិ បានឲ្យដឹងថា ចាប់ពីថ្ងៃទី១ដល់ថ្ងៃទី២០មិថុនាឆ្នាំ២០២១ ក្រុមការងារចាក់វ៉ាក់សាំងរបស់ក្រសួងការពារជាតិ បានចាក់ជូនប្រជាពលរដ្ឋនៅអតីតតំបន់ក្រហមក្នុងរាជធានីភ្នំពេញបានចំនួន១លាន២ម៉ឺន៥ពាន់៨៦១នាក់ ខណៈចាក់លើកទី២ បានចំនួន៩៨ម៉ឺន៦ពាន់២៨៥នាក់។

កណ្តាល ៖ លោក នុត ពុធដារ៉ា អភិបាលរងខេត្តកណ្តាល រួមជាមួយលោកប្រធានមន្ទីរ គណៈអភិបាលស្រុក មន្ត្រីរាជការ នៅថ្ងៃអាទិត្យ ទី២០ ខែមិថុនា ឆ្នាំ២០២១ បាននាំយកអំណោយទៅចែកជូនបងប្អូនប្រជាពលរដ្ឋដែលធ្វើចត្តាឡីស័កនៅតាមផ្ទះ ក្នុងតំបន់ផ្សារព្រែកតាមាក់ ព្រមទាំងចុះពិនិត្យការរៀបចំផ្សារព្រែកតាមាក់ ដើម្បីដាក់ជូនបងប្អូនលក់ដូរ។ បន្ទាប់មក លោកអភិបាលរងខេត្ត ក៏បានចុះពិនិត្យការរៀបចំទីតាំងមណ្ឌលចត្តាឡីស័ក នៅវិទ្យាល័យហ៊ុនសែន ខ្សាច់កណ្តាល ៕ ដោយ / គ្រី សម្បត្តិ