មណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រស្ថិតក្រោមការព្យាបាលយ៉ាងយកចិត្តទុកដាក់ ការផ្ដល់អាហារបរិភោគគ្រប់គ្រាន់ ឆ្ងាញ់ៗ ថ្នាំពេទ្យ និងការចុះពិនិត្យសុខភាពជារៀងរាល់ថ្ងៃរបស់ក្រុមគ្រូពេទ្យរបស់យើង អ្នកជំងឺបានជាសះស្បើយជាបន្តបន្ទាប់ៗ៕

រដ្ឋបាលខេត្តស្វាយរៀង នៅថ្ងៃទី៣ មិថុនា បានជូនដំណឹងថា មានបុគ្គលចំនួន ៨នាក់ រួមមានឈ្មោះ សោម ស៊ុន ភេទស្រី អាយុ ៣៥ឆ្នាំ, សុន រិទ្ធី ភេទប្រុស, កង ថា ភេទស្រី, មួន សាវី ភេទស្រី អាយុ ៥៩ឆ្នាំ, មុំ នីរឿន ភេទប្រុស អាយុ ៦១ឆ្នាំ, ជុំ ស្រីណុច ភេទស្រី អាយុ ២៩ឆ្នាំ, ញុញ ស្រីណា ភេទស្រី អាយុ ១៧ឆ្នាំ, និងឈ្មោះ អូន រ៉ិត ភេទស្រី អាយុ ៤០ឆ្នាំ បានឆ្លងជំងឺកូវីដ-១៩។ ពួកគេជាអ្នកលក់ដូរនៅខាងមុខរោងចក្រស៊ីកូ តំបន់មេនហាតធេន គិតចាប់ពីថ្ងៃទី២០ ខែឧសភា ឆ្នាំ២០២១មក។ រដ្ឋបាលខេត្តបានអំពាវនាវឲ្យប្រជាពលរដ្ឋ កម្មករ កម្មការិនីដែលមានពាក់ព័ន្ធទាំងផ្ទាល់ និងប្រយោល ជាមួយអ្នកវិជ្ជមានកូវីដ-១៩ទាំងនោះ…

រដ្ឋបាលខេត្តដំបងបានឲ្យដឹងថា នៅថ្ងៃទី២មិថុនា ខេត្តបានរកឃើញមនុស្សចំនួន ៦៩នាក់បន្ថែមទៀតវិជ្ជមានជំងឺកូវីដ-១៩។ ក្នុងចំណោមអ្នកឆ្លងថ្មីនោះ មាន៥០នាក់ជាប្រជាពលរដ្ឋ កម្មករ អាជីវករ និងបុគ្គលិកកាស៊ីណូ នៅស្រុកកំរៀង, នៅស្រុករតនមណ្ឌលចំនួន៤នាក់, នៅស្រុកបាណន់ម្នាក់, ស្រុកបវេល២នាក់, នៅក្រុងបាត់ដំបង់៤នាក់, ស្រុកសំពៅលូនម្នាក់, ស្រុកថ្មគោល៤នាក់, ស្រុកម៉ោងឬស្សីម្នាក់, មកពីខេត្តកំពង់ឆ្នាំងម្នាក់ និងពីខេត្តប៉ៃលិនម្នាក់។ ក្រោយការរកឃើញវិជ្ជមាន ពួកគេត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកនានាក្នុងខេត្តបាត់ដំបង។ ខេត្តបាត់ដំបងនៅថ្ងៃទី២មិថុនាក៏មានអ្នកជាសះស្បើយពីជំងឺកូវីដ-១៩ចំនួន១២នាក់ផងដែរ។ ខេត្តបាត់ដំបង គិតមកដល់ថ្ងៃទី២មិថុនាឆ្នាំ២០២១ មានអ្នកឆ្លងជំងឺកូវីដ-១៩ សរុបចំនួន៣០៣នាក់ ក្នុងនោះបានព្យាបាលជាសះស្បើយ ចំនួន១០៥នាក់ មានអ្នកស្លាប់២នាក់ និងកំពុងសម្រាកព្យាបាលនៅខេត្តបាត់ដំបងចំនួន១៩៦នាក់ និង២នាក់ត្រូវបានបញ្ជូនទៅព្យាបាលនៅខេត្តបន្ទាយមានជ័យ៕

អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២មិថុនាឆ្នាំ២០២១ បានជូនដំណឹងថា មានអ្នកជំងឺកូវីដ-១៩ បានទៅមើលម្តាយឈឺ ដែលកំពុងសម្រាកព្យាបាល ឧត្តមភាពដែលមានទីតាំងស្ថិតនៅផ្លូវជាតិលេខ ៥ សង្កាត់ ព្រែកព្នៅ ខណ្ឌព្រែកព្នៅ ចាប់ពីថ្ងៃទី ២៩ឧសភា ដល់ថ្ងៃទី ២មិថុនា ឆ្នាំ២០២១។ អនុគណៈកម្មការបានបញ្ជាក់ថា អ្នកប៉ះពាល់ មិនទាន់បានទៅយកសំណាកនៅឡើយទេ ។ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវដល់ប្រជាពលរដ្ឋ ដែលធ្លាប់បានទៅទីកន្លែង និងពេលវេលានោះ ត្រូវដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងមានហានិភ័យនោះ។

រដ្ឋបាលខេត្តព្រៃវែង បានបង្ហាញអត្តសញ្ញាណករណីអ្នកវិជ្ជមានកូវីដ-១៩ ចំនួន ៤៥នាក់បន្ថែមទៀតតាមរយៈការធ្វើតេស្តរហ័ស (Rapid Test) នៅថ្ងៃទី២មិថុនាឆ្នាំ២០២១។ ក្នុងចំណោមអ្នកឆ្លងថ្មីទាំង៤៥នាក់នោះ រួមមាន ទៅពីរាជធានីភ្នំពេញចំនួន៤នាក់, មកពីប្រទេសថៃម្នាក់, កម្មករនៅខេត្តកណ្ដាលចំនួន៩នាក់, នៅស្រុកមេសាងម្នាក់, និង៣០នាក់ទៀតនៅស្រុកព្រះស្ដេច។ អ្នកវិជ្ជមានជំងឺកូវីដ-១៩ទាំងនោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុករបស់ខ្លួននីមួយៗ។ ក្នុងនោះដែរ រដ្ឋបាលខេត្តព្រៃវែង បានអំពាវនាវដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ឬប្រយោល ជាមួយបុគ្គលវិជ្ជមានកូវីដ-១៩ ខាងលើ និងដាក់ខ្លួនដាច់ដោយឡែកតាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក (៣ការពារ ៣កុំ)។ គិតមកដល់ថ្ងៃទី២មិថុនាឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ចំនួន៥២០នាក់ ក្នុងនោះបានព្យាបាលជាសះស្បើយចំនួន២១៥នាក់ មានអ្នកស្លាប់ចំនួន៥នាក់ និងនៅសល់៣០០នាក់កំពុងទទួលការព្យាបាល។