យោងតាមសេចក្តីប្រកាសព័ត៌មានរដ្ឋបាលខេត្តកំពង់ចាម នៅថ្ងៃទី២ មិថុនា ឆ្នាំ២០២១ បានបង្ហាញអត្តសញ្ញាណករណីស្លាប់ដោយសារជំងឺកូវីដ-១៩ ។ សពមានឈ្មោះ ស៊ឹម ឈីម អាយុ ៤៥ឆ្នាំ មុខរបរជាកសិករ រស់នៅភូមិត្រពាំងឈូក ឃុំសំពងជ័យ ស្រុកជើងព្រៃ ខេត្តកំពង់ចាម បានស្លាប់នៅម៉ោង៧យបប់ថ្ងៃទី១មិថុនាឆ្នាំ២០២១ ដោយសារជំងឺកូវីដ-១៩។ ក្នុងសេចក្តីប្រកាសព័ត៌មានបានឲ្យដឹងថា នៅថ្ងៃទី២៥ឧសភា ឆ្នាំ២០២១ ស្ត្រីរូបនោះបានធ្វើតេស្តកូវីដ-១៩ ទទួលបានលទ្ធផលវិជ្ជមានកូវីដ-១៩ ដោយសារបាន ប៉ះពាល់ដោយផ្ទាល់នឹងកូនស្រី វិជ្ជមានកូវីដ-១៩ ជាកម្មការិនីរោងចក្រខាលីនតុន។ ស្ត្រីរូបនោះត្រូវបានបញ្ជូនមកសម្រាកនៅមន្ទីរពេទ្យមេគង្គកំពង់ចាម ហើយស្ត្រីរូបនោះមានប្រវត្តិព្យាបាលជំងឺរីកបេះដូង។ ដោយការវិវត្តនៃជំងឺចេះតែធ្ងន់ធ្ងរឡើង ហើយស្ថានភាពអ្នកជំងឺហត់ដង្ហក់ខ្លាំងដែលតម្រូវឱ្យក្រុមគ្រូពេទ្យ ជួយសង្គ្រោះតាមលក្ខណៈបច្ចេកទេសយ៉ាងយកចិត្តទុកដាក់ រួមទាំងការប្រើម៉ាស៊ីនជំនួយដង្ហើមផងនោះក៏ នៅតែមិនអាចជួយសង្គ្រោះអ្នកជំងឺបាន។ អ្នកជំងឺខាងលើ បានស្លាប់បាត់បង់ជីវិតនៅថ្ងៃទី១ មិថុនា ឆ្នាំ២០២១។ ជាការសន្និដ្ឋានរបស់ក្រុមគ្រូពេទ្យ ស្ត្រីជនជាតិខ្មែរ ឈ្មោះ ស៊ឹម ឈីម អាយុ ៤៥ឆ្នាំ បានស្លាប់ដោយរោគវិនិច្ឆ័យរលាកសួតធ្ងន់ធ្ងរ ដោយសារវីរុសកូវីដ-១៩ និងមានជំងឺរីកបេះដូង។ យោងតាមក្រសួងសុខាភិបាលក្នុងរយៈពេល២៤ម៉ោងចុងក្រោយមានអ្នកស្លាប់ដោយសារជំងឺកូវីដ-១៩ចំនួន១០នាក់។ គិតត្រឹមព្រឹកថ្ងៃទី២មិថុនានេះ កម្ពុជាមានអ្នកស្លាប់ដោយសារជំងឺកូវីដ-១៩ចំនួន២៣០នាក់ហើយ។

យោងតាមសេចក្ដីជូនដំណឹងរបស់រដ្ឋបាលខេត្តកំពង់ចាមបានឲ្យដឹងថា ក្នុងថ្ងៃទី១មិថុនា រដ្ឋបាលខេត្តបានចាត់មន្ទីរសុខាភិបាលខេត្តយកសំណាកធ្វើតេស្ដរហ័សកូវីដ-១៩ លើអ្នកសង្ស័យចំនួន៣ពាន់៣២៣នាក់ ដោយទទួលបានលទ្ធផលវិជ្ជមានកូវីដ-១៩ចំនួន៣៣នាក់។ ក្នុងនោះចំណោមអ្នកឆ្លងទាំងនោះមាននៅស្រុកកំពង់សៀម៤នាក់, ស្រុកព្រៃឈរម្នាក់, ស្រុកបាធាយ៩នាក់, និងស្រុកជើងព្រៃ១៩នាក់។ អ្នកជំងឺទាំង៣៣នាក់នោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យមេគង្គកំពង់ចាម និងវិទ្យាល័យព្រះសីហនុ។ ជាមួយគ្នានោះ រដ្ឋបាលខេត្តកំពុងបន្តស្រាវជ្រាវរកអ្នកដែលប៉ះពាល់ដោយផ្ទាល់ និងប្រយោលបន្ថែមទៀត។ រដ្ឋបាលខេត្តកំពង់ចាមបានអំពាវនាវឲ្យអ្នកដែលពាក់ពន្ធ័នឹងអ្នកជំងឺកូវីដ-១៩ទាំង៣៣នាក់នោះ ត្រូវទៅពិនិត្យសុខភាព និងយកសំណាកនៅមន្ទីរពេទ្យបង្អែកដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់។ ជាមួយគ្នានោះ រដ្ឋបាលខេត្តបានឲ្យដឹងថា នៅថ្ងៃទី១មិថុនា ខេត្តកំពង់ចាមមានអ្នកជាសះស្បើយពីជំងឺកូវីដ-១៩ចំនួន៣៧នាក់ផងដែរ។ គិតត្រឹមថ្ងៃទី១មិថុនាឆ្នាំ២០២១ ខេត្តកំពង់ចាមមានអ្នកឆ្លងជំកូវីដ-១៩ចំនួន៩១៤នាក់ ក្នុងនោះបានព្យាបាលជាសះស្បើយចំនួនា៣៤៧នាក់ និងនៅសល់៥៦៧នាក់កំពុងទទួលការព្យាបាល។

ខេត្តបន្ទាយមានជ័យ៖ អ្នកជំងឺកូវីដ១៩ បានជាសះស្បេីយ សរុបចំនួន ១០៧នាក់ (ស្រី ៥៤នាក់) នៅថ្ងៃទី០២ មិថុនា ឆ្នាំ២០២១នេះ និងរកឃើញអ្នកឆ្លងថ្មីចំនួន ២៥ នាក់។

កំពត ៖ នៅ ព្រឹក ថ្ងៃទី ០២ ខែមិថុនា ឆ្នាំ ២០២១ ឯកឧត្តម ជាវ តាយ អភិបាលនៃគណៈអភិបាលខេត្ត ឯកឧត្តម ជឹង ផល្លា ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំមួយចំនួនទៀត បានចូលរួមទទួល អំណោយសប្បុរសធម៌ របស់ថ្នាក់ដឹកនាំ និងអាជីវករ ដែលបាននាំយកមកប្រគល់ជូនរដ្ឋបាលខេត្តកំពត ដើម្បីចូលរួមបង្ការទប់ស្កាត់ ការឆ្លងរីករាលដាលជំងឺកូវីដ-១៩ក្នុងសហគមន៍ ជាពិសេស ក្នុងអំឡុងពេល នៃ ការផ្ទុះ ឆ្លង ជំងឺ កូ វីដ -១៩ ថ្មីៗនេះ ។ អំណោយរបស់សប្បុរសជនរួមមាន ៖-ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយុទ្ធពលខេមរៈភូមិន្ទ និងជាមេបញ្ជាការកងទ័ពជើងគោក និងលោកជំទាវ ពេជ្រ ច័ន្ទមុន្នី បានជូនឧបករណ៍ធ្វើតេស្តរហ័សកូវីដ-១៩ចំនួន ៣០០០ដើម -ឯកឧត្តមបណ្ឌិត ប៉ែន ស៊ីម៉ន ប្រធានគណៈកម្មការទី១០ នៃរដ្ឋសភា ជូនឧបករណ៍ធ្វើតេស្តរហ័សកូវីដ-១៩ ចំនួន…

ព្រឹត្តិការណ៍ថ្មីៗ ប្រចាំថ្ងៃទី០២ មិថុនា​ឆ្នាំ២០២១៖ របាយការអ្នកឆ្លងកូវីដសម្រាប់ថ្ងៃទី02 ខែមិថុនា ឆ្នាំ២០២១ -ឆ្លងថ្មី 750 ករណី -ឆ្លងក្នុងសហគមន៏ 716 នាក់ -នាំចូលពីបរទេស 34 នាក់ -ជាសះស្បើយ 653 នាក់ -ស្លាប់ 10 នាក់ សូមជម្រាបជូនថាចំនួនអ្នកឆ្លងកូវីតសរុបទូទាំងប្រទេស គិតត្រឹមថ្ងៃទី០២ ខែ មិថុនា ឆ្នាំ២០២១ – អ្នកឆ្លងសរុប 31.460 នាក់ – អ្នកជាសះស្បើយ 24.042 នាក់ -អ្នកស្លាប់ 230 នាក់។

យោងតាមក្រសួងសុខាភិបាលនៅថ្ងៃទី២មិថុនាឆ្នាំ២០២១ បានឲ្យដឹងថា នៅថ្ងៃ១មិថុនា គេបានរកឃើញអ្នកវិជ្ជមានកូវីដ-១៩ចំនួន៧៥០នាក់ ដែលក្នុងនោះអ្នកដំណើរមកពីបរទេសចំនួន៣៤នាក់។ ជាមួយគ្នានេះ ក្រសួងសុខាភិបាលប្រកាសថា នៅថ្ងៃ១មិថុនា មានអ្នកជាសះស្បើយពីជំងឺកូវីដ-១៩ ចំនួន៦៥៣នាក់។ យោងតាមរបាយការណ៍របស់ក្រសួងសុខាភិបាល គិតមកដល់ថ្ងៃទី១មិថុនាឆ្នាំ២០២១ កម្ពុជាមានអ្នកឆ្លងជំងឺកូវីដ-១៩ ចំនួន៣ម៉ឺន១ពាន់៤៦០នាក់ ក្នុងនោះបានព្យាបាលជាសះស្បើយចំនួន២ម៉ឺន៤ពាន់៤២នាក់ ។ ជាមួយគ្នានោះ ក្រសួងសុខាភិបាលបាននៅថ្ងៃនេះ មានអ្នកស្លាប់ចំនួនថ្មីចំនួន១០នាក់ ដែលនាំឲ្យ កម្ពុជាមានអ្នកស្លាប់ដោយសារជំងឺកូវីដ-១៩ចំនួន២៣០នាក់ហើយ។