អាជ្ញាធរនៃរដ្ឋបាលខេត្តបាត់ដំបង បានសម្រចក្នុងការបញ្ចប់នូវការបីទខ្ទប់នូវទីតាំងខ្នងផ្ទះប្រជាពលរដ្ឋ ចំនួន០៣ខ្នងកន្លងមកស្ថិតនៅចំណុចភូមិទួលតាថុន ឃុំជ្រៃ ស្រុកមោងឫស្សី ក្នុងភូមិសាស្ត្រ នៃ ខេត្តរបស់ខ្លួន នៅថ្ងៃទី២៨ខែឧសភាឆ្នាំ២០២១។        ការសម្រេចពីការបញ្ចប់នូវការបិទខ្ទប់ទីតាំងខ្នងផ្ទះចំនួន០៣ខ្នងនិងបើកឡើងវិញ ក្នុងភូមិសាស្ត្រខាងលើនេះ គឺធ្វើឡើងដោយយោងសេចក្តីសម្រេច រដ្ឋបាលខេត្តបាត់ដំបង លេខ ១១០ /២១ សសរ.ចុះថ្ងៃទី២៨ ខែឧសភា ឆ្នាំ២០២១ ពីការបញ្ចប់នូវការបិទខ្ទប់និងបើកឡើងវិញ នូវ ខ្នងផ្ទះចំនួន០៣ខ្នងខាងលើដោយមានចែងនៅក្នុងសេចក្តីសម្រេចភ្ជាប់ជូនខាងក្រោមនេះ៖

    រដ្ឋបាលខេត្តបាត់ដំបង បានចេញសេចក្តីប្រកាសព័ត៌មាន និង ជូនដំណឹង នៅល្ងាច ថ្ងៃទី២៨ ខែឧសភាឆ្នាំ២០២១នេះ ពីករណីរកឃើញ វិជ្ជមានជម្ងឺកូវីដ-19 ចំនួន១១នាក់ ថ្មីបន្ថែមទៀត ក្នុងនោះពាក់ព័ន្ធព្រឹត្តិការណ៍សហគមន៍២០កុម្ភៈចំនួន០១នាក់និង ជាពលករវិលត្រឡប់ពីប្រទេសថៃ ចំនួន១០នាក់ និងបានព្យាបាលអ្នកជម្ងឺ ឲ្យជាសះស្បើយ ចំនួន០២នាក់ ត្រូវបានអនុញ្ញាតិឲ្យវិលត្រឡប់ទៅលំនៅដ្ឋានរបស់ខ្លួនវិញផងដែរ។       ដោយឡែកករណីអ្នកវិជ្ជមានកូវីដ-19ខាងលើនេះត្រូវបានបញ្ជូនឲ្យសម្រាកព្យាបាលជម្ងឺនៅមន្ទីរពេទ្យបង្អែកខេត្ត និង មន្ទីរពេទ្យបង្អែកស្រុក។      សូមបញ្ជាក់ផងដែរថា៖ តាំងពីចាប់ផ្តើមករណីផ្ទុះជម្ងឺកូវីដ-19កន្លងមក ខេត្តបាត់ដំបង មានអ្នកជម្ងឺកូវីដ-19 សរុបចំនួន១៩៩នាក់ ក្នុងនោះ បានព្យាបាលឲ្យជាសះស្បើយ ចំនួន៧២នាក់,ស្លាប់២ករណី បានបញ្ជូនឲ្យទៅសម្រាកព្យាបាលនៅខេត្តបន្ទាយមានជ័យ ចំនួន០២នាក់ និងកំពុងសម្រាកព្យាបាលជម្ងឺនៅតាមមន្ទីរពេទ្យបង្អែកនានាសរុបចំនួន ១២៣នាក់។       ដោយឡែកពាក់ព័ន្ធនិងករណីរកឃើញវិជ្ជមានកូវីដ-19ខាងលើនេះ ត្រូវបានអាជ្ញាធរនៃរដ្ឋបាលខេត្តបាត់ដំបង ធ្វើការជូនដំណឹងនិងអំពាវនាវដល់អាជ្ញាធរមូលដ្ឋានត្រូវមានវិធានការសុខាភិបាលឲ្យបានម៉ឺងម៉ាត់ និង អ្នកពាក់ព័ន្ធជាមួយអ្នកជម្ងឺឲ្យចូលខ្លួនធ្វើតេស្តដើម្បីយកវត្ថុសំណាកត្រួតពិនិត្យមើលសុខភាពនិងត្រូវដាក់ខ្លួនឲ្យនៅដាច់ដោយឡែកដើម្បីតាមដានត្រួតពិនិត្យមើលសុខភាពក្នុងករណីសង្ស័យ ត្រូវរាយការណ៍ជូនអាជ្ញាធរ និង គ្រូពេទ្យជាបន្ទាន់ ដើម្បីធ្វើការព្យាបាល៕

   នៅថ្ងៃទី២៨ ខែឧសភាឆ្នាំ២០២១នេះរដ្ឋបាលខេត្តបាត់ដំបងបានចេញសេចក្តីសម្រេចបិទខ្ទប់នូវទីតាំងខ្នងផ្ទះចំនួន២០ខ្នង ស្ថិតក្នុងភូមិសាស្ត្រឃុំតាម៉ឺន និងឃុំតាពូង ស្រុកថ្មគោល ខេត្តបាត់ដំបង ដោយបានរកឃើញ ករណីឆ្លងជម្ងឺកូវីដ-19 ចំនួន០២នាក់ រស់នៅក្នុងឃុំទាំង០២ខាងលើ និងបានបិទខ្ទប់ខ្នងផ្ទះចំនួន២០ខ្នង ដែលពាក់ព័ន្ធអ្នកជម្ងឺទាំង០២នាក់។ ហើយស្ត្រីដែលឆ្លងជម្ងឺកូវីដ-19មានឈ្មោះ១.ឈ្មោះធឿន សាវន ភេទស្រី អាយុ៦៥ឆ្នាំ និង២.ឈ្មោះ វិន សាវឿន ភេទស្រី អាយុ ៤៣ឆ្នាំ ដែលមានទីលំនៅនិងរស់នៅ ក្នុងភូមិអង់ជើង ឃុំតាម៉ឺន និង ភូមិតាពូងត្បូង ឃុំតាពូង ស្រុកថ្មគោល ខេត្តបាត់ដំបង និងបានពាក់ព័ន្ធជាមួយខ្នងផ្ទះចំនួន២០ខ្នងដែលស្ថិតនៅក្នុងឃុំចំនួន០២ និងភូមិចំនួន០៥ រួមមាន៖ ភូមិអង់ជើង,ភូមិតាពូងជើង ក្នុងឃុំតាម៉ឺន។ និងភូមិអង់ត្បូង, ភូមិតាពូងត្បូង និងភូមិកសិកម្ម ក្នុងឃុំតាពូង។        ការបិទខ្ទប់នូវទីតាំងខាងលើនេះដោយយោងសេចក្តីសម្រេច លេខ ១១១/២១សសរ. ចុះថ្ងៃទី២៨ខែឧសភាឆ្នាំ២០២១នេះ ស្តីពីការសម្រេចបិទខ្ទប់នូវទីតាំងខ្នងផ្ទះចំនួន២០ខ្នង ស្ថិតនៅក្នុងភូមិទាំង៥ក្នុងឃុំចំនួន០២នៃភូមិសាស្ត្រស្រុកថ្មគោលខេត្តបាត់ដំបងរហូតដល់មានការជូនដំណឹងជាថ្មី។        ការបិទខ្ទប់ជាបណ្តោះអាសន្នទីតាំងខាងលើនេះ គឺតម្រូវឲ្យអាជ្ញាធរមូលដ្ឋាននៅទីតាំងពាក់ព័ន្ធខាងលើត្រូវមានវិធានការហ៊ុព័ទ្ធនូវទីតាំងពាក់ព័ន្ធទាំងនេះ ក្នុងការហាមការចេញ-ចូលនៅទីតាំងទាំងនោះនិងត្រូវធ្វើការស្រាវជ្រាវរកអ្នកដែលពាក់ព័ន្ធជាមួយបុគ្គលខាងលើទាំងផ្ទាល់-ប្រយោល ដើម្បីយកទៅធ្វើចត្តាឡីស័ក និងចុះយកវត្ថុសំណាកតេស្ត រកមេរោគកូវីដ-19៕