យោងតាមកងរាជអាវុធហត្ថរាជធានីភ្នំពេញ នៅថ្ងៃទី២៧ ឧសភានេះ បានឲ្យដឹងថា កម្លាំងអាវុធហត្ថរាជធានីភ្នំពេញ បានបញ្ជូន បុរសម្នាក់ ដែលបានរត់ចេញពីមណ្ឌលព្យាបាល កូវីដ-១៩ ទៅកាន់ ពន្ធនាគារព្រៃស នៅល្ងាចថ្ងៃទី២៦ ឧសភា ឆ្នាំ២០២១។ បុរសរូបនោះ បានរត់ចេញពីមណ្ឌលព្យាបាល កូវីដ-១៩ កាលពីថ្ងៃទី២២ឧសភា ឆ្នាំ២០២១ និងត្រូវបានចៅក្រមស៊ើបសួរ រស់ សាម៉ឺឌី ចេញដីការបង្គាប់ឲ្យឃុំខ្លួននៅថ្ងៃទី២៦ ខែឧសភា ឆ្នាំ២០២១ របស់ បន្ទាប់ពីបុរសរូបនោះ ត្រូវបានព្យាបាលជាសះស្បើយពីជំងឺកូវីដ-១៩រួចរាល់។ យោងតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ ការរត់គេចចេញពីមណ្ឌលព្យាបាល ត្រូវប្រឈមនឹង ការផ្តន្ទាទោសដាក់ពន្ធាគាពី១ឆ្នាំ ទៅ ៥ឆ្នាំ និងពិន័យជាប្រាក់ពី ៥លានរៀល ទៅ ២០លានរៀល តែបើ មានការចម្លងដល់អ្នកដទៃ នឹងត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ ជាមិនខាន។ អាវុធហត្ថរាជធានីភ្នំពេញ បានអំពាវនាវ ដល់ ប្រជាពលរដ្ឋដែល វិជ្ជមានជំងឺកូវីដ-ត្រូវចូលរួមអនុវត្តតាមវិធានការព្យាបាល របស់ក្រសួងសុខាភិបាល ដោយការ អត់ធ្មត់ដើម្បីឲ្យជាសះស្បើយ ជៀសវាងរត់គេចដែលអាចនាំទុក្ខដល់សុខភាពខ្លួនផង នាំទុក្ខដល់អ្នកដ៏ទៃក្នុងក្រុមគ្រួសារនិងសហគមន៍ផង…

យោងតាមសេចក្ដីជូនដំណឹងរបស់រដ្ឋបាលខេត្តកំពត បានឲ្យដឹងថា ថ្ងៃទី២៦ឧ សភា គេបានរកឃើញករណីវិជ្ជមានវីរុសកូវីដ-១៩ លើចំនួន ៧នាក់។ ក្នុងចំណោមអ្នកវិជ្ជមានថ្មីនោះ មានអ្នករស់នៅស្រុកអង្គរជ័យចំនួន៤នាក់ និងស្រុកទឹកឈូចំនួន៣នាក់។ ជាមួយគ្នានោះ ដ្ឋបាលខេត្តកំពតបានស្រាវជ្រាវរកឃើញអ្នកពាក់ពន្ធ័១៧នាក់ ដែលបានប៉ះពាល់ផ្ទាល់ជាមួយអ្នកវិជ្ជមានកូវីដ-១៩ទាំង៧នាក់នោះ។ រដ្ឋបាលខេត្តកំពត បានអំពាវនាវដល់អ្នកផ្សេងទៀត ដែលមានពាក់ពន្ធ័ ឬដឹងខ្លួនថាបានប៉ះពាល់ដោយផ្ទាល់ ឬដោយប្រយោលជាមួយអ្នកវិជ្ជមានកូវីដ-១៩ទាំងនោះ ត្រូវធ្វើចត្តាឡីស័កនៅតាមផ្ទះរយៈពេល១៤ថ្ងៃ។ ប្រសិនបើមានបញ្ហាសុខភាពប្រែប្រួល ត្រូវផ្ដល់ព័ត៌មានទៅអាជ្ញាធរមូលដ្ឋាន និងប្រញាប់ទៅធ្វើតេស្ដនៅមន្ទីរពេទ្យបង្អែកជាបន្ទាន់។

អាជ្ញាធរខេត្តកំពង់ធំ បានជូនដំណឹងថា គេបានបន្តរកឃើញអ្នកឆ្លងជំងឺកូវីដ-១៩ ចំនួន ២២នាក់នៅថ្ងៃទី២៦ ឧសភា។ ក្នុងចំណោមអ្នកឆ្លងថ្មីទាំង ២២នាក់នោះ មានកម្មកររោងចក្រចំនួន៥នាក់ , អ្នកប៉ះពាល់ជាមួយកម្មករចំនួន ១៦នាក់ និងម្នាក់ទៀតជាអ្នកដំណើរទៅពីរាជធានីភ្នំពេញ។ ក្នុងចំណោមអ្នកឆ្លងទាំង២២នាក់នៅ ជាអ្នករស់នៅស្រុកតាំងគោកចំនួន២០នាក់, ស្រុកស្ទោងម្នាក់ និងស្រុកប្រាសាទសំបូរម្នាក់។ រដ្ឋបាលខេត្តកំពង់ធំ បានអំពាវនាវដល់ ប្រជាពលរដ្ឋទាំងអស់ ដែលបានប៉ះពាល់ផ្ទាល់ និងប្រយោលជាមួយអ្នកជំងឺកូវីដ-១៩ទាំងនោះ ត្រូវប្រញាប់ធ្វើចត្តាឡីស័ក និងប្រញាប់ទំនាក់ទំនងទៅអាជ្ញារមូលដ្ឋាន ដើម្បីទៅធ្វើតេស្តរកមេរោគកូវីដ-១៩ នៅតាមមណ្ឌលសុខភាព ឬមន្ទីរពេទ្យបង្អែកដែលនៅជិតបំផុត។ ខេត្តកំពង់ធំនៅថ្ងៃ១៤ឧសភាក៏បានអនុញ្ញាតឲ្យអ្នកជាសះស្បើយពីជំងឺកូវីដ-១៩ចំនួន៤នាក់ត្រឡប់ទៅផ្ទះវិញផងដែរ។ គិតមកដល់ថ្ងៃទី២៦ឧសភាឆ្នាំ២០២១ ខេត្តកំពង់ធំបានរកឃើញអ្នកវិជ្ជមានកូវីដ-១៩ចំនួន២១០នាក់ ក្នុងនោះបានព្យាបាលជាសះស្បើយចំនួន៨២៨នាក់ និងនៅសល់១២៨នាក់កំពុងសម្រាកព្យាបាល។

រដ្ឋបាលខេត្តព្រៃវែងបានបង្ហាញអត្តសញ្ញាណករណីអ្នកវិជ្ជមានកូវីដ-១៩ ចំនួន ២៥នាក់បន្ថែមទៀតតាមរយៈការធ្វើតេស្តរហ័ស (Rapid Test) នៅថ្ងៃទី២៦ ឧសភាឆ្នាំ២០២១។ ក្នុងចំណោមអ្នកឆ្លងថ្មីទាំង ២៥នាក់នោះ រួមមាន នៅក្នុងស្រុកពាមជរចំនួន ១៥នាក់, ស្រុកពារាំងចំនួន ២នាក់, ស្រុកព្រះស្ដេចចំនួន ៣នាក់ និងស្រុកមេសាងចំនួន ៥នាក់។ អ្នកវិជ្ជមានជំងឺកូវីដ-១៩ទាំងនោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុករបស់ខ្លួននិមួយៗ។ ក្នុងនោះដែរ រដ្ឋបាលខេត្តព្រៃវែង បានអំពាវនាវដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ឬប្រយោល ជាមួយបុគ្គលវិជ្ជមានកូវីដ-១៩ ខាងលើ និងដាក់ខ្លួនដាច់ដោយឡែកតាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក (៣ការពារ ៣កុំ)។ គិតមកដល់ថ្ងៃទី២៦ឧសភាឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ចំនួន៣៣០នាក់ ក្នុងនោះបានព្យាបាលជាសះស្បើយចំនួន១៥២នាក់ មានអ្នកស្លាប់ចំនួន៤នាក់ និងនៅសល់១៧៤នាក់កំពុងទទួលការព្យាបាល។