យោងតាមសេចក្ដីជូនដំណឹងរបស់រដ្ឋបាលខេត្តកំពង់ចាម នៅថ្ងៃទី២១ ឧសភានេះបានឲ្យដឹងថា ក្នុងថ្ងៃ២០ ឧសភា ខេត្តកំពង់ចាមរកឃើញវិជ្ជមានកូវីដ-១៩ ចំនួន ៩៣នាក់។ រដ្ឋបាលខេត្តកំពង់ចាមបានបន្តថា ការរកឃើញនោះ បន្ទាប់ពីរដ្ឋបាលខេត្តបានចាត់មន្ទីរសុខាភិបាលខេត្តយកសំណាកធ្វើតេស្ដរហ័សកូវីដ-១៩ លើអ្នកសង្ស័យចំនួន៨០១នាក់ ដោយទទួលបានលទ្ធផលវិជ្ជមានកូវីដ-១៩ចំនួន៩៣នាក់។ ក្នុងនោះចំណោមអ្នកឆ្លងទាំង៩៣នាក់នោះ ស្រុកជើងព្រៃចំនួន៣៤នាក់, ស្រុកបាធាយចំនួន៣៣នាក់, ស្រុកព្រៃឈរចំនួន៩នាក់, ស្រុកកំពង់សៀមចំនួន៦នាក់ និង១១នាក់ទៀតជាកម្មករ កម្មការិនីមកពីខេត្តកំពង់ធំ និងកំពង់ឆ្នាំង។ ជំងឺទាំង៩៣នាក់ ត្រូវបានបញ្ជូនទៅសម្រាកព្យាបាលនៅមន្ទីរពេទ្យមេគង្គកំពង់ចាម និងបន្តស្រាវជ្រាវរកអ្នកដែលប៉ះពាល់ដោយផ្ទាល់ និងប្រយោលបន្ថែមទៀត។ រដ្ឋបាលខេត្តកំពង់ចាមបានអំពាវនាវឲ្យអ្នកដែលពាក់ពន្ធ័នឹងអ្នកជំងឺកូវីដ-១៩ទាំង៩៣នាក់នោះ ត្រូវទៅពិនិត្យសុខភាព និងយកសំណាកនៅមន្ទីរពេទ្យបង្អែកដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់។ រដ្ឋបាលខេត្តកំពង់ចាមក៏បានជូនដំណឹងថា នៅថ្ងៃទី២០ឧសភា ខេត្តកំពង់ចាមមានអ្នកជាសះស្បើយពីជំងឺកូវីដ-១៩ចំនួន២៣នាក់ផងដែរ។

រដ្ឋបាលខេត្តព្រៃវែងនៅថ្ងៃទី២១ឧសភាឆ្នាំ២០២១បានជូនដំណឹងថា យោងតាមលទ្ធផលតេស្ដរហ័ស Rapid Test នៅថ្ងៃទី២០ឧសភាឆ្នាំ២០២១ គេបានរកឃើញអ្នកវិជ្ជមានកូវីដ-១៩ថ្មីចំនួន១១នាក់។ អ្នកឆ្លងថ្មីទាំង១១នាក់នោះ មានអ្នកធ្វើដំណើរមកពីប្រទេសថៃចំនួន៤នាក់, អ្នកធ្វើដំណើរពីរាជធានីភ្នំពេញចំនួនចំនួន៤នាក់ និងអ្នកឆ្លងក្នុងសហគមន៍២០កុម្ភៈចំនួន៣នាក់។ ជាមួយគ្នានោះ រដ្ឋបាលខេត្តព្រៃវែងបានប្រកាសថា នៅថ្ងៃទី២០ឧសភា មានអ្នកជំងឺកូវីដ-១៩ម្នាក់បានស្លាប់ ។ សពមានឈ្មោះ សាន សំអូន ភេទស្រី អាយុ៣៣ឆ្នាំ ជាប្រជាពលរដ្ឋរស់នៅភូមិអង្គាញ់ ឃុំប្រធាតុ ស្រុកកំពង់ត្របែក ខេត្តព្រៃវែង។ ខេត្តព្រៃវែងគិតមកដល់ថ្ងៃទី២០ឧសភាឆ្នាំ២០២១ មានអ្នកឆ្លងជំងឺកូវីដ-១៩ចំនួន២២៤នាក់ ក្នុងនោះបានព្យាបាលជាសះស្បើយចំនួន១១៤នាក់ និងមានករណីស្លាប់ចំនួន ៤នាក់។

មណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រ៖ ក្រុមគ្រូពេទ្យជួរមុខរបស់យើងនាំបងប្អូនអ្នកជំងឺលេងល្បែងប្រជាប្រិយ៍កម្សាន្ត ដើម្បីសុខភាព និងបន្ធូរអារម្មណ៍ផ្លូវចិត្តដល់ពួកគាត់ផងដែរ។

មណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រ អ្វីៗដើម្បីចង់ឲ្យអ្នកជំងឺឆាប់ជាសះស្បើយ ប្អូនៗកុមារា កុមារី ពួកគេក៏ត្រូវបានយកចិត្តទុកដាក់ខ្ពស់ក្នុងការមើលថែផងដែរ៖

ដំណឹងដ៏រីករាយ និងសូមអបអរសាទរដល់បងប្អូន!! អ្នកជំងឺចំនួន ៥០៥នាក់ត្រូវបានក្រុមគ្រូពេទ្យ នៃមណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រ អនុញ្ញាតឱ្យត្រឡប់ទៅផ្ទះវិញនៅថ្ងៃទី២០ ខែឧសភា ឆ្នាំ២០២១ ក្រោយពីទទួលការព្យាបាលយ៉ាងយកចិត្តទុកដាក់ខ្ពស់ពីសំណាក់ ក្រុមគ្រូពេទ្យសម្តេចតេជោប្រឆាំងជំងឺកូវីដ១៩ ពួកគាត់បានជាសះស្បើយ និងត្រូវធ្វើចត្តាឡីស័កខ្លួនឯងដាច់ដោយឡែករយៈពេល១៤ថ្ងៃបន្តទៀត ដើម្បីតាមដានសុខភាព។ #TYDA#ក្រុមគ្រូពេទ្យសម្តេចតេជោប្រឆាំងកូវីដ១៩