ទិដ្ឋភាពរាជធានីភ្នំពេញ នៅព្រឹកថ្ងៃទី០៧ ខែឧសភា ឆ្នាំ២០២១ ក្រោយពេល រដ្ឋបាលរាជធានីភ្នំពេញ ដាក់ចេញវិធានការរដ្ឋបាល នៅក្នុងភូមិសាស្ត្ររបស់ខ្លួន ដោយបែងចែកជា “តំបន់ក្រហម” “តំបន់លឿងទុំ” និង “តំបន់លឿង” សម្រាប់រយៈពេល ៧ថ្ងៃ គិតចាប់ពីម៉ោងសូន្យ នាថ្ងៃទី០៦ រហូតដល់ថ្ងៃទី១២ ខែឧសភា ឆ្នាំ២០២១។ សេចក្ដីជូនដំណឹង គិតត្រឹមថ្ងៃទី០៦ ខែឧសភា ឆ្នាំ២០២១ នៅរាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ៥៧៨នាក់ ដែលជាករណីឆ្លងក្នុងសហគមន៍ រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋដែលធ្លាប់ប្រាស្រ័យទាក់ទងជាមួយអ្នកជំងឺកូវីដ-១៩ ទាំងអស់ខាងក្រោម ត្រូវរាយការណ៍ជូនអាជ្ញាធរមូលដ្ឋានជាបន្ទាន់ និងរួសរាន់ទៅយកសំណាកនៅតាមទីតាំងដែលបានកំណត់។

តិដ្ឋភាពរាជធានីភ្នំពេញ ថតបាននៅព្រឹកថ្ងៃទី៧ ខែឧសភា ឆ្នាំ ២០២១ អាជ្ញាធររាជធានីភ្នំពេញ បានប្រកាសបន្តបិតផ្សាររដ្ឋ និងផ្សារមិនរៀបរយទាំងអស់បណ្ដោះអាសន្ន ក្នុងរាជធានីភ្នំពេញ សម្រាប់រយៈពេល ៧ថ្ងៃទៀត។ ប្រជាពលរដ្ឋត្រូវអនុវត្តវិន៍ធានការសុខាភិបាល វិធានការរដ្ឋបាលរបស់អាជ្ញាធរមានសមត្ថកិច្ច និងវិធានការចាំបាច់ផ្សេងៗទៀតដែលកំណត់ដោយរដ្ឋបាលរាជធានីភ្នំពេញ ជាពិសេសត្រូវអនុវត្តឱ្យបានម៉ឺងម៉ាត់នូវវិធានការ «៣ការពារ និង៣កុំ» របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យបានខ្ជាប់ខ្ជួន។

នៅព្រឹកថ្ងៃទី៧ឧសភា ឆ្នាំ២០២១ នេះ ក្រុមគ្រូពេទ្យរបស់កងពលតូចអន្តរាគមន៍លេខ១ បានបើកយុទ្ធនាការចាក់វ៉ាក់សាំងការពារជំងឺកូវីដ-១៩ ជូនដល់ប្រជាពលរដ្ឋរស់នៅក្នុងតំបន់ក្រហម ក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។ ការបើកប្រតិបត្តិការបើកយុទ្ធនាការចាក់វ៉ាក់សាំងនោះ ដឹកនាំដោយនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិការយុទ្ធនាការចាក់វ៉ាក់សាំង។ តំបន់ក្រហមត្រូវគេរាយការណ៍ថា មាននៅក្នុងភូមិ សង្កាត់មួយចំនួនក្នុងខណ្ឌចំនួន៥ រួមមានខណ្ឌមានជ័យ ខណ្ឌដង្កោ ខណ្ឌសែនសុខ ខណ្ឌពោធិ៍សែនជ័យ និងខណ្ឌឬស្សីកែវ។ ប៉ុន្តែយុទ្ធនាការចាក់វ៉ាក់សាំងរបស់កងទ័ពនៅតំបន់ក្រហមចាប់តាំងពីថ្ងៃសទី១ឧសភាមក គឺទើបតែធ្វើឡើងនៅក្នុងខណ្ឌចំនួន៤ប៉ុណ្ណោះរួមមាន ខណ្ឌមានជ័យ ខណ្ឌដង្កោ ខណ្ឌពោធិ៍សែនជ័យ និងខណ្ឌកំបូល។ បើយោងតាមរបាយការណ៍ក្រសួងការពារជាតិ ចេញផ្សាយថ្ងៃទី៦ឧសភា ឆ្នាំ២០២១ បានឲ្យដឹងថា ការចាក់វ៉ាក់សាំងការពារជំងឺកូវីដ-១៩លើកទី១ នៅតំបន់ក្រហមបានចំនួន២៤ម៉ឺន៦ពាន់៧០២នាក់។ យោងតាមក្រសួងសុខាភិបាល គិតមកដល់ថ្ងៃទី៦ឧសភាឆ្នាំ២០២១ កម្ពុជាបានចាក់វ៉ាក់សាំងការពារកូវីដ-១៩ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន១ លាន ៦សែន ៦ពាន់ ៧នាក់។

រដ្ឋបាលខេត្តបបន្ទាយមានជ័យ បិទផ្សារម៉ាឡៃ ស្រុកម៉ាឡៃចាប់​ពីថ្ងៃទី៧ ដល់ថ្ងៃទី១៩ ឧសភា ឆ្នាំ២០២១ ក្រោយរកឃើញពាក់ព័ន្ធអ្នកជំងឺកូវីដ-១៩៖

នារសៀលថ្ងៃព្រហស្បតិ៍ទី០៦ ខែឧសភា ឆ្នាំ២០២១នេះ នៅសាលប្រជុំនន្ទីរ អគារ ខ សាលាខេត្ត ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង និងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញដឹកនាំកិច្ចប្រជុំផ្សព្វផ្សាយ និងពង្រឹងការអនុវត្តសេចក្ដីណែនាំលេខ០៣ សណន របស់រាជរដ្ឋាភិបាល ស្ដីពីការពង្រឹងការអនុវត្តវិធានការចាំបាច់មួយចំនួន ដើម្បីទប់ស្កាត់ការឆ្លងរាលដាល នៃជំងឺកូវីដ-១៩ បន្ទាប់ពីរាជរដ្ឋាភិបាលបានសម្រេចបញ្ចប់ ការបិទខ្ទប់ ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល។ អញ្ជើញចូលរួមក្នុងកិច្ចប្រជុំនេះមាន ឯកឧត្តមអភិបាលរងខេត្ត លោកនាយក នាយករង រដ្ឋបាលសាលាខេត្ត លោកស្នងការនគរបាលខេត្ត លោកមេបញ្ជាការរងតំបន់ប្រតិិបត្តិការសឹករងខេត្ត លោកមេបញ្ជាការរងកងរាជអាវុធហត្ថខេត្ត លោកប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ត លោកប្រធានមន្ទីរសុខាភិបាល នៃរដ្ឋបាលខេត្ត លោកអភិបាលក្រុង/ស្រុកទាំង៨ លោកនាយកទីចាត់ការរដ្ឋបាល សាលាខេត្ត និងមន្ត្រីពាក់ព័ន្ធមួយចំនួនទៀត៕ដោយ-រ៉ាវុធ