រដ្ឋបាលខេត្តព្រះសីហនុនៅថ្ងៃទី៣ឧសភា បានជូនដំណឹងថា មានកម្មករព្យួរកិច្ចសន្យាការងារ នៃរោងចក្រញ៉ូវស្តារម្នាក់ឈ្មោះ លី សុភា ភេទស្រី កើតនៅថ្ងៃទី៣ ខែមីនា ឆ្នាំ១៩៩៧ កាន់អត្តសញ្ញាណប័ណ្ណលេខ ០៨០០៩៧៩១៦ បានលួចគេចវេះចេញតំបន់បិទខ្ទប់នៃខេត្តព្រះសីហនុធ្វើដំណើរទៅខេត្តស្ទឹងត្រែង។ ស្ត្រីរូបនោះ មានលទ្ធផលមានវិជ្ជមានកូវីដ-១៩ ហើយអ្នកជំងឺរូបនោះ បានប៉ះពាល់ដោយប្រយោលជាមួយកម្មករ ដែលបានព្យួរកិច្ចសន្យាការងារជាមួយគ្នាចំនួន២០នាក់បន្ថែមទៀត នៃរោងចក្រញ៉ូវស្តារក្នុងខេត្តព្រះសីហនុ។ រដ្ឋបាលខេត្តព្រះសីហនុបានចាត់ទុក ទង្វើរបស់បុគ្គលនោះ គឺជាអំពើដោយចេតនាមិនគោរពវិធានការរដ្ឋបាលដែលមានចែងនៅក្នុងមាត្រា៤ និងមាត្រា១០ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។ រដ្ឋបាលខេត្តព្រះសីហនុ បានស្នើឲ្យអភិបាលខេត្តស្ទឹងត្រែងចាត់វិធានការច្បាប់ចំពោះបុគ្គលល្មើសខាងលើឱ្យបានតឹងរ៉ឹងបំផុត។ យោងតាម មាត្រា១០ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត ជនណាដែលមិនគោរព “វិធានការរដ្ឋបាល” ដោយចេតនា នឹងត្រូវប្រឈមនឹងការផ្តន្ទាទោសដាក់ពន្ធនាគាររហូតដល់ ៣ឆ្នាំ ឬ៥ឆ្នាំ ប្រសិនអំពើនោះបណ្តាលឱ្យមានការចម្លងជំងឺកូវីដ-១៩ ដល់អ្នកដទៃ ឬបណ្តាលឱ្យប៉ះពាល់ធ្ងន់ធ្ងរដល់សុខភាពសាធារណៈ ដោយមិនគិតដល់បទល្មើសព្រហ្មទណ្ឌដទៃទៀត។

ភ្នំពេញ ៖ ដោយមានការយកចិត្តទុកដាក់ពីថ្នាក់ដឹកនាំព្រឹទ្ធសភា នាព្រឹកថ្ងៃទី០៤ ខែឧសភា ឆ្នាំ២០២១ ឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា បានអញ្ជើញនាំយកអំណោយរបស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា និងលោកជំទាវ ចែកជូនដល់កងកម្លាំងការពារសន្តិសុខសណ្តាប់ធ្នាប់ នៅវិមានព្រឹទ្ធសភាសរុបចំនួន៧៥នាក់។ ក្នុងឱកាសនោះអំណោយដែលចែកក្នុងម្នាក់ៗទទួលបាន៖ ឃីតចំនួន០១ ដោយក្នុង០១ឃីតមាន៖ មី០១កេស ត្រីខកំប៉ុង ១២កំប៉ុង ទឹកផ្លែឈើ១២កំប៉ុង ស្ករស០១គីឡូក្រាម ទឹកត្រី ០១ដប ទឹកស៊ីអ៉ីវ០១ដប នំ ០១ប្រអប់ សាប៊ូកក់សក់០១ដប សាប៊ូម្សៅ០១កញ្ចប់ ម៉ាស ០១ប្រអប់ ច្រាសដុសធ្មេញ០១ដើម ថ្នាំដុសធ្មេញ ០១ប្រអប់ ក្រដាសអនាម័យ០១ប្រអប់ និងធុងជ័រធំ០១ធុង ព្រមទាំងថវិការ១០ម៉ឺនរៀល៕ ដោយ / គ្រី សម្បត្តិ

ភ្នំពេញ៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឱ្យយដឹងថា នៅថ្ងៃទី០៣ ខែឧសភា ឆ្នាំ២០២១ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៣លើក បណ្ដាលឱ្យមនុស្សស្លាប់ម្នាក់ និងរបួសធ្ងន់ស្រាល៤នាក់។ របាយការណ៍ដដែលបញ្ជាក់ថា មូលហេតុដែលបណ្ដាលឱ្យកើតមាន គ្រោះថ្នាក់ចរាចរណ៍រួមមាន៖ ល្បឿន, មិនគោរពសិទ្ធិ និងមិនប្រកាន់ស្ដាំ៕ ដោយ/ ឆៃហួត

សេចក្ដីរាយការណ៍បានឲ្យដឹងថា ប៉ុន្មានថ្ងៃនេះ ប្រជាពលរដ្ឋនៅតំបន់ក្រហមបានសម្រុកទៅចាក់វ៉ាក់សាំងកូវីដ-១៩ ច្រើនកកកុញ ដែលនាំឲ្យគេបារម្ភពបីការអាចឆ្លងជំងឺកូវីដ-១៩ បន្ថែមទៀត។ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅថ្ងៃទី៤ឧសភា ឆ្នាំ២០២១ តាមរយៈទំព័រហ្វេសប៊ុក បានអំពាវនាវដល់ប្រជាពលរដ្ឋទាំងអស់ ដែលរស់នៅក្នុងតំបន់ក្រហមនៃខណ្ឌចំនួន៤ រួមមាន ខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ និងខណ្ឌកំបូល មកទទួលការចាក់វ៉ាក់សាំងការពារជំងឺកូវីដ-១៩ ទៅតាមកាលកំណត់របស់អាជ្ញាធរ ដើម្បីចៀសវាងនូវភាពកកកុញ និងអនុវត្តឱ្យបានម៉ឺងម៉ាត់បំផុតនូវវិធានការ «៣ការពារ ៣កុំ»។ ថ្ងៃនេះ គឺជាថ្ងៃទី៤ហើយនៃយុទ្ធនាការចាក់វ៉ាក់សាំងការពារជំងឺកូវីដ-១៩ របស់ក្រសួងការពារជាតិ ដើម្បីចាក់វ់ាក់សាំងជូនប្រជាពលរដ្ឋ កម្មករ កម្មការិនី ក្នុងខណ្ឌចំនួន៤ ដែលមានចំនួនជិត៥០ម៉ឺននាក់។ យោងតាមរបាយការណ៍បានបង្ហាញថា ក្នុងរយៈពេល៣ថ្ងៃចាប់ពីថ្ងៃទី១ដល់ថ្ងៃទី៣ឧសភា កងទ័ពបានចាក់វ៉ាក់សាំងដូសទី១ជូនប្រជាពលរដ្ឋ កម្មករ កម្មការិនី ក្នុងតំបន់ក្រហមនៃខណ្ឌចំនួន៤បានចំនួន១០ម៉ឺន៣៥៧នាក់។ ក្នុងចំណោមនោះ ណ្ឌមានជ័យ ចាក់បាន២ម៉ឺន១ពាន់៩៣០នាក់, ខណ្ឌដង្កោចាក់បាន ២ម៉ឺន២ពាន់៦៣៤នាក់, ខណ្ឌកំបូល ចាក់បាន ២ម៉ឺន៥៥៨នាក់ និងខណ្ឌពោធិ៍សែនជ័យចាក់បាន ៣ម៉ឺន៥ពាន់២៣៥នាក់។ សូមបញ្ជាក់ថា ចាប់ពីថ្ងៃទី១ឧសភាឆ្នាំ២០២១ រាជរដ្ឋាភិបាលកម្ពុជា បានចាប់ផ្តើមយុទ្ធនាការចាក់វ៉ាក់សាំងជូនប្រជាពលរដ្ឋនៅក្នុងតំបន់ក្រហម…

ខេត្តកំពង់ចាម បានរកឃើញអ្នកវិជ្ជមានកូវីដ-១៩ ចំនួន៣នាក់បន្ថែមទៀត នៅស្រុកចំការលើ និងស្រុកព្រៃឈរ ខេត្តកំពង់ចាម។