ក្រសួងសុខាភិបាល៖ មនុស្សចំនួន៣នាក់ទៀត បានស្លាប់ដោយសារជំងឺកូវីដ១៩ ដែលនាំការស្លាប់សារុបដោយវីរុសកូវីដ១៩ នៅក្នុងប្រទេសកម្ពុជា បានកើនឡើងដល់ចំនួន ៧៤នាក់។

ភ្នំពេញ៖ ក្រុមការងារលេខាធិការដ្ឋាន សហការជាមួយសមាគមរួមគ្នាដើម្បីអភិវឌ្ឍកម្ពុជា និងស.ស.យ.កខណ្ឌឫស្សីកែវ និងស.ស.យ.កខណ្ឌជ្រោយចង្វារកាលពីថ្ងៃទី២៤ ខែមេសា ឆ្នាំ២០២១ បានរៀបចំសម្របសម្រួលនាំយកគ្រឿង ឧបភោគបរិភោគដែលជាអំណោយដ៏ថ្លៃថ្លារបស់ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា សម្រាប់ផ្តល់ជូនដល់បងប្អូនប្រកបរបររត់រម៉កកង់បី និងអាជីវកម្មក្រៅប្រព័ន្ធដែលកំពុងរស់នៅក្នុងមូលដ្ឋានខណ្ឌជ្រោយចង្វារចំនួន៤៩គ្រួសារ និងមូលដ្ឋានខណ្ឌឫស្សីកែវចំនួន៥៤គ្រួសារ។ អំណោយដែលទទួលបានដោយក្នុងមួយគ្រួសារៗទទួលបានអង្ករ២០គីឡូក្រាម ទឹកស៊ីអ៉ីវ១យួរ ត្រីខកំប៉ុង១យួរ មី១កេស ក្នុងការជួយសម្រួលដល់ជីវភាពរស់នៅក្នុងកំឡុងពេលដែលរាជធានីភ្នំពេញត្រូវបានបិទខ្ទប់ ដើម្បីទប់ស្កាត់ការរីករាលដាលនៃជំងឺកូវីដ-១៩ និងឈានទៅបិទបញ្ចប់ព្រឹត្តិការណ៍២០កុម្ភៈ។ ដោយ/គ្រីសម្បត្តិ

ក្រសួងសុខាភិបាលបានប្រកាសនៅថ្ងៃទី២៥ ខែមេសា ឆ្នាំ២០២១ថា បានបន្តរកឃើញអ្នកឆ្លងជំងឺកូវីដ-១៩ ចំនួន ៦១៦នាក់ថែមទៀត ដែលសុទ្ធតែករណីឆ្លងក្នុងព្រឹត្តិការណ៍សហគមន៍ ២០ កុម្ភះ។ ជាមួយគ្នានេះក្រសួងបានបញ្ជាក់ដែរដាអ្នកជំងឺកូវីដ-១៩ ចំនួន១៩០នាក់ជាសះស្បើយ។ តទៅនេះសូមអានសេចក្តីជូនព័ត៌មានរបស់ក្រសួងសុខាភិបាលនៅខាងក្រោម៖

ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ នៅថ្ងៃអាទិត្យ ទី២៥ ខែមេសា ឆ្នាំ២០២១ បានបញ្ជាក់ឱ្យដឹងថាភូមិសាស្រ្តរាជធានីភ្នំពេញ នៅបន្តបិទខ្ទប់ដដែល ដោយមិនអនុញ្ញាតឱ្យពលរដ្ឋទូទៅធ្វើចរាចរណ៍ឡើយ។ ក្នុងនាមប្រធានគណៈបញ្ជាការឯកភាពរាជធានីភ្នំពេញ ឯកឧត្តម បានបញ្ជាឱ្យកងកម្លាំងមូលដ្ឋានទាំងអស់ ត្រូវបន្តអនុវត្តវិធានការបិទខ្ទប់បន្តទៀត។ សូមបញ្ជាក់ថា រាជរដ្ឋាភិបាលកម្ពុជា បានចេញសេចក្តីសម្រេចមួយ នៅថ្ងៃទី២៥ ខែមេសា ឆ្នាំ២០២១នេះដែរ ដោយបញ្ចប់ការហាមឃាត់ការធ្វើដំណើរ និងការបិទរមណីយដ្ឋានទេសចរណ៍នៅទូទាំងប្រទេស ដែលត្រូវបានសម្រេចដោយសេចក្តីសម្រេចលេខ ៤៤ សសរ ចុះថ្ងៃទី៦ ខែមេសា ឆ្នាំ២០២១ និងសេចក្តីសម្រេចលេខ៥១ សសរ ចុះថ្ងៃទី១៧ ខែមេសា ឆ្នាំ២០២១ របស់រាជរដ្ឋាភិបាល។ សេចក្តីសម្រេចនេះ បានអនុញ្ញាតឱ្យពលរដ្ឋទូទៅ ធ្វើដំណើរចេញចូលឆ្លងខេត្តបាន លើកលែងតែការចេញចូលនៅតំបន់បិទខ្ទប់ប៉ុណ្ណោះ ដែលក្នុងនោះមានរាជធានីភ្នំពេញ និងក្រុងតាខ្មៅ នៃខេត្តកណ្តាល៕

ក្រសួងសុខាភិបាល នៅថ្ងៃអាទិត្យ ទី២៥ ខែមេសា ឆ្នាំ ២០២១ បានអនុញ្ញាតឲ្យម្ចាស់សេវាព្យាបាលឯកជន និងសម្ភព ស្របច្បាប់ ក្នុងរាជធានីភ្នំពេញ ទាំងអស់ អាចទទួលពិនិត្យ ថែទាំ និងព្យាបាល អ្នកជំងឺកូវីដ-១៩បាន។ យោងតាមសេចក្តីជូនព័ត៌មាន មន្ទីរពេទ្យឯកជនទាំងអស់ត្រូវស្នើសុំច្បាប់អនុញ្ញាតជាមុនពីក្រសួងសុខាភិបាល និងមានលក្ខខណ្ឌវេជ្ជសាស្រ្តសមស្របមួយចំនួនទៀត ក្នុងការបើកសេវាពិនិត្យព្យាបាលអ្នកជំងឺកូវីដ-១៩៕

ភ្នំពេញ៖ ឯកឧត្តមគឹមសន្តិភាព រដ្ឋលេខាធិការ និងជាមន្រ្តីនាំពាក្យក្រសួងយុត្តិធម៌បានបញ្ជាក់ថាបើទោះបីរាជរដ្ឋាភិបាលនៅថ្ងៃទី២៥ ខែមេសា ឆ្នាំ២០២១នេះ បានចេញសេចក្តីសម្រេចបញ្ចប់ការហាមឃាត់ធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេសក្តី ប៉ុន្តែនៅរាជធានីភ្នំពេញ និងក្រុងតាខ្មៅនិង តំបន់បិទខ្ទប់ផ្សេងទៀតដែលសម្រេចដោយរដ្ឋបាលខេត្តនានា ត្រូវបានហាមឃាត់ដដែលទេ។ ពាក់ព័ន្ធក្នុងរឿងនេះ ឯកឧត្តម គឹម សន្តិភាពបានធ្វើការពន្យល់ថាសូមជម្រាបជូនថា ការធ្វើដំណើរឆ្លងកាត់ចេញចូលភូមិសាស្ត្រខេត្តមួយទៅខេត្តមួយ ត្រូវបានអនុញ្ញាត តាមសេចក្តីសម្រេចលេខ ៥៣ សសរ ចុះថ្ងៃទី២៥ ខែមេសា ឆ្នាំ២០២១ របស់រាជរដ្ឋាភិបាល! ប៉ុន្តែការធ្វើដំណើរចេញចូលឆ្លងកាត់រាជធានីភ្នំពេញ និងក្រុងតាខ្មៅខេត្តកណ្តាល ដែលជាតំបន់បិទខ្ទប់ រួមទាំងតំបន់បិទខ្ទប់ផ្សេងទៀតដែលសម្រេចដោយរដ្ឋបាលខេត្តនានា ត្រូវបានហាមឃាត់ដដែល លើកលែងតែការធ្វើដំណើរដើម្បីបំពេញមុខងារក្នុងការផ្តល់សេវាសង្គ្រោះបន្ទាន់ សេវាសាធារណៈចាំបាច់និងបន្ទាន់ សេវាពាក់ព័ន្ធនឹងការងារសន្តិសុខនិងសណ្តាប់ធ្នាប់សាធារណៈ ឬសេវាដឹកជញ្ជូនទំនិញ និងករណីចាំបាច់ផ្សេងទៀតដោយមានការអនុញ្ញាតពីអាជ្ញាធរមានសមត្ថកិច្ច ដោយអនុវត្តតាមសេចក្តីសម្រេចលេខ ៤៩ សសរ ចុះថ្ងៃទី១៤ ខែមេសា ឆ្នាំ២០២១ របស់រាជរដ្ឋាភិបាល៕ដោយ៖ម៉ាដេប៉ូ