ខេត្តកំពតប្រកាសផ្អាកលក់គ្រឿងស្រវឹងគ្រប់ប្រភេទនៅភូមិសាស្ត្រខេត្ត។

ក្រសួងសុខាភិបាល បានណែនាំស្តីពីការតាមដានរោគសញ្ញា និងថែទាំ ព្យាបាលអ្នកជំងឺកូវីដ-១៩ នៅតាមផ្ទះ។

ខេត្ត កែប៖ នៅយប់ថ្ងៃទី១៥ ខែមេសា ឆ្នាំ២០២១ នេះ ឯកឧត្តម សោម ពិសិដ្ឋ អភិបាលខេត្ត និងជាប្រធានគណ:បញ្ជាការឯកភាពរដ្ឋបាលខេត្ត កែប បានអញ្ជេីញចុះពិនិត្យស្ថានភាពទូទៅ នៅតាមបណ្ដា ប៉ុស្តិ៍ត្រួតពិនិត្យ ចំនួន៣ទីតាំង ក្នុងភូមិសាស្ត្រ ខេត្ត កែប ជាមួយព្រំប្រទល់ខេត្តកំពត ។ ឯកឧត្តម អភិបាលខេត្ត បានណែនាំដល់ក្រុមការងារ ជាពិសេស កងកម្លាំង ដែលឈរជេីងទាំងបីទីតាំង ត្រូវអនុវត្តន៍តាមតួនាទីភារកិច្ចរបស់ខ្លួនអោយបានខ្ជប់ខ្ជួន និងបទបញ្ជារបស់ប្រមុខរាជរដ្ឋាភិបាល និងរដ្ឋបាលខេត្ត។ ជាមួយគ្នានេះ ដែរ ឯកឧត្តម អភិបាលខេត្ត បានឧបត្ថម្ភនូវគ្រឿង ឧបភោគ បរិភោគ ដល់ក្រុមការងារ ទាំងបី ទីតាំង រួមមានៈ ទឹកសុទ្ធ១៥០យួ មីជាតិ១៦កេស ម៉ាស់៣០ប្រអប់ ស្រោមដៃ៦ប្រអប់ និងឆ្នាំងដាំទឹកអគ្គីសនីចំនួន៣ ដេីម្បីប្រេីប្រាស់ប្រចាំថ្ងៃ៕សិលា សារិន

រដ្ឋបាលខេត្តកំពង់ធំបង្ហាញអត្តសញ្ញាណអ្នកវិជ្ជមានជំងឺកូវីដ១៩ ម្នាក់ ដែលប្រកាសដោយនៅថ្ងៃទី១៥ ខែមេសា ឆ្នាំ២០២១។

នៅលើទំព័រហ្វេសប៊ុកនៅថ្ងៃទី១៦មេសាឆ្នាំ២០២១ សម្ដេចតេជោ ហ៊ុន សែន នាយករដ្ឋមន្ត្រី បានសរសេរថា ដោយភារកិច្ចខានមិនបានក្នុងការចូលរួមប្រជុំអាស៊ាននាថ្ងៃទី២៤ មេសា ២០២១ ខាងមុខនៅរដ្ឋធានីហ្សាកាតាប្រទេសឥណ្ឌូណេស៊ី។ កិច្ចការដែល សម្ដេចត្រូវធ្វើដើម្បីការពារការឆ្លងកូវីដ-១៩ ស្របតាមវិធានការសុខាភិបាល ដំបូងគឺសម្ដេចត្រូវចាក់វ៉ាក់សាំងដូសទី២នៅថ្ងៃទី២០ មេសា ២០២១ ដែលមុននោះគ្រោងចាក់នៅថ្ងៃទី២៩ មេសា ២០២១។ នៅថ្ងៃទី២៣ មេសា ២០២១ ត្រូវយកសំណាកពិនិត្យដើម្បីទទួលលិខិតបញ្ជាក់សម្រាប់អោយអាជ្ញាធរសុខាភិបាលឥណ្ឌូណេស៊ី។ ព្រឹកថ្ងៃទី២៤ មេសា ២០២១ ចេញដំណើរទៅហ្សាកាតា។ ពេលទៅដល់ត្រូវយកសំណាកពិនិត្យម្តងទៀត។ ពេលរសៀលការប្រជុំចាប់ផ្តើម ពេលចប់មិនថាថ្ងៃឬយប់សម្ដេចត្រូវត្រឡប់មកវិញ។ ពេលមកដល់ព្រលានយន្តហោះអន្តរជាតិភ្នំពេញ សម្ដេចត្រូវយកសំណាកពិនិត្យម្តងទៀត។ មកដល់ផ្ទះ សម្ដេចត្រូវធ្វើចត្តាឡីស័ក១៤ថ្ងៃជាមួយនឹងការពិនិត្យសំណាក២ទៅ៣ដងទៀត។ ដើម្បីធានាសុវត្ថិភាពសម្រាប់ភរិយា កូន និងចៅ សម្ដេចត្រូវអោយភរិយារបស់សម្ដេច នាំកូននិងចៅទៅសម្រាកនៅទីកន្លែងផ្សេង។ សមាជិកប្រតិភូដែលធ្វើដំណើរជាមួយសម្ដេច ត្រូវយកសំណាកនិងធ្វើចត្តាឡីស័ក១៤ថ្ងៃដូចគ្នា។ សម្ដេចបានបន្តថា មានអ្នកអោយយោបល់សម្ដេចថាដោយសារ សម្ដេចបានចាក់វ៉ាក់សាំងរួចហើយ សម្ដេចគួរធ្វើចត្តាឡីស័ក៧ថ្ងៃបានហើយ តែសម្ដេចបានប្រាប់ទៅពួកគាត់វិញថា សម្ដេចចង់ធ្វើអោយប្រាកដថា សម្ដេចមិនមានវិជ្ជមានកូវីដ-១៩ នោះទេព្រោះសម្ដេចត្រូវធ្វើការជាមួយមនុស្សច្រើនគ្នា ពិសេសចៅៗរបស់សម្ដេចទាំងតូចទាំងធំតែងមកលេងច្របាច់ជើងនិងគេងលើគ្រែព្រមទាំងរត់លេងក្នុងបន្ទប់របស់ជីតា៕

ក្រសួងសុខាភិបាល៖ ជនជាតិខ្មែរពីរនាក់ទៀត បាលស្លាប់ដោយសារជំងឺកូវីដ-១៩។

អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី១៦មេសាឆ្នាំ២០២១ បានជូនដំណឹងដល់ប្រជាពលរដ្ឋដែលបានទៅទទួលសេវា និងមានទំនាក់ទំនងជាមួយបុគ្គលិកធ្វើការនៅ បន្ទប់ពិគ្រោះព្យាបាលជម្ងឺ ស៊ុក ចិន្តា ដែលមានទីតាំងស្ថិតនៅផ្ទះលេខ ១៦៧ ផ្លូវលេខ ៥៥៥ សង្កាត់ទឹកថ្លា ខណ្ឌសែនសុខ ត្រូវប្រញាប់ទៅធ្វើតេស្ដ។ មូលហេតុ អ្នកជំងឺកូវីដ-១៩ បានទៅធ្វើតេស្ដឈាម និងដាក់សេរ៉ូមនៅទីតាំងខាងលើនោះ ចាប់ពីថ្ងៃសទី១១ដល់ថ្ងៃទី១៥មេសាឆ្នាំ២០២១។ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកជាប់ពាក់ពន្ធ័ទាំងអស់ ត្រូវដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ។

អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី១៦មេសាឆ្នាំ២០២១ បានជូនដំណឹងដល់ឲ្យបុគ្គលិក និងប្រជាពលរដ្ឋ ដែលមានទំនាក់ទំនងជាមួយបុគ្គលិករបស់ក្រុមហ៊ុនប៊ី ភី ស៊ី ត្រេឌីង ខូអិលធីឌី (BPC Trading Co., Ltd) ដែលមានទីតាំងស្ថិតនៅតាមបណ្ដោយ ផ្លូវ២១៧ (ព្រះមុន្នីរ៉េត) សង្កាត់ស្ទឹងមានជ័យ ខណ្ឌមានជ័យ ត្រូវប្រញាប់ទៅធ្វើតេស្ដ។ មូលហេតុ អ្នកជំងឺកូវីដ-១៩ ធ្វើការនៅក្រុមហ៊ុនខាងលើមានតួនាទីជាអ្នកបើកបររថយន្ត ដែលបានធ្វើការចាប់ពីថ្ងៃទី១ដល់ថ្ងៃ១២មេសាឆ្នាំ២០២១។ អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកជាប់ពាក់ពន្ធ័ទាំងអស់ ត្រូវដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ។