ប្រេស៊ីល៖ ប្រេស៊ីលបានកត់ត្រាដំបូងពីការរកឃើញវីរុសកូវីដ១៩បំប្លែងខ្លួនថ្មី ដែលមានប្រភពដើមពីប្រទេសអាហ្វ្រិកខាងត្បូង ដែលនេះជាសញ្ញាគ្រោះថ្នាក់ថ្មីមួយ សម្រាប់ប្រទេសដែលរងគ្រោះយ៉ាងធ្ងន់ធ្ងរដោយសារតែមានចំនួនអ្នកស្លាប់ប្រចាំថ្ងៃដ៏អាក្រក់បំផុតនៅលើពិភពលោក ហើយកំពុងស្វែងរកកន្លែងបញ្ចុះសព ។ ការរកឃើញនៃវីរុសបំប្លែងខ្លួនថ្មីមានប្រភពដើមពីអាហ្វ្រិកខាងត្បូងខាងលើនេះ បានបន្ថែមការព្រួយបារម្ភថា រលកថ្មីនៃជំងឺកូវីដ១៩ដ៏កាចសាហាវដែលកំពុងផ្ទុះឡើងនៅប្រេស៊ីល អាចនឹងរក្សាការបំបែកកំណត់ត្រាឆ្លងដ៏គួរអោយភ័យខ្លាចសម្រាប់សប្តាហ៍ក្រោយៗទៀត ។ តួយ៉ាងនៅថ្ងៃអង្គារសប្តាហ៍នេះ ក្រសួងសុខាភិបាលប្រេស៊ីលបានរាយការណ៍អំពីការស្លាប់ក្នុងមួយថ្ងៃចំនួន៤ពាន់១៩៥នាក់ ។ ទោះបីជាយ៉ាងណាក៏ដោយ ប្រធានាធិបតីប្រេស៊ីលលោក ហ៊្សែរ បូលសូណារ៉ូ បាននិយាយថា នឹងមិនមានការបិទប្រទេសទេ ពោលគឺមួយថ្ងៃគត់បន្ទាប់ពីប្រទេសនេះបានរកឃើញចំនួនស្លាប់ដោយជំងឺកូវីដ១៩កើតខ្ពស់បំផុតមិនធ្លាប់មានពីមុនមក ។ ប្រធានាធិបតីប្រេស៊ីលរូបនេះ ក៏បាននិយាយការពារការប្រើថ្នាំគ្រុនចាញ់ អ៊ីដ្រុកស៊ីតក្លរ៉ូខ្វីន (Hydroxychloroquine) ដើម្បីព្យាបាលជំងឺកូវីដផងដែរ ទោះជាគ្មានការសិក្សាវិទ្យាសាស្ត្រណាមួយរកឃើញថា ថ្នាំនេះមានប្រសិទ្ធភាពក្នុងការការពារ ឬព្យាបាលវីរុសនោះទេ ៕ ប្រភព៖ CNA

អាមេរិក៖ ជំងឺកូវីដ១៩បំប្លែងខ្លួនថ្មីមានប្រភពដើមពីចក្រភពអង់គ្លេស ដែលមានឈ្មោះសម្គាល់ថា B117 បានក្លាយជាវីរុសសម្បូរជាងគេនៅក្នុងសហរដ្ឋអាមេរិកនាពេលបច្ចុប្បន្ន ស្របពេលដែលករណីឆ្លងថ្មីៗនៅតែបន្តកើនឡើងខ្លាំង នេះបើតាមការបញ្ជាក់របស់មន្ត្រីសុខាភិបាលកំពូលរបស់អាមេរិកម្នាក់ ។ ហើយក្រៅពីវីរុស B117 សហរដ្ឋអាមេរិកបានរកឃើញដូចគ្នានូវករណីឆ្លងវីរុសកូវីដ១៩បំប្លែងខ្លួនថ្មីមានប្រភពដើមពីអាហ្វ្រិកខាងត្បូង ដែលវីរុសទាំងនេះត្រូវបានគេជឿជាក់ថា ជាមូលហេតុនៅពីក្រោយនៃការកើនឡើងករណីឆ្លងទាំងនៅសហរដ្ឋអាមេរិក និងនៅជុំវិញពិភពលោក ។ បើតាមនាយកមជ្ឈមណ្ឌលបង្ការ និងទប់ស្កាត់ជំងឺអាមេរិក (CDC) លោកស្រី រ៉ាឈែល វ៉ាលែនស្កាយ វីរុសបំប្លែងខ្លួនថ្មីមានប្រភពដើមនៅចក្រភពអង់គ្លេស បច្ចុប្បន្នបានក្លាយជាវីរុសដែលសម្បូរជាងគេនៅក្នុងសហរដ្ឋអាមេរិក… ដូច្នេះហើយទើបតម្រូវឱ្យមានការបង្កើនការធ្វើតេស្ដ ដើម្បីកំណត់អត្តសញ្ញាណ និងធ្វើចត្តាឡីស័កបុគ្គលដែលបានឆ្លងវីរុសនេះ ។ ស្របពេលជាមួយគ្នានេះដែរ នាយកមជ្ឈមណ្ឌលបង្ការ និងទប់ស្កាត់ជំងឺអាមេរិក (CDC)រូបនេះក៏បានជំរុញផងដែរឱ្យប្រជាជនអាមេរិកទាំងអស់ ចាក់វ៉ាក់សាំងឱ្យបានលឿនតាមដែលអាចធ្វើទៅបាន ដើម្បីទប់ស្កាត់ការឆ្លងវីរុស COVID-19 បំប្លែងខ្លួនថ្មី ៕ ប្រភព៖ CNA

ថៃ៖ វីរុសកូវីដ១៩បំប្លែងខ្លួនថ្មីមានប្រភពដើមពីចក្រភពអង់គ្លេស ដែលរីករាលដាលយ៉ាងឆាប់រហ័សនោះ គឺជាភ្នាក់ងារបង្កការចម្លងជាចង្កោម ដែលត្រូវបានគេរកឃើញនៅតាមកន្លែងកម្សាន្តនានាទូទាំងទីក្រុងបាងកក ប្រទេសថៃ នេះបើតាមការបញ្ជាក់របស់ក្រុមអ្នកជំនាញផ្នែកមេរោគរបស់ថៃ ។ ប្រធានមជ្ឈមណ្ឌលឧត្តមភាពផ្នែកជីវសាស្រ្ត នៅសកលវិទ្យាល័យ ជូឡាឡុងកន (Chulalongkorn) របស់ថៃ លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ (Yong Poovorawan) បាននិយាយនៅក្នុងសន្និសីទកាសែតមួយ នៅឯក្រសួងសុខាភិបាលសាធារណៈថា ប្រសិនបើអាចធ្វើទៅបាន… យើងមិនគួរមានការធ្វើដំណើរ ឬចលនាណាមួយទេនាពេលឥឡូវនេះ… បើសិនជាមិនអាច ត្រូវតែមានវិធានការរឹតត្បិតដើម្បីគ្រប់គ្រងជំងឺនេះ ។ លោកវេជ្ជបណ្ឌិតក៏បានព្រមានប្រឆាំងនឹងការធ្វើដំណើរដែលមិនចាំបាច់ ក្នុងអំឡុងពេលនៃរដូវបុណ្យចូលឆ្នាំ ដោយលោកបានប៉ាន់ប្រមាណថា ចំនួននៃការឆ្លងថ្មីអាចនឹងហក់ឡើងខ្ពស់ ។ ទន្ទឹមគ្នា អ្នកឯកទេសរូបនេះក៏បានជំរុញឲ្យរដ្ឋាភិបាលពន្លឿនការចាក់វ៉ាក់សាំងដល់ប្រជាជនប្រឆាំងនឹងជំងឺកូវីដ-១៩ផងដែរ ៕ ប្រភព៖ Bangkok Post