យោងតាមរដ្ឋបាលខេត្តព្រះសីហនុ បានឲ្យដឹងថា នៅរសៀលថ្ងៃទី១៥មីនា ឆ្នាំ ២០២១ មានរថយន្ត១គ្រឿង បានបើកគេចវេះប៉ុស្តិ៍ត្រួតពិនិត្យចត្តាឡីស័កព្រំប្រទល់រវាងខេត្តព្រះសីហនុ និងខេត្តកំពត ត្រូវបានកម្លាំងគណៈបញ្ជាការឯកភាពស្រុកព្រៃនប់ ធ្វើការពិន័យអន្តរការណ៍។ សេចក្ដីរាយការណ៍បានឲ្យដឹងថា ឈ្មោះ កី កុសល ភេទ ប្រុស បើកបររថយន្តម៉ាក Nissan ពណ៌ខ្មៅ មួយគ្រឿងបានបើកគេចវេះពីប៉ុស្តិ៍ត្រួតពិនិត្យចត្តាឡីស័កព្រំប្រទល់រវាងខេត្តព្រះសីហនុ និងខេត្តកំពត។ យោងតាមអនុក្រឹត្យលេខ៣៧ ចុះថ្ងៃទី១២មីនាឆ្នាំ២០២១ របស់រាជរដ្ឋាភិបាលកម្ពុជា ត្រង់មាត្រា២២ ត្រូវផ្តន្ទាទោសពិន័យអន្តរការណ៍ពី ១លានរៀល ទៅ ៥លាន)រៀល ចំពោះបុគ្គលដែលគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័កក្នុងអំឡុងពេលធ្វើចត្តាឡីស័ក តែមិនបានបណ្តាលឱ្យមានការចម្លងជំងឺកូវីដ-១៩ ដល់អ្នកដទៃ។ រដ្ឋបាលខេត្តព្រះសីហនុបញ្ជាក់ថា ចំពោះជនដែលប៉ុនប៉ង និងបំផ្លាញសុខភាពសាធារណៈរបស់ជាតិ រដ្ឋបាលខេត្តត្រូវចាត់វិធានការតាមផ្លូវច្បាប់យ៉ាងម៉ឺងម៉ាត់បំផុត និងគ្មានការលើកលែង។ ជាមួយគ្នានោះ រដ្ឋបាលខេត្តព្រះសីហនុ បានក្រើនរំលឹកដល់ប្រជាពលរដ្ឋទាំងអស់ត្រូវចូលរួមអនុវត្តឱ្យបានខ្ជាប់ខ្ជួនតាមការណែនាំរបស់រាជរដ្ឋាភិបាល និងការអំពាវនាវរបស់អាជ្ញាធរស្រុក ដើម្បីចូលរួមក្នុងការប្រយុទ្ធប្រឆាំងការរីករាលដាលជំងឺកូវីដ-១៩ នៅក្នុងសហគមន៍៕

នៅថ្ងៃទី១៥ ខែមិនា ឆ្នាំ២០២១ យោងស្ថានភាពរីករាលដាលនៃជំងឺកូវីដ-១៩ មានសភាពមិនទាន់ធូរស្រាល ឯកឧត្តម ជា សុមេធី អភិបាលខេត្តព្រៃវែង និងគណៈកម្មាការប្រយុទ្ធប្រឆាំងកូវីដ-១៩ ខេត្តបានចុះត្រួតពិនិត្យមេីលគោលដៅចំនួន៤ទីតាំង គឺឃុំព្រែកខ្សោយ (ក) ឃុំព្រែកខ្សោយ (ខ) ឃុំអ្នកលឿង និងឃុំពាមរក៍ ស្រុកពាមរក៍ ដែលរដ្ឋបាលខេត្តព្រៃវែង សូមធ្វើការផ្អាកបណ្តោះអាសន្ននូវការចេញ-ចូល ដើម្បីទប់ស្កាត់ការរីករាលដាលនៃជំងឺកូវីដ១៩ ចូលក្នុងសហគមន៍ ជាពិសេសព្រឹត្តិការណ៍ សហគមន៍ ២០កុម្ភៈ ដែលនៅតែបន្តកើនឡើងនេះ។ ការចុះពិនិត្យនេះគឺក្នុងគោលបំណងបង្កើនការរឹតបន្តឹងលើការត្រួតពិនិត្យ និងការគ្រប់គ្រងទីតាំងក្នុងគោលដៅនិមួយៗធានាបាននូវប្រសិទ្ធភាពនៃការចូលរួមប្រយុទ្ធប្រឆាំងបង្ការទប់ស្កាត់ជាមួយរាជរដ្ឋាភិបាល និងអនុវត្តនូវវិធានការ និងសេចក្ដីណែនាំរបស់ក្រសួងសុខាភិបាល។ ក្នុងឱកាសនេះ ឯកឧត្តម អភិបាល ខេត្ត ក៍សូមសំដែងការកោតសរសើរ និងលើកទឹកចិត្តចំពោះ គណៈកម្មាការប្រយុទ្ធប្រឆាំងជំងឺកូវីដ-១៩ ខេត្ត និងស្រុក ព្រមទាំងមន្ត្រី និងកងកម្លាំង ជាពិសេស លោកគ្រូពេទ្យ ដែលជាកំលាំងជួរមុខ ក្នុងគោលដៅទាំងអស់ ដែលបានប្រឹងប្រែងអស់ពីកម្លាំងកាយចិត្តក្នុងបេសកកម្មនេះ៕ដោយ -រ៉ាវុធ

ខេត្តកំពង់ធំ៖បងប្អូនពលករដែលទើបវិលត្រឡប់មកពីប្រទេសថៃនៅយប់ថ្ងៃទី១៤ខែមីនាចំនួន៦៦នាក់ត្រូវបានឯកឧត្ដមសុខលូអភិបាលខេត្តកំពង់ធំនិងក្រុមការងារចុះសាកសួរសុខទុក្ខនិងនាំយក​អំណោយសម្ដេចតេជោ(ឃីត១កញ្ចប់) ជូនបងប្អូនពលករនៅមណ្ឌលចត្តាឡីស័កវិទ្យាល័យកំពង់ធំនិងបន្ត​ជួប​ពលករដែល​កំពុងធ្វើចត្តាឡឺស័កនៅស្រុកសន្ទុកចំនួន៣៦នាក់ស្រុកបារាយណ៍ចំនួន៧១នាក់ស្រុកតាំងគោកចំនួន៤៣នាក់និងស្រុកកំពង់ស្វាយ៣៥នាក់សរុបទាំងអស់ចំនួន២៥១នាក់នៅថ្ងៃទី១៥ខែមីនាឆ្នាំ២០២១។ ជាមួយគ្នានោះដែរឯកឧត្តមសុខលូអភិបាលខេត្តកំពង់ធំបានពាំនាំនូវការសាកសួរសុខទុក្ខពីសម្ដេចអគ្គ​មហា​សេនា​បតី​តេជោហ៊ុនសែននិងសម្តេចកិតត្តិព្រឹទ្ធបណ្ឌិតប៊ុនរ៉ានីហ៊ុនសែនជូនចំពោះបងប្អូន​ប្រជា​ពល​រដ្ឋ​គ្រប់រូបដែលកំពុងធ្វើចត្តាឡីស័កនៅគ្រប់មណ្ឌលទាំងអស់ទូទាំងខេត្តកំពង់ធំព្រមទាំងផ្តាំផ្ញើឲ្យអាជ្ញាធរខេត្តអាជ្ញាធរស្រុកសូមយកចិត្តទុកដាក់ចំពោះពុកម៉ែបងប្អូនទោះបីជាមានការ​លំបាក​យ៉ាងណា​ក៏ដោយត្រូវខិតខំជួយបងប្អូនឱ្យអស់លទ្ធភាព។ ទន្ទឹមនឹងនោះដែរឯកឧត្តមសុខលូបានអំពាវនាវដល់ពលករទាំងអស់បន្ទាប់ពីធ្វើចត្តាឡីស័ករយៈពេល១៤ថ្ងៃទទួលបានលទ្ធផលអវិជ្ជមាននៅពេលត្រឡប់ទៅផ្ទះវិញសូមអនុវត្តនូវវិធានការ៣ការពារ៣កុំរបស់រាជរដ្ឋាភិបាលនិងគោរពតាមការណែនាំរបស់ក្រសួងសុខាភិបាលជាពិសេសសូមរក្សាអនាម័យត្រូវពាក់​ម៉ាស់នៅពេលចាំបាច់ឧស្សាហ៍លាងដៃនឹងសាប៊ូទឹកអាកុលឬជែលរក្សាគម្លាតសុវត្ថិភាពពីគ្នាយ៉ាងតិចឲ្យបាន១.៥ម៉ែត្រកុំទៅកន្លែងបិទជិតកុំទៅកន្លែងមានមនុស្សច្រើនកុំប៉ះពាល់គ្នាកុំចាប់ដៃគ្នាកុំកៀកស្មាគ្នាកុំឱបគ្នានិង​ចូលរួម​ស្កេនQR Code នៅគ្រប់ទីកន្លែងដែលពុកម៉ែបងប្អូនទៅដល់ដែលអាចទទួលបានដំណឹង​ឆាប់​រហ័សប្រសិនបើទីតាំងនោះមានករណីឆ្លងជំងឺកូវីដ១៩។ ចុងក្រោយឯកឧត្តមសុខលូក៏បានក្រើនរំលឹកដល់អាជ្ញាធរគ្រប់ក្រុង-ស្រុកទាំង៩សូមធ្វើការណែ​នាំដល់​បងប្អូន​ប្រជាពលរដ្ឋដែលមានបំណងចង់រៀបចំពិធីបុណ្យនានាដែលមិនចាំបាច់ដូចជាបុណ្យផ្កាបុណ្យបច្ច័យបួនបុណ្យទក្ខិណានុប្បទានជាដើមសូមផ្អាកបណ្ដោះអាសន្នលើកលែង​ចំពោះ​ពិធីបុណ្យ​ចាំបាច់ដូចជាបុណ្យសពបុណ្យគំរប់ខួប៧ថ្ងៃ១០០ថ្ងៃពិធីរៀបអាពាហ៍ពិពាហ៍ដាច់ខាតត្រូវតែ​ណែនាំដល់ម្ចាស់​កម្មវិធីធ្វើយ៉ាងម៉េចត្រូវកាត់បន្ថយអ្នកចូលរួមក្នុងមួយតុគឺមានអ្នកចូលរួមតែ៥នាក់ប៉ុណ្ណោះហើយអ្នកចូលរួមទាំងអស់ការធ្វើអនាម័យនិងការវាស់កំដៅការពាក់ម៉ាសការរក្សាគម្លាតសុវត្ថិភាពបុគ្គលនិងសង្គមដើម្បីរួមគ្នាទប់ស្កាត់ការឆ្លងរីករាលដាលនៃជំងឺកូវីដ១៩ចូលក្នុងសហគមន៍។ដោយប៊ុន​រដ្ឋា