-
កិច្ចប្រជុំភាក្សាអំពីកិច្ចសហប្រតិបត្តិជម្រុញលើកស្ទួយវិស័យទេសចរណ៍ក្នុងដំណាក់កាលវិបត្តិកូវីដ-១៩ រវាងក្រសួងទេសចរណ៍ និងអង្គការ UNESCO
ឯកឧត្តម ថោង រដ្ឋសក្តិ អគ្គនាយកអភិវឌ្ឍទេសចរណ៍ និងសហប្រតិបត្តិការអន្តរជាតិ និងឯកឧត្តម ជុក ជំនោរ ប្រធាននាយកដ្ឋានអភិវឌ្ឍផលិតផលទេសចរណ៍ និងជាប្រធានលេខាធិការដ្ឋានគណៈកម្មាធិការជាតិអភិវឌ្ឍទេសចរណ៍ និងលោក ផុន មេសា មន្រ្តីនាយកដ្ឋាន បានជួបជុំជាមួយលោក SARDAR UMAR ALAM នាយកអង្គការ UNESCO ប្រចាំកម្ពុជា និងសហការី ដើម្បីពិភាក្សាអំពីកិច្ចសហប្រតិបត្តិជម្រុញលើកស្ទួយវិស័យទេសចរណ៍ក្នុងដំណាក់កាលវិបត្តិកូវីដ-១៩។ភាគីទាំងពីរ បានពិភាក្សា និងផ្លាស់ប្តូរយោបល់លើការងារ៣សំខាន់ រួមមាន៖ ការត្រៀមរៀបចំពិធីបុណ្យសិល្បៈ វប្បធម៌ និងទេសចរណ៍ នាកំឡុងខែវិច្ឆិកា ឆ្នាំ២០២១ ដើម្បីបង្កើតជាព្រឹត្តិការណ៍ទេសចរណ៍ប្រចាំឆ្នាំ និងអបអរសាទរខួបទី៣០ឆ្នាំ នៃវត្តមានអង្គការ UNESCO នៅកម្ពុជា ការរៀបចំកម្មវិធីរួមគ្នាដើម្បីជម្រុញការផ្សព្វផ្សាយផលិតផលទឹកឃុំធម្មជាតិរបស់កម្ពុជា ការផ្សព្វផ្សាយអំពីសក្តានុពលរបស់កម្ពុជា ដោយផ្សារភ្ជាប់ធនធានវប្បធម៌ ធម្មជាតិ និងគោលដៅទេសចរណ៍នានាទូទាំងប្រទេស។ជាលទ្ធផល ភាគីទាំងពីរបានឯកភាពគ្នាជាគោលការណ៍រួម ហើយក្រុមការងារបច្ចេកទេសនឹងបន្តសហការដើ់ម្បីរៀបចំកម្មវិធីទាំង៣នេះ ឲ្យចេញជារូបរាង ឈរលើស្ថានភាពជាក់ស្តែងនៃជំងឺកូវីដ -១៩៕
-
កូវីដ១៩៖ វ៉ាក់សាំងចិនបញ្ជូនដល់ប្រទេសថៃហើយ ព្រឹកមិញនេះ
វ៉ាក់សាំងបង្ការជំងឺកូវីដ១៩របស់ក្រុមហ៊ុនចិន ស៊ីណូវ៉ាក់ ឈុតដំបូងចំនួន២០ម៉ឺនដូសត្រូវបានបញ្ជូនទៅដល់ប្រទេសថៃហើយ នាព្រឹកថ្ងៃទី២៤ កុម្ភៈ ២០២១នេះ ដោយលោកនាយករដ្ឋមន្ត្រី ប្រាយុទ្ធ ចាន់អូចា និងរដ្ឋមន្ត្រីសុខាភិបាលបានទៅទទួលផ្ទាល់នៅចំណតអាកាសយានដ្ឋានសុវណ្ណភូមិ។ រដ្ឋមន្ត្រីសុខាភិបាលថៃ Anutin Charnvirakul ថា វ៉ាក់សាំងទាំងនេះនឹងត្រូវស្ថិតក្រោមការត្រួតពិនិត្យ៣ថ្ងៃទៀត ដោយនឹងបញ្ជូនទៅមន្ទីរពិសោធន៍ ហើយលោកត្រូវបានរាយការណ៍ថា នឹងក្លាយជាមនុស្សដំបូងចាក់វ៉ាក់សាំងនេះ នាថ្ងៃទី២៧ កុម្ភៈ។ រីឯលោក ប្រាយុទ្ធ នឹងត្រូវចាក់វ៉ាក់សាំងអង់គ្លេសវិញ គឺវ៉ាក់សាំង AstraZeneca ដែលនឹងមកដល់ប្រទេសថៃ នារសៀលថ្ងៃពុធ ទី២៤ កុម្ភៈនេះ។ បើតាមស្ថានទូតចិនប្រចាំប្រទេសថៃថា វ៉ាក់សាំងឈុតដំបូងនេះត្រូវបានបញ្ជាទិញ ក្នុងតម្លៃពាណិជ្ជកម្ម៕
-
លោក ប្រាយុទ្ធ ចាន់អូចា បញ្ជាក់ថា ថៃនឹងពិចារណាដកការធ្វើចត្តាឡីស័ក សម្រាប់ភ្ញៀវទេសចរណ៍ដែលកាន់កាតចាក់វ៉ាក់សាំង
ថៃ៖ នាយករដ្ឋមន្រ្តីថៃលោក ប្រាយុទ្ធ ចាន់អូចា បញ្ជាក់ថា រដ្ឋាភិបាលនឹងពិចារ ណាលុបចោលការធ្វើចត្តាឡីស័ករយៈពេល១៤ថ្ងៃ សម្រាប់ភ្ញៀវទេសចរណ៍ណាដែលបានចាក់វ៉ាក់សាំងប្រឆាំងនឹង Covid-19 រួចហើយ ដែលនេះទំនងជាវិធីមួយ ដើម្បីជួយអោយឧស្សាហកម្មទេសចរណ៍ប្រទេសថៃរស់ឡើងវិញ ។ ក្រោយកិច្ចប្រជុំគណៈរដ្ឋមន្ត្រីនៅថ្ងៃអង្គារម្សិលមិញនេះ នាយករដ្ឋមន្រ្តីថៃលោក ប្រាយុទ្ធ ចាន់អូចា បាននិយាយថា ជនបរទេសដែលមកទស្សនាថៃអាចមិនធ្វើចត្តាឡីស័កពីរសប្តាហ៍ បើសិនជាពួកគេកាន់កាតចាក់វ៉ាក់សាំង តែអាជ្ញាធរនៅបន្តតាមដានពួកគេ ។ សូមជម្រាបថា អាជ្ញាធរសុខាភិបាលថៃ នៅថ្ងៃអង្គារម្សិលមិញ បានអនុម័តវ៉ាក់សាំងបង្ការជំងឺ COVID-19 ដែលផលិតឡើងដោយក្រុមហ៊ុនឱសថចិន Sinovac សម្រាប់ការប្រើប្រាស់ក្នុងករណីបន្ទាន់ ដែលជាការត្រួសត្រាយផ្លូវសម្រាប់ប្រទេសនេះ ដើម្បីទទួលបានវ៉ាក់សាំងជាជំហានដំបូងចំនួន២០ម៉ឺនដូស នៅថ្ងៃពុធនេះ ។ បើតាមមន្ត្រីរដ្ឋាភិបាលដែលស្នើសុំមិនបញ្ចេញឈ្មោះម្នាក់ នាយករដ្ឋមន្រ្តីថៃលោក ប្រាយុទ្ធ ចាន់អូចា នឹងទៅអាកាសយានដ្ឋាន ដើម្បីសង្កេតមើលការមកដល់់របស់វ៉ាក់សាំងចិន ៕ ប្រភព៖ The Thaiger
-
អ្នកឆ្លង COVID-19 នៅទូទាំងពិភពលោកកើនឡើង១១២លាន៦៤ម៉ឺននាក់ ក្នុងនោះស្លាប់២លាន៤៩ម៉ឺននាក់ និងជាសះស្បើយ៨៨លាន២៣ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១២លាន៦៤ម៉ឺន៨ពាន់៣០៨ករណី ក្នុងនោះមានអ្នកជម្ងឺសរុបចំនួន២លាន៤៩ម៉ឺន៦ពាន់៦៥០នាក់ស្លាប់ និង ជាសះស្បើយឡើងវិញសរុបចំនួន៨៨លាន២៣ម៉ឺន៣ពាន់៨៥១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៤ ខែកុម្ភៈ ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៨លាន៨៩ម៉ឺន៧ពាន់៧១៨នាក់ ស្លាប់ចំនួន៥១ម៉ឺន៤ពាន់៩៩៦នាក់ និងជាសះស្បើយចំនួន១៩លាន២១ម៉ឺន២ពាន់៥១៧នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១១លាន២ម៉ឺន៩ពាន់៣២៦នាក់ ស្លាប់ចំនួន១៥ម៉ឺន៦ពាន់៥៩៨នាក់ និងជាសះស្បើយ១០លាន៧២ម៉ឺន៤ពាន់១៤៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១០លាន២៦ម៉ឺន៦២១នាក់ ស្លាប់២៤ម៉ឺន៨ពាន់៦៤៦នាក់ និងជាសះស្បើយ៩លាន២១ម៉ឺន៥ពាន់១៦៤នាក់ ៕ ប្រភព៖ worldometers
-
រដ្ឋបាលខេត្តព្រះសីហនុអំពាវនាវដល់ពលរដ្ឋដែលធ្លាប់ចេញចូលទីតាំងមួយចំនួន និងដឹងខ្លួនប៉ះពាល់ជាមួយជនជាតិចិន២នាក់ដែលឆ្លងជំងឺកូវីដ-១៩ ឲ្យប្រញាប់ទៅធ្វើតេស្ត និងធ្វើចត្តាឡីស័កឲ្យបានត្រឹមត្រូវ
រដ្ឋាបាលខេត្តព្រះសីហនុ បានអំពាវនាវប្រជាពលរដ្ឋ ដែលធ្លាប់ចេញចូល នៅសណ្ឋាគារជីនប៉ីទាំង៣សាខា និងអគារស្នាក់នៅរួមរបស់បុគ្គលិកក្រុមហ៊ុនជីនប៉ិន ចាប់ពីយប់ថ្ងៃទី១៦កុម្ភៈឆ្នាំ២០២១មក និងសណ្ឋាគារហ័ងហ្គ័នជាយី ចាប់ពីយប់ថ្ងៃទី២០កុម្ភៈឆ្នាំ២០២១មក ឬដឹងថាខ្លួនបានប៉ះពាល់ជាមួយអ្នកជំងឺកូវីដ១៩ ដែលជាជនជាតិចិនទើបរកឃើញវិជ្ជមានទាំង២នាក់ ឲ្យប្រញាប់ទៅធ្វើតេស្តរកវីរុសកូវីដ-១៩។ រដ្ឋបាលខេត្តព្រះសីហនុ បានបញ្ជាក់ថា ក្រុមឆ្លើយតបបន្ទាន់នៃមន្ទីរក្រសួងសុខាភិបាលខេត្តព្រីហនុ ប្រចាំការនៅសាលាបឋមសិក្សា អនុវិទ្យាល័យ តេជោសែន កម្មករ ស្ថិតនៅវិថីឯករាជ្យ (ផ្លូវ១០០) សង្កាត់លេខ ៤ ក្រុងព្រះសីហនុ ចាប់ពីម៉ោង១រសៀល ថ្ងៃទី២៤ ខែកុម្ភៈ ឆ្នាំ២០២១តទៅ ដើម្បីក្រុមការងារពិនិត្យយកសំណាកធ្វើតេស្ត និងធ្វើចត្តាឡីស័កចំនួន១៤ថ្ងៃ។ សូមជម្រាបថា រដ្ឋបាលខេត្តព្រះសីហនុ នៅថ្ងៃទី២៣កុម្ភៈ ឆ្នាំ២០២១ បានបញ្ជាក់ថា គេបានរកឃើញជនជាតិចិនចំនួន២នាក់ មានវិជ្ជមានកូវីដ-១៩។ ពួកគេទាំង២នាក់ បានធ្វើដំណើចេញពីរាជធានីភ្នំពេញ កាលពីថ្ងៃទី១៦និងទី២០ ខែកុម្ភៈ ឆ្នាំ២០២១ កន្លងទៅ។ បច្ចុប្បន្នជនជាតិចិនទាំង២ ត្រូវបានដាក់អោយនៅព្យាបាលដាច់ដោយឡែកក្នុងមន្ទីរពេទ្យបង្អែកខេត្តព្រះសីហនុ។ ជាមួយគ្នានោះ រដ្ឋបាលខេត្តព្រះសីហនុក៏បានបិទសណ្ឋាគារដែលពួកគេធ្លាប់ស្នាក់នៅផងដែរ។ គិតត្រឹមថ្ងៃទី២៤កុម្ភៈ ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ១៩ ចំនួន ៦៣៣នាក់ ក្នុងនោះអ្នកជាសះស្បើយចំនួន ៤៧៦នាក់ និងអ្នកជំងឺ១៤២នាក់ កំពុងសម្រាកព្យាបាលនៅមន្ទីរពេទ្យ៕
-
អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ ជូនដំណឹងពីលេខទូរស័ព្ទ២៤ប្រព័ន្ធ ដើម្បីទំនាក់ទំនងសម្ភាសន៍ និងប្រមូលព័ត៌មានដើម្បី ប្រយុទ្ធប្រឆាំងនឹងជំងឺកូវីដ-១៩ (COVID-19)
អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ គឺជាក្រុមការងារអន្តរស្ថាប័ន ចំណុះឲ្យគណៈកម្មការអន្តរក្រសួង មានភារកិច្ច ស្រាវជ្រាវ ស្វែងរក និងតាមដានបុគ្គលសង្ស័យថា មានផ្ទុកជំងឺកូវីដ-១៩ បានដាក់ឱ្យប្រើប្រាស់លេខទូរស័ព្ទ ចំនួន២៤ខ្សែ មានប្រព័ន្ធSMART ចំនួន១២ ខ្សែ និងប្រព័ន្ធMETFONE ចំនួន១២ខ្សែ សម្រាប់ទំនាក់ទំនង និង ប្រមូលព័ត៌មាន៕
-
ថ្ងៃទី២៣ ខែកុម្ភ: ឆ្នាំ២០២១ មានករណីវិជ្ជមានវីរុសកូវីដ-១៩ ថ្មីចំនួន ៤០នាក់ និងអ្នកជាសះស្បេីយចំនួន១នាក់
ក្នុងចំណោមអ្នកឆ្លងថ្មីទាំង៤០នាក់នោះ មាន៣៨នាក់ពាក់ពន្ធ័នឹងព្រឹត្តិការណ៍សហគមន៍២០កុម្ភៈ និង២នាក់ទៀតជាអ្នកដំណើរមកពីបរទេស។ ដូច្នេះចាប់តាំងពីថ្ងៃ២០ដល់ថ្ងៃ២៤កុម្ភៈមានអ្នកឆ្លងជំងឺកូវីដ-១៩ពាក់ពន្ធ័នឹងព្រឹត្តិការណ៍២០កុម្ភៈចំនួន១៣៧នាក់ហើយ។ កម្ពុជាគិតមកដល់ថ្ងៃ២៤កុម្ភៈឆ្នាំ២០២១ មានអ្នកឆ្លងជំងឺកូវីដ-១៩ចំនួន៦៣៣នាក់ ក្នុងនោះបានព្យាបាលជាសះស្បើយចំនួន៤៧៦នាក់ និងនៅសល់១៤២នាក់កំពុងព្យាបាលនៅមន្ទីរពេទ្យ។
-
មនុស្ស ចំនួន៤០នាក់ ត្រូវបានរកឃើញថាអ្នកឆ្លង កូវីដ១៩ ថ្មី ក្នុងនោះ៣៨នាក់ ជាករណីឆ្លង សហគមន៍ក្នុង «ព្រឹត្តិការណ៍ ២០កុម្ភៈ»
-
ក្រុមជំនាញឆ្លើយតបបន្ទាន់ នៃមន្ទីរសុខាភិបាលខេត្តព្រះសីហនុ រកឃើញវិជ្ជមានជំងឺ កូវីដ-១៩ លើជនបរទេស២នាក់
ព្រះសីហនុ៖ ជនជាតិចិន២នាក់ ត្រូវបានក្រុមជំនាញឆ្លើយតបបន្ទាន់ នៃមន្ទីរសុខាភិបាលខេត្តព្រះសីហនុ រកឃើញវិជ្ជមានជំងឺ កូវីដ-១៩ កាលពីថ្ងៃទី២២ ខែកុម្ភៈ ឆ្នាំ២០២១។ បច្ចុប្បន្នពួកគាត់ទាំង២ ត្រូវបានដាក់ឲ្យនៅដាច់ដោយឡែក និងផ្តល់ការព្យាលបាល នៅមន្ទីរពេទ្យបង្អែកខេត្តព្រះសីហនុ នេះបើតាមសេចក្តីជូនដំណឹងរបស់រដ្ឋបាលខេត្តព្រះសីហនុ។ រដ្ឋបាលខេត្តព្រះសីហនុសម្រេចផ្អាកអាជីវកម្មសណ្ឋាគារជីនប៉ី៣សាខា និងអគារស្នាក់រួមរបស់បុគ្គលិកក្រុមហ៊ុនជីនប៉ី ក្រុងព្រះសីហនុព្រមទាំង សណ្ឋាគារហ័ងហ្គ័នជាយី ជាបណ្តោះអាសន្ន ដើម្បីទប់ស្កាត់ការរីករាលដាល នៃជំងឺកូវីដ-១៩។
-
ថៃ៖ បាងកកបើកក្លឹបរាត្រី កន្លែងម៉ាសា និងទីតាំងកម្សាន្តនានាវិញ ចាប់ពីយប់នេះ
ក្លឹបនិងទីតាំងកម្សាន្តពេលយប់នានានៅក្នុងរាជធានីបាងកក ប្រទេសថៃ អាចបើកដំណើរការឡើងវិញ រហូតដល់ម៉ោង១១យប់ ចាប់ពីថ្ងៃទី២៣ កុម្ភៈ ២០២០១នេះ បន្ទាប់ពីគណៈកម្មការទប់ស្កាត់បានបន្ធូរបន្ថយការរឹតបន្តឹងបង្ការកូវីដ១៩ នេះបើតាមអ្នកនាំពាក្យសាលាក្រុង ចេញផ្សាយដោយសារព័ត៌មាន The Nation នាប៉ុន្មានម៉ោងមុននេះ។ ប្រភពថា ភោជនីយដ្ឋាននានាអាចបំរើសេវាកម្មអាហារ និងស្រា រហូតដល់ម៉ោង១១យប់ ហើយកន្លែងម៉ាសា ក្លឹបកម្សាន្ត និងទីតាំងកម្សាន្តផ្សេងៗទៀតក៏អាចបើកឡើងវិញ រហូតដល់ម៉ោង១១យប់ ប៉ុន្តែតុអង្គុយត្រូវរក្សាគម្លាត គ្មានការរាំលេង ហើយនិងមានការពិនិត្យវត្តមានត្រឹមត្រូវ។ កន្លែងហាត់ប្រាណនានា ក៏អាចបើកធម្មតាវិញ ខណៈដែលស្តាលេងកីឡាអាចដំណើរការបានតែចំនួនមានកំណត់។ សាលារៀននៅក្រុងបាងកកក៏អាចដំណើរការបានជាធម្មតាដែរ។ ការបន្ធូរបន្ថយនេះធ្វើឡើង ក្រោយពេលអត្រាឆ្លងកូវីដ១៩នៅថៃបានបន្តធ្លាក់ចុះ ក្រោម១០០នាក់ ក្នុងមួយថ្ងៃ ខណៈដែលវ៉ាក់សាំងឈុតដំបូងនឹងមកដល់ស្អែកនេះ៕