-
ទីបំផុតហ្វីលីពីនបើកភ្លើងខៀវអោយប្រើវ៉ាក់សាំង Covid-19 របស់ក្រុមហ៊ុន Pfizer-BioNTech ក្នុងករណីបន្ទាន់ (Video)
ហ្វីលីពីន៖ រដ្ឋបាលត្រួតពិនិត្យសុវត្ថិភាពចំណីអាហារ និង ឱសថហ្វីលីពីនប្រកាសអនុម័តអោយប្រើប្រាស់វ៉ាក់សាំង COVID-19 របស់ក្រុមហ៊ុនផលិតឱសថ ភីហ្វីហ្ស៊ឺ របស់អាមេរិក និង បាយអូអិនធិចរបស់អាល្លឺម៉ង់ នៅក្នុងករណីបន្ទាន់ នេះបើតាមសារព័ត៌មានរ៉យទ័រនៅថ្ងៃទី១៤ ខែមករា ឆ្នាំ២០២១ ។ ជាមួយគ្នានេះ ប្រធានរដ្ឋបាលត្រួតពិនិត្យសុវត្ថិភាពចំណីអាហារ និង ឱសថហ្វីលីពីនលោក រ៉ូលែនដូ អេនរីហ្គេ ដូមីនហ្គោ បាននិយាយថា វ៉ាក់សាំងរបស់ក្រុមហ៊ុនភីហ្វីហ្ស៊ឺ-បាយអូអិនធិច ដែលបានបង្ហាញអត្រាជោគជ័យរហូតដល់៩៥ភាគរយនេះ អាចនឹងមានប្រសិទ្ធភាពក្នុងការទប់ស្កាត់ជំងឺកូវីដ១៩ ជាមួយនឹងមនុស្សជិតកន្លះលាននាក់នៅហ្វីលីពីន ដែលឆ្លងវីរុសដ៏កាចសាហាវមួយនេះ ។ សូមជម្រាបថា ការអនុម័តខាងលើនេះ បានកើតមានឡើងក្រោយអាជ្ញាធរសុខាភិបាលហ្វីលីពីនបាននិយាយថា ក្រុមហ៊ុនផលិតឱសថចិន ស៊ីណាវ៉ាក់ នៅថ្ងៃពុធម្សិលមិញ ក៏ទើបតែបានដាក់ពាក្យស្នើសុំការអនុញ្ញាតឲ្យប្រើប្រាស់វ៉ាក់សាំង COVID-19 របស់ខ្លួន នៅហ្វីលីពីន ខណៈប្រទេសអាស៊ានមួយនេះរំពឹងថា នឹងចាប់ផ្តើមយុទ្ធនាការចាក់វ៉ាក់សាំង COVID-19 នៅខែកុម្ភៈ ឆ្នាំ២០២១ ៕
-
លោកជំទាវ យក់ សម្បត្តិ បញ្ជាក់ថា រាជរដ្ឋាភិបាល សម្រេចផ្តល់ថវិកា ៨០០លានរៀលទៀត ដល់ខេត្ត ឧត្តរមានជ័យ និង២០០លានរៀល ដល់ខេត្តបាត់ដំបង ដើម្បីរៀបចំទីតាំងធ្វើចត្តាឡីស័កសម្រាប់ពលករ
លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បញ្ជាក់ប្រាប់បណ្តាញព័ត៌មាន នៅ ថ្ងៃទី១៤ ខែមករា ឆ្នាំ២០២១ថា សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានផ្តល់ថវិកា ៨០០ លានរៀលទៀត សម្រាប់ខេត្ត ឧត្តរមានជ័យ និង២០០លានរៀលថែមទៀត សម្រាប់ខេត្តបាត់ដំបង ដើម្បីរៀបចំទីតាំងសម្រាប់ធ្វើចត្តាឡីស័កជូនពលករខ្មែរ ដែលត្រឡប់មកពីប្រទេសថៃ ។ លោកជំទាវ យក់ សម្បត្តិ បានបន្ថែមថា ថវិកា ៨០០លានរៀល សម្រាប់ខេត្តឧត្តរមានជ័យ នឹង ត្រូវប្រើប្រាស់សម្រាប់រៀបចំទីតាំងធ្វើចត្តាឡីស័ក១០កន្លែង រៀបចំបាយទឹកសម្រាប់ពលករ ក៏ដូចជា ប្រើប្រាស់ក្នុងកិច្ចការមួយចំនួនទៀត ដោយសារតែមានពលករជាច្រើន បានសម្រុកចូលមកតាមច្រក ខេត្តឧត្តរមានជ័យ។ ដោយឡែកថវិកាបន្ថែម២០០លានរៀល សម្រាប់ខេត្តបាត់ដំបង គឺដើម្បីសម្រួល ដល់ការរៀបចំទីតាំងសម្រាប់ធ្វើចត្តាឡីស័ក ដល់ពលករឱ្យកាន់តែប្រសើរឡើងថែមទៀត។ លោកជំទាវរដ្ឋលេខាធិការ បានបញ្ជាក់បន្ថែមថា ថវិកាទាំងនេះ កំពុងតែរៀបចំបញ្ជូនឱ្យរដ្ឋបាល ខេត្តទាំងពីរភ្លាមៗតែម្តង ។ សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តីកម្ពុជា កាលពីថ្ងៃទី១២…
-
ប្រធានាធិបតីរុស្ស៊ីបញ្ជាអោយចាប់ផ្តើមចាក់វ៉ាក់សាំង Sputnik V ដើម្បីបង្ការវីរុស Covid-19 ក្នុងទ្រង់ទ្រាយធំជូនដល់ប្រជាជនទាំងអស់
រុស្ស៊ី៖ ប្រធានាធិបតីរុស្ស៊ីលោក វ៉្លាឌីមៀ ពូទីន បញ្ជាអោយរដ្ឋាភិបាលរបស់លោកចាប់ផ្តើមចាក់វ៉ាក់សាំង COVID-19 ទ្រង់ទ្រាយធំនៅសប្តាហ៍ក្រោយ ដោយចាក់ជូនប្រជាជនរុស្ស៊ីទាំងអស់ ចំពេលដែលពលរដ្ឋជាង១.៥លាននាក់បានចាក់វ៉ាក់សាំងរួចរាល់ហើយ នេះបើតាមសារព័ត៌មាន RT នៅយប់ថ្ងៃទី១៣ ខែមករា ឆ្នាំ២០២១ ។ តាមរយៈកិច្ចប្រជុំអនឡាញជាមួយគណៈរដ្ឋមន្ត្រីរបស់ខ្លួន លោក ពូទីន បាននិយាយថា ខ្ញុំស្នើសុំអោយពួកអ្នកចាប់ផ្តើមកម្មវិធីចាក់វ៉ាក់សាំង COVID-19 ជូនដល់ពលរដ្ឋទាំងមូលនៅសប្តាហ៍ក្រោយ ។ ស្របពេលជាមួយគ្នានេះដែរ ឧបនាយករដ្ឋមន្ត្រីរុស្ស៊ីលោក តាធៀណា ហ្គោលីកូវ៉ា បាននិយាយថា អាជ្ញាធរនឹងត្រៀមខ្លួន ដើម្បីពង្រីកកម្មវិធីចាក់វ៉ាក់សាំងបង្ការកូវីដ១៩ ដោយចាប់ផ្តើមនៅថ្ងៃចន្ទសប្តាហ៍ក្រោយនេះតែម្តង ៕
-
មន្រ្តីជាន់ខ្ពស់អង្គការ WHO ព្រមានថា វីរុស Covid-19 ឆ្នាំទី២ អាចនឹងធ្ងន់ធ្ងរជាងឆ្នាំទី១ទៅទៀត (Video)
ស្វីស៖ អង្គការសុខភាពពិភពលោក WHO នៅថ្ងៃពុធនេះនិយាយថា ជំងឺកូវីដ១៩ឆ្នាំទី២នេះ អាចនឹងមានសភាពធ្ងន់ធ្ងរជាងឆ្នាំដំបូងទៅទៀត ជាពិសេសនៅអឌ្ឍគោលខាងជើង ពីព្រោះវីរុសទម្រង់ថ្មីកំពុងឆ្លងរីករាលដាលយ៉ាងឆាប់រហ័ស នេះបើតាមសារព័ត៌មានរ៉យទ័រនៅថ្ងៃទី១៤ ខែមករា ឆ្នាំ២០២១ ។ មន្ត្រីផ្នែកសង្គ្រោះបន្ទាន់របស់អង្គការសុខភាពពិភពលោក WHO លោក ម៉ៃ រីយ៉ាន បញ្ជាក់ថា យើងនឹងឈានចូលដល់ឆ្នាំទី២នៃរោគរាតត្បាតនេះ ហើយវារឹតតែពិបាកថែមទៀត ដោយសារតែសក្ដានុពលនៃការចម្លង និង បញ្ហាមួយចំនួនដែលយើងកំពុងជួបប្រទះ ។ លោក រីយ៉ាន បន្ថែមទៀតថា ពិតណាស់ នៅអឌ្ឍគោលខាងជើង ជាពិសេសនៅអឺរ៉ុប និងអាមេរិកខាងជើង យើងបានឃើញថាមានពិធីបុណ្យានានា ភាពត្រជាក់ ប្រជាជនស្នាក់ខាងក្នុងផ្ទះ ការជួបជុំ និងការរួមបញ្ចូលកត្តាជាច្រើន ដែលជំរុញអោយមានការចម្លងកាន់តែខ្លាំងនៅក្នុងប្រទេសជាច្រើន ។ សូមជម្រាបថា ជំងឺ COVID-19 បានចម្លងទៅមនុស្សសរុបចំនួន៩២លាន៧៤ម៉ឺន៧ពាន់៩០៤ករណី ក្នុងនោះមានអ្នកជម្ងឺសរុបចំនួន១លាន៩៨ម៉ឺន៥ពាន់៤០៥នាក់ស្លាប់ និង ជាសះស្បើយឡើងវិញសរុបចំនួន៦៦លាន២៧ម៉ឺន៦ពាន់៣៤៤នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៤ ខែមករា ឆ្នាំ២០២១ ៕
-
ហ្វីលីពីនប្រកាសរកឃើញអ្នកផ្ទុកវីរុស Covid-19 ទម្រង់ថ្មីជាលើកដំបូង ដែលមានប្រភពនៅអង់គ្លេស
ហ្វីលីពីន៖ អាជ្ញាធរសុខាភិបាលហ្វីលីពីនបានរកឃើញជាលើកដំបូងនូវអ្នកផ្ទុកវីរុសកូវីដ១៩ទម្រង់ថ្មី ដូចគ្នាទៅនឹងវីរុសនៅចក្រភពអង់គ្លេស ដែលឆ្លងរាតត្បាតយ៉ាងលឿន នេះបើតាមសារព័ត៌មានស៊ីនហួរនៅថ្ងៃទី១៤ ខែមករា ឆ្នាំ២០២១ ។ ក្រសួងសុខាភិបាលហ្វីលីពីន DOH និងមជ្ឈមណ្ឌលហ្សែនហ្វីលីពីន PGC បាននិយាយថា វីរុសកូរ៉ូណាទម្រង់ថ្មីដែលហៅថា VUI-202012/01 ឬ lineage B117 ត្រូវបានរកឃើញនៅក្នុងខ្លួនភ្នាក់ងារអចលនទ្រព្យម្នាក់នៅទីក្រុង កេហ្សុន ស៊ីធី។បុរសនេះធ្លាប់បានទៅអារ៉ាប់រួមអេមីរ៉ាត់ ចាប់ពីថ្ងៃ២៧ ខែធ្នូដល់ទី៧ ខែមករា ។ជននេះត្រូវបានធ្វើតេស្តវិជ្ជមានកូវីដ១៩ នៅមួយថ្ងៃក្រោយវិលត្រឡប់ពីទីក្រុងឌូបៃ មកដល់ទីក្រុងម៉ានីល ។ ឆ្លើយតបនឹងបញ្ហាខាងលើនេះ រដ្ឋាភិបាលហ្វីលីពីនហាមឃាត់អ្នកដំណើរដែលមានប្រវត្តិធ្វើដំណើរនាពេលថ្មីៗទៅកាន់ចក្រភពអង់គ្លេស និង៣២ប្រទេស និងតំបន់ផ្សេងទៀត ដើម្បីការពារកុំអោយមានការឆ្លងរាលដាលថ្មីៗនៅក្នុងប្រទេស ខណៈអ្នកជំនាញការសុខភាពព្រមានថា វីរុសកូវីដ១៩ទម្រង់ថ្មីនេះអាចនាំអោយចំនួនឆ្លងនៅហ្វីលីពីនកើនឡើង១៥ដង ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៩៣លាននាក់ ក្នុងនោះស្លាប់ជាង១លាន៩៨ម៉ឺននាក់ និងជាសះស្បើយជាង៦៦លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៩២លាន៧៤ម៉ឺន៧ពាន់៩០៤ករណី ក្នុងនោះមានអ្នកជម្ងឺសរុបចំនួន១លាន៩៨ម៉ឺន៥ពាន់៤០៥នាក់ស្លាប់ និង ជាសះស្បើយឡើងវិញសរុបចំនួន៦៦លាន២៧ម៉ឺន៦ពាន់៣៤៤នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៤ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៣លាន៦១ម៉ឺន៦ពាន់៣៤៥នាក់ ស្លាប់ចំនួន៣៩ម៉ឺន៣ពាន់៩២៨នាក់ និងជាសះស្បើយចំនួន១៣លាន៩៧ម៉ឺន៥ពាន់៣៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៥១ម៉ឺន២ពាន់៨៣១នាក់ ស្លាប់ចំនួន១៥ម៉ឺន១ពាន់៧៦៥នាក់ និងជាសះស្បើយ១០លាន១៤ម៉ឺន៦ពាន់២៥៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន២៥ម៉ឺន៧ពាន់៤៥៩នាក់ ស្លាប់២០ម៉ឺន៦ពាន់៩នាក់ និងជាសះស្បើយ៧លាន២៧ម៉ឺន៧ពាន់១៩៥នាក់ ៕
-
មនុស្ស១៣នាក់ត្រូវរកឃើញផ្ទុកជំងឺកូវីដ-១៩នៅថ្ងៃនេះ
យោងតាមក្រសួងសុខាភិបាលនៅថ្ងៃ១៤មករាឆ្នាំ២០២១នេះបានាឲ្យដឹងថា នៅថ្ងៃ១៣មករាឆ្នាំ២០២១ គេបានរកឃើញអ្នកឆ្លងជំងឺកូវីដ-១៩ថ្មីចំនួន១៣នាក់។ ក្នុងចំណោមអ្នកឆ្លងថ្មីទាំង១៣នាក់នោះ មាន៨នាក់ជាពលករទើបត្រឡប់មកពីប្រទេសថៃ។ ចំណែក៥នាកា់ទៀតជាពលរដ្ឋខ្មែរធ្វើដំណើរមកពីសហរដ្ឋអាមេរិក និងឥណ្ឌូនេស៊ី។ ក្រសួងសុខាភិបាលក៏បានបញ្ជាក់ដែរថា នៅថ្ងៃ១៣មករា មានអ្នកជាសះស្បើយម្នាក់ផងដែរ។ គិតមកដល់ថ្ងៃ១៣មករាឆ្នាំ២០២១ កម្ពុជាមានអ្នកឆ្លង៤១១នាក់ ក្នុងនោះបានព្យាបាលជាសះស្បើយបានចំនួន៣៧៧នាក់ និងនៅសល់៣៤នាក់កំពុងសម្រាកព្យាបាលនៅមន្ទីរពេទ្យ៕កឹម ទៀង
-
ផ្សារលក់គ្រឿងសមុទ្រដ៏ធំមួយនៅកណ្តាលទីក្រុងបាងកក ត្រូវបានបិទរយៈពេល០៣ថ្ងៃ បន្ទាប់ពីអ្នកលក់ម្នាក់ធ្វើតេស្តវិជ្ជមាន Covid-19
ថៃ៖ ផ្សារ ក្លុង ថូយ (Klong Toey) ដែលជាផ្សារលក់គ្រឿងសមុទ្រដ៏ធំមួយនៅកណ្តាលទីក្រុងបាងកក របស់ប្រទេសថៃ ត្រូវបានបិទរយៈពេល០៣ថ្ងៃ គិតចាប់ពីថ្ងៃពុធនេះ ក្រោយអ្នកលក់ម្នាក់បានធ្វើតេស្តវិជ្ជមាន Covid-19 នេះបើតាមសារព័ត៌មានបាងកកប៉ុស្តិ៍នៅថ្ងៃទី១៣ ខែមករា ឆ្នាំ២០២១ ។ ស្របពេលជាមួយគ្នានេះដែរ ទារកអាយុ០៣ខែម្នាក់ក៏បានធ្វើតេស្តវិជ្ជមាន Covid-19 ផងដែរ ខណៈមកទល់ពេលនេះ វាជាករណីឆ្លងក្មេងជាងគេ ក្នុងចំណោមករណីឆ្លងថ្មីចំនួន៣២ត្រូវបានកត់ត្រានៅក្នុងរដ្ឋធានីនេះកាលពីថ្ងៃ អង្គារ ម្សិលមិញ ។ ចៅសង្កាត់ ក្លុង ថូយ លោកស្រី ភីយ៉ាដា នីយុម បាននិយាយថា អ្នកលក់នៅផ្សារ នេះ ដែលមិនមានរោគសញ្ញាត្រូវបានដាក់អោយធ្វើចត្តាឡីស័ក ក្រោយការធ្វើតេស្តទឹកមាត់បានបង្ហាញថា អ្នកលក់រូបនេះបានឆ្លងវីរុសនេះ ។ បន្ថែមលើនេះ លោកស្រី ភីយ៉ាដា បានបន្ថែមទៀតថា មនុស្សជាង១០នាក់ដែលមានទំនាក់ទំនងជិតស្និទ្ធជាមួយអ្នកលក់ដែលឆ្លងមេរោគនេះ ត្រូវបានផ្ដាច់ខ្លួននៅដាច់ដោយឡែកផងដែរ ហើយថា ផ្សារនេះនឹងត្រូវបិទដើម្បីបាញ់ថ្នាំសម្លាប់មេរោគ ហើយនឹងបើកឡើងវិញនៅថ្ងៃសៅរ៍ចុងសប្តាហ៍នេះ ៕
-
ក្រសួងទេសសចរណ៍ស្នើភាគីពាក់ព័ន្ធជួយផ្សព្វផ្សាយ ចំណាត់ថ្នាក់លេខ១លើពិភាពពលោកក្នុងការទប់ស្កាត់ជំងឺកូវីដ-១៩ របស់កម្ពុជា ដើម្បីទាក់ទាញភ្ញៀវទេសចរ
ក្រសួងទេសសចរណ៍នៅថ្ងៃ១២មករាឆ្នាំ២០២១ បានប្រកាសថា កាលពីខែវិច្ឆិកាឆ្នាំ២០២០ ការិយាល័យសេដ្ឋកិច្ចសេណេហ្គាល់បានចុះផ្សាយរបាយការណ៍ស្ដីពីការផ្ដល់ចំណាច់ថ្នាក់ដល់ប្រទេសដែលគ្រប់គ្រងកូវីដ-១៩ បានល្អបំផុតនៅលើពិភពលោក ក្នុងនោះប្រទេសកម្ពុជាឈរនៅចំណាត់ថ្នាក់លេខ៣ បន្ទាប់ទី Saint Kitts និង Nevis ដែលជារដ្ឋតូចនៃតំបន់ការ៉ាអ៊ីប និងស៊ូស្សែល។ ក្រសួងទេសចរណ៍បានបន្តថា កាលពីថ្ងៃទី២០ធ្នូឆ្នាំ២០២០ ការិយាល័យសេដ្ឋកិច្ចសេណេហ្គាល់បានចុះផ្សាយរបាយការណ៍របស់ខ្លួនជាថ្មីថា កម្ពុជាបានជាប់ចំណាត់ថ្នាក់លេខ១លើពិភពលោក ក្នុងការប្រយុទ្ធប្រឆាំង និងការទប់ស្កាត់ការរាតត្បាតនៃជំងឺកូវីដ-១៩ ដែលមានពិន្ទុ១លើ១ ដែលជាពិន្ទុខ្ពស់ជាងគេបំផុតនៃការធ្វើចំណាត់ថ្នាក់ ក្នុងចំណោម១៦៦ប្រទេសជុំវិញពិភពលោក បន្ទាប់មកគឺប្រទេសស៊ូដង់ខាងត្បូង និងប្រទេសប្រ៊ុយណេ ដែលមានពិន្ទុ០,៩៩។ ដោយសារមានការគ្រប់គ្រងល្អ និងម៉ឺងម៉ាត់របស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩ ប្រទេសកម្ពុជាបានក្លាយជាប្រទេសមួយក្នុងចំណោមប្រទេសដែលមានសុវត្ថិភាពបំផុតក្នុងការមកទ្សនា ទោះបីជានៅក្នុងអំឡុងពេលនៃការឆ្លងរាលដាលជមងឺកូវីដ-១៩។ ចំណាត់ថ្នាក់នោះ ជាមោទនភាពជាតិមួយផ្សេងទៀតរបស់ប្រទេសកម្ពុជ និងជាឱកាសល្អក្នុងការផ្សព្វផ្សាយកម្ពុជា ព្រះរាជាណាចក្រអច្ឆរិយៈផ្ដល់ភាពកក់ក្ដៅ ជូនដល់ភ្ញៀវទេសចរណ៍ជាតិ និងអន្តរជាតិ នៅគ្រប់កាលៈទេសៈទាំងអស់។ ក្រសួងទេសចរណ៍បានសម្ដែងការអបអរសាទរចំពោះការជាបា់ចំណាត់ថ្នាក់លេខ១ លើពិភពលោកក្នុងការប្រយុទ្ធប្រឆាំងនឹងជំងឺកូវីដ-១៩ របស់កម្ពុជា។ ក្រសួងទេសចរណ៍ក៏បបានស្នើសុំការគាំទ្រ និងកិច្ចសហប្រតិបត្តិការពីគ្រប់ភាគីពាក់ពន្ធ័ ប្រតិបត្តិករទេសចរណ៍ ដៃគូអភិវឌ្ឍន៍ សាធារណជន និងប្រពន្ធ័ផ្សព្វផ្សាយជាតិ និងអន្តរជាតិ ក្នុងការផ្សព្វផ្សាយដំណឹងនោះដល់ដៃគូពាក់ពន្ធ័ ទេសចរជាតិ អន្តរជាតិទាំងអស់នៅជុំវិញពិភពលោកថា កម្ពុជាជាប្រទេសមួយក្នុងចំណោមប្រទេសដែលមានសុវត្ថិភាពបំផុតក្នុងការមកទស្សនាក្នុងអំឡុងពេលរីករាលដាលនៃជំងឺកូវីដ-១៩៕
-
សហរដ្ឋអាមេរិកមានផែនការចាក់វ៉ាក់សាំង Covid-19 ជូនដល់ពលរដ្ឋដែលមានអាយុលើស៦៥ឆ្នាំទាំងអស់គ្នា ដើម្បីពន្លឿនការចែកចាយវ៉ាក់សាំង (Video)
អាមេរិក៖ រដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ នឹងផ្តល់អនុសាសន៍ឲ្យចាក់វ៉ាក់សាំង COVID-19 ជូនដល់ពលរដ្ឋដែលមានអាយុលើសពី៦៥ឆ្នាំទាំងអស់គ្នា ស្ថិតក្នុងគោលបំណងពន្លឿនការចែកចាយ ចំពេលដែលអត្រាអ្នកស្លាប់បានកើនឡើងដល់កម្រិតខ្ពស់បំផុតមិនធ្លាប់មានពីមុនមក នេះបើតាមសារព័ត៌មានរ៉យទ័រនៅថ្ងៃទី១៣ ខែមករា ឆ្នាំ២០២១ ។ នៅសហរដ្ឋអាមេរិក មានមនុស្សជាង៣៧ម៉ឺន៥ពាន់នាក់ហើយ ដែលបានស្លាប់ដោយសារ Covid-19 ក្នុងចំណោមអ្នកជំងឺសរុបជាង២៣លាននាក់ ។ ដោយឡែកនៅប៉ុន្មានថ្ងៃចុងក្រោយនេះ ចំនួនអ្នកស្លាប់ប្រចាំថ្ងៃនៅសហរដ្ឋអាមេរិកបានឡើងដល់៤ពាន់នាក់ក្នុងមួយថ្ងៃ ។ សូមជម្រាបថា នាយកដ្ឋានសុខាភិបាល និងសេវាកម្មមនុស្សត្រូវបានគេរំពឹងថា នឹងប្រកាសគោលការណ៍ណែនាំថ្មីនេះ នៅក្នុងសន្និសីទខ្លីមួយនៅអង្គារសប្តាហ៍នេះ (ម៉ោងក្នុងតំបន់) ។ បច្ចុប្បន្ននេះវ៉ាក់សាំងភាគច្រើនត្រូវបានចែកចាយដល់ប្រជាជនដែលស្ថិតក្នុងប្រភេទហានិភ័យខ្ពស់បំផុត រួមមានបុគ្គលិកផ្នែកថែទាំសុខភាពជួរមុខ និងមនុស្សចាស់នៅតាមមណ្ឌលថែទាំ ៕