-
តំបន់ប្រតិបត្តិការសឹករងឧត្តរមានជ័យ បន្តសហការជាមួយ កម្លាំងចម្រុះចុះរៀបចំសំអាតអនាម័យ និងការពារទីតាំងបរិវេណមណ្ឌលចត្តាឡីស័កពលករខ្មែរ
ឧត្តមសេនីយ៍ទោ តន់ ញាន មេបញ្ជាការតំបន់ប្រតិបត្តិការសឹករងឧត្តរមានជ័យ នៅថ្ងៃទី៧មករា ឆ្នាំ២០២១ បានចាត់តាំងកម្លាំងកងទ័ពប្រមាណជាង៥០នាក់ បន្តចុះសហការជាមួយផ្នែកទំនាក់ទំនងព្រំដែនកម្ពុជាប្រចាំច្រកអូរស្មាច់ និងកងពលតូចដឹកជញ្ជូនលេខ៩៩ ព្រមទាំងកម្លាំងចម្រុះ និងអាជ្ញាធរមូលដ្ឋាន ក្នុងការចុះការពារ និងរៀបចំសម្អាតទីតាំងថ្មី សម្រាប់ធ្វើចត្តាឡីស័ក ដល់បងប្អូនប្រជាពលករ ត្រឡប់មកពីប្រទេសថៃ។ ជាមួយគ្នានោះដែរ កម្លាំងមួយផ្នែករបស់តំបន់ប្រតិបត្តិការសឹករងឧត្តរមានជ័យបានសការជាមួយ និងកងពលតូចដឹកជញ្ជូនលេខ៩៩ ធ្វើការដឹកជញ្ជូនប្រជាពលករខ្មែរ ដែលត្រឡប់មកពីប្រទេសថៃ តាមច្រកអន្តរជាតិអូរស្មាច់ មកកាន់ទីតាំងធ្វើចត្តាឡីស័ក ក្នុងខេត្តឧត្តរមានជ័យ និងមួយផ្នែក សហការជាមួយផ្នែកទំនាក់ទំនងព្រំដែនកម្ពុជា ប្រចាំការការពារនៅច្រកថ្មដូន និងច្រកជប់គគីរ ការពារក្រែងមានករណីពលករលួចឆ្លងដែនដោយខុសច្បាប់ ឬមិនព្រមចូលរួមធ្វើចត្តាឡីស័ក។ ដោយឡែក កម្លាំងផ្នែកសឹករងត្រពាំងប្រាសាទចំនួនប្រមាណ១៥នាក់ផ្សេងទៀត បានសហការជាមួយកងកម្លាំងប្រដាប់អាវុធទាំង៣ប្រភេទ ដែលដឹកនាំដោយ លោក ហ៊ុន សិលា អភិបាលរងស្រុកត្រពាំងប្រាសាទ បានចូលរួមសម្អាត និងរៀបចំអាគារអនុវិទ្យាល័យ ហ៊ុនសែនទួលតាសេក ស្ថិតក្នុងនៅឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យដើម្បីធ្វើជាកន្លែងចត្តាឡីស័កបន្ថែមដល់ពលករខ្មែរដែលត្រឡប់មកពីប្រទេសថៃផងដែរ។ ជាមួយគ្នានោះ លោកឧត្តមសេនីយ៍ទោ តន់ ញាន មេបញ្ជាការតំបន់ប្រតិបត្តិការសឹករងឧត្តរមានជ័យ បានដាក់បទបញ្ជាឲ្យកម្លាំងទ័ព២៧នាក់ ប្រចាំការ ការពារនៅជុំវិញទីតាំងមណ្ឌល ដើម្បីបង្កើនសុវត្ថិភាព និងរបៀបរៀបរយ ចំពោះមណ្ឌលចត្តាឡីស័កពលករខ្មែរ…
-
អាជ្ញាធរថៃប្រកាសផ្អាកឱ្យប្រជាពលរដ្ឋខ្មែរចូលដឹកជញ្ជូន និងពិនិត្យទំនិញ ក្នុងផ្សាររោងក្លឿ ប្រទេសថៃ ចាប់ពីថ្ងៃ១០មករា តទៅ
-
និយតករអឺរ៉ុបអនុម័តអោយប្រើវ៉ាក់សាំង Covid-19 របស់ក្រុមហ៊ុនផលិតឱសថអាមេរិក Moderna នៅតាមបណ្តាប្រទេសសមាជិករបស់ខ្លួន
អឺរ៉ុប៖ គណៈកម្មការអឺរ៉ុប នៅថ្ងៃពុធនេះ បានអនុម័តអោយប្រើវ៉ាក់សាំង COVID-19 របស់ក្រុមហ៊ុនផលិតឱសថអាមេរិក ម៉ូឌែណា នៅតាមបណ្តាប្រទេសសមាជិករបស់សហភាពអឺរ៉ុប បន្ទាប់ពីទីភ្នាក់ងារឱសថរបស់សហភាពអឺរ៉ុប EMA បានបើកភ្លើងខៀវនាពេលថ្មីៗ នេះបើតាមសារព័ត៌មាន CNBC នៅថ្ងៃទី០៦ ខែមករា ឆ្នាំ២០២១ ។ វ៉ាក់សាំងរបស់ក្រុមហ៊ុនផលិតឱសថអាមេរិក ម៉ូឌែណា គឺជាវ៉ាក់សាំងទី២ហើយដែលត្រូវបាននិយតករអឺរ៉ុបផ្តល់ភ្លើងខៀវអោយប្រើប្រាស់ សម្រាប់ប្រជាជនរបស់ខ្លួន ខណៈវ៉ាក់សាំងរបស់ក្រុមហ៊ុនេះ បានចែកចាយរួចហើយនៅអង់គ្លេស និងសហរដ្ឋអាមេរិក ។ បើតាមសេចក្តីថ្លែងការណ៍របស់ទីភ្នាក់ងារឱសថរបស់សហភាពអឺរ៉ុប EMA គណៈកម្មាធិការវេជ្ជសាស្ត្ររបស់យើងបានវាយតម្លៃយ៉ាងហ្មត់ចត់នូវទិន្នន័យស្តីពីគុណភាព សុវត្ថិភាព និងប្រសិទ្ធភាពនៃវ៉ាក់សាំង និងបានផ្តល់អនុសាសន៍ ដោយព្រមព្រៀងលើការយល់ព្រមទីផ្សារតាមលក្ខខណ្ឌផ្លូវការ ដែលត្រូវបានផ្តល់ដោយគណៈកម្មការអឺរុប ៕
-
ថៃទទួលស្គាល់ព័ត៌មានអំពីការរកឃើញអ្នកឆ្លង COVID-19 ជាង៩០០នាក់ ក្នុងរោងចក្រផលិតត្រីខកំប៉ុងក្នុងខេត្តសាមុត សាខន ប៉ុន្តែវាជាព័ត៌មានចាស់
ថៃ៖ ក្រសួងសុខាភិបាលថៃនៅថ្ងៃព្រហស្បតិ៍នេះ ទទួលស្គាល់នូវសេចក្ដីរាយការណ៍ពីការរកឃើញ COVID-19 ជាង៩០០ករណីថ្មី នៅក្នុងរោងចក្រផលិតត្រីខកំប៉ុងមួយកន្លែងក្នុងខេត្ត សាមុត សាខន ក្រោយការធ្វើតេស្ដលើមនុស្ស៣ពាន់៨០០នាក់ ប៉ុន្តែតួលេខទាំងនេះគឺជាព័ត៌មានចាស់ ដែលត្រូវបានរាយការណ៍រួចហើយ នៅក្នុងរបាយការណ៍មុនៗនាពេលថ្មីៗ នេះបើតាមសារព័ត៌មាន Bangkok Post នៅថ្ងៃទី០៧ ខែមករា ឆ្នាំ២០២១ ។ ជាមួយគ្នានេះ អគ្គនាយក នៃនាយកដ្ឋានគ្រប់គ្រងជំងឺឆ្លងរបស់ថៃលោក អូផាស កានកាវីងផុង និយាយថា ករណីឆ្លងខាងលើគឺជាការពិត ហើយលោកក៏បានបញ្ជាក់ដែរថា រោងចក្រផលិតត្រីខកំប៉ុងមួយកន្លែងក្នុងខេត្ត សាមុត សាខន គឺជាកម្មសិទ្ធរបស់ក្រុមហ៊ុនផលិតចំណីអាហារ ប៉ាតាយ៉ា ។ លោក អូផាស បានសង្កត់ធ្ងន់ថា តួលេខឆ្លងទាំងនោះ គឺជាព័ត៌មានចាស់ ដោយមានរាប់បញ្ចូលទាំងករណីឆ្លងថ្មីសរុបច្រើនជាង៥០០ករណីក្នុងខេត្តដដែលនេះ ដែលមជ្ឈមណ្ឌលសម្រាប់គ្រប់គ្រងស្ថានការណ៍ COVID-19 បានចេញផ្សាយជាសាធារណៈកាលពីប៉ុន្មានថ្ងៃមុននេះ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៨៧លាននាក់ ក្នុងនោះស្លាប់ជាង១លាន៨៩ម៉ឺននាក់ និងជាសះស្បើយជាង៦៣លាន១២ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨៧លាន៦៣ម៉ឺន៦ពាន់៥៣៩ករណី ក្នុងនោះមានអ្នកជម្ងឺសរុបចំនួន១លាន៨៩ម៉ឺន៧៩១នាក់ស្លាប់ និង ជាសះស្បើយឡើងវិញសរុបចំនួន៦៣លាន១២ម៉ឺន៩ពាន់៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៧ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២១លាន៨៥ម៉ឺន៧ពាន់៦១៦នាក់ ស្លាប់ចំនួន៣៦ម៉ឺន៩ពាន់៩៩០នាក់ និងជាសះស្បើយចំនួន១៣លាន២ម៉ឺន៤ពាន់១៤២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៣៩ម៉ឺន៥ពាន់៩៣៨នាក់ ស្លាប់ចំនួន១៥ម៉ឺន៣៧២នាក់ និងជាសះស្បើយ១០លាន១ម៉ឺន៦ពាន់១៦៣នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន៨៧ម៉ឺន៤ពាន់៥៣៩នាក់ ស្លាប់១៩ម៉ឺន៩ពាន់៤៣នាក់ និងជាសះស្បើយ៧លាន៣ម៉ឺន៦ពាន់៥៣០នាក់ ៕
-
ឯកឧត្តម ងួន រតនៈ អភិបាលខេត្តបាត់ដំបង បានអំពាវនាវដល់បងប្អូនដែលកំពុងតែប្រកបរបរសេវាកម្មដឹកជញ្ជូនភ្ញៀវទេសចរណ៍ តាមម៉ូតូកង់៣ និងផាស់អេប ឲ្យមានការប្រុងប្រយ័ត្ននិងទប់ស្កាត់ការឆ្លងនិងចម្លងពីជម្ងឺកូវីដ-19
ថ្លែងទៅកាន់បងប្អូនដែលជាអ្នកប្រកប នូវមុខរបរសេវាកម្មដឹកជញ្ជូនភ្ញៀវតាមម៉ូតូកង់៣ និងផាស់អេបក្នុងទីប្រជុំជនក្រុង-ខេត្តបាត៎ដំបងប្រមាណ១២០នាក់ នៅរសៀល ថ្ងៃទី៦ខែមករាឆ្នាំ២០២១ នេះ ឯកឧត្តម ងួន រតនៈ អភិបាលខេត្តបាត់ដំបង បានធ្វើលារអំពាវនាវដល់បងប្អូនបម្រើនូវសេវាកម្មដឹកជញ្ជូនភ្ញៀវទេសចរណ៍សូមឲ្យមានការរប្រុងប្រយ័ត្នឲ្យបានម៉ឺងម៉ាត់និងត្រូវចូលរួមក្នុងការទប់ស្កាត់នូវការឆ្លងនិងការចម្លង ពីកូវីដ-១៩ តាមរយៈការណែនាំរបស់ក្រសួងសុខាភិបាល និងពីប្រមុខ នៃរាជរដ្ឋាភិបាលកម្ពុជាកន្លងមក ដោយមិនត្រូវមើលស្រាលពីជម្ងឺឆ្លងដ៏កំណាចមួយនេះ ដែលកំពុងតែបន្តកើតមាននិងរាតត្បាតជាសកល នៅលើពិភពលោក និងមិនទាន់ផុតរលត់រលាយសាបសូន្យនៅឡើយនោះទេ?។ ការថ្លែងបែបនេះ គឺធ្វើឡើងនៅក្នុងពិធីជួបសំណេះសំណាលនិងចែកស្បៀង ដល់បងប្អូនជាអ្នករត់ម៉ូតូកង់បីនិងផាស់អាប់នៅរសៀលថ្ងៃទី៦មករា នេះ។ ដោយឯកឧត្តមអភិបាលខេត្តបាត់ដំបង បានធ្វើការក្រើនរំលឹកថា៖ ក្នុងខណៈនេះ នៅប្រទេសថៃ កំពុងតែកើតមាននូវការឆ្លងរីករាលដាលតាមបណ្តាខេត្តជាច្រើននៅក្នុងសហគមន៍ របស់ប្រទេសមួយនេះ នូវជំងឺកូវីដ-១៩។ហើយពលករខ្មែរកំពុងតែធ្វើការនៅទីនោះក៏បាននាំគ្នាវិលត្រឡបមកកាន់ស្រុកកំណើតវិញ។ហើយអ្នកខ្លះក៏បានឆ្លងនូវកូវីដ-១៩ និងកំពុងតែសម្រាកព្យាបាលក្នុងមន្ទីរពេទ្យ រួមទាំងពលករផ្សេងៗច្រើនទៀត ក៏ត្រូវបានធ្វើការឃាត់ខ្លួន ដើម្បីធ្វើចត្តាឡីស័កតាមវិធានសុខាភិបាល យ៉ាងម៉ត់ចត់ ត្រឹមត្រូវ តាមកាលវេលាកំណត់និងពិនិត្យយកវត្ថុសំណាកដើម្បីផ្ញើទៅវិទ្យាស្ថានប៉ាស្ទ័រភ្នំពេញ ដើម្បីរកលទ្ធផល ពីកូវីដ-19។ មុននិងឲ្យវិលត្រឡប់ទៅកាន់លំនៅដ្ឋានស្រុកកំណើតរបស់ខ្លួនវិញ។ ឯកឧត្តម ងួន រតនៈ បានបន្តថា៖ បញ្ហានេះវាក៏បានធ្វើឲ្យមានការព្រួយបារម្ភ ដូច្នេះសូមបងប្អូនជាដែលជាអ្នកប្រកបនូវមុខរបរក្នុងការបម្រើសេវាកម្មដឹកជញ្ជូនភ្ញៀវទេសចរណ៍ទាំងអស់ត្រូវមានការប្រុងប្រយ័ត្នឲ្យជាប៉ជាប្រចាំ និងត្រូវតែអនុវត្តនូវវិធានការក្នុងការធ្វើអនាម័យតាមសេចក្តីណែនាំរបស់ក្រសួងសុខាភិបាល ដោយត្រូវពាក់ម៉ាស់ឲ្យបានត្រឹមត្រូវ លាងដៃនឹងទឹកស្អាតជាមួយសាប៊ូ ឬជែល ឬ អាល់កុល…
-
ពលករខ្មែរមកពីប្រទេសថៃ២នាក់ទៀតត្រូវបានរកឃើញវិជ្ជមានវីរុសកូវីដ-១៩នៅថ្ងៃនេះ
យោងតាមសេចក្ដីប្រកាសរបស់ក្រសួងសុខាភិបាលនៅថ្ងៃទី៧មករាឆ្នាំ២០២១បានឲ្យដឹងថា នៅថ្ងៃទី៦មករា គេបានរកឃើញករណីវិជ្ជមានវីរុសកូវីដ-១៩ចំនួន២នាក់។ អ្នកឆ្លងថ្មីទាំង២នាក់នោះ មានបុរសខ្មែរអាយុ២៦ឆ្នាំ មានអាសយដ្ឋាននៅភូមិត្រស់ ឃុំអូរតាគី ស្រុកថ្មគោល ខេត្តបាត់ដំបង បានធ្វើដំណើរមកពីប្រទេសថៃមកដល់ប្រទេសកម្ពុជានៅថ្ងៃទី២មករាឆ្នាំ២០២១ លទ្ធផលធ្វើតេស្តវត្ថុសំណាករបស់បុរសរូបនោះ ផ្ដល់ដោយវិទ្យាស្ថានប៉ាស្ទ័រកម្ពុជា បញ្ជាក់ថា វិជ្ជមានវីរុសកូវីដ-១៩។ បុរសរូបនោះ ត្រូវបានដាក់ឲ្យសម្រាកព្យាបាលនៅមន្ទីរពេទ្យបង្អែកខេត្តប៉ៃលិន។ ចំណែកអ្នកឆ្លងថ្មីម្នាក់ទៀត ជាបុរសជនជាតិខ្មែរអាយុ២៥ឆ្នាំ មានអាសយដ្ឋាននៅភូមិថ្នល់បត់ ឃុំភ្នំតូច ស្រុកមង្គលបុរី ខេត្តបន្ទាយមានជ័យ បានធ្វើដំណើរមកពី ប្រទេសថៃមកដល់ប្រទេសកម្ពុជានៅថ្ងៃសទី៤មករាឆ្នាំ២០២១ លទ្ធផលធ្វើតេស្តវត្ថុសំណាករបស់បុរសរូបនោះ ផ្ដល់ដោយវិទ្យាស្ថានប៉ាស្ទ័រកម្ពុជា បញ្ជាក់ថា វិជ្ជមានវីរុសកូវីដ-១៩។ បុរសរូបនោះ ត្រូវបានដាក់ឲ្យសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។ កម្ពុជាគិតមកដល់ថ្ងៃទី៧មករាឆ្នាំ២០២១នេះ មានអ្នកឆ្លងជំងឺកូវីដ-១៩ចំនួន ៣៨៥នាក់ ក្នុងនោះបានជាសះស្បើយចំនួន៣៦២នាក់ និងនៅសល់២៣នាក់កំពុងសម្រាកព្យាបាលនៅមន្ទីរពេទ្យ៕កឹម ទៀង
-
ថៃរកឃើញអ្នកឆ្លង Covid-19 ថ្មីៗចំនួន៣៦៥ករណីទៀត ខណៈមានអ្នកជំងឺម្នាក់ទៀតស្លាប់ (មានវីដេអូ)
ថៃ៖ បុរសម្នាក់ដែលដឹកកម្មករចំណាកស្រុកទៅ និងមកធ្វើការបានស្លាប់ដោយ សារជំងឺ Covid-19 ស្របពេលដែលរដ្ឋាភិបាលថៃបានកត់ត្រាអ្នកឆ្លងថ្មីៗចំនួន៣៦៥ករណីបន្ថែមទៀត នេះបើតាមសារព័ត៌មានបាងកកប៉ុស្តិ៍នៅថ្ងៃទី០៦ ខែមករា ឆ្នាំ២០២១ ។ ករណីស្លាប់របស់បុរសខាងលើនេះ បាននាំអោយចំនួនអ្នកស្លាប់ដោយសារជំងឺ Covid-19 នៅក្នុងប្រទេសថៃកើនឡើងដល់៦៦នាក់ ខណៈដែលតួលេខអ្នកឆ្លងសរុបកើនឡើងដល់៩ពាន់៣៣១ករណីគិតត្រឹមថ្ងៃពុធទី០៦ ខែមករា ឆ្នាំ២០២១នេះ ។ អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ លោកវេជ្ជបណ្ឌិត តាវីសិប វីសានុយោធិន បញ្ជាក់ថា អ្នកស្លាប់ចុងក្រោយនេះ គឺជាបុរសមានវ័យ៦៣ឆ្នាំម្នាក់ ជាអ្នកដឹកកម្មករបរទេសអោយទៅធ្វើការ និងត្រឡប់ទៅកន្លែងស្នាក់នៅរបស់ពួកគេនៅខេត្ត សាមុត សាខន ។ លោកវេជ្ជបណ្ឌិតបន្ថែមទៀតថា បុរសនោះត្រូវបានបញ្ជូនទៅកាន់មន្ទីរពេទ្យក្នុងខេត្តនេះកាលពីថ្ងៃទី២៧ ខែធ្នូ ឆ្នាំ២០២០ ហើយត្រូវបានប្រកាសថា បានបាត់បង់ជីវិតកាលពីថ្ងៃអង្គារម្សិលមិញ ដោយសារតែបញ្ហាជំងឺជាច្រើននៅក្នុងខ្លួន ៕
-
ចិនចាប់ផ្តើមរឹតបន្តឹងវិធានការទប់ស្កាត់ Covid-19 ជាថ្មី បន្ទាប់ពីមានការកើនឡើងខ្លាំងករណីក្នុងសហគមន៍ (មានវីដេអូ)
ចិន៖ អាជ្ញាធរចិនអះអាងថា ពួកគេបាននិងកំពុងរឹតបន្តឹងវិធានការទប់ស្កាត់ការរីករាលដាលនៃវីរុស Covid-19 ជាថ្មី ចំពេលដែលករណីឆ្លងក្នុងប្រទេសកំពុងស្ទុះឡើងខ្លាំងទៀត ពិសេសករណីឆ្លងក្បែរទីក្រុងប៉េកាំង នេះបើតាមសារព័ត៌មានរ៉យទ័រនៅថ្ងៃទី០៦ ខែមករា ឆ្នាំ២០២១ ។ តំបន់ភាគខាងជើង ឈាងខាងកើតខេត្តហឺប៉ី ដែលឡោមព័ន្ធជុំវិញទីក្រុងប៉េកាំង កាលពីថ្ងៃអង្គារ៍សប្តាហ៍នេះបានប្រកាសអាសន្នបន្ទាន់ បន្ទាប់ពីរកឃើញករណីឆ្លងរាតត្បាតក្នុងសហគមន៍ជាច្រើនមិនធ្លាប់មានក្នុងពេល០៦ខែចុងក្រោយនេះ ។ ជាការឆ្លើយតប រដ្ឋាភិបាលចិនបានសម្រេចរឹតបន្តឹងវិធានការគម្លាតសង្គមជាថ្មី ក្នុងនោះរាប់បញ្ចូលទាំងការធ្វើតេស្តទ្រង់ទ្រាយធំ ការបិទសាលារៀន និងរឹតបន្តឹងលើអ្នកដំណើរមកពីគ្រប់តំបន់ហានិភ័យខ្ពស់ឆ្លង Covid-19 ។ ក្រៅពីនេះ អាជ្ញាធរចិនក៏នឹងស៊ើបអង្កេតតាមដានលើគ្រប់ទំនិញនាំចូលទាំងអស់ ដើម្បីប្រាកដថា មិនមានវីរុស Covid-19 តោងមកជាប់ទំនិញទាំងនោះផងដែរ ៕
-
សហព័ន្ធអាហារសមុទ្រនៅថៃដំណើរការរោងចក្រឡើងវិញ ព្រោះបុគ្គលិកឆ្លងកូវីដ១៩ តិចពេក
សហព័ន្ធអាហារសមុទ្រនៅប្រទេសថៃ ឈ្មោះថា Thai Union បានអះអាងនៅថ្ងៃពុធ ទី៦ មករា ២០២១នេះថា បណ្តារោងចក្ររបស់ខ្លួនបានបន្តដំណើរការធម្មតាវិញ ក្រោយពេលបុគ្គលិករបស់ខ្លួនឆ្លងកូវីដ១៩ ចំនួន៦៩នាក់ ក្នុងចំណោមបុគ្គលិកច្រើនជាង២៣០០០នាក់ ក្នុងបណ្តារោងចក្រនានា ស្ថិតនៅក្រុងបាងកក។ តាមរយៈសេចក្តីថ្លែងការណ៍របស់ខ្លួន ក្រុមហ៊ុនលក់ត្រីធូណាលំដាប់លេខ១លើពិភពលោកមួយនេះបាននិយាយថា ខ្លួនបានធ្វើតេស្តបុគ្គលិក៨៥ភាគរយ ឬ ២៣៦៣០នាក់ ក្នុងខេត្តសាមុត សាខន ជាខេត្តមានផ្សារលក់អាហារសមុទ្រផ្ទុះការចម្លងជំងឺកូវីដ១៩ ក្នុងសហគមន៍ទ្រង់ទ្រាយធំឡើងវិញ នៅប្រទេសថៃនោះ។ ក្រុមហ៊ុននេះថា រោងចក្រទាំងនោះនឹងបន្តប្រតិបត្តិការ ដោយមានការជួបប្រជុំមនុស្សតិចតួច ប្រកាន់ខ្ជាប់អនាម័យដ៏ខ្ពស់ និងអនុវត្តតាមវិធានសុខាភិបាលរបស់ក្រសួង។ នាយកប្រតិបត្តិរបស់ក្រុមហ៊ុន Thiraphong Chansiri បាននិយាយថា «ដោយសារតែចំនួនបុគ្គលិកឆ្លងតិចតួច បណ្តារោងចក្ររបស់ Thai Union ថ្មីៗនេះ នៅតែបន្តបើកទ្វារ រហូតដល់ធ្វើប្រតិបត្តិការផលិត»។ Thai Union អះអាងថា មិនទាន់បិទទ្វាររោងចក្រនៅក្នុងខេត្តទេ ហើយអាងថា ការបិទខេត្ត២សប្តាហ៍ប៉ះពាល់ប្រមាណ២ភាគរយប៉ុណ្ណោះនៃចំណូលសរុបរបស់ក្រុមហ៊ុន៕ ប្រភពពី CNA