-
មេបញ្ជាការ កងពលតូចថ្មើរជើងលេខ៥១ បន្តចុះត្រួតពិនិត្យនៅពេលយប់ ដើម្បីពង្រឹងកម្លាំង សហការទប់ស្កាត់ប្រជាពលរដ្ឋឆ្លងដែនខុសច្បាប់ ដើម្បីការពារការឆ្លងរីករាលដាលជំងឺកូវីដ-១៩
លោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ រួមជាមួយលោកអភិបាលរងខេត្តបន្ទាយមានជ័យនៅយប់ថ្ងៃទី៥មករាឆ្នាំ២០២១ បានចុះត្រួតពិនិត្យកម្លាំង នៅតាមបណ្តាគោលដៅ ដែលសហការជាមួយកម្លាំងចម្រុះ និងអាជ្ញាធរមូលដ្ឋានដែលកំពុងឈរជើង និងល្បាតតាមព្រំដែនកម្ពុជា-ថៃ ដើម្បីទប់ស្កាត់ការឆ្លងរីករាលដាលជំងឺឆ្លងកូវីដ-១៩ ។ ក្នុងឱកាសនោះ លោកមេបញ្ជាការ បានដាក់បទបញ្ជាដល់កងកម្លាំងគ្រប់បណ្តាគោលដៅត្រូវយកចិត្ដទុកដាក់ ល្បាតត្រួតពិនិត្យ២៤ម៉ោងលើ២៤ម៉ោង ដោយមិនឲ្យមានប្រជាពលរដ្ឋឆ្លងដែនខុសច្បាប់ជាដាច់ខាតនៅគ្រប់បណ្តាគោលដៅដែលបានកំណត់ និងឲ្យកម្លាំងទាំងអស់យកចិត្តទុកដាក់ថែទាំសុខភាពផ្ទាល់ខ្លួនអោយបានល្អជាប់ជាប្រចាំ។ សូមបញ្ជាក់ថា ទោះបីមានការអំពាវនាវរបស់ប្រមុខរាជរដ្ឋាភិបាល ចំពោះពលករខែ្មរ ដែលវិលត្រប់មកពីប្រទេសថៃ តាមច្រកព្រំដែនដែលបានកំណត់យ៉ាងណាក៏ដោយ ក៏មានប្រជាពលរដ្ឋមួយចំនួនតូច នៅតែបន្តលួចឆ្លងដោយខុសច្បាប់៕កឹម ទៀង
-
ឯកឧត្តម ឃួង ស្រេង៖ សម្ពោធដាក់ឲ្យប្រើប្រាស់មណ្ឌលចត្តាឡីស័ករាជធានីភ្នំពេញ ជាផ្លូវការដែលអាចទទួលមនុស្សចំនួន៥០៤ នាក់
ភ្នំពេញ៖ មណ្ឌលចត្តាឡីស័ករាជធានីភ្នំពេញ ដែលមានទីតាំង ស្ថិតនៅភូមិផ្សារលិចសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ បានស្ថាបនារួចជាស្ថាពរហើយ និងបានដាក់សម្ពោធដាក់ឲ្យប្រើប្រាស់ជាផ្លូវការនាព្រឹកថ្ងៃទី០៦ខែមករាឆ្នាំ ២០២១នេះ ក្រោមវត្តមានលោក ឃួង ស្រេង អភិបាលភ្នំពេញនិងលោកស្រីជា ស៊ីណាឃួង ស្រេង រួមជាមួយនឹងអភិបាលរងរាជធានីអភិបាលខណ្ឌនិងមន្ត្រីរាជការចំណុះឲ្យរដ្ឋបាលរាជធានីភ្នំពេញជាច្រើនរូបទៀត។ មណ្ឌលចត្តាឡីស័ករាជធានីភ្នំពេញមានចំនួន៤អគារ ដែលក្នុងមួយអគារដាក់មនុស្សបាន១២៦នាក់ដូច្នេះ៤ អ គារស្មើនឹង៥០៤នាក់ចែកចេញជា៥០៤បន្ទប់ ស្មើនិង៥០៤គ្រែ ជាមួយនឹងការបំពាក់កង្ហារ បន្ទប់ទឹក បង្គន់អានាម័យនិងការរៀបចំនូវហេដ្ឋារចនាសម្ព័ន្ធជាច្រើនទៀត ដែលបានបង្កលក្ខណៈងាយស្រួលឲ្យបងប្អូនដែលត្រូវធ្វើចត្តាឡីស័កបានភាពងាយស្រួល។ លោកឃួង ស្រេង. បានមានប្រសាសន៍លើកឡើងថា មណ្ឌលចត្តាឡីស័កនេះ ធ្វើឡើងដើម្បីដាក់អ្នកដំណើរដែលចូលមកព្រះរាជាណាចក្រកម្ពុជាតាមអាកាសយានដ្ឋានអន្តរជាតិភ្នំពេញ ហើយអ្នកដំណើរទាំងអស់នោះ ត្រូវបានចែកជាពីរប្រភេទ ពោលគឺ បើអ្នកដំណើរមានលទ្ធភាពគ្រប់គ្រាន់ មានលុយកាក់ច្រើន ពួកគាត់អាចធ្វើចត្តាឡីស័កនៅតាមផ្ទះសំណាក់ ឬសណ្ឋាគារ ។ តែបើអ្នកដំណើរមិនមានលទ្ធភាពគ្រប់គ្រាន់ទេ ពួកគាត់អាចធ្វើចត្តាឡីស័កនៅមជ្ឈមណ្ឌលចត្តាឡីស័ករាជធានីបាន ដោយមណ្ឌលនេះ មិនតម្រូវអោយមានការបង់ថ្លៃសេវានោះទេ ព្រមទាំងផ្ដល់នូវអាហារហូបចុកក្នុងមួយថ្ងៃ៣ពេល ជាមួយនឹងការធ្វើតេស្តសំណាកដោយមិនអស់ប្រាក់ថែមទៀត។ លោកក៏បានបញ្ជាក់ថា នៅថ្ងៃទី១១ខែមករាខាងមុខនេះ នៅតាមបណ្ដា សាលារៀនទាំងអស់ នៅក្នុងរាជធានីភ្នំពេញនឹងបើកវេសនកាល ចូលរៀនវិញ។ ដូច្នេះសាលាដែលធ្លាប់ជាកន្លែងធ្វើចត្តាឡីស័កត្រូវប្រគល់ទៅឲ្យសាលាវិញ ដើម្បីឲ្យសិស្សានុសិស្សអាចចូលរៀនបាន ។ ចំណែកបងប្អូនប្រជាពលរដ្ឋដែលបាននិងកំពុងធ្វើចត្តាឡីស័កនៅតាមសាលារៀនទាំងនោះ នឹងត្រូវប្ដូរមកនៅមណ្ឌលចត្តាឡីស័ករាជធានីភ្នំពេញនេះ…
-
វៀតណាមផ្អាកជើងហោះហើរពីប្រទេស និងដែនដីដូចជាអង់គ្លេស និងអាហ្វ្រិកខាងត្បូងដែលផ្ទុះវីរុស Covid-19 ទម្រង់ថ្មី
វៀតណាម៖ នាយករដ្ឋមន្ត្រីវៀតណាមលោក ង្វៀន សួន ភុក បានហាមឃាត់ជើងហោះហើរពីបណ្តាប្រទេស និង ដែនដី ដូចជាអង់គ្លេស និងអាហ្វ្រិកខាងត្បូងដែលកំពុងកត់ត្រាករណីវីរុស Covid-19 ទម្រង់ថ្មី នេះបើតាមសារព័ត៌មាន VNExpress នៅយប់ថ្ងៃទី០៥ ខែមករា ឆ្នាំ២០២១ ។ នាយករដ្ឋមន្ត្រីវៀតណាម នៅថ្ងៃអង្គារនេះថ្លែងថា ក្រសួងការបរទេស ក្រសួងសុខាភិបាល និងក្រសួងដឹកជញ្ជូន ត្រូវសម្របសម្រួលជាមួយគ្នា និងរៀបចំបញ្ជីឈ្មោះប្រទេស និងដែនដី ដែលបទប្បញ្ញត្តិថ្មីនេះនឹងត្រូវអនុវត្តចំពោះ ។ សម្រាប់ពេលនេះ បញ្ជីខាងលើនេះ រួមបញ្ចូលចក្រភពអង់គ្លេស និងអាហ្វ្រិកខាងត្បូង ជាទីដែលវីរុស Covid-19 ទម្រង់ថ្មីផ្សេងគ្នាចំនួនពីរត្រូវបានរកឃើញ ។ រហូតមកទល់ពេលនេះ វីរុស Covid-19 ទម្រង់ថ្មីមានប្រភពនៅចក្រភពអង់គ្លេស ត្រូវបានរកឃើញនៅក្នុងប្រទេសចំនួន ៣៨ ៕
-
ថៃបន្តដាក់ប្រទេសក្នុងគ្រាអាសន្នរហូតដល់ចុងខែកុម្ភៈខាងមុខ ដើម្បីទប់ស្កាត់ Covid-19 រលកថ្មី
ថៃ៖ ឯកអគ្គរាជទូតកម្ពុជាប្រចាំប្រទេសថៃ បានជូនដំណឹងដល់ប្រជាពលរដ្ឋខ្មែរ ដែលកំពុងស្នាក់នៅ សិក្សា និងធ្វើការនៅក្នុងប្រទេសថៃអោយដឹងថា រាជរដ្ឋាភិបាលថៃបានប្រកាសបន្តដាក់ប្រទេសក្នុងគ្រាអាសន្នរយ:ពេលជាង១ខែ ចាប់ពីថ្ងៃទី១៦ ខែមករា ដល់ទី២៨ ខែកុម្ភៈ ឆ្នាំ២០២១ ដើម្បីបន្តទប់ស្កាត់ និងគ្រប់គ្រងការរីករាលដាលការឆ្លងនៃជំងឺកូវីដ១៩រលកថ្មីនៅក្នុងប្រទេសថៃ ។ ស្ថានទូតកម្ពុជាបានសើ្នឱ្យប្រជាពលរដ្ឋខ្មែរនៅប្រទេសថៃទាំងអស់ បន្តចូលរួម សហការយ៉ាងសកម្មថែមទៀត ដើម្បីអនុវត្តនូវវិធានការនានារបស់រាជរដ្ឋាភិបាលថៃ ឱ្យបានខ្ជាប់ខ្លួន និងមានប្រសិទ្ធភាពខ្ពស់ ព្រមទាំងរក្សាសុខភាពអនាម័យ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ-១៩ បន្តទៀត ។ សូមជម្រាបថា នៅទូទាំងប្រទេសថៃបច្ចុប្បន្នមានអ្នកឆ្លង COVID-19 ចំនួន៨ពាន់៩៦៦នាក់ ក្នុងនោះស្លាប់៦៥នាក់ និងជាសះស្បើយឡើងវិញ៤ពាន់៣៥២នាក់ ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៨៧លាននាក់ ក្នុងនោះស្លាប់ជាង១លាន៨៧ម៉ឺននាក់ និងជាសះស្បើយជាង៦១លាន៥៣នាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨៦លាន៨៣ម៉ឺន៣ពាន់៤៨១ករណី ក្នុងនោះមានអ្នកជម្ងឺសរុបចំនួន១លាន៨៧ម៉ឺន៥ពាន់៤៦០នាក់ស្លាប់ និង ជាសះស្បើយឡើងវិញសរុបចំនួន៦១លាន៥៣ម៉ឺន២ពាន់៣៥២នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៦ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២១លាន៥៧ម៉ឺន៨ពាន់៦០៦នាក់ ស្លាប់ចំនួន៣៦ម៉ឺន៥ពាន់៦២០នាក់ និងជាសះស្បើយចំនួន១២លាន៨៦ម៉ឺន២ពាន់២១៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៣៧ម៉ឺន៥ពាន់៤៧៨នាក់ ស្លាប់ចំនួន១៥ម៉ឺន១៥១នាក់ និងជាសះស្បើយ៩លាន៩៩ម៉ឺន៦ពាន់៥០១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន៨១ម៉ឺន២ពាន់៧នាក់ ស្លាប់១៩ម៉ឺន៧ពាន់៧៧៧នាក់ និងជាសះស្បើយ៦លាន៩៦ម៉ឺន៣ពាន់៤០៧នាក់ ៕
-
ថ្ងៃនេះ ក្រសួងសុខាភិបាលរកឃើញពលករខ្មែរដែលត្រឡប់មកពីប្រទេសថៃម្នាក់ទៀត ឆ្លងជំងឺកូវីដ-១៩
នៅព្រឹកថ្ងៃទី៦មករា ឆ្នាំ២០២១នេះ ក្រសួងសុខាភិបាល បានប្រកាសរកឃើញពលករខ្មែរ ដែលទើបត្រឡប់មកពីប្រទេសថៃម្នាក់ទៀត អាយុ២៨ឆ្នាំ ស្នាក់នៅផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ស្ត្រីរូបនោះ បានមកដល់កម្ពុជា នៅថ្ងៃទី២មករា ឆ្នាំ២០២១ និងទើបរកឃើញវីរុសកូវីដ-១៩នៅថ្ងៃទី៥មករាឆ្នាំ២០២១ ហើយត្រូវបានដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តប៉ៃលិន។ ក្រសួងសុខាភិបាលក៏បានប្រកាសដែរថា នៅថ្ងៃនេះ មិនមានករណីជាសះស្បើយពីជំងឺកូវីដ-១៩នោះទេ។ គិតត្រឹមម៉ោង៧ ថ្ងៃទី០៦ ខែមករា ឆ្នាំ២០២១ កម្ពុជារកឃើញករណីឆ្លងជំងឺកូវីដ១៩សុរបចំនួន ៣៨៣ នាក់ ក្នុងនោះអ្នកជាសះស្បើយចំនួន ៣៦២ នាក់ និងអ្នកជំងឺកំពុងព្យាបាល នៅមន្ទីរពេទ្យមានចំនួន ២១នាក់៕កឹម ទៀង
-
ថៃទិញវ៉ាក់សាំងកូវីដ ៣៥លានដូសថែមទៀត កើនដល់៦៣លានដូស ក្នុងពេលវឹកវរខ្លាំង
លោកនាយករដ្ឋមន្ត្រីថៃបានប្រកាសនៅថ្ងៃនេះថា ប្រទេសរបស់លោកបានបញ្ជាទិញវ៉ាក់សាំងប្រឆាំងកូវីដ១៩ ចំនួន៣៥លានដូសបន្ថែមទៀត ពីក្រុមហ៊ុន AstraZenca នាំឲ្យវ៉ាក់សាំងដែលថៃទិញសរុបទាំងលើកមុន កើនដល់៦៣លានដូស។ គិតត្រឹមថ្ងៃទី៥ មករា ២០២១នេះ ថៃមានអ្នកស្លាប់ដោយសារកូវីដ១៩ ចំនួន៦៥នាក់ហើយ ខណៈអ្នកឆ្លងសរុបជិត៩ម៉ឺននាក់ ខណៈដែល២ថ្ងៃជាប់ៗគ្នាមកនេះ ថៃឆ្លងថ្មីក្នុងសហគមន៍ប្រមាណ១ពាន់នាក់។ នាយករដ្ឋមន្ត្រី ប្រាយុទ្ធ ចាន់អូចា និយាយប្រាប់អ្នកសារព័ត៌មានថា «ថ្ងៃនេះ ពួកយើងបានសម្រេចទិញបន្ថែមពី ក្រុមហ៊ុន AstraZenca ចំនួន៣៥លានដូស»៕ ប្រភពពី CNA
-
ថៃរកឃើញអ្នកឆ្លង Covid-19 ថ្មីៗចំនួន៥២៧ករណីទៀត ភាគច្រើនជាពលករចំណាកស្រុក
ថៃ៖ រដ្ឋាភិបាលថៃនៅថ្ងៃអង្គារនេះ បានកត់ត្រាករណីឆ្លង Covid-19 ថ្មីៗចំនួន៥២៧ករណីបន្ថែមទៀត ហើយលើកលែងតែ០៦នាក់ចេញ នៅសល់ពីនេះជាករណីឆ្លងនៅក្នុងស្រុកទាំងអស់ នេះបើតាមសារព័ត៌មានបាងកកប៉ុស្តិ៍នៅថ្ងៃទី០៥ ខែមករា ឆ្នាំ២០២១ ។ បើបូកបញ្ចូលទាំងករណីឆ្លងខាងលើនេះ នៅទូទាំងប្រទេសថៃមានអ្នកឆ្លង Covid-19 សរុបកើនឡើងដល់៨ពាន់៩៦៦ករណី ចាប់តាំងពីវីរុសដ៏កាចសាហាវមួយនេះផ្ទុះឡើងនៅថៃកាលពីខែមករា ឆ្នាំ២០២០កន្លងទៅ ។ ទន្ទឹមនឹងរបាយការណ៍នេះដែរ មិនមានអ្នកស្លាប់ថ្មីត្រូវបានគេរាយការណ៍ទេ ពោលគឺមានចំនួន៦៥នាក់ដដែល ។ ករណីបន្ថែមនៅថ្ងៃអង្គារនេះ គឺតិចជាងករណីឆ្លងថ្មីចំនួន៧៤៥ករណីដែលត្រូវបានកត់ត្រាកាលពីថ្ងៃចន្ទម្សិលមិញ ខណៈចំនួននេះគឺមានជាង៥០០ករណីនៅក្នុងខេត្ត សាមុត សាខន ដែលជាចំណុចកណ្តាល នៃការផ្ទុះឡើងចុងក្រោយបង្អស់ ៕
-
កូរ៉េខាងជើងស្ថិតក្នុងចំណោមប្រទេសដែលបានស្នើសុំវ៉ាក់សាំង Covid-19 បើទោះបីជាប្រទេសខ្លួនគ្មានករណីឆ្លងក៏ដោយ
កូរ៉េខាងជើង៖ កូរ៉េខាងជើងបានដាក់ពាក្យសុំវ៉ាក់សាំង Covid-19 ជាមួយអង្គការសម្ព័ន្ធវ៉ាក់សាំង Gavi ជាដៃគូសុខភាពសាធារណៈឯកជន ដែលធ្វើការដើម្បីធ្វើឲ្យប្រសើរឡើងនូវការចាក់វ៉ាក់សាំងនៅក្នុងប្រទេសដែលមានប្រាក់ចំណូលទាប នេះបើតាមសារព័ត៌មាន WSJ នៅថ្ងៃទី០៥ ខែមករា ឆ្នាំ២០២១ ។ ជាមួយគ្នានេះ អង្គការសម្ព័ន្ធវ៉ាក់សាំង Gavi មិនបានផ្តល់ការបញ្ជាក់ដោយផ្ទាល់អំពីសេចក្តីថ្លែងការណ៍នេះនោះទេ ប៉ុន្តែបាននិយាយថា ការធ្វើបច្ចុប្បន្នភាពនឹងត្រូវធ្វើឡើងនៅដើមឆ្នាំ២០២១នេះ ។ ប៉ុន្តែសម្ព័ន្ធភាពវ៉ាក់សាំងបាននិយាយថា ប្រទេសកំពុងអភិវឌ្ឍន៍ចំនួន៨៦ ក្នុងចំណោម៩២ បានស្នើសុំវ៉ាក់សាំងនេះ ខណៈកូរ៉េខាងជើងក៏បានស្នើសុំព័ត៌មានស្តីពីការទទួលបានវ៉ាក់សាំង ពីបណ្តាប្រទេសអឺរ៉ុបផងដែរ ៕
-
ពលរដ្ឋអាល្លឺម៉ង់ប្រមាណ២៦ម៉ឺន៥ពាន់នាក់ទទួលការចាក់វ៉ាក់សាំង Covid-19
អាល្លឺម៉ង់៖ ប្រជាជនអាល្លឺម៉ង់សរុប២៦ម៉ឺន៥ពាន់៩៨៦នាក់ហើយ បានទទួលការចាក់វ៉ាក់សាំង COVID-19 នៅទូទាំងប្រទេស គិតត្រឹមថ្ងៃចន្ទម្សិលមិញ នេះបើតាមវិទ្យាស្ថានអាល្លឺម៉ង់ រ៉ូប៊ឺត ខូច ឬ RKI ចុះផ្សាយដោយសារព័ត៌មានស៊ីនហួរ នៅថ្ងៃទី០៥ ខែមករា ឆ្នាំ២០២១ ។ ស្របពេលជាមួយគ្នានេះដែរ រដ្ឋមន្រ្តីសុខាភិបាលអាល្លឺម៉ង់ លោក ហ្សែនស៍ ស្ពេន បញ្ជាក់ថា ការចាក់វ៉ាក់សាំង គឺជាផ្លូវដើរចេញពីការឆ្លងរីករាលដាលនៃវីរុស COVID-19 … មួយជំហានៗ យើងនឹងអាចចាក់វ៉ាក់សាំងដល់ប្រជាជនរបស់យើងបានកាន់តែច្រើន ដូច្នេះយើងនឹងអាចវិលត្រលប់មករកសភាពធម្មតាវិញបាន ។ សូមជម្រាបថា នៅក្នុងចំណោមអ្នកដែលត្រូវបានចាក់វ៉ាក់សាំង COVID-19 ខាងលើនេះ គឺមានប្រជាជនជាង១១ម៉ឺន៤ពាន់៦០០នាក់ដែលរស់នៅតាមមជ្ឈ មណ្ឌលថែទាំ រួមទាំងបុគ្គលិកពេទ្យជាង១២ម៉ឺន៣ពាន់១០០នាក់ផងដែរ នេះបើតាមទិន្នន័យដែលប្រមូលបានពីបណ្តារដ្ឋរបស់ប្រទេសអាល្លឺម៉ង់ ខណៈយុទ្ធនាការចាក់វ៉ាក់សាំងនេះ បានចាប់ផ្តើមនៅថ្ងៃទី២៧ ខែធ្នូ ឆ្នាំ២០២០ ៕