-
លោកជំទាវ ម៉ែន សំអន អរគុណចំពោះក្រុមហ៊ុន ឡាយ សអុិនវេសមិនដែលបានប្រគល់ម៉ាស់ចំនួន១១ម៉ឺន៥ពាន់ចែកថ្នាក់មូលដ្ឋាន
ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងនូវការអរគុណចំពោះក្រុមហ៊ុនឡាយ សអុិនវេសមិនដែលបានប្រគល់ម៉ាស់ចំនួន១១ម៉ឺន៥ពាន់ដើម្បីចែកជូនតាមមូលដ្ឋានបន្តទៀត។ លោកជំទាវកិត្តិសង្គហបណ្ឌិត ម៉ែន សំអន ថ្លែងនូវការអរគុណបែបនេះខណៈរៀបចំពិធីប្រគល់ និងទទួលនូវម៉ាស់ ចំនួន ១១ម៉ឺន៥ពាន់ម៉ាស់ និងអាកុល៤៤កានពីក្រុមហ៊ុនឡាយ សអុិនវេសមិន និង សហការីនាព្រឹកថ្ងៃទី២២ ខែធ្នូឆ្នាំ២០២០ នៅទីស្តីការក្រសួង ។ ថ្លែងក្នុងឱកាសនោះ ក្នុងនាមរាជរដ្ឋាភិបាលកម្ពុជា និងក្នុងនាមលោកជំទាវកិត្តិសង្គហបណ្ឌិត ម៉ែន សំអនផ្ទាល់ ក៏បានថ្លែងអំណរគុណយ៉ាងជ្រាលជ្រៅ ជូនចំពោះក្រុមហ៊ុនឡាយ សអុិនវេសមិនដែលបានជួយឧបត្ថម្ភជាសម្ភារៈបរិក្ខាពេទ្យបម្រើដល់វិស័យសុខាភិបាល ក៏ដូចជាគ្រូពេទ្យបច្ចេកទេសក្នុងការចូលរួមទប់ស្កាត់មេរោគកូវីដ១៩ នៅកម្ពុជា ។ ដោយឡែកថ្ងៃនេះ ក្រុមហ៊ុនឡាយ សអុិនវេសមិនក៏បានចូលរួមនូវការចែករំលែកជួយដល់ប្រជាពលរដ្ឋកម្ពុជា តាមរយៈ លោកជំទាវ នូវការផ្តល់នូវម៉ាស់និងអាកុលទាំងនេះសម្រាប់បែងចែកជូនដល់ថ្នាក់មូលដ្ឋានបន្ត។ លោកជំទាវកិត្តិសង្គហបណ្ឌិត ម៉ែន សំអនក៏បានអំពាវនាវឲ្យប្រជាពលរដ្ឋទាំងអស់ត្រូវប្រុងប្រយ័ត្នឲ្យបានខ្ពស់គ្រប់ៗក្រុមគ្រួសារ ក្នុងការចូលរួមទប់ស្កាត់នូវការឆ្លងរីករាលដាលនៃជម្ងឺកូវីដ១៩ ។ ជាពិសេស មិនត្រូវភ្លេចខ្លួននោះទេ បើទោះបីជាប្រទេសកម្ពុជាមានអ្នកឆ្លងនៅមានកម្រិតក៍ដោយក៍ត្រូវតែបន្តក្រោមការអនុវត្តតាមការណែនាំរបស់ក្រសួងសុខាភិបាល និងសារាចរណែនាំ និងវិធានការណ៍ជាច្រើនរបស់សម្តេចអគ្គមហាសេនាបតីតេជោនាយករដ្ឋមន្រ្តីនៃព្រះរាជាណាចក្រកម្ពុជា ស្របពេលដែលកម្ពុជាមកដល់ថ្ងៃនេះ អ្នកឆ្លងមានចំនួន ៣៦៣នាក់ អ្នកជាសះស្បើយមានចំនួន ៣៤៧នាក់…
-
លោក ចូ បៃដិន ទទួលការចាក់វ៉ាក់សាំង Covid-19 ផ្សាយផ្ទាល់តាមទូរទស្សន៍ ដើម្បីជាការបង្កើនទំនុកចិត្តជូនដល់ប្រជាជនខ្លួន
អាមេរិក៖ ប្រធានាធិបតីជាប់ឆ្នោតអាមេរិក លោក ចូ បៃដិន បានទទួលការចាក់វ៉ាក់សាំង COVID-19 សម្រាប់ដូសដំបូងរួចហើយ នៅថ្ងៃចន្ទនេះ ដោយមានការផ្សាយផ្ទាល់តាមកញ្ចក់ទូរទស្សន៍ ដើម្បីជាការបង្កើនទំនុកចិត្តជូនដល់ប្រជាជនខ្លួន នៅមុនពេលត្រូវបានចែកចាយនៅទូទាំងប្រទេសនាឆ្នាំក្រោយ នេះបើតាមសារព័ត៌មានរ៉យទ័រនៅថ្ងៃទី២២ ខែធ្នូ ឆ្នាំ២០២០ ។ ប្រធានាធិបតីជាប់ឆ្នោតអាមេរិកវ័យ៧៨ឆ្នាំរូបនេះ ត្រូវបានគេមើលឃើញថា គឺស្ថិតនៅក្នុងចង្កោមវ័យ ដែលងាយប្រឈមមុខខ្លាំងចំពោះវីរុសនេះ ។ លោក ចូ បៃដិន នៅតែអះអាងថា លោកនឹងចាប់ផ្តើមយុទ្ធការ ប្រយុទ្ធប្រឆាំងនឹង COVID-19 ដែលបានសម្លាប់ជីវិតមនុស្សនៅអាមេរិកជាង៣១ម៉ឺន៥ពាន់នាក់ទៅហើយនេះ នៅក្រោយពេលលោកស្បថឡើងកាន់តំណែង ជាប្រធានាធិបតីទី ៤៦ របស់សហរដ្ឋអាមេរិក នៅថ្ងៃទី២០ ខែមករា ឆ្នាំ២០២០ ។ សូមរំលឹកផងដែរថា អនុប្រធានាធិបតីអាមេរិក លោក ម៉ៃ ភែន និងភរិយា កាលពីចុងសប្តាហ៍មុននេះ ក៏បានទទួលការចាក់វ៉ាក់សាំងរួចរាល់ហើយដែរ ខណៈដែលប្រធានាធិបតីអាមេរិកជិតផុតអាណត្តិ លោក ដូណាល់ ត្រាំ វិញ ធ្លាប់បានអះអាងថា លោកនឹងចាក់វ៉ាក់សាំងនេះ នៅពេលគ្រូពេទ្យផ្តល់យោបល់ ៕
-
អ្នកជំនាញអះអាងថា វ៉ាក់សាំង Covid-19 របស់ចិន គឺមានសុវត្ថិភាព និងប្រសិទ្ធភាព នេះបើតាមលទ្ធផលនៃការធ្វើតេស្តគ្លីនិក និងចាក់បន្ទាន់
ចិន៖ បើតាមលទ្ធផល នៃការតេស្តគ្លីនិក និងចាក់បន្ទាន់បានបង្ហាញថា វ៉ាក់សាំង COVID-19 របស់ក្រុមហ៊ុនចិន គឺមានសុវត្ថិភាព និងប្រសិទ្ធភាព នេះបើតាមការអះអាងរបស់អ្នកជំនាញជនជាតិចិនម្នាក់ ដកស្រង់ចុះផ្សាយដោយសារព័ត៌មានស៊ីនហួរនៅយប់ថ្ងៃទី២១ ខែធ្នូ ឆ្នាំ២០២០ ។ រហូតមកទល់ពេលនេះ មានមនុស្សប្រមាណជាង ៦ម៉ឺននាក់ហើយ នៅតាមតំបន់នានាក្រៅពីប្រទេសចិន ដែលបានទទួលចាក់វ៉ាក់សាំងរបស់ក្រុមហ៊ុនចិន ហើយក៏មិនមានរបាយការណ៍អំពីប្រតិកម្មអាក្រក់ធ្ងន់ធ្ងរនោះដែរ ។ មន្ត្រីម្នាក់នៃគណៈកម្មាធិការសុខភាពជាតិចិន NHC និងជាប្រធានក្រុមការងារអភិវឌ្ឍន៍ថ្នាំបង្ការជាតិ លោក Zheng Zhongwei បញ្ជាក់ថា ចិនបានអនុវត្តវ៉ាក់សាំង COVID-19 សម្រាប់ការប្រើប្រាស់បន្ទាន់ ជិតមួយលានដូសរួចទៅហើយ ។ លោកបានសង្កត់ធ្ងន់ថា ការចាក់វ៉ាក់សាំងទាំងនេះ ត្រូវបានផ្តល់ជូនដោយស្ម័គ្រចិត្ត និងមានមូលដ្ឋានច្បាស់លាស់ ព្រមទាំងស្របតាមច្បាប់ និងបទប្បញ្ញត្តិពាក់ព័ន្ធនានាផងដែរ ហើយថា ប្រតិកម្មមិនល្អមួយចំនួនក៏ត្រូវបានគេរាយការណ៍ដែរ ប៉ុន្តែមិនមានផលប៉ះពាល់ធ្ងន់ធ្ងរណាមួយកើតឡើងទេ ៕
-
សិង្ហបុរីក្លាយជាប្រទេសដំបូងគេនៅអាស៊ី ដែលទទួលបានវ៉ាក់សាំង COVID-19 របស់ក្រុមហ៊ុន Pfizer/BioNTech
សិង្ហបុរី៖ ទីបំផុតសិង្ហបុរី ក្លាយជាប្រទេសដំបូងគេនៅអាស៊ី ដែលទទួលបានវ៉ាក់សាំង Covid-19 របស់ក្រុមហ៊ុន Pfizer/BioNTech បន្ទាប់ពីវាត្រូវបានដឹកតាមយន្តហោះមកដល់នៅល្ងាចថ្ងៃចន្ទដើមសប្តាហ៍នេះ នេះបើតាមសារព័ត៌មាន CNA នៅថ្ងៃទី២១ ខែធ្នូ ឆ្នាំ២០២០ ។ នាយករដ្ឋមន្រ្តីសង្ហិបុរីលោក លី សៀនឡុង បាននិយាយថា ការចាក់វ៉ាក់សាំងនៅក្នុងប្រទេសរបស់លោក នឹងត្រូវធ្វើឡើងដោយស្ម័គ្រចិត្ត ហើយអាទិភាពនឹងត្រូវផ្តល់ជូនដល់ក្រុមមនុស្សដែលងាយរងគ្រោះខ្លាំងជាងគេបំផុត ដូចជាបុគ្គលិកពេទ្យជួរមុខ និងមនុស្សចាស់ជរាជាដើម ។ សូមជម្រាបថា វ៉ាក់សាំងរបស់ក្រុមហ៊ុនអាមេរិក-អាល្លឺម៉ង់ Pfizer/BioNTech ខាងលើនេះ ត្រូវបានដឹកជញ្ជូនតាមជើងហោះហើរលេខ SQ7979 តាមរយៈក្រុមហ៊ុនដឹកអ្នកដំណើរសិង្ហបុរីអ៊ែរឡាញ ដែលបានចាកចេញពីទីក្រុងព្រុចស៊ែល ប្រទេសប៊ែលហ្ស៊ិក ហើយចុះចតនៅអាកាសយានដ្ឋានសិង្ហបុរី ចាងជី នៅវេលាម៉ោង០៧ និង៣៦នាទីល្ងាចថ្ងៃចន្ទនេះ ៕
-
ពលករចំណាកស្រុកខុសច្បាប់នៅតែលួចចូលថៃ បើទោះបីជាប្រទេសនេះកំពុងផ្ទុះ Covid-19 ក្នុងសហគមន៍
ថៃ៖ កងទ័ពថៃ នៅថ្ងៃចន្ទម្សិលមិញបានសារភាពថា ពួកគេមិនអាចបិទព្រំដែនទាំងស្រុងពីជនចំណាកស្រុកខុសច្បាប់បានទេ សូម្បីតែក្រសួងសុខាភិបាលបានបញ្ជាក់ថា ការឆ្លងមេរោគចុងក្រោយបង្អស់នៅឯទីផ្សារបង្គាមួយក្នុងខេត្ត សាមុត សាខន មានទំនាក់ទំនងជាមួយពលករចំណាកស្រុកក៏ដោយ នេះបើតាមសារព័ត៌មានបាងកកប៉ុស្តិ៍នៅថ្ងៃទី២២ ខែធ្នូ ឆ្នាំ២០២០ ។ នាយរងសេនាធិការនិងជាអ្នកនាំពាក្យកងទ័ពលោកឧត្តមសេនីយ៍ឯក Santipong Thammapiya បញ្ជាក់ថា ពលករចំណាកស្រុកខុសច្បាប់កំពុងឆ្លងដែនដោយប្រើប្រាស់បណ្តាញធម្មជាតិ បើទោះបីជាយើងបានដាក់ពង្រាយកងទាហានទៅការពារព្រំដែនប្រវែង៥.៥២៦គីឡូម៉ែត្ររបស់យើងក៏ដោយ ។ លោកបានទទួលស្គាល់ថា ពលករចំណាកស្រុកខុសច្បាប់នៅតែលួចចូលថៃពីមីយ៉ាន់ម៉ា ជាពិសេសនៅតាមទីតាំងតូចៗក្នុងខេត្ត Tak, Chiang Rai និង Kanchanaburi ហើយថា កងទ័ពនឹងដាក់ធនធានបន្ថែមទៀត រួមទាំងយន្តហោះដ្រូន កងអង្គភាពល្បាតចល័ត និងរបងលួសបន្លាផងដែរ ដើម្បីការពារតំបន់ដែលមានហានិភ័យខ្ពស់ ។ នាយកវិទ្យាស្ថានគ្រប់គ្រងជំងឺក្រុងលោកវេជ្ជបណ្ឌិត Vichan Pawun និយាយថា ពលករចំណាកស្រុកនៅខេត្ត សាមុត សាខន អាចជាមូលហេតុនៃការឆ្លងថ្មីបំផុតក្នុងផ្សារបង្គានៅស្រុក Muang ។ លោកវេជ្ជបណ្ឌិតបានសង្កត់ធ្ងន់ថា ផ្អែកលើការធ្វើតេស្តបានរកឃើញថា ៩០ភាគរយនៃអ្នកឆ្លងគឺជាកម្មករចំណាកស្រុកមីយ៉ាន់ម៉ាដែលរស់នៅក្នុងតំបន់នោះ ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៧៨លាននាក់ ក្នុងនោះស្លាប់ជាង១លាន៧០ម៉ឺននាក់ និងជាសះស្បើយជាង៥៤លាន៥៧ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧៧លាន៧០ម៉ឺន៦ពាន់៧០៩ករណី ក្នុងនោះមានអ្នកជម្ងឺសរុបចំនួន១លាន៧០ម៉ឺន៨ពាន់៤០៩នាក់ស្លាប់ និង ជាសះស្បើយឡើងវិញសរុបចំនួន៥៤លាន៥៧ម៉ឺន៨ពាន់៤៩៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២២ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៨លាន៤៧ម៉ឺន៣ពាន់៦៩៧នាក់ ស្លាប់ចំនួន៣២ម៉ឺន៦ពាន់៧៧២នាក់ និងជាសះស្បើយចំនួន១០លាន៨០ម៉ឺន២ពាន់៤៩៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៧ម៉ឺន៥ពាន់៤២២នាក់ ស្លាប់ចំនួន១៤ម៉ឺន៦ពាន់១៤៥នាក់ និងជាសះស្បើយ៩លាន៦៣ម៉ឺន៥ពាន់៦១៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន២៦ម៉ឺន៤ពាន់២២១នាក់ ស្លាប់១៨ម៉ឺន៧ពាន់៣២២នាក់ និងជាសះស្បើយ៦លាន២៨ម៉ឺន៦ពាន់៩៨០នាក់ ៕
-
ថ្ងៃនេះអ្នកជំងឺកូវីដ-១៩ ចំនួន២នាក់បានជាសះស្បើយ និងមិនមានអ្នកឆ្លងថ្មីនោះទេ
-
នាយករដ្ឋមន្ត្រីថៃត្រូវការពេលគិត៧ថ្ងៃ សម្រេចលុបឬមិនលុបពិធីឆ្លងឆ្នាំទូទាំងប្រទេសតែម្តង
នាយករដ្ឋមន្ត្រីថៃ លោក ប្រាយុទ្ធ ចាន់អូចា នៅថ្ងៃទី២១ ធ្នូ ២០២០នេះបាននិយាយថា លោកត្រូវការពេល៧ថ្ងៃទៀត ដើម្បីវាយតម្លៃពីស្ថានភាពកូវីដ១៩ មុនពេលលោកត្រូវសម្រេចចិត្តលុបឬមិនលុបពិធីបុណ្យឆ្លងឆ្នាំ សកល ទូទាំងប្រទេសតែម្តង។ និយាយក្រោយពេលប្រជុំជាមួយរដ្ឋបាលគ្រប់គ្រងស្ថានភាពកូវីដ១៩ ទាក់ទងការផ្ទុះក្នុងសហគមន៍ទ្រង់ទ្រាយដ៏ធំកាលពីចុងសប្តាហ៍នោះ លោក ប្រាយុទ្ធ បានបន្ថែមទៀតថា ក្រុមន្ត្រីសុខាភិបាលនិងនគរបាលតាមព្រំដែនបានពង្រឹងសន្តិសុខ ប៉ុន្តែនៅមានចម្លោះប្រហោង នៅតំបន់ព្រំដែនជាមួយមីយ៉ាន់ម៉ា។ កាលពីចុងសប្តាហ៍ មានឆ្លងកូវីដ១៩ ករណីថ្មី ច្រើនជាង៨០០នាក់ ទាក់ទងនឹងអ្នកលក់បង្គារម្នាក់ នៅខេត្ត សាមុត សាខន ខណៈដែលស្រុក Muang នៃខេត្តមួយនេះក៏ទើបផ្ទុះការចម្លងក្នុងសហគមន៍ ផ្តើមចេញពីក្រុមអន្តោប្រវេសន៍ខុសច្បាប់ដែរ៕ ប្រភពពី The Nations
-
ឧបនាយករដ្ឋមន្រ្តីប្រទេសមួយបានស្លាប់ ក្រោយឆ្លងវីរុសជំងឺកូវីដ១៩
លោក Museveni ប្រធានាធិបតីអ៊ូហ្គង់ដាបានថ្លែងថា លោក Kivejinja ឧបនាយករដ្ឋមន្រ្តីទី២នៃប្រទេសអ៊ូហ្គង់ដាបានទទួលមរណភាពដោយសារឆ្លងវីរុសជំងឺកូវីដ១៩។ ក្នុងសកម្មភាពឃោសនារកសំឡេងឆ្នោតដែលបានធ្វើនៅក្រុងHoimaភាគខាងលិចប្រទេសអ៊ូហ្គង់ដា លោក Museveni បានថ្លែងថា លោក Kivejinja ដែលកំពុងទទួលការព្យាបាលពីជំងឺកូវីដ១៩នៅមន្ទីរពេទ្យMulagoនៃរដ្ឋធានីអ៊ូហ្គង់ដាជាអកុសលបានទទួលមរណភាពដោយសារមានអាការៈអាប់អួរទៅ លោកមានការឈឺចាប់និងមានក្តីទុក្ខយ៉ាងក្រៀមក្រំចំពោះរឿងនេះ។ លោក Nabakooba រដ្ឋមន្រ្តីក្រសួងព័ត៌មាននិងបច្ចេវិទ្យាទូរគមនាគមន៍អ៊ូហ្គង់ដាបានបង្ហោះសារតាមបណ្តាញទំនាក់ទំនងសង្គមកាលពីយប់ថ្ងៃដដែលថា លោកKivejinjaទទួលមរណភាពនៅមន្ទីរពេទ្យMulagoកាលពីថ្ងៃទី១៩ខែធ្នូ ក្នុងរយៈពេលប៉ុន្មានសប្តាហ៍មុននេះ លោកបានទទួលការព្យាបាលក្នុងបន្ទប់ICUរហូត។ លោកRugundaនាយករដ្ឋមន្រ្តីអ៊ូហ្គង់ដាបានបង្ហោះសារតាមបណ្តាញទំនាក់ទំនងសង្គមថា ការទទួលមរណភាពរបស់លោកKivejinjaគឺជាការខាតបង់យ៉ាងធ្ងន់ធ្ងររបស់អ៊ូហ្គង់ដា៕
-
សមាជិកសភាអាមេរិកឈានដល់កិច្ចព្រមព្រៀងលើកញ្ចប់ថវិកាសង្គ្រោះសេដ្ឋកិច្ច ដែលរងគ្រោះដោយសារវិបត្តិកូវីដ១៩ជិត៩០០ពាន់លានដុល្លារ
អាមេរិក៖ សមាជិកសភាអាមេរិកនៅថ្ងៃអាទិត្យម្សិលមិញ (ម៉ោងក្នុងតំបន់) បានឈានដល់កិច្ចព្រមព្រៀងមួយលើកញ្ចប់ថវិកាសង្គ្រោះសេដ្ឋកិច្ច ដែលរងផលប៉ះពាល់ដោយសារ Covid-19 ជិត៩០០ពាន់លានដុល្លារ នេះបើតាមសារព័ត៌មាន CGTN នៅថ្ងៃទី២១ ខែធ្នូ ឆ្នាំ២០២០ ។ មេដឹកនាំព្រឹទ្ធសភាមកពីគណបក្សសាធារណរដ្ឋលោក មីត ម៉ាកខូននែល បាននិយាយនៅក្នុងសេចក្តីថ្លែងការណ៍មួយថា យើងបានព្រមព្រៀងលើកញ្ចប់ថវិកាជិត៩០០ពាន់លានដុល្លារ… វាត្រូវបានរៀបចំឡើងជាមួយគោលនយោបាយគោលដៅ ដើម្បីជួយប្រជាជនអាមេរិក ដែលបានរង់ចាំជាយូរមកហើយ ។ ប្រធានសភាបក្សប្រជាធិបតេយ្យលោកស្រី ណាន់ស៊ី ប៉េឡូស៊ី និងមេដឹកនាំសំឡេងភាគតិចព្រឹទ្ធសភាលោក ឆាក់ ស៊ូមឺ បានបញ្ជាក់ដែរថា ការព្រមព្រៀងត្រូវបានសម្រេចជាមួយបក្សសាធារណរដ្ឋ និងសេតវិមានលើកិច្ចព្រមព្រៀងមួយ ដែលផ្តល់ថវិកាចាំបាច់បន្ទាន់ ដើម្បីជួយសង្គ្រោះអាយុជីវិត និងជីវភាពរបស់ប្រជាជនអាមេរិក ខណៈ Covid-19 បង្កើនល្បឿនឆ្លង ។ សូមជម្រាបថា កញ្ចប់ថវិកាសង្រ្គោះខាងលើនេះត្រូវគេរំពឹងថា នឹងរួមបញ្ចូលជំនួយសម្រាប់ការចែកចាយវ៉ាក់សាំង និង ភស្តុភារអត្ថប្រយោជន៍បន្ថែម សម្រាប់អ្នកគ្មានការងារធ្វើចំនួន៣០០ដុល្លារក្នុងមួយសប្តាហ៍ និងការចែកមូលប្បទានប័ត្រសំរាប់ជំរុញសេដ្ឋកិច្ចជុំថ្មីក្នុងមួយមូលប្បទានប័ត្រ៦០០ដុល្លារ ៕