-
កូរ៉េខាងត្បូងបញ្ជាអោយបិទសាលារៀន ស្របពេលករណីឆ្លង Covid-19 កើនឡើងខ្លាំង
កូរ៉េខាងត្បូង៖ រដ្ឋាភិបាលកូរ៉េខាងត្បូងបានបញ្ជាអោយបិទសាលារៀន គិតចាប់ពីថ្ងៃអង្គារសប្តាហ៍នេះតទៅ នៅក្នុងរដ្ឋធានីសេអ៊ូល និងតំបន់ក្បែរខាងគ្នា ខណៈដែលប្រទេសអាស៊ីខាងត្បូងមួយនេះ កំពុងប្រយុទ្ធនឹងការឆ្លងរាតត្បាតនៃជំងឺ Covid-19 ដ៏អាក្រក់បំផុត នេះបើតាមសារព័ត៌មានរ៉យទ័រនៅថ្ងៃទី១៤ ខែធ្នូ ឆ្នាំ២០២០ ។ បណ្តាសាលារៀននៅក្នុងរដ្ឋធានីសេអ៊ូល នឹងត្រូវផ្លាស់ប្តូរទៅជាការសិក្សាតាមអនឡាញវិញ រហូតដល់ដំណាច់ខែធ្នូនេះ ដែលវាជាចំណាត់ការចុងក្រោយនៃវិធានការរក្សាគម្លាតសង្គម ដែលរហូតមកទល់ពេលនេះ បានបរាជ័យ ក្នុងការទប់ស្កាត់ការកើនឡើងករណីឆ្លងជំងឺ Covid-19 ។ ការបិទសាលារៀន គឺជាជំហានឆ្ពោះទៅរកការដាក់ចេញនូវវិធានការណ៍ផ្លាស់ប្តូរគម្លាតសង្គមក្នុងដំណាក់កាលទី ៣ ខណៈវិធានការនេះ នឹងរាំងខ្ទប់ដល់ប្រទេសមានសេដ្ឋកិច្ចធំបំផុតទីបួននៅអាស៊ីមួយនេះ ។ សូមបញ្ជាក់ថា គិតត្រឹមថ្ងៃទី១៤ ខែធ្នូនេះ នៅទូទាំងប្រទេសកូរ៉េខាងត្បូងមានអ្នកឆ្លងជំងឺ Covid-19 សរុប៤ម៉ឺន៣ពាន់៤៨៤ករណី ក្នុងនោះមានអ្នកស្លាប់៥៨៧នាក់ និងជាសះស្បើយឡើងវិញសរុប៣ម៉ឺន២ពាន់១០២ ៕
-
លោក ដូណាល់ ត្រាំ និងលោក ម៉ៃ ភែន ព្រមទាំងមន្ត្រីកំពូលៗអាមេរិកដទៃទៀត នឹងត្រូវផ្តល់ការចាក់វ៉ាក់សាំង Covid-19
អាមេរិក៖ ប្រធានាធិបតីអាមេរិកលោក ដូណាល់ ត្រាំ និងអនុប្រធានាធិបតីលោក ម៉ៃ ភែន ព្រមទាំងមន្ត្រីជាន់ខ្ពស់អាមេរិកដទៃទៀត នឹងត្រូវផ្តល់ការចាក់វ៉ាក់សាំង COVID-19 ដែលនឹងចាប់ផ្តើមពីថ្ងៃចន្ទនេះ (ម៉ោងក្នុងតំបន់) នេះបើតាមសារព័ត៌មាន CNA នៅថ្ងៃទី១៤ ខែធ្នូ ឆ្នាំ២០២០ ។ មន្ត្រីកំពូលៗនៅសេតវិមាន និងមន្ត្រីសំខាន់ៗមួយចំនួនទៀតរបស់រដ្ឋបាលលោក ដូណាល់ ត្រាំ នឹងទទួលការចាក់វ៉ាក់សាំងនៅក្នុងរយៈពេល១០ថ្ងៃខាងមុខទៀតនេះ ប៉ុន្តែគេមិនទាន់ដឹងច្បាស់នៅឡើយទេ ថាតើលោក ដូណាល់ ត្រាំ នឹងទទួលការចាក់វ៉ាក់សាំងភ្លាមៗដែរទេ ដោយសារតែរូបលោកធ្លាប់ឆ្លង និងជាសះស្បើយឡើងវិញពីជំងឺនេះ ។ ម្យ៉ាងវិញទៀត គេក៏នៅមិនទាន់មានការបញ្ជាក់ថា តើប្រធានាធិបតីជាប់ឆ្នោតលោក ចូ បៃដិន និងអនុប្រធានាធិបតីជាប់ឆ្នោត លោកស្រី កាម៉ាឡា ហារីស ព្រមទាំងមន្ត្រីនៃក្រុមការងាររបស់លោក បៃដិន នឹងទទួលការចាក់វ៉ាក់សាំងដែរ ឬក៏អត់នោះដែរ ៕
-
វ៉ាក់សាំង Covid-19 របស់ក្រុមហ៊ុន Pfizer/BioNTech ចាប់ផ្តើមដឹកចេញពីរោងចក្រផលិតនៅរដ្ឋ Michigan ដើម្បីចែកចាយទៅកាន់រដ្ឋផ្សេងៗរបស់សហរដ្ឋអាមេរិក
អាមេរិក៖ សារព័ត៌មាន CNA ចុះផ្សាយនៅថ្ងៃទី១៤ ខែធ្នូនេះថា រថយន្តកុងតឺន័រដឹកជញ្ជូនវ៉ាក់សាំង COVID-19 ដំបូងរបស់ក្រុមហ៊ុន Pfizer/BioNTech បានបើកចេញពីរោងចក្រផលិតនៅរដ្ឋមីឈីហ្គែន នៅថ្ងៃអាទិត្យសប្តាហ៍មុននេះ (ម៉ោងក្នុងតំបន់) ដើម្បីយកទៅចែកចាយអោយប្រើប្រាស់នៅទូទាំងប្រទេស ។ ក្នុងដំណាក់កាលដំបូង វ៉ាក់សាំងចំនួន៣លានដូសត្រូវបានគេរំពឹងថា នឹងចែកចាយនៅទូទាំងសហរដ្ឋអាមេរិក ហើយបើតាមក្រុមមន្ត្រីអាមេរិកនោះ ការដឹកជញ្ជូនវ៉ាក់សាំងនឹងត្រូវធ្វើជាដំណាក់កាល ដោយក្នុងដំណាក់កាលដំបូង នឹងទៅដល់មណ្ឌលចែកចាយចំនួន១៤៥កន្លែងនៅចន្ទនេះ ។ ដោយឡែកគោលដៅចំនួន៤២៥កន្លែងផ្សេងទៀតនឹងទទួលបានវ៉ាក់សាំងនៅថ្ងៃអង្គារ និង៦៦កន្លែងទៀត នឹងទទួលបានវ៉ាក់សាំងនៅថ្ងៃពុធសប្តាហ៍នេះ ៕
-
គូវ៉ែតបើកភ្លើងខៀវអោយប្រើវ៉ាក់សាំង Covid-19 របស់ក្រុមហ៊ុន Pfizer-BioNtech ក្នុងករណីបន្ទាន់
គូវ៉ែត៖ ក្រសួងសុខាភិបាលគូវ៉ែត នៅថ្ងៃអាទិត្យសប្តាហ៍មុននេះ បានបើកភ្លើងខៀវឲ្យប្រើវ៉ាក់សាំង COVID-19 របស់ក្រុមហ៊ុន Pfizer-BioNtech ក្នុងករណីបន្ទាន់ នេះបើតាមសារព័ត៌មាន The Arab News នៅថ្ងៃទី១៣ ខែធ្នូ ឆ្នាំ២០២០ ។ ក្រសួងសុខាភិបាលគូវ៉ែទបានអនុម័តឲ្យប្រើប្រាស់វ៉ាក់សាំង Covid-19 របស់ក្រុមហ៊ុន Pfizer-BioNtech ក្នុងករណីបន្ទាន់ ខណៈក្រសួងបានផ្តល់ជម្រើសដល់ប្រជាពលរដ្ឋក្នុងការចុះឈ្មោះជាមុន ដើម្បីទទួលវ៉ាក់សាំងនៅលើគេហទំព័ររបស់ខ្លួន ។ ស្របពេលជាមួយគ្នានេះដែរ ប្រទេសឈូងសមុទ្រអារ៉ាប់ពីរទៀត គឺអារ៉ាប់រួម និងបារ៉ែនក៏បានអនុម័តឲ្យប្រើប្រាស់វ៉ាក់សាំង COVID-19 របស់ក្រុមហ៊ុនចិន Sinopharm ផងដែរ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៧២លាននាក់ ក្នុងនោះស្លាប់ជាង១លាន៦១ម៉ឺននាក់ និងជាសះស្បើយជិត៥០លាន៨៦ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧២លាន៦៣ម៉ឺន៩ពាន់៨៤ករណី ក្នុងនោះមានអ្នកជម្ងឺសរុបចំនួន១លាន៦១ម៉ឺន៨ពាន់៧៥៤នាក់ស្លាប់ និង ជាសះស្បើយឡើងវិញសរុបចំនួន៥០លាន៨៥ម៉ឺន៩ពាន់៥៦៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៤ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៦លាន៧៣ម៉ឺន៧ពាន់២៦៧នាក់ ស្លាប់ចំនួន៣០ម៉ឺន៦ពាន់៤៥៩នាក់ និងជាសះស្បើយចំនួន៩លាន៧២ម៉ឺន៤ពាន់៤៣៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៨៨ម៉ឺន៤ពាន់៧១៦នាក់ ស្លាប់ចំនួន១៤ម៉ឺន៣ពាន់៣៩៣នាក់ និងជាសះស្បើយ៩លាន៣៨ម៉ឺន៧ពាន់៦០៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៩០ម៉ឺន១ពាន់៩៩០នាក់ ស្លាប់១៨ម៉ឺន១ពាន់៤១៩នាក់ និងជាសះស្បើយ៥លាន៩៨ម៉ឺន២ពាន់៩៥៣នាក់ ៕
-
ថ្ងៃនេះមាន ២អ្នក ជាសះស្បើយពីជំងឺកូវីដ-១៩ និងមិនមានអ្នកឆ្លងថ្មីនោះទេ
-
រដ្ឋបាលខណ្ឌច្បារអំពៅ ទទួលអំណោយជាអង្ករ ពីសប្បុរសជន ដេីម្បីរួមចំណែកទ្រទ្រង់សកម្មភាពមនុស្សធម៌ និងការទប់ស្កាត់ នៃការរីករាលដាលជម្ងឺកូវីដ ១៩ ក្នុងមូលដ្ឋាន
ភ្នំពេញ៖ នៅថ្ងៃអាទិត្យ ១៣រោច ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១២ ខែធ្នូ ឆ្នាំ២០២០ រដ្ឋបាលខណ្ឌច្បារអំពៅ បានទទួលអំណោយរបស់លោកញ៉ូង ផាត និង ក្រុមគ្រួសារ ជាអង្ករចំនួន ៣តោន ដេីម្បីរួមចំណែកទ្រទ្រង់សកម្មភាពមនុស្សធម៌ និងការទប់ស្កាត់ នៃការរីករាលដាលជម្ងឺកូវីដ ១៩ ក្នុងមូលដ្ឋានខណ្ឌច្បារអំពៅ ។ ក្នុងឱកាសនេះ រដ្ឋបាលខណ្ឌច្បារអំពៅ សូមថ្លែងអំណរគុណយ៉ាងជ្រាលជ្រៅចំពៅទឹកដ៏សប្បុរសរបស់លោក ញ៉ូង ផាត និង ក្រុមគ្រួសារ ដែលបានឧបត្ថម្ភអង្ករ ដេីម្បីរួមចំណែកទ្រទ្រង់សកម្មភាពមនុស្សធម៌ និងការទប់ស្កាត់ នៃការរីករាលដាលជម្ងឺកូវីដ ១៩ ក្នុងមូលដ្ឋានខណ្ឌច្បារអំពៅ នាពេលនេះ ។ រដ្ឋបាលខណ្ឌច្បារអំពៅ សូមជូនពរ លោក និងក្រុមគ្រួសារ ជួបប្រទះនូវពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕ដោយប៊ុនធី និង វ៉ាន់លុក
-
អង្គការសុខភាពពិភពលោកកំពុងពិចារណាក្នុងការអនុញ្ញាតអោយប្រើវ៉ាក់សាំងរបស់ក្រុមហ៊ុន Pfizer, Moderna និង AstraZeneca ក្នុងករណីបន្ទាន់
ស្វីស៖ វ៉ាក់សាំងប្រឆាំងជំងឺ COVID-19 របស់ក្រុមហ៊ុនផលិតសថ ភីហ្វីហ្សឺ-បាយអូអិនធិច, ម៉ូឌែណ និងអាស្រ្តាហ្សេណេកា កំពុងស្ថិតក្នុងការពិចារណារបស់អង្គការសុខភាពពិភពលោក WHO ក្នុងពេលពីរទៅបីសប្តាហ៍ទៀត មុននឹងបើកភ្លើងខៀវអោយប្រើប្រាស់ក្នុងករណីបន្ទាន់ នេះបើតាមសារព័ត៌មាន AFP នៅថ្ងៃទី១២ ខែធ្នូ ឆ្នាំ២០២០ ។ ស្របពេលជាមួយគ្នានេះដែរ អង្គការសុខភាពពិភពលោក WHO បានបង្ហើបឲ្យដឹងថា បច្ចុប្បន្ននេះមានក្រុមហ៊ុនចំនួន១០ហើយបានចាប់អារម្មណ៍ដាក់ពាក្យមកកាន់អង្គការអន្តរជាតិនេះ ដើម្បីត្រួតពិនិត្យ និង ធ្វើការដាក់ចេញឲ្យប្រើប្រាស់វ៉ាក់សាំងរបស់ពួកគេនៅក្នុងករណីបន្ទាន់ ។ បើតាមអង្គការសុខភាពពិភពលោក WHO នោះ ខ្លួនអាចនឹងអនុម័តឲ្យវ៉ាក់សាំងទាំងបីខាងលើនេះ ប្រើប្រាស់នៅក្នុងប្រទេសមួយចំនួន បើទោះបីជានិយ័តករវេជ្ជសាស្ត្រនៅក្នុងប្រទេសទាំងនោះ មិនទាន់អាចពិនិត្យវ៉ាក់សាំងបានលម្អិតដោយខ្លួនឯងក៏ដោយ ៕
-
សហរដ្ឋអាមេរិកសម្រេចអនុញ្ញាតអោយប្រើប្រាស់វ៉ាក់សាំង Covid-19 របស់ក្រុមហ៊ុនផលិតឱសថ Pfizer-BioNTech
អាមេរិក៖ ទីបំផុតរដ្ឋបាលចំណីអាហារ និងឱសថអាមេរិក FDA បានអនុញ្ញាតិឲ្យវ៉ាក់សាំង Covid-19 របស់ក្រុមហ៊ុនផលិតឱសថអាមេរិក-អាល្លឺម៉ង់ Pfizer-BioNTech សម្រាប់ប្រើប្រាស់ជាបន្ទាន់នៅសហរដ្ឋអាមេរិក នេះបើតាមសារព័ត៌មានរ៉យទ័រនៅថ្ងៃទី១២ ខែធ្នូ ឆ្នាំ២០២០ ។ ទន្ទឹមគ្នា រដ្ឋបាលចំណីអាហារ និងឱសថអាមេរិក FDA នៅថ្ងៃសុក្រនេះប្រកាសថា ការប្រើប្រាស់ជាបន្ទាន់ត្រូវបានផ្តល់ជូនតាមអនុសាសន៍របស់គណៈកម្មាធិការប្រឹក្សាយោបល់អំពីវ៉ាក់សាំង និងផលិតផលជីវសាស្ត្រពាក់ព័ន្ធ ។ បើតាម FDA ការបញ្ជូនវ៉ាក់សាំង៣លានដូសដំបូង ទៅកាន់តំបន់ប្រឈមមុខខ្លាំងនៅទូទាំងសហរដ្ឋអាមេរិក នឹងត្រូវចាប់ផ្តើមធ្វើឡើងនៅសប្តាហ៍ក្រោយ ។ សូមជម្រាបថា ការអនុញ្ញាតខាងលើនេះ បានកើតមានឡើងក្រោយក្រុមទីប្រឹក្សាខាងក្រៅនៃរដ្ឋបាលចំណីអាហារ និងឱសថអាមេរិក FDA កាលពីល្ងាចថ្ងៃព្រហ ស្បតិ៍សប្តាហ៍នេះ បានបោះឆ្នោតគាំទ្រក្នុងសំឡេង១៧ទល់៤ ចំពោះវ៉ាក់សាំងនេះ ដោយសម្រេចថា គុណប្រយោជន៍របស់វាមានច្រើនជាងហានិភ័យសម្រាប់ការប្រើប្រាស់ដោយបុគ្គលដែលមានអាយុចាប់ពី១៦ឆ្នាំឡើងទៅ ៕
-
ក្រុមហ៊ុន Pfizer-BioNTech ច្រានចោលព័ត៌មានថា មានមនុស្ស០៦នាក់ស្លាប់ ដោយសារការធ្វើតេស្តវ៉ាក់សាំង Covid-19 របស់ខ្លួន
អាមេរិក៖ ក្រុមហ៊ុនផលិតឱសថ Pfizer-BioNTech បានចេញមុខច្រានចោល បន្ទាប់ពីព័ត៌មានដែលបន្តចែកចាយពាលពេញបណ្តាញទំនាក់ទំនងសង្គមថា មានមនុស្ស០៦នាក់បានស្លាប់ ដោយសារតែទទួលការធ្វើតេស្តវ៉ាក់សាំង COVID-19 របស់ខ្លួននៅដំណាក់កាលចុងក្រោយ នេះបើតាមសារព័ត៌មានរ៉យទ័រនៅយប់ថ្ងៃទី១១ ខែធ្នូ ឆ្នាំ២០២០ ។ នាយកប្រតិបត្តិក្រុមហ៊ុន Pfizer-BioNTech លោកវេជ្ជបណ្ឌិត Bourla បាននិយាយថា ការអះអាងខាងលើនេះ គឺមានផ្នែកមិនពិតច្រើនជាងពិត ពីព្រោះក្នុងចំណោមមនុស្ស០៦នាក់ដែលបាត់បង់ជីវិតនោះ គឺមានតែ០២នាក់ប៉ុណ្ណោះ ដែលទទួលការតេស្តវ៉ាក់សាំង ហើយ០៤នាក់ទៀតគ្មានជាប់ទាក់ទងនឹងវ៉ាក់សាំងនោះទេ ។ ចំពោះបញ្ហាដែលកើតឡើងនៅអង់គ្លេស ដោយបុគ្គលិកសុខាភិបាលអង់គ្លេសពីរនាក់ត្រូវបានគេរាយការណ៍ថា បានកើតអការៈអាលែកហ្ស៊ី បន្ទាប់ពីទទួលការចាក់វ៉ាក់សាំងCOVID-19របស់ Pfizer-BioNTech នោះ គឺជាករណីស្រាលមួយប៉ុណ្ណោះ ហើយស្ថានភាពពួកគេក៏បានប្រសើរឡើងវិញរួចហើយដែរ ៕