ភ្នំពេញ៖ អាកុលចំនួន៤០កាន និងម៉ាសចំនួន២ម៉ឺនម៉ាសត្រូវបានអាជ្ញាធររាជធានីភ្នំពេញ សម្រេចប្រគល់ជូនកងទ័ពឈរជើងតាមព្រំដែន ដែលចងសម្ព័ន្ធមេត្រីភាពជាមួយរដ្ឋបាលរាជធានីភ្នំពេញ ដើម្បីបង្ការ និងទប់ស្កាត់ជម្ងឺកូវីដ-១៩ ខណៈដែលជម្ងឺនេះបាននឹងកំពុងរាលដាលចូលដល់សហគមហើយនោះ។ ពិធីប្រគល់ និងទទួលនេះបានធ្វើឡើងនាសៀលថ្ងៃទី១១ ធ្នូនេះ ក្រោមវត្តមាន លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកឧត្តមសេនីយ៍ទោ ឌឹម បូណា មេបញ្ជាការរងកងពលធំអន្តរាគមន៍លេខ៣ នៅសាលារាជធានីភ្នំពេញ។ ចំពោះអាកុល និងម៉ាសទាំងនេះត្រូវបានប្រគល់ជូនទៅ កងពលធំអន្តរាគមន៍លេខ៣ អាកុលចំនួន១៤កាន និងម៉ាសចំនួន៦០០០ម៉ាស។ កងពលតូចអន្តរាគមន៍លេខ៩ អាកុលចំនួន១០កាន ម៉ាសចំនួន៥០០០ម៉ាស់ ។ កងពលតូចអន្តរាគមន៍លេខ១២៨ ចំនួន១០កាន ម៉ាស៥០០០ម៉ាស ។ បញ្ជាការដ្ឋានអង្គរក្សប្រចាំការព្រះវិហារចំនួន៣កាននិងម៉ាស២០០០ម៉ាស ។វរៈនគរបាលការពារព្រំដែន៧៩៣ចំនួន៣កាននិងម៉ាស២០០០ម៉ាស ។ សរុបទាំងអស់អាកុលចំនួន៤០កាន និងម៉ាសចំនួន២ម៉ឺនម៉ាស។ លោកឧត្តមសេនីយ៍ទោ ឌឹម បូណា មេបញ្ជាការរងកងពលធំអន្តរាគមន៍លេខ៣ ក្នុងឱកាសនោះបានថ្លែងអំណរគុណយ៉ាងជ្រាលជ្រៅចំពោះលោក ឃួង ស្រេងអភិបាលរាជធានីភ្នំពេញដែលតែងតែគិតគូរចំពោះកងទ័ពឈរជើងតាមព្រំដែន ដែលចងសម្ព័ន្ធមេត្រីភាពជាមួយរដ្ឋបាលរាជធានីភ្នំពេញ ដោយកមន្លងមកតែងផ្តល់នូវគ្រឿងឧបភោគ បរិភោគ ថវិការហូតមក ដើម្បីលើកទឹកចិត្តកងទ័ពឱ្យកាន់តែអង់អាចក្លាហានឡើង៕

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅព្រឹកថ្ងៃទី១១ ខែធ្នូ ឆ្នាំ២០២០នេះ បានចាត់ក្រុមការងារ ដែលមានលោក គីម រិទ្ធី លោកស្រី ដាំ ដារិនី អនុប្រធានស.ស.យ.ក. និង លោក នួន ផារ័ត្ន សមាជិកគណៈអចិន្រ្តៃយ៍នៃគណៈកម្មាធិការកណ្ដាល ស.ស.យ.ក. បាននាំយកថវិកាដែលទទួលបានមកពីការចូលរួមវិភាគទានពីសមាជិក សមាជិការ ស.ស.យ.ក. ទូទាំងប្រទេស និងសប្បុរជននានា ចំនួន ១២៥ ០០០ ដុល្លារអាមេរិក តាមរយៈឯកឧត្តម សេង ទៀង ដើម្បីចូលរួមជាមួយរាជរដ្ឋាភិបាលកម្ពុជាទិញវ៉ាក់សាំងជំងឺកូវីដ-១៩។ ការចូលរួមយ៉ាងផុសផុលពីសំណាក់សមាជិក សមាជិកា និងសប្បុរសជននានា មិនថាតិចក្តី ច្រើនក្តី គឺបានបង្ហាញពីឆន្ទៈ និងស្មារតីសាមគ្គីយ៉ាងមុតមាំក្នុងនាមមហាគ្រួសារខែ្មរ គឺតែងតែចេះជួយគ្នាក្នុងគ្រាលំបាក។នេះបើតាមទំព័រហ្វេសប៊ុកផ្លូវការរបស់ ស.ស.យក បង្ហោះផ្សាយនៅព្រឹកថ្ងៃទី១១ ខែធ្នូ ឆ្នំា២០២០នេះ៕

ភ្នំពេញ ៖ ឯកឧត្តម ឧត្តមសេនីយ៍ ឯក យិន ច័ន្ទ ធួន និងលោកជំទាវ បានចូលរួមថវិកាចំនួន ១ លានរៀល ជាមួយរាជរដ្ឋាភិបាល នៃព្រះរាជាណាចក្រកម្ពុជា ពិសេសជាមួយ សម្តេចតេជោ ហ៊ុន សែន នាយក រដ្ឋមន្ត្រី ដើម្បីទិញវ៉ាក់សាំងការពារជំងឺកូវីដ១៩ ជាក់ជូនប្រជាពលរដ្ឋកម្ពុជាឋដោយឥតគិតថ្លៃ។ ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។ សូមបញ្ជាក់ថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់៕

ភ្នំពេញ៖ ពលករខ្មែរម្នាក់ដែលទើបមកពីប្រទេសម៉ាឡេស៊ី ហើយក្រសួងសុខាភិបាល តម្រូវឲ្យធ្វើចត្តាឡីស័កនៅសណ្ឋាគារ ឡុង លីវ ដែលមានទីតាំងតាមផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន បានលោតពីលើអគារសណ្ឋាគារ បណ្តាលឲ្យធ្លាយដំបូលសាលារៀនសុធារស រងរបួសធ្ងន់ធ្ងរ។ របាយការណ៍របស់ប៉ុស្តិ៍នគរបាលរដ្ឋបាលសង្កាត់ទន្លេបាសាក់ បានឲ្យដឹងថា ជនរងគ្រោះឈ្មោះ សួន វាសនា អាយុ២៣ឆ្នាំ ស្នាក់នៅធ្វើចត្ដាឡីស័កក្នុងសណ្ឋាគារ ឡុង លីវ បន្ទប់លេខ៥១១ ជាន់ទី៥ ផ្លូវ៣១២ ក្រុម២៣ ភូមិ៥ សង្កាត់ទន្លេបាសាក់ ខណ្ឌចំការមន រងរបួសបែកក្បាល និងមានស្នាមឆូតលើដងខ្លួនរងរបួសស្រាល។ ជាមួយគ្នានេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានប្រាប់បណ្ដាញព័ត៌មាន ថា នៅពេលនេះជនរងគ្រោះកំពុងសង្គ្រោះនៅ មន្ទីរពេទ្យមិត្តភាពខ្មែរ-សូវៀត ដែលបច្ចុប្បន្នបានដឹងខ្លួន និងនិយាយបានខ្លះៗ តែស្ថិតនៅក្នុងសភាពធ្ងន់ធ្ងរនៅឡើយទេ។ លោកស្រី ឱ វណ្ណឌីន បានសង្កត់ធ្ងន់ថា ការធ្លាក់ពីលើអគារសណ្ឋាគារនេះ ជារឿងផ្ទាល់ខ្លួនរបស់ជនរងគ្រោះ មិនមានពាក់ព័ន្ធនឹងបញ្ហាកូវីដ-១៩នោះឡើយ។ លោកស្រីអ្នកនាំពាក្យបានបញ្ជាក់ថា តាមការសាកសួរបុគ្គលនេះផ្ទាល់ គឺគាត់ភ្លាត់ជើងធ្លាក់មក ដោយសារភាពរវើយរវាយរបស់គាត់ ដែលជាឥទ្ធិពល នៃការប្រើប្រាស់គ្រឿងថ្នាំញៀន…

ភ្នំពេញ ៖ ដើម្បីចូលរួមចំណែកជាមួយរាជរដ្ឋាភិបាល ក្នុងការទិញវ៉ាក់សាំងការពារជំងឺកូវីដ១៩ តាមការប្រកាសរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៧ ខែធ្នូ និងក្នុងស្មារតីស្រឡាញ់ជាតិ មាតុភូមិ ថ្នាក់ដឹកនាំ សមាជិក ព្រឹទ្ធសភា និងមន្ត្រីរាជការនៃអគ្គលេខាធិការដ្ឋានព្រឹទ្ធសភា បានចូលរួមចំណែកបរិច្ចាគនូវថវិកាមួយចំនួន ដែលទទួលបាន ទឹកប្រាក់សរុប ជាង៧លានដុល្លារ និងជាង ១៥៦លានរៀល ដើម្បីទិញវ៉ាក់សាំងការពារជំងឺកូវីដ១៩ ដើម្បីចាក់ជូនប្រជាពលរដ្ធដោយឥតគិតថ្លៃ ។ ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។ សូមបញ្ជាក់ថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់៕