-
សម្តេច ហេង សំរិន ប្រកាសបរិច្ចាគប្រាក់បៀវត្សរ៍៤៨លានរៀល ចូលរួមទិញវ៉ាក់សាំងកូវីដ ចាក់ជូនពលរដ្ឋ
សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី៨ធ្នូ ឆ្នាំ២០២០នេះ បានប្រកាសបរិច្ចាគប្រាក់បៀវត្សរ៍ ក្នុងមួយខែ៨លានរៀល រយៈពេល ៦ខែ ចាប់ពីខែធ្នូ ឆ្នាំ២០២០ តទៅ ដែលសរុប៤៨លានរៀល សម្រាប់ចូលរួមទិញវ៉ាក់សាំងការពារជំងឺកូវីដ១៩។ ការប្រកាសរបស់ សម្តេច ហេង សំរិន បានធ្វើឡើងបន្ទាប់ពី សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានប្រកាសនៅថ្ងៃទី៧ធ្នូ ឆ្នាំ២០២០ថា កម្ពុជាកំពុងត្រៀមថវិកាទិញវ៉ាក់សាំងកូវីដ១៩ មកចាក់ជូនប្រជាពលរដ្ឋដោយឥតគិតថ្លៃ។ សម្តេចបានបញ្ជាក់ថា គ្រោងនឹងទិញជាជំហានដំបូង ចំនួន ១លានដូស ដើម្បីចាក់ប្រជាពលរដ្ឋប្រមាណ៥០ម៉ឺននាក់ដំបូង ដែលអាចនឹងចាក់សម្រាប់ក្រុមគ្រូពេទ្យ គ្រូបង្រៀន មុនគេ។ ក្រោយការប្រកាសរបស់សម្ដេចតេជោ ក៏មានសប្បុរសជននានា បានបរិច្ចាគថវិការបស់ខ្លួនដើម្បីចូលរួមជាមួយរាជរដ្ឋាភិបាលក្នុងការត្រៀមថវិកាទិញវ៉ាក់សាំងកូវីដ-១៩ ដែលគិតមកដល់ព្រឹកថ្ងៃទី៨ធ្នូឆ្នាំ២០២០ បានជិត២០លានដុល្លារនោះហើយ៕ កឹម ទៀង
-
លោក ដូណាល់ ត្រាំ គ្រោងចុះហត្ថលេខាលើបទបញ្ជាប្រតិបត្តិមួយ ដែលនឹងផ្តល់អាទិភាពចែកចាយវ៉ាក់សាំង Covid-19 ដល់ប្រជាជនអាមេរិកមុនដំបូង
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី០៨ ខែធ្នូនេះថា ប្រធានាធិបតីអាមេរិកលោក ដូណាល់ ត្រាំ នឹងចុះហត្ថលេខាលើបទបញ្ជាប្រតិបត្តិមួយ នៅថ្ងៃអង្គារនេះ (ម៉ោងក្នុងតំបន់) ក្នុងគោលបំណងធានាអោយបាននូវអាទិភាពទទួលបានវ៉ាក់សាំង COVID-19 ដែលរដ្ឋាភិបាលអាមេរិកបញ្ជាទិញ ទុកចាក់ជូនប្រជាជនអាមេរិក មុននឹងផ្គត់ផ្គង់ទៅក្រៅប្រទេស ។ បើតាមមន្ត្រីអាមេរិកម្នាក់ក្នុងលក្ខខណ្ឌមិនបញ្ចេញឈ្មោះនិយាយថា បទបញ្ជប្រតិបត្តិខាងលើនេះ ក៏នឹងបង្កើតរបៀបវារៈមួយសម្រាប់ទីភ្នាក់ងារទាំង ឡាយនៃរដ្ឋាភិបាលអាមេរិក អោយជួយដល់បណ្ដាប្រទេសដទៃ ដើម្បីទិញ ឬទទួលបានវ៉ាក់សាំងផងដែរ ។ ពាក់ព័ន្ធនឹងបញ្ហាចែកចាយវ៉ាក់សាំងនេះដែរ សេតវិមានគ្រោងបើកកិច្ចប្រជុំកំពូលមួយនៅថ្ងៃអង្គារដដែលនេះ ដើម្បីពិភាក្សាលើគ្នានីតិវិធីចែកចាយវ៉ាក់សាំង ខណៈវ៉ាក់សាំង COVID-19 ត្រូវបានគេរំពឹងថា នឹងត្រូវចាប់ផ្ដើមចាក់ជូនប្រជាជនអាមេរិក ឱ្យបានមុនថ្ងៃបុណ្យណូអែល ខណៈក្រុមមន្ត្រីរបស់លោក ចូ បៃដិន មិនត្រូវបានអញ្ជើញឱ្យចូលរួមនៅក្នុងកិច្ចប្រជុំកំពូលនេះឡើយ ៕
-
អ៊ីរ៉ង់ចោទប្រកាន់សហរដ្ឋអាមេរិកថា បានរារាំងប្រទេសខ្លួនមិនអោយទិញវ៉ាក់សាំង Covid-19
អ៊ីរ៉ង់៖ ប្រធានធនាគារកណ្តាលអ៊ីរ៉ង់បញ្ជាក់ថា អាមេរិកកំពុងព្យាយាមយ៉ាងសកម្មដើម្បីរារាំងកិច្ចខិតខំប្រឹងប្រែងរបស់អ៊ីរ៉ង់ ក្នុងការទិញវ៉ាក់សាំង Covid-19 តាមរយៈកម្មវិធី COVAX ដែលជាគំនិតផ្តួចផ្តើមជាសកល ធ្វើឡើងដោយអង្គការសុខភាពពិភពលោក WHO នេះបើតាមសារព័ត៌មាន Al Jazeera នៅថ្ងៃទី០៨ ខែធ្នូ ឆ្នាំ២០២០ ។ ប្រធានធនាគារកណ្តាលអ៊ីរ៉ង់លោក Abdolnasser Hemmati នៅថ្ងៃចន្ទនេះនិយាយថា វាគួរតែត្រូវបានកត់ត្រានៅក្នុងប្រវត្តិសាស្ត្រថា កិច្ចប្រឹងប្រែងរបស់អ៊ីរ៉ង់ក្នុងការទិញវ៉ាក់សាំងតាមរយៈកម្មវិធី COVAX ត្រូវបានរារាំងដោយសារតែបញ្ហាផ្ទេរប្រាក់ដែលកើតឡើងពីការដាក់ទណ្ឌកម្មរបស់អាមេរិកប្រឆាំងនឹងអ៊ីរ៉ង់ ។ ប្រធានធនាគារកណ្តាលអ៊ីរ៉ង់រូបនេះ បានបង្ហោះសារនៅលើបណ្តាញសង្គម Instagram ថា មកទល់ពេលនេះ វិធីសាស្រ្តណាក៏ដោយ ក្នុងការទូទាត់ និង ផ្ទេររូបិយប័ណ្ណដែលត្រូវការ គឺត្រូវប្រឈមនឹងឧបសគ្គដោយសារតែការដាក់ទណ្ឌកម្មអមនុស្សធម៌របស់រដ្ឋាភិបាលអាមេរិក និងតម្រូវការដើម្បីទទួលបានការអនុញ្ញាតពីការិយាល័យគ្រប់គ្រងទ្រព្យសម្បត្តិបរទេស របស់ក្រសួងរតនាគារអាមេរិក OFAC ៕
-
ជីប ម៉ុង បរិច្ចាគ ៣លានដុល្លារអាមេរិកជូនរាជរដ្ឋាភិបាលសម្រាប់ទិញវ៉ាក់សាំងការពារកូវីដ១៩
ជីប ម៉ុង បរិច្ចាគទឹកប្រាក់ចំនួន៣លានដុល្លាអាមេរិកជូនរាជរដ្ឋាភិបាលដែលមានសម្តេចតេជោ ហ៊ុន សែន ប្រមុខថ្នាក់ដឹកនាំ សម្រាប់ទិញវ៉ាក់សាំងការពារ កូវីដ១៩ ចាក់ជូន ប្រជាពល រដ្ឋដោយ ឥតគិត ថ្លៃ។ ការបរិច្ចាគនេះធ្វើឡើងបន្ទាប់ពីការប្រកាសរបស់សម្តេចតេជោ ហ៊ុន សែន ក្នុងការត្រៀម ថវិកាទិញវ៉ាក់សាំងកូវីដ១៩ក្នុងជំហានដំបូងចំនូន១លានដូសដើម្បីចាក់ជូនប្រជាពលរដ្ឋចំនួន៥០ម៉ឺននាក់។ សម្តេចតេជោ ហ៊ុន សែន បានមានប្រសាសន៍នៅក្នុងលិខិតថ្លែងអំណរជូនចំពោះក្រុមហ៊ុន ជីប ម៉ុង ថា៖« ជំនួយជាថវិកាចំនួន៣លានដុល្លារអាមេរិកសម្រាប់រាជរដ្ឋាភិបាល រកទិញវ៉ាក សាំងការ ពារជំងឺ COVID-19 នៅកាលៈទេសៈនេះពិតជាមានតម្លៃដែលពុំអាចកាត់ថ្លៃបាន។ » ជីប ម៉ុង តែងតែងរួមចំណែកជាមួយរាជរដ្ឋាភិបាលជានិច្ចជាកាល ទាន់ពេលវេលា និងគ្រប់ កាលៈ ទេសៈក្នុងការជួយសម្រួលការលំបាកនានារបស់រាជរដ្ឋាភិបាល។ ក្នុងឆ្នាំ២០២០នេះ ជីប ម៉ុង បានបរិច្ចាគជូនរាជរដ្ឋាភិបាលកម្ពុជាចំនួន៥០ម៉ឺនដុល្លារ អាមេរិកសម្រាប់ យុទ្ធនា ការ ប្រយុទ្ធ ប្រឆាំង ជំងឺ កូវីដ១៩, ៥០ម៉ឺន ដុល្លារអាមេរិក ជូន កាកបាទក្រហមកម្ពុជា, ៤០…
-
អង្គការសុខភាពពិភពលោក WHO ប្រឆាំងនឹងការចាក់វ៉ាក់សាំង Covid-19 តម្រូវដោយច្បាប់
ស្វីស៖ អង្គការសុខភាពពិភពលោក WHO នៅថ្ងៃចន្ទនេះបញ្ជាក់ថា ការព្យាយាមពន្យល់អោយប្រជាជនយល់ដឹងអំពីគុណប្រយោជន៍នៃវ៉ាក់សាំង Covid-19 នឹងមានប្រសិទ្ធភាពឆ្ងាយជាងការព្យាយាមធ្វើអោយការចាក់វ៉ាក់សាំងនេះក្លាយជាអ្វីតម្រូវដោយច្បាប់ នេះបើតាមសារព័ត៌មានរ៉យទ័រនៅថ្ងៃទី០៨ ខែធ្នូ ឆ្នាំ២០២០ ។ ជាមួយគ្នានេះ ប្រធាននាយកដ្ឋានវ៉ាក់សាំងរបស់អង្គការ WHO លោកស្រី កេត អូប្រាយអ៊ឹន បានប្រាប់ក្នុងសន្និសីទកាសែតមួយថា ខ្ញុំអត់គិតថា ការតំរូវដោយច្បាប់ ក្នុងការធ្វើដូច្នេះ ជាទិសដៅត្រូវអនុវត្តនៅទីនេះទេ… ជាការល្អ ត្រូវមានការលើកទឹកចិត្ត និងជួយសម្រួលអោយមានការប្រើវា ជាជាងការចាប់បង្ខំ ។ បន្ថែមលើនេះ អង្គការសុខភាពពិភពលោក WHO ក៏បានបញ្ជាក់ដែរថា វាជាការសំរេចចិត្ត និងការទទួលខុសត្រូវរបស់សាម៉ីប្រទេស ថាតើពួកគេនឹងធ្វើយុទ្ធនាការចាក់វ៉ាក់សាំងប្រឆាំងនឹងជំងឺ Covid-19 ដោយរបៀបណា ។ តែទីភ្នាក់ងារសុខភាពរបស់អង្គការសហប្រជាជាតិមួយនេះ នៅតែនិយាយថា ការតំរូវដោយច្បាប់ថា ត្រូវតែចាក់វ៉ាក់សាំង Covid-19 គឺជាផ្លូវដើរខុសឆ្គងមួយ ។ តួយ៉ាងកាលពីអតីតកាល ការចាប់បង្ខំអោយចាក់វ៉ាក់សាំងបាននាំមកនូវប្រតិកម្ម គឺការប្រឆាំងជំទាស់កាន់តែខ្លាំងឡើង ៕
-
សមាគម ៣ ពាក់ព័ន្ធនឹងវិស័យធនាគារ និងហិរញ្ញវត្ថុនៅកម្ពុជា លើកទឹកចិត្តដល់សាធារណជន ទាំងអស់ឱ្យធ្វើការទូទាត់ប្រាក់តាមបប្រព័ន្ធអេឡិចត្រូនិកដើម្បីចូលរួមទប់ស្កាត់ការរីករាលដាលជំងឺកូវីដ-១៩
យោងតាមសសេចក្ដីថ្លែងការណ៍រួម នៅថ្ងៃសទី៨ធ្នូឆ្នាំ២០២០ សមាគមមីក្រូហិរញ្ញវត្ថុកម្ពុជា(CMA) សមាគមធនាគារនៅកម្ពុជា(ABC) និងសមាគមសហព័ន្ធហិរញ្ញវត្ថុ និងបច្ចេកវិទ្យាកម្ពុជា(CAFT) បានចេញសេចក្តីថ្លែងការណ៍រួម លើកទឹកចិត្តដល់សាធារណជន អតិថិជន និងអាជីវករទាំងអស់ឱ្យធ្វើការទូទាត់តាមប្រព័ន្ធ អេឡិចត្រូនិក ដែលផ្តល់ដោយគ្រឹះស្ថានធនាគារ និងហិរញ្ញវត្ថុ ដើម្បីចូលរួមទប់ស្កាត់ការរីករាលដាលជំងឺកូវីដ១៩ក្នុងប្រទេសកម្ពុជា៕កឹម ទៀង
-
អ្នកឆ្លង COVID-19 នៅទូទាំងពិភពលោកកើនឡើងជិត៦៨លាននាក់ ក្នុងនោះស្លាប់ជិត១លាន៥៥ម៉ឺននាក់ និងជាសះស្បើយជិត៤៧លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦៧លាន៩២ម៉ឺន៧ពាន់៨១៩ករណី ក្នុងនោះមានអ្នកជម្ងឺសរុបចំនួន១លាន៥៤ម៉ឺន៩ពាន់៨០៧នាក់ស្លាប់ និង ជាសះស្បើយឡើងវិញសរុបចំនួន៤៦លាន៩៩ម៉ឺន៩ពាន់៣៦១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៨ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៥លាន៣៦ម៉ឺន៩ពាន់៤៦នាក់ ស្លាប់ចំនួន២៩ម៉ឺន៤៤៣នាក់ និងជាសះស្បើយចំនួន៨លាន៩៨ម៉ឺន២ពាន់២៤៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៧០ម៉ឺន៣ពាន់៩០៨នាក់ ស្លាប់ចំនួន១៤ម៉ឺន៩៩៤នាក់ និងជាសះស្បើយ៩លាន១៧ម៉ឺន៧ពាន់៦៤៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៦២ម៉ឺន៨ពាន់៦៥នាក់ ស្លាប់១៧ម៉ឺន៧ពាន់៣៨៨នាក់ និងជាសះស្បើយ៥លាន៨០ម៉ឺន១ពាន់៦៧នាក់ ៕
-
នាយឧត្តមសេនីយ៍ សៅ សុខា បើកកិច្ចប្រជុំត្រួតពិនិត្យការអនុវត្តបទបញ្ជារបស់រាជរដ្ឋាភិបាល ក្នុងការទប់ស្កាត់និងបង្ក្រាបបទល្មើសធនធានធម្មជាតិ
ភ្នំពេញ៖ ព្រឹកថ្ងៃទី០៨ ខែធ្នូ ឆ្នាំ២០២០ នៅបញ្ជាការដ្ឋានកងរាជអាវុធហត្ថលើផ្ទៃប្រទេស ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ បានបើកកិច្ចប្រជុំត្រួតពិនិត្យការអនុវត្តបទបញ្ជារបស់រាជរដ្ឋាភិបាល ដើម្បីទប់ស្កាត់និងបង្ក្រាបបទល្មើសធនធានធម្មជាតិ។ ដំណើរការកិច្ចប្រជុំនេះ ប្រើប្រាស់តាមមធ្យោបាយប្រព័ន្ធសន្និសីទវីដេអូ និងតាមប្រព័ន្ធ ZOOM ពីបញ្ជាការដ្ឋានកងរាជអាវុធហត្ថលើផ្ទៃប្រទេស ទៅកាន់បណ្តាបញ្ជាការដ្ឋានកងរាជអាវុធហត្ថខេត្តចំនួន២៤ខេត្ត។ អនុវត្តតាមសេចក្តីសម្រេចរបស់រាជរដ្ឋាភិបាលលេខៈ១២៧ ស.ស.រ. ចុះថ្ងៃទី០៧ ខែធ្នូ ឆ្នាំ២០១៦ ស្តីពីការបង្កើតគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ។ គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បន្តធ្វើការអប់រំផ្សព្វផ្សាយច្បាប់ បទដ្ឋានគតិយុត្ត បទបញ្ជាពាក់ព័ន្ធនឹងធនធានធម្មជាតិ ជាមួយគ្នានោះបានពង្រឹងយន្តការថ្នាក់រាជធានី ខេត្ត ប្រើប្រាស់កម្លាំងសរុបរបស់គណៈបញ្ជាការឯកភាពរដ្ឋបាលរាជធានី ខេត្ត ស្រុក ក្រុង ខណ្ឌ ធ្វើការទប់ស្កាត់ និងបង្ក្រាបការកាប់ព្រៃឈើ ការដឹកឈើ ការនាំចេញឈើខុសច្បាប់ ការចាប់សត្វព្រៃ ការនាំចេញសត្វព្រៃខុសច្បាប់ ការកាប់រានទន្ទ្រានយកដីរដ្ឋ និងការរុករករ៉ែដោយខុសច្បាប់។ គណៈកម្មការជាតិ បានបន្តអនុវត្តនូវភារកិច្ច ដោយបានដាក់ចេញនូវវិធានការម៉ឺងមាត់ ធ្វើការទប់ស្កាត់ និងបង្ក្រាបបទល្មើសធនធានធម្មជាតិ៕
-
ប្រជាពលរដ្ឋ មកធ្វើតេស្តរកកូវីដ១៩លើកទី២ នៅពហុកីឡដ្ឋានស្តាតអូឡាំពិក
-
គិតមកដល់ម៉ោង៩ព្រឹកថ្ងៃទី៨ធ្នូឆ្នាំ២០២០ សប្បុរសជនបានចូលថវិកាជាង១៨លានដុល្លារហើយ សម្រាប់ចូលរួមជាមួយរាជរដ្ឋាភិបាលក្នុងការត្រៀមទិញវ៉ាក់សាំងការពារជំងឺកូវីដ-១៩
សម្ដេចតេជោ ហ៊ុន សែន នៅលើទំព័រហ្វេសប៊ុក នៅព្រឹកនេះ បានសរសេរថា បន្ទាប់ពីខ្ញុំព្រះករុណាខ្ញុំបានប្រកាសពីការទិញវ៉ាក់សាំងការពារកូវីដ១៩មក មានចលនាគាំទ្រយ៉ាងធំធេងទាំងតាមផ្លូវចិត្ត និងទាំងតាមការផ្តល់ថវិកាដែលខ្ញុំព្រះករុណាខ្ញុំចាត់ទុកថានេះជា (ខឿនការពារសុខភាពរបស់ប្រជាជន) បន្ទាប់ពីខឿនការពារជាតិរបស់ប្រជាជននាឆ្នាំ២០០៨ ដល់ឆ្នាំ២០១១។ សម្ដេចបានបន្តថា សរុបថវិកាដែលសប្បុរសជនចូលរួមរហូតពេលនេះមានជាង១៨លានដុល្លារអាមេរិកដែលបញ្ជីឈ្មោះមានផ្សាយលើកញ្ចក់ទូរទស្សន៍ជាតិ និងបណ្តាញផ្សព្វផ្សាយរបស់ Fresh news ព្រមជាមួយបណ្តាញផ្សព្វផ្សាយផ្សេងទៀត។ នៅមានព្រះសង្ឃ និងប្រជាពលរដ្ឋជាច្រើនទៀតដែលចង់ចូលរួម ប៉ុន្កែមិនដឹងថាចូលនៅកន្លែងណា និងតាមរបៀបណា? ខ្ញុំព្រះករុណាខ្ញុំបានចាត់ចែងតាមច្រកពីរគឺ៖១.ចូលតាមរយៈលោក សេង ទៀង រដ្ឋលេខាធិការទីស្តីការគណរដ្ឋមន្ត្រីដែលមានលេខទូរស័ព្វ 012 961971 ប្រចាំការទទួលនៅទីស្តីការគណៈរដ្ឋមន្ត្រី។ ២.តាមរយៈធានាគារ ABA លេខគណនេយ្យ (001249176) Tep Sothy ។ខ្ញុំព្រះករុណាខ្ញុំសូមទូលប្រគេន និងជំរាបជូនថាក្នុងករណីយមានការផ្ទេរតាមធានាគារនេះ សូមកុំភ្លេចដាក់ឈ្មោះនិងទីកន្លែងរស់នៅឱ្យបានត្រឹមត្រូវ ដើម្បីឱ្យខ្ញុំព្រះករុណាខ្ញុំបានធ្វើលិខិតថ្លែងអំណរគុណចំឈ្មោះពិតប្រាកដ។ខ្ញុំព្រះករុណាសូមថ្លែងអំណរគុណយ៉ាងជ្រាលជ្រៅចំពោះការគាំទ្ររបស់ព្រះសង្ឃ និងបងប្អូនជនរួមជាតិក្នុងចលនាប្រយុទ្ធប្រឆាំងជាមួយកូវីដ១៩ ដែលខ្ញុំព្រះករុណាចាត់ទុកថាជា (ខឿនការពារសុខភាពរបស់ប្រជាជន)៕ កឹម ទៀង