-
ក្រុមហ៊ុនឱសថអាមេរិក Pfizer ដាក់ពាក្យស្នើសុំការចាក់វ៉ាក់សាំង Covid-19 បន្ទាន់នៅឥណ្ឌា
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី០៧ ខែធ្នូនេះថា ក្រុមហ៊ុនឱសថ ភីហ្វីហ្សឺ របស់សហរដ្ឋអាមេរិកបានដាក់ពាក្យស្នើសុំការប្រើប្រាស់បន្ទាន់ នូវវ៉ាក់សាំង COVID-19 របស់ខ្លួនក្នុងប្រទេសឥណ្ឌា នេះបើតាមមន្រ្តីជាន់ខ្ពស់មួយរូបរបស់រដ្ឋាភិបាលឥណ្ឌា ។ ទីប្រឹក្សារដ្ឋាភិបាលឥណ្ឌាទទួលបន្ទុកកម្មវិធីវ៉ាក់សាក់ COVID-19 លោក វីខេ ផូល បានបញ្ជាក់នៅក្នុងបទសម្ភាសន៍តាមកញ្ចក់ទូរទស្សន៍ឥណ្ឌា NDTV នាពេលថ្មីៗនេះថា យើងស្វាគមន៍ចំណាប់អារម្មណ៍របស់ក្រុមហ៊ុនឱសថ ភីហ្វីហ្សឺ ដែលចង់បានអាជ្ញាប័ណ្ណប្រើប្រាស់បន្ទាន់ក្នុងប្រទេសរបស់យើង ។ លោក វីខេ ផូល បានសង្កត់ធ្ងន់ទៀតថា ជាធម្មតាឥណ្ឌាត្រូវការពេល៩០ថ្ងៃ ដើម្បីធ្វើការសម្រេចចិត្តលើការស្នើសុំបែបនេះ ប៉ុន្តែការសម្រេចចិត្តលើវ៉ាក់សាំងរបស់ ភីហ្វីហ្សឺ អាចនឹងធ្វើឡើងលឿនជាងនេះ ។ យ៉ាងណាមិញ រដ្ឋមន្រ្តីសុខាភិបាលឥណ្ឌាមិនបានធ្វើការឆ្លើយតបណាមួយ ជុំវិញនឹងសំណើខាងលើនេះរបស់ក្រុមហ៊ុនឱសថ ភីហ្វីហ្សឺ នោះទេ ខណៈដែលមន្រ្តីរបស់ ភីហ្វីហ្សឺ ប្រចាំប្រទេសឥណ្ឌា ក៏មិនទាន់បញ្ចេញប្រតិកម្មភ្លាមៗនោះដែរ ៕
-
លោក មូន ចេអ៊ីន បញ្ជាអោយបង្កើនការធ្វើតេស្តរក Covid-19 ក្នុងគ្រាដែលប្រទេសខ្លួនប្រឈមនឹងការផ្ទុះរលកទី៣
កូរ៉េខាងត្បូង៖ ប្រធានាធិបតីកូរ៉េខាងត្បូងលោក មូន ចេអ៊ីន នៅថ្ងៃចន្ទនេះ អំពាវនាវអោយបង្កើនការធ្វើតេស្តរក Covid-19 និងការតាមដានយ៉ាងហ្មត់ចត់បន្ថែមទៀត ស្របពេលប្រទេសនេះព្យាយាមគ្រប់គ្រងរលកនៃការឆ្លងចុងក្រោយបង្អស់ និង ធំបំផុតរបស់ខ្លួន នេះបើតាមសារព័ត៌មានរ៉យទ័រចុះផ្សាយនៅថ្ងៃទី០៧ ខែធ្នូ ឆ្នាំ២០២០ ។ អ្នកនាំពាក្យរបស់វិមានខៀវលោក ជុង ម៉ាន់ហូ បានថ្លែងក្នុងសន្និសីទសារព័ត៌មានមួយថា លោក មូន បានបញ្ជាអោយរដ្ឋាភិបាលប្រើគ្រប់ធនធានទាំងអស់ ដើម្បីទប់ស្កាត់ការឆ្លងរាតត្បាត Covid-19 និងអំពាវនាវអោយបង្កើនការធ្វើតេស្តបន្ថែមទៀត តាមរយៈការកៀគរយោធា និង មនុស្សមកពីសេវាសាធារណៈ ។ អ្នកនាំពាក្យរបស់វិមានខៀវរូបនេះបន្ថែមទៀតថា លោក មូន ក៏បានបញ្ជាក់ផងដែរថា កន្លែងធ្វើតេស្តគួរតែមានរយៈពេលច្រើនម៉ោង ដើម្បីអនុញ្ញាតឱ្យអ្នកធ្វើការអាចចូលមកធ្វើតេស្តបានងាយស្រួល ហើយកន្លែងធ្វើតេស្តចល័តតាមដងផ្លូវគួរតែបង្កើតឡើងអោយបានច្រើនបន្ថែមទៀត ។ បើតាមទីភ្នាក់ងារត្រួតពិនិត្យ និងបង្ការជំងឺកូរ៉េខាងត្បូង កូរ៉េខាងត្បូងបានរាយការណ៍ពីអ្នកឆ្លងជំងឺ Covid-19 ថ្មីៗចំនួន៦១៥ករណី នៅថ្ងៃចន្ទនេះ ពោលគឺវាមានរយៈពេល១ខែគត់ ដែលប្រទេសមួយនេះបានរាយការណ៍ករណីឆ្លងប្រចាំថ្ងៃ ៣ខ្ទង់មិនធ្លាប់មានក្នុងរយៈពេល០៩ខែមកនេះ ៕
-
ជប៉ុនត្រៀមបញ្ជូនគិលានុបដ្ឋាយិកាយោធាទៅកាន់តំបន់រងគ្រោះធ្ងន់ធ្ងរដោយសារ Covid-19
ជប៉ុន៖ ជប៉ុនបាននិងកំពុងត្រៀមបញ្ជូនគិលានុបដ្ឋាយិកាមកពីកងកម្លាំងស្វ័យការ ពារខ្លួនទៅកាន់កោះអូសាកា និង ហុកកៃដូដើម្បីជួយព្យាបាល ចំពេលមានការកើនឡើងករណីឆ្លងវីរុសកូរ៉ូណា បន្ទាប់ពីមានសំណើពីសំណាក់រដ្ឋាភិបាលដីកោះទាំងពីរ នេះបើតាមអ្នកនាំពាក្យប្រមុខរដ្ឋាភិបាលជប៉ុនលោក កាស៊ុណូប៊ុ កាតុ ចុះផ្សាយដោយសារព័ត៌មាន AP នៅថ្ងៃទី០៧ ខែធ្នូ ឆ្នាំ២០២០ ។ សារព័ត៌មានជប៉ុន ក្យូដូ បានរាយការណ៍ថា កោះ ហុកកៃដូ ភាគខាងជើងជប៉ុនបាននិងកំពុងមានផែនការស្នើសុំរដ្ឋាភិបាល អោយបញ្ជូនគិលានុបដ្ឋាយិកាមកពីកងកម្លាំងស្វ័យការពារខ្លួនដើម្បីជួយព្យាបាល ខណៈដែលដីកោះមួយនេះបានមើលឃើញពីការកើនឡើងអ្នកឆ្លងវីរុសនៅឯមន្ទីរពេទ្យចំនួន០២កន្លែង ។ បើតាមសារព័ត៌មានជប៉ុន NHK កោះ អូសាកា ភាគខាងលិចជប៉ុនវិញ រដ្ឋាភិបាលក្នុងតំបន់បានបញ្ជាក់នៅថ្ងៃអាទិត្យសប្តាហ៍មុននេះថា ករណីឆ្លង Covid-19 ប្រចាំថ្ងៃកើនឡើងប្រមាណ៣០០ករណីនៅក្នុងរយៈពេល០៦ថ្ងៃមកនេះ ។ សូមបញ្ជាក់ថា គិតត្រឹមថ្ងៃទី០៧ ខែធ្នូនេះថា នៅទូទាំងប្រទេសជប៉ុនមានអ្នកឆ្លង Covid-19 សរុប១៦ម៉ឺន៩៨ករណី ក្នុងនោះមានអ្នកស្លាប់សរុប២ពាន់៣១៥នាក់ និងអ្នកជាសះស្បើយឡើងវិញសរុប១៣ម៉ឺន៥ពាន់២៧៧នាក់ ៕
-
មីយ៉ាន់ម៉ារកឃើញអ្នកឆ្លង Covid-19 ថ្មីចំនួន១.១០៨ករណី និង២៩នាក់ទៀតស្លាប់ នៅក្នុងរបាយការណ៍ប្រចាំថ្ងៃអាទិត្យសប្តាហ៍មុននេះ
មីយ៉ាន់ម៉ា៖ អាជ្ញាធរសុខាភិបាលមីយ៉ាន់ម៉ាបានរាយការណ៍ពីអ្នកឆ្លងជំងឺ Covid-19 ថ្មីៗចំនួន១.១០៨ករណីនៅក្នុងរបាយការណ៍ប្រចាំថ្ងៃអាទិត្យសប្តាហ៍មុននេះ ធ្វើអោយតួលេខអ្នកឆ្លងសរុបនៅទូទាំងប្រទេសកើនដល់៩ម៉ឺន៩ពាន់១៥៥ករណី នេះបើតាមសេចក្តីថ្លែងការណ៍របស់ក្រសួងសុខាភិបាល និងកីឡាមីយ៉ាន់ម៉ា ចុះផ្សាយដោយសារព័ត៌មានស៊ីនហួរនៅថ្ងៃទី០៧ ខែធ្នូ ឆ្នាំ២០២០ ។ សេចក្តីថ្លែងការណ៍ដដែលបានអោយដឹងទៀតថា អ្នកជំងឺចំនួន២៩នាក់បន្ថែមទៀតត្រូវបានរាយការណ៍ថា បានបាត់បង់ជីវិតនៅក្នុងថ្ងៃអាទិត្យម្សិលមិញនេះ នាំអោយតួលេខអ្នកជំងឺស្លាប់សរុបកើនដល់២ពាន់១១០នាក់ ។ បើតាមរបាយការណ៍របស់ក្រសួងសុខាភិបាល និងកីឡាមីយ៉ាន់ម៉ា អ្នកជំងឺ Covid-19 សរុប៧ម៉ឺន៧ពាន់៦៣៦នាក់ហើយបានជាសះស្បើយឡើងវិញ និងបានអនុញ្ញាតអោយចេញពីមន្ទីរពេទ្យ ។ ដោយឡែកមនុស្សសរុប១លាន២៨ម៉ឺន៨ពាន់៣៦៥នាក់ផ្សេងទៀតក៏ត្រូវបានធ្វើតេស្តរក Covid-19 ផងដែរ ៕
-
អគារកាណាឌីយ៉ាទាំងមូលនឹងត្រូវបិទរហូតដល់ថ្ងៃ១៧ធ្នូ ឆ្នាំ២០២០
យោងតាមលិខិតដែលចុះហត្ថលេខាដោយរដ្ឋមន្ត្រីក្រសួងសុខាភិបាលលោកសាស្ត្រាចារ្យ ម៉ម ប៊ុនហេង ជូនដំណឹងដល់អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលធនាគារកាណាឌីយ៉ា នៅថ្ងៃទី៧ធ្នូឆ្នាំ២០២០ នេះបានឲ្យដឹងថា ដោយសារបុគ្គលិកធនាគារចិនម្នាក់មានវិជ្ជមានវីរុសកូវីដ-១៩ ហើយបានប្រើប្រាស់ជណ្ដើរយន្តរួមគ្នានៅអគារកាណាឌីយ៉ា ដូច្នេះត្រូវបិទអគាកាណាឌីយ៉ាទាំងមូលបន្តទៀតរយៈពេល១៤ថ្ងៃ ចាប់ពីថ្ងៃទី៣ធ្នូដល់ថ្ងៃ១៧ធ្នូឆ្នាំ២០២០។ ក្រសួងសុខាភិបាលក៏រំលឹកឲ្យបុគ្គលិកដែលធ្វើការនៅអគារកាណាឌីយ៉ាទាំងអស់ ត្រូវមកធ្វើតេស្ដជាលើកទី២នៅថ្ងៃ១៣ធ្នូ និងលើកទី៣ នៅថ្ងៃ១៧ធ្នូឆ្នាំ២០២០។ អគារកាណាឌីយ៉ាត្រូវបានក្រសួងសុខាភិបាលបិទជាបណ្ដោះអាសន្ននៅថ្ងៃទី៣ធ្នូ បន្ទាប់ពីបានរកឃើញវីរុសកូវីដ-១៩លើបុរសជនជាតិខ្មែរអាយុ២៣ឆ្នាំ មានអាសយដ្ឋាននៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិលធនាគារចិន ស្ថិតក្នុងអគារកាណាឌីយ៉ា។ បុរសនោះ ត្រូវគេរាយការណ៍ថា ធ្លាប់បានប៉ះពាល់ផ្ទាល់ជាមួយស្ត្រីអាយុ៣៦ឆ្នាំម្នាក់ ដែលបានរកឃើញថាបានឆ្លងរុសកូវីដ-១៩នៅថ្ងៃ២៩វិច្ឆិកាឆ្នាំ២០២០៕
-
រដ្ឋបាលខណ្ឌចំការមន ធ្វើយុទ្ធនាការផ្សព្វផ្សាយអំពីវិធានការណែនាំ និងការពារជំងឺកូវីដ-១៩ ដល់ប្រជាពលរដ្ឋនៅក្នុងមូលដ្ឋាន
ភ្នំពេញ៖ រដ្ឋបាលខណ្ឌចំការមន ធ្វើយុទ្ធនាការផ្សព្វផ្សាយអំពីវិធានការណ៍ណែនាំ និងការពារជំងឺកូវីដ-១៩ ដល់ប្រជាពលរដ្ឋក្នុងមូលដ្ឋាន នៅព្រឹកថ្ងៃទី០៧ ខែធ្នូ ឆ្នាំ២០២០ បន្ទាប់ពីទទួលបាននូវបទបញ្ជាណែនាំរបស់ឯកឧត្តម ឃួង ស្រេង អភិបាលរាជធានីភ្នំពេញ ដែលបានដាក់បញ្ជាឱ្យរដ្ឋបាលខណ្ឌទាំង១៤ គោរពទៅតាមការណែនាំទាំង១០ចំណុច ដែលបានដាក់ចេញ កាលពីពេលកន្លងមក ជាពិសេស អនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្ដេច បានផ្ញើសារផ្តល់ការណែនាំដល់ប្រជាពលរដ្ឋឱ្យមានការប្រុងប្រយ័ត្នខ្ពស់ និងរួមគ្នាប្រយុទ្ធប្រឆាំងការរីករាលដាលនៃជំងឺកូវីដ-១៩ នៅក្នុងសហគមន៍ ក្រោយព្រឹត្តិការណ៍សហគមន៍ ២៨វិច្ឆកាមកនោះ គេឃើញរដ្ឋបាលខណ្ឌទាំង១៤ ក្នុងរាជធានីភ្នំពេញ បាន បើកយុទ្ធនាការផ្សព្វផ្សាយយ៉ាងគគ្រឹកគ្រេង ។ អនុវត្តន៍តាមបទបញ្ជា និង អនុសាសន៍ខាងលើនេះ រដ្ឋបាលខណ្ឌចំការមន បានប្រុងប្រៀបរៀបចំចាត់ចែងកម្លាំងតាំងពីព្រឹកព្រលឹម ហើយបានបើកយុទ្ធនាការបន្តផ្សព្វផ្សាយអំពីវិធាននានារបស់ក្រសួងសុខាភិបាល និងបទបញ្ជាទាំង១០ចំណុច របស់រដ្ឋបាលរាជធានីភ្នំពេញ ជាពិសេសអនុសាសន៍ដឹកនាំដ៏ខ្ពង់ខ្ពស់បំផុតរបស់ សម្តេចតេជោ នាយករដ្ឋមន្ត្រី នៃកម្ពុជា ក្នុងការទប់ស្កាត់ការឆ្លងមេរោគកូវីដ-១៩ នៅក្នុងសហគមន៍រាជធានីភ្នំពេញ ដើម្បីធ្វើយ៉ាងណាទប់ស្កាត់ការរីករាលដាលជំងឺកូវីដ១៩ ខណៈដែលជំងឺនេះ បាននឹងកំពុងរីករាលដាលចូលសហគមន៍ជាច្រើននៅភ្នំពេញ។ មុនពេលចេញក្បួនយុទ្ធនាការផ្សព្វផ្សាយនេះ លោក ថេង សុថុល អភិបាលខណ្ឌចំការមន…
-
សម្តេចក្រឡាហោម ស ខេង អំពាវនាវឱ្យមន្រ្តី និងអ្នកពាក់ព័ន្ធដែលចូលទីស្តីការគណៈរដ្ឋមន្រ្តីទៅពិនិត្យសំណាក់១០០%
សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃតាមរយៈសារជាសំឡេងនៅថ្ងៃទី០៦ខែធ្នូបានអំពាវនាវសារជាថ្មីឱ្យថ្នាក់ដឹកនាំក្រសួងមហាផ្ទៃមន្រ្តី និងអ្នកពាក់ព័ន្ធទាំងអស់ឱ្យទៅធ្វើតេស្តរកវីរុសកូវីដ១៩ទាំងអ្នកដែលបានធ្វើតេស្តរួចម្តងហើយ និងអ្នកមិនបានធ្វើតេស្តត្រូវតែទៅធ្វើតេស្តម្តងទៀតនៅថ្ងៃទី០៧ធ្នូនេះនៅទីស្តីការក្រសួងមហាផ្ទៃដើម្បីពិនិត្យបញ្ជាក់និងកាត់ផ្តាច់ខ្សែចម្លងទៅក្នុងសហគមន៍។ ការអំពាវនាវតាមបណ្តាញទំនាក់ទំនងសង្គមរបស់សម្តេចក្រឡាហោម ស ខេង នៅពេលនេះបានធ្វើឡើងបន្ទាប់ពីមន្ត្រីរាជការក្រសួងមហាផ្ទៃមួយចំនួនរួមទាំងអ្នកពាក់ព័ន្ធផ្សេងទៀតបានឆ្លងកូវីដ១៩តៗគ្នាបែបសហគមន៍ដែលបញ្ហានេះបានផ្ទុះឡើងកាលពីថ្ងៃទី២៨ខែវិច្ឆិកាកន្លងទៅ។ សម្រាប់ពេលនេះអ្នកឆ្លង និងអ្នកពាក់ព័ន្ធដោយផ្ទាល់និងដោយប្រយោលជាច្រើននាក់កំពុងធ្វើចត្តាឡីស័កនៅតាមទីកន្លែងសុវត្ថិភាព និងតាមលំនៅដ្ឋានរៀងៗខ្លួន៕ដោយ៖ អ៊ិត រ៉ាវុធ
-
ទីបំផុតឥណ្ឌូណេស៊ីទទួលបានវ៉ាក់សាំង Covid-19 ដំបូងចំនួន១.២លានដូសពីក្រុមហ៊ុនផលិតឱសថ ស៊ីណូវ៉ាក់ របស់ចិន
ឥណ្ឌូនេស៊ី៖ សារព័ត៌មានរ៉យទ័រចុះផ្សាយនៅថ្ងៃ០៧ ខែធ្នូនេះថា ឥណ្ឌូណេស៊ីបានទទួលវ៉ាក់សាំងការពារ COVID-19 ដំបូង ដែលដឹកតាមកប៉ាល់ពីប្រទេសចិនហើយ នៅថ្ងៃអាទិត្យសប្តាហ៍មុននេះ ។ ប្រធានាធិបតីឥណ្ឌូណេស៊ីលោក ចូកូ វីដូដូ ក៏បានធ្វើសេចក្តីប្រកាសមួយតាមប្រព័ន្ធអនឡាញដែរថា ឥប្រទេសរបស់លោកបានទទួលវ៉ាក់សាំងកូវីដ-១៩ ជាលើកដំបូងចំនួន១.២លានដូសពីក្រុមហ៊ុនចិន ស៊ីណូវ៉ាក់ (Sinovac Biotech) ដែលវ៉ាក់សាំងប្រភេទនេះ ឥណ្ឌូណេស៊ីធ្លាប់ទទួកយកមកធ្វើតេស្តទ្រង់ទ្រាយធំកាលពីខែសីហាកន្លងទៅនេះ។ ប្រធានាធិបតីឥណ្ឌូណេស៊ីរូបនេះ បានសង្កត់ធ្ងន់ថា ប្រទេសរបស់លោកនឹងត្រៀមទទួលវ៉ាក់សាំងដដែលនេះ ចំនួន១.៨លានដូសទៀតនៅដើមខែមករា ឆ្នាំ២០២១ ហើយថា នៅពេលដែលយើងសម្រេចថានឹងប្រើវាបាន នោះយើងអាចចាប់ផ្តើមចាក់វ៉ាក់សាំង ហើយអ្វីគ្រប់ៗយ៉ាងនឹងត្រូវត្រៀមអោយរួចរាល់ ៕
-
ក្រុមហ៊ុនឱសថចិន Sinovac វិនិយោគ៥១៥លានដុល្លារ ដើម្បីជំរុញផលិតកម្មផលិតវ៉ាក់សាំង Covid-19
ចិន៖ ក្រុមហ៊ុនផលិតឱសថចិន ស៊ីណូវ៉ាក់ បាយអូធិច បានផ្តល់ប្រាក់៥១៥លានដុល្លារដល់ក្រុមហ៊ុនក្នុងស្រុកមួយ ដើម្បីបង្កើនសមត្ថភាពផលិតវ៉ាក់សាំង Covid-19 ខណៈក្រុមហ៊ុននេះត្រូវបានគេរំពឹងថា នឹងបញ្ចេញចាក់អោយសាធារណៈជនទូទៅក្នុងខែធ្នូនេះតែម្តង នេះបើតាមសាររ៉យទ័រនៅថ្ងៃទី០៧ ខែធ្នូ ឆ្នាំ២០២០ ។ ជាមួយគ្នានេះ ក្រុមហ៊ុន Sino Biopharmaceutical របស់ចិនបានបញ្ជាក់នៅថ្ងៃចន្ទនេះថា អង្គភាពធុរកិច្ចមួយនឹងវិនិយោគប្រាក់៥១៥លានដុល្លារទៅក្នុងក្រុមហ៊ុន Sinovac Life Sciences ដែលជាសាខាមួយរបស់ក្រុមហ៊ុនផលិតឱសថ Sinovacដើម្បីជួយអភិវឌ្ឍ និងផលិតវ៉ាក់សាំង CoronaVac ។ បើតាម Sinovac Biotech ខ្លួនរំពឹងថា នឹងផលិតវ៉ាក់សាំង Covid-19 ចំនួន៣០០លានដូសក្នុងមួយឆ្នាំ និងមានបំណងសង់បញ្ចប់រោងចក្រផលិតវ៉ាក់សាំងទី២នៅយ៉ាងយូរត្រឹមចុងឆ្នាំ២០២០ខាងមុខ ដើម្បីបង្កើនផលិតកម្មវ៉ាក់សាំងប្រចាំឆ្នាំអោយដល់៦០០លានដូស ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៦៧លាននាក់ ក្នុងនោះស្លាប់ជាង១លាន៥៤ម៉ឺននាក់ និងជាសះស្បើយជាង៤៦លាន៥៧ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦៧លាន៣៨ម៉ឺន៥ពាន់២៨៥ករណី ក្នុងនោះមានអ្នកជម្ងឺសរុបចំនួន១លាន៥៤ម៉ឺន១ពាន់៦៣៨នាក់ស្លាប់ និង ជាសះស្បើយឡើងវិញសរុបចំនួន៤៦លាន៥៧ម៉ឺន៨ពាន់៨៩៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៧ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៥លាន១៥ម៉ឺន៩ពាន់៥២៩នាក់ ស្លាប់ចំនួន២៨ម៉ឺន៨ពាន់៩០៦នាក់ និងជាសះស្បើយចំនួន៨លាន៨៥ម៉ឺន៥ពាន់៥៩៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៦៧ម៉ឺន៦ពាន់៨០១នាក់ ស្លាប់ចំនួន១៤ម៉ឺន៥៩០នាក់ និងជាសះស្បើយ៩លាន១៣ម៉ឺន៨ពាន់១៧១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៦០ម៉ឺន៣ពាន់៥៤០នាក់ ស្លាប់១៧ម៉ឺន៦ពាន់៩៦២នាក់ និងជាសះស្បើយ៥លាន៧៧ម៉ឺន៦ពាន់១៨២នាក់ ៕