-
ក្រុមហ៊ុនផលិតឱសថចិន CNBG ដាក់ពាក្យសុំការអនុញ្ញាតដើម្បីនាំវ៉ាក់សាំង Covid-19 របស់ខ្លួនទៅកាន់ទីផ្សារ
ចិន៖ ក្រុមហ៊ុនផលិតឱសថ CNBG បានដាក់ពាក្យសុំការអនុញ្ញាតទៅកាន់និយ័តករចិន ដើម្បីនាំវ៉ាក់សាំង Covid-19 របស់ខ្លួនទៅកាន់ទីផ្សារអោយបានមុន ឬស្មើការចេញប្រើវ៉ាក់សាំងរបស់គូប្រជែងមកពីបស្ចិមប្រទេស នៅពេលការសាកល្បងអំពីប្រសិទ្ធភាពរបស់វ៉ាក់សាំងមួយចំនួន ឈានដល់ដំណាក់កាលចុងក្រោយ នេះបើតាមសារព័ត៌មាន CGTN នៅថ្ងៃទី២៦ ខែវិច្ឆិកា ឆ្នាំ២០២០ ។ ពាក្យសុំនេះ ទំនងជាមានបញ្ចូលទៅជាមួយនូវទិន្នន័យបានមកពីការសាកពិសោធន៍លើមនុស្សនៅដំណាក់កាលទី៣របស់ក្រុមហ៊ុន ដែលធ្វើឡើងនៅមជ្ឈិមបូព៌ា និងអាមេរិកខាងត្បូង ។ បើតាមក្រុមហ៊ុន CNBG ខ្លួនមិនទទួលបានរបាយការណ៍អំពីប្រតិកម្មវ៉ាក់សាំងអាក្រក់ខ្លាំង លើអ្នកស្ម័គ្រចិត្តចាក់វ៉ាក់សាំងរបស់ខ្លួននោះទេ ។ សូមជម្រាបថា CNBG អាចនឹងក្លាយក្រុមហ៊ុនផលិតវ៉ាក់សាំងដំបូងគេ ក្រៅពីរុស្ស៊ី ដែលវ៉ាក់សាំង Covid-19 របស់ខ្លួន នឹងត្រូវយកទៅចាក់សំរាប់សាធារណៈជនទូទៅ ដែលនេះបង្ហាញពីការប្តេជ្ញាចិត្តរបស់ចិន ក្នុងការដើរតួនាទីធំមួយសំរាប់ការចែកចាយវ៉ាក់សាំងទៅកាន់ប្រទេសនានានៅជុំវិញពិភពលោក ៕
-
ថៃគ្រោងចុះកិច្ចព្រមព្រៀងទិញវ៉ាក់សាំង Covid-19 តម្លៃ៦ពាន់លានដុល្លារពីក្រុមហ៊ុន AstraZeneca នៅថ្ងៃសុក្រសប្តាហ៍នេះ
ថៃ៖ សារព័ត៌មានបាងកកប៉ុស្តិ៍ចុះផ្សាយនៅថ្ងៃពុធនេះថា វិទ្យាស្ថានវ៉ាក់សាំងជាតិនឹងចុះហត្ថលេខាលើកិច្ចសន្យាតម្លៃ៦ពាន់លានដុល្លារ សម្រាប់វ៉ាក់សាំង Covid-19 ជាមួយក្រុមហ៊ុនផលិតឱសថរបស់អង់គ្លេស-ស៊ុយអែត អាស្រ្តាហ្សេណេកា នៅថ្ងៃសុក្រសប្តាហ៍នេះ ។ ស្ថិតក្រោមកិច្ចសន្យាខាងលើនេះ ប្រទេសថៃនឹងបញ្ជាទិញវ៉ាក់សាំង Covid-19ចំនួន២៦លានដូស ដែលគ្រប់គ្រាន់ល្មមសម្រាប់ចាក់អោយមនុស្សចំនួន១៣លាននាក់ ។ បើតាមអ្នកនាំពាក្យរងរបស់រដ្ឋាភិបាលថៃលោកស្រី ត្រៃស៊ូរី តៃសារ៉ាណាគុល លោកនាយករដ្ឋមន្ត្រី ប្រាយុទ្ធ ចាន់អូចា នឹងធ្វើជាអធិបតីក្នុងពិធីនេះបន្ទាប់ពីគណៈរដ្ឋមន្ត្រីបានអនុម័តការទិញវ៉ាក់សាំងនេះនៅថ្ងៃទី១៧ ខែវិច្ឆិកា ។ លោកស្រីបញ្ជាក់ថា ការចុះហត្ថលេខាលើកិច្ចសន្យានេះ នឹងផ្តល់អោយប្រជាជនថៃនូវឱកាសប្រសើរជាងប្រទេសដទៃទៀត ដើម្បីទទួលបានវ៉ាក់សាំង លោកស្រីថា ការទទួលយកវ៉ាក់សាំងត្រូវបានរំពឹងថា នឹងធ្វើឡើងនៅពាក់កណ្តាលឆ្នាំ ២០២១ ។ ហើយកិច្ចសន្យានេះដែរ អាចនឹងគ្របដណ្តប់លើការផលិតវ៉ាក់សាំងក្នុងប្រទេសថៃ នៅឯរោងចក្ររបស់ក្រុមហ៊ុន Siam Bioscience Group ដោយលោកស្រីបាននិយាយថា វារួមបញ្ចូលទាំងការផ្ទេរបច្ចេកវិជ្ជាផលិតកម្មផងដែរ ៕
-
ថ្ងៃនេះមិនមានអ្នកឆ្លងជំងឺកូវីដ-១៩ថ្មីទេ ហើយក៏មិនមានអ្នកជាសះស្បើយនោះដែរ
-
ប្រធានាធិបតីបារាំងរំពឹងថា ការចាក់វ៉ាក់សាំង Covid-19 នឹងចាប់ផ្តើមនៅបារាំងនាចុងឆ្នាំនេះ ឬដើមឆ្នាំក្រោយ
បារាំង៖ ប្រធានាធិបតីបារាំងលោក អែម៉ានុយអែល ម៉ាក្រុង នៅថ្ងៃអង្គារនេះថ្លែងថា ការចាក់វ៉ាក់សាំងប្រឆាំងជម្ងឺ Covid-19 ដែលបង្កឡើងដោយវីរុសកូរ៉ូណា អាចនឹងចាប់ផ្តើមដំណើរការអោយបានឆាប់តាមដែលអាចធ្វើទៅបាន ក្នុងប្រទេសបារាំងនៅចុងឆ្នាំ២០២០ ប្រសិនបើមានការយល់ព្រមពីនិយ័តករ នេះបើតាមសារព័ត៌មានរ៉យទ័រនៅថ្ងៃ២៥ ខែវិច្ឆិកា ឆ្នាំ២០២០ ។ ការកត់សម្គាល់បែបនេះរបស់លោក ម៉ាក្រុង ធ្វើឡើងតាមរយៈកញ្ចក់ទូរទស្សន៍រដ្ឋ ដើម្បីលំអិតពីវិធីសាស្រ្តដែលបារាំងនឹងចាប់ផ្តើមបន្ធូរបន្ថយវិធានការរឹតបន្តឹងការបិទប្រទេសក្នុងសប្តាហ៍នេះ ។ លោក ម៉ាក្រុង បាននិយាយទៀតថា យើងទំនង ជានឹងទទួលបាននូវការអនុញ្ញាតពីអាជ្ញាធរសុខាភិបាល ដើម្បីចាប់ផ្តើមចាក់វ៉ាក់សាំងដល់ប្រជាជនដែលងាយរងគ្រោះបំផុត ជាពិសេសមនុស្សមានវ័យចំណាស់ក្នុងពេលឆាប់ៗខាងមុខ ពោលគឺនៅចុងឆ្នាំនេះ ឬនៅដើមខែមករា ឆ្នាំក្រោយ លោកថា ក្រុមប្រជាជនផ្សេងទៀតនឹងត្រូវផ្តល់ការចាក់វ៉ាក់សាំងជាបន្តបន្ទាប់ ។ គួរបញ្ជាក់ថា គិតត្រឹមថ្ងៃទី២៥ ខែវិច្ឆិកានេះ នៅទូទាំងប្រទេសបារាំងមានអ្នកឆ្លង Covid-19 សរុបចំនួន២លាន១៥ម៉ឺន៣ពាន់៨១៥ករណី ក្នុងនោះមានអ្នកស្លាប់សរុប៥ម៉ឺន២៣៧នាក់ និងអ្នកជាសះស្បើយឡើងវិញសរុប១៥ម៉ឺន៤ពាន់៦៧៩នាក់ ៕
-
សហភាពអឺរ៉ុបឈានដល់កិច្ចព្រមព្រៀងទិញវ៉ាក់សាំង Covid-19 ចំនួន១៦០លានដូសពីក្រុមហ៊ុនផលិតឱសថអាមេរិក ម៉ូឌែណា
ប៊ែលហ្ស៊ិក៖ សហភាពអឺរ៉ុបឈានដល់កិច្ចព្រមព្រៀងមួយជាមួយក្រុមហ៊ុនផលិតឱសថអាមេរិក ម៉ូឌែណា ក្នុងការផ្គត់ផ្គង់បេក្ខភាពវ៉ាក់សាំង Covid-19 នេះបើតាមការបញ្ជាក់របស់ប្រធានគណៈកម្មការអឺរ៉ុប ចុះផ្សាយដោយសារព័ត៌មានរ៉យទ័រនៅថ្ងៃទី២៥ ខែវិច្ឆិកា ឆ្នាំ២០២០ ។ ប្រធានគណៈកម្មការអឺរ៉ុបលោកស្រី យូស៊ូឡា វ៉ុន ដឺ ឡេយ៉ែន បានថ្លែងយ៉ាងដូច្នេះថា ខ្ញុំរីករាយដែលបានប្រកាសថា ថ្ងៃស្អែកនេះយើងនឹងចុះកិច្ចព្រមព្រៀងលើកិច្ចសន្យាថ្មីមួយ ដើម្បីទទួលបាននូវវ៉ាក់សាំងការពារជម្ងឺ Covid-19 បន្ថែមទៀត លោកស្រីថា កិច្ចព្រមព្រៀងនោះ នឹងអនុញ្ញាតអោយយើងបញ្ជាទិញវ៉ាក់សាំងចំនួន១៦០លានដូស ដែលផលិតឡើងដោយក្រុមហ៊ុនឱសថអាមេរិក ម៉ូឌែណា។ គួរបញ្ជាក់ផងដែរថា កាលពីសប្តាហ៍មុននេះ ក្រុមហ៊ុនផលិតឱសថដ៏ធំរបស់អាមេរិក ម៉ូឌែណា បានប្រកាសពីលទ្ធផល នៃការធ្វើតេស្តវ៉ាក់សាំង COVID-19 របស់ខ្លួននៅដំណាក់ទី៣ ដោយអះអាងថា វាមានប្រសិទ្ធភាពរហូតដល់៩៤.៥% ក្នុងការទប់ស្កាត់នឹងវីរុសដ៏កាចសាហាវមួយនេះ ៕
-
រុស្ស៊ីសន្យាថា នឹងលក់វ៉ាក់សាំង Covid-19 នៅលើទីផ្សារអន្តរជាតិទាបជាងវ៉ាក់សាំងរបស់ដៃគូប្រជែងមកពីបស្ចិមប្រទេស
រុស្ស៊ី៖ រុស្ស៊ីបានបញ្ចេញលទ្ធផលថ្មីមួយ នៅថ្ងៃអង្គារនេះ ដោយបញ្ជាក់ថា វ៉ាក់សាំង Covid-19 របស់ខ្លួនមានប្រសិទ្ធភាពខ្ពស់ ហើយសន្យាថា វ៉ាក់សាំងនឹងលក់លើទីផ្សារអន្តរជាតិទាបជាងវ៉ាក់សាំងរបស់ដៃគូប្រជែងមកពីបស្ចិមប្រទេស នេះបើតាមសារព័ត៌មានស្ពូតនីគ នៅថ្ងៃទី២៥ ខែវិច្ឆិកា ឆ្នាំ២០២០ ។ ជាមួយគ្នានេះ ឧបនាយករដ្ឋមន្ត្រីរុស្ស៊ីលោកស្រី តាតយ៉ាណា ហ្គោលីកូវ៉ា បានលើកឡើងថា ការចាក់វ៉ាក់សាំងទ្រង់ទ្រាយធំនៅក្នុងប្រទេសរុស្ស៊ី ត្រូវបានរំពឹងថា នឹងចាប់ផ្តើមនៅឆ្នាំ២០២១ខាងមុខ លោកស្រីថា វ៉ាក់សាំង Sputnik V ចំនួនជាង២លានដូសនឹងត្រូវផលិតនៅរុស្ស៊ីក្នុងឆ្នាំ២០២០នេះ ។ យោងតាមមូលនិធិវិនិយោគផ្ទាល់របស់រុស្ស៊ី ដែលគ្រប់គ្រងការផលិតវ៉ាក់សាំង បានអោយដឹងថា វ៉ាក់សាំង Sputnik V នឹងមានតម្លៃទាបជាងគូប្រជែង ត្រឹមតែ១០ដុល្លារក្នុងមួយដូស ឬតិចជាង២០ដុល្លារសម្រាប់ពីរដូសនៅលើទីផ្សារអន្តរជាតិ ហើយការចាក់វ៉ាក់សាំងនេះ នឹងមិនគិតថ្លៃសម្រាប់ប្រជាជនរុស្ស៊ីនោះទេ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៦១លាននាក់ ក្នុងនោះស្លាប់ជាង១លាន៤១ម៉ឺននាក់ និងជាសះស្បើយជាង៤១លាន៥៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦០លាន៩ម៉ឺន៩ពាន់៤១៦ករណី ក្នុងនោះមានអ្នកជម្ងឺសរុបចំនួន១លាន៤១ម៉ឺន៤ពាន់៦១៨នាក់ស្លាប់ និង ជាសះស្បើយឡើងវិញសរុបចំនួន៤១លាន៥៤ម៉ឺន៩ពាន់៥៧៥នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៥ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១២លាន៩៥ម៉ឺន៥ពាន់៧នាក់ ស្លាប់ចំនួន២៦ម៉ឺន៥ពាន់៨៩១នាក់ និងជាសះស្បើយចំនួន៧លាន៦៣ម៉ឺន៦ពាន់៦៨៤នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន២២ម៉ឺន១ពាន់៩៩៨នាក់ ស្លាប់ចំនួន១៣ម៉ឺន៤ពាន់៧៤៣នាក់ និងជាសះស្បើយ៨លាន៦៤ម៉ឺន១ពាន់៤០៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន១២ម៉ឺន១ពាន់៤៤៩នាក់ ស្លាប់១៧ម៉ឺន១៧៩នាក់ និងជាសះស្បើយ៥លាន៤៧ម៉ឺន៦ពាន់១៨នាក់ ៕
-
នៅថ្ងៃនេះ កម្ពុជាមានអ្នកឆ្លងជំងឺកូវីដ-១៩ថ្មីម្នាក់ និងមានអ្នកជាសះស្បើយ២នាក់បន្ថែមទៀត
យោងតាមក្រសួងសុខាភិបាលនៅព្រឹកថ្ងៃ២៥វិច្ឆិកានេះ បានឲ្យដឹងថា គេបានរកឃើញករណីឆ្លងជំងឺកូវីដ-១៩ថ្មីម្នាក់ នៅថ្ងៃ២៤វិច្ឆិកាឆ្នាំ២០២០។ ដូច្នេះ គិតមកដល់ព្រឹកថ្ងៃ២៥វិច្ឆិកាឆ្នាំ២០២០ កម្ពុជាមានអ្នកឆ្លងជំងឺកូវីដ-១៩សរុប៣០៧នាក់។ អ្នកឆ្លងថ្មីនោះ ជាបុរសជនជាតិនេប៉ាល់អាយុ៣៧ឆ្នាំ មានអស័យដ្ឋាននៅសសណ្ឋាគារមួយកន្លែងក្នុងរាជធានីភ្នំពេញ បានាធ្វើដំណើរមកពីប្រទេសនេប៉ាល់ ទៅទីក្រុងដូហា ប្រទេសកាតា និងបានបន្តជើងយន្តហោះនៅប្រទេសកូរ៉េខាងត្បូង ហើយបានមកដល់ប្រទេសកម្ពុជានៅថ្ងៃ១១វិច្ឆិកាឆ្នាំ២០២០។ អ្នកដំណើររូបនោះ ធ្លាប់មានវិជ្ជមានវីរុសកូវីដ-១៩ កាលពីនៅប្រទេសនេប៉ាល់នៅថ្ងៃ១៩តុលាឆ្នាំ២០២០ និងបានធ្វើចត្តាឡីស័ករយៈពេល១៤ថ្ងៃនៅពេលនោះ។ នៅថ្ងៃទី២ និងទី៨វិច្ឆិកាឆ្នាំ២០២០ បុរសរូបនោះ បានធ្វើតេស្ដឡើងវិញដោយទទួលបានលទ្ធផលអវិជ្ជមានវីរុសកូវីដ-១៩ទាំងពីរលើក។ ក្រសួងសុខាភិបាលបានបញ្ជាក់ទៀតថា ថ្ងៃដែលបានមកដល់កម្ពុជា គាត់បានធ្វើតេស្ដដោយទទួលបានលទ្ធផលនៅថ្ងៃស១២វិច្ឆិកាឆ្នាំ២០២០ អវិជ្ជមានវីរុសកូវីដ-១៩ ហើយត្រូវបានអនុញ្ញាតឲ្យធ្វើចត្តាឡីស័កនៅក្នុងសណ្ឋាគារមួយនៅរាជធានីភ្នំពេញ ដោយគាត់ជាបុគ្គលិកអង្គការអន្តរជាតិមួយនៅភ្នំពេញ។ លទ្ធផលតេស្ដនៅថ្ងៃទី១៣នៃការធ្វើចត្តាឡីស័ករបស់បុរសនោះ ត្រូវនឹងថ្ងៃទី២៤វិច្ឆិកាឆ្នាំ២០២០ ផ្ដល់ដោយវិទ្យាស្ថានប៉ាស្ទ័រកម្ពុជា គឺទទួលបានលទ្ធផលវិជ្ជមានវីរុសកូវីដ-១៩ ហើយបុរសនេប៉ាល់រូបនោះ ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ នៅថ្ងៃ២៥វិច្ឆិកានេះ ក្រសួងសុខាភិបាលក៏បានបញ្ជាក់ដែរថា មានអ្នកជាសះស្បើយចំនួន២នាក់។ អ្នកជាសះស្បើយចំនួន២នាក់នោះ គឺម្នាក់ជាបុរសជនជាតិខ្មែរអាយុ៣៤ឆ្នាំ មានអាសយដ្ឋាននៅឃុំសារិកាកែវ ស្រុកល្វាឯម ខេត្តកណ្ដាល និងម្នាក់ទៀតជាបុរសជនជាតិអាមេរិកកាំង អាយុ៦៩ឆ្នាំ ស្នាក់នៅរាជធានីភ្នំពេញ។ ក្រសួងសុខាភិបាលបានបញ្ជាក់ថា គិតមកដល់ថ្ងៃ២៥វិច្ឆិកាឆ្នាំ២០២០ កម្ពុជាមានអ្នកឆ្លងជំងឺកូវីដ-១៩ចំនួន៣០៧នាក់ ក្នុងនោះបានជាសះស្បើយចំនួន២៩៨នាក់ និងនៅសល់៩នាក់កំពុងសម្រាកព្យាបាលនៅមន្ទីរពេទ្យ៕
-
បេក្ខភាពវ៉ាក់សាំង Covid-19 ចំនួន០២របស់ប្រទេសថៃ ឈានដល់ដំណាក់កាលធ្វើតេស្តលើមនុស្សហើយ
ថៃ៖ វិទ្យាស្ថានស្រាវជ្រាវវ៉ាក់សាំងជាតិរបស់ថៃនៅថ្ងៃចន្ទនេះប្រកាសថា បេក្ខភាពវ៉ាក់សាំង Covid-19 ចំនួន០២ ក្នុងចំណោមវ៉ាក់សាំងចំនួន០៧របស់ថៃ ត្រូវបានទទួលជោគជ័យក្នុងការធ្វើតេស្តទៅលើសត្វ ហើយបន្ទាប់មកនឹងបន្តទៅសាកល្បងទៅលើមនុស្សវិញម្តង នេះបើតាមសារព័ត៌មានស៊ីនហួរនៅថ្ងៃទី២៤ ខែវិច្ឆិកា ឆ្នាំ២០២០ ។ នាយកវិទ្យាស្ថានខាងលើនេះ គឺលោកវេជ្ជបណ្ឌិត Nakorn Premsri បានបញ្ជាក់ថា បេក្ខភាពវ៉ាក់សាំង Covid-19 ចំនួន០២ ដែលកំពុងធ្វើតេស្តក្នុងដំណាក់កាលទី២ទៅលើមនុស្សនេះ មួយគឺវ៉ាក់សាំង mRNA ដែលត្រូវបានបង្កើតឡើងដោយមជ្ឈមណ្ឌលស្រាវជ្រាវ Chula VRC និងមួយទៀត គឺវ៉ាក់សាំង DNA ដែលបង្កើតដោយស្ថាប័ន BioNet-Asia ។ បើតាមការរំពឹងទុករបស់មជ្ឈមណ្ឌលស្រាវជ្រាវ Chula VRC នោះ វ៉ាក់សាំង mRNA របស់ខ្លួននឹងឈានចូលដល់ដំណាក់កាលធ្វើតេស្តលើមនុស្សនៅថ្ងៃទី១៩ ខែមេសា ឆ្នាំក្រោយនេះ ។ វ៉ាក់សាំង mRNA នឹងធ្វើតេស្តលើកដំបូងលើអ្នកស្ម័គ្រចិត្តចំនួន៧២នាក់ ហើយប្រសិនបើជោគជ័យនោះ មជ្ឈមណ្ឌលស្រាវជ្រាវ Chula VRC នឹងធ្វើតេស្តលើកទី២លើអ្នកស្ម័គ្រចិត្តចំនួន៦០០នាក់បន្ថែមទៀត ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៦០លាននាក់ ក្នុងនោះស្លាប់ជាង១លាន៤០ម៉ឺននាក់ និងជាសះស្បើយជាង៤១លាន១៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៩លាន៥០ម៉ឺន១ពាន់៥៤៩ករណី ក្នុងនោះមានអ្នកជម្ងឺសរុបចំនួន១លាន៤០ម៉ឺន១ពាន់៥៦៧នាក់ស្លាប់ និង ជាសះស្បើយឡើងវិញសរុបចំនួន៤១លាន១៤ម៉ឺន៥ពាន់៨៨៨នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៤ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១២លាន៧៧ម៉ឺន៦ពាន់៧៣៧នាក់ ស្លាប់ចំនួន២៦ម៉ឺន៣ពាន់៦៨៧នាក់ និងជាសះស្បើយចំនួន៧លាន៥៤ម៉ឺន៨ពាន់៤៣៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន១៧ម៉ឺន៧ពាន់៧២២នាក់ ស្លាប់ចំនួន១៣ម៉ឺន៤ពាន់២៥៤នាក់ និងជាសះស្បើយ៨លាន៦០ម៉ឺន៣ពាន់៥៧៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៨ម៉ឺន៨ពាន់៤នាក់ ស្លាប់១៦ម៉ឺន៩ពាន់៥៤១នាក់ និងជាសះស្បើយ៥លាន៤៤ម៉ឺន៥ពាន់៩៥នាក់ ៕