-
បងប្អូន២នាក់ចេញពីធ្វើការសំណង់នាំគ្នាស្ងោរមាន់ហូបជាមួយបាយ ស្រាប់តែផ្ទុះធុងហ្គាសស្លាប់ម្នាក់របួសម្នាក់
ភ្នំពេញ៖ បុរសម្នាក់បានស្លាប់ក្នុងផ្នួកភ្លេីងយ៉ាង និងម្នាក់ទៀតបានរងរបួសត្រូវបញ្ជូនទៅកាន់មន្ទីរពេទ្យភ្លាមៗ ខណៈពួកគាត់ចេញពីធ្វើការសំណង់ហើយនាំគ្នាស្ងោរមាន់ដេីម្បីហូបបាយស្រាប់តែផ្ទុះធុងហ្គាស ឆាបឆេះបន្ទប់ជួល កាលពីវេលាម៉ោង១៩ និង២០នាទីយប់ ថ្ងៃទី២៣ ខែវិច្ឆិកាឆ្នាំ ២០២០ នៅចំណុចបន្ទប់ជួលលេខ ៣៣ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។ សមត្ថកិច្ចបានឲ្យដឹងថា៖ សពជនរងគ្រោះមានឈ្មោះព្រីម សុខា ភេទប្រុស អាយុ២១ ឆ្នាំមុខរបរដើរម៉ៅការបុកគ្រឹះ ស្នាក់នៅបន្ទប់ជួលកន្លែងកើតហេតុខាងលើ មានស្រុកកំណើត ភូមិប្រាំយ៉ាង ស្រុកស្រីសន្ធរ ខេត្តកំពង់ចាម និងមានប្រពន្ធកំពុងមានផ្ទៃពោះ៧ខែផង។ ចំណែកម្នាក់ទៀតឈ្មោះព្រីម ឃីញ ភេទប្រុសអាយុ២១ឆ្នាំ ស្នាក់នៅជាមួយគ្នា និងស្រុកកំណើតជាមួយគ្នា។ យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនកើតហេតុ គេឃើញបងប្អូនកូនភ្លោះ២ នាក់រួមទាំងក្មួយជីដូនមួយម្នាក់ទៀត ស្នាក់នៅបន្ទប់ជួលកន្លែងកើតហេតុខាងលើ ហើយបាននាំគ្នាបើកហ្គាសស្ងោរមាន់ធ្វើម្ហូបមិនទាន់នឹងបានហូបផងស្រាប់តែផ្ទុះធុងហ្គាសប្រភេទធុងតូច បណ្ដាលឲ្យឆាបឆេះបន្ទប់ជួល បន្ទាប់មកគេឃើញបុរសជាប្អូននឹងក្មួយជីដូនមួយបានរត់ចេញមកក្រៅ និងស្រែកឲ្យជួយ ចំណែកបងមិនបានចេញមកក្រៅទេដោយនៅស្តាយម៉ូតូមួយគ្រឿង បម្រុងយកចេញ ខណៈនោះប្អូនមិនឃើញបងចេញមកក្រៅក៏ចូលទៅជួយ បន្ទាប់មកបងបានចេញមកក្រៅ ចំណែកប្អូនត្រូវបានភ្លើងឆាបឆេះស្លាប់តែម្តង។ ក្រោយមកក៏ផ្អើលដល់ប្អូនប្រជាពលរដ្ឋ នាំគ្នារាយការណ៍ជូនទៅសមត្ថកិច្ចហៅរថយន្តពន្លត់អគ្គិភ័យចំនួន ២គ្រឿងចុះមកជួយអន្តរាគមន៍ ខណៈដែលមកដល់អគ្គិភ័យត្រូវបានរលត់ទៅវិញបាត់ទៅហើយ។ សមត្ថកិច្ចបានប្រាប់ឲ្យដឹងថា ចំពោះករណីខាងលើនេះកម្លាំងសមត្ថកិច្ចកច្ចមូលដ្ឋាននិងជំនាញបានចុះមកកន្លែងកើតហេតុខាងលើកំពុងតែធ្វើការស្រាវជ្រាវបន្ត និងធ្វើកំណត់ហេតុប្រគល់សាកសពជូនទៅសាច់ញាតិយកទៅធ្វើបុណ្យតាមប្រពៃណី៕ ដោយ៖…
-
នៅថ្ងៃនេះ កម្ពុជាមិនមានអ្នកឆ្លងជំងឺកូវីដ-១៩ថ្មីនោះទេ ប៉ុន្តែមានអ្នកជាសះស្បើយម្នាក់បន្ថែមទៀត
យោងតាមក្រសួងសុខាភិបាលនៅព្រឹកថ្ងៃ២៤វិច្ឆិកានេះ បានឲ្យដឹងថា គេមិនបានរកឃើញករណីឆ្លងជំងឺកូវីដ-១៩ថ្មីនោះទេនៅថ្ងៃ២៣វិច្ឆិកាឆ្នាំ២០២០។ ដូច្នេះ គិតមកដល់ព្រឹកថ្ងៃ២៣វិច្ឆិកាឆ្នាំ២០២០ កម្ពុជាមានអ្នកឆ្លងជំងឺកូវីដ-១៩សរុប៣០៦នាក់។ នៅថ្ងៃ២៤ ក្រសួងសុខាភិបាលបានបញ្ជាក់ថា មានអ្នកជាសះស្បើយពីជំងឺកូវីដ-១៩ម្នាក់ ដែលនាំឲ្យអ្នកជាសះស្បើយសរុបមានចំនួន២៩៦នាក់ និងនៅសល់១១នាក់តែប៉ុណ្ណោះកំពុងសម្រាកព្យាបាលនៅមន្ទីរពេទ្យ។ អ្នកជាសះស្បើយនោះជាបុរសជនជាតិឥណ្ឌាអាយុ៣៣ឆ្នាំ មានអាសយដ្ឋាននៅក្រុងព្រះសីហនុ បានធ្វើដំណើរមកពីប្រទេសឥណ្ឌា ដោយឆ្លងកាត់ប្រទេសអារ៉ាប់ប៊ីសាអូឌីត និងបានបន្តជើងយន្តហោះនៅប្រទេសកូរ៉េខាងត្បូង មុននឹងមកដល់ប្រទេសកម្ពុជានៅថ្ងៃទី៥វិច្ឆិកាឆ្នាំ២០២០។ ក្រសួងបានបញ្ជាក់ថា ការជាសះស្បើយនៅបន្ទាប់ពីបានធ្វើតេស្ដចំនួន២ដង ហើយទទួលបានលទ្ធផលអវិជ្ជមានវីរុសកូវីដ-១៩៕
-
វ៉ាក់សាំង Covid-19 របស់ក្រុមហ៊ុន ភីហ្វីហ្សឺ និង បាយអូអិនធិច ទំនងជាត្រូវអនុញ្ញាតអោយប្រើប្រាស់នៅអង់គ្លេសនាសប្តាហ៍នេះ
អង់គ្លេស៖ សារព័ត៌មានរ៉យទ័រចុះផ្សាយនៅថ្ងៃចន្ទនេះថា វ៉ាក់សាំងប្រឆាំងជម្ងឺ COVID-19 របស់ក្រុមហ៊ុនអាមេរិក ភីហ្វីហ្សឺ និងក្រុមហ៊ុនអាល្លឺម៉ង់ បាយអូអិនធិច ទំនងជាត្រូវបានអនុញ្ញាតអោយប្រើប្រាស់នៅអង់គ្លេសនាសប្តាហ៍នេះតែម្តង ក្រោយមន្រ្តីជាន់ខ្ពស់អង្គការ WHO ព្រមានថា រលកទី៣នៃការឆ្លងវីរុសនេះអាចនឹងកើនឡើងនៅអឺរ៉ុប ។ ស្របពេលជាមួយគ្នានេះដែរ ក្រសួងសុខាភិបាលអង់គ្លេសមិនបានផ្តល់ការអត្ថាធិប្បាយអ្វីឡើយ ជុំវិញសេចក្តីរាយការណ៍ខាងលើនេះ ប៉ុន្តែកាលពីពេលថ្មីៗនេះ អង់គ្លេសបានបញ្ជាទិញវ៉ាក់សាំងរបស់ក្រុមហ៊ុនផលិតឱថសទាំងពីរ ចំនួន៤០លានដូស ហើយរំពឹងថា នឹងមាន១០លានដូសនៅក្នុងដៃដែលគ្រប់គ្រាន់សម្រាប់ការពារប្រជាជន៥លាននាក់នៅត្រឹមដំណាច់ឆ្នាំនេះ ប្រសិនបើវាត្រូវបានអនុញ្ញាតឲ្យប្រើប្រាស់នៅក្នុងករណីបន្ទាន់ ។ យ៉ាងណាមិញ បើតាមសារព័ត៌មានអង់គ្លេស តេលេក្រាប អាជ្ញាធរសុខាភិបាល អង់គ្លេសកំពុងត្រៀមចាប់ផ្តើមដំណើរការវាយតម្លៃជាផ្លូវការ ទៅលើវ៉ាក់សាំងCovid-19របស់ក្រុមហ៊ុន ភីហ្វីហ្សឺ-បាយអូអិនធិច ហើយទីភ្នាក់ងារសុខាភិបាលជាតិអង់គ្លេសត្រូវបានបង្គាប់អោយត្រៀមខ្លួនចាត់ចែងវ៉ាក់សាំងនោះ នៅថ្ងៃទី០១ ខែធ្នូខាងមុខនេះ ៕
-
មន្រ្តីជាន់ខ្ពស់អង្គការ WHO ព្រមានថា រលកទី៣នៃជំងឺ COVID-19 អាចនឹងផ្ទុះឡើងក្នុងទ្វីបអឺរ៉ុប
ស្វីស៖ មន្រ្តីជាន់ខ្ពស់មួយរូបរបស់អង្គការសុខភាពពិភពលោក WHO ព្រមានថា រលកទី៣នៃការចម្លងជម្ងឺ COVID-19 អាចនឹងផ្ទុះឡើងនៅក្នុងទ្វីបអឺរ៉ុបនាដើមឆ្នាំ២០២១ខាងមុខនេះ បើសិនជារដ្ឋាភិបាលអឺរ៉ុបទាំងអស់បរាជ័យក្នុងការចាត់វិធានការចាំបាច់នានា ដើម្បីទប់ស្កាត់រលកទី២ នេះបើតាមសារព័ត៌មាន CGTN នៅថ្ងៃទី២៣ ខែវិច្ឆិកា ឆ្នាំ២០២០ ។ ថ្លែងនៅក្នុងបទសម្ភាសន៍ជាមួយសារព័ត៌មានស្វីស នៅថ្ងៃអាទិត្យម្សិលមិញ ប្រេ សិតពិសេសអង្គការ WHO លោក David Nabarro លើកឡើងថា ពួកគេ (អឺរ៉ុប) បានខកខានក្នុងការចាត់វិធានការចាំបាច់នានា កំឡុងរដូវក្ដៅ បន្ទាប់ពីពួកគេអាចគ្រប់គ្រងរលកទីមួយបាន ។ លោក David Nabarro បានសង្កត់ធ្ងន់ទៀតថា បច្ចុប្បន្ន យើងកំពុងប្រឈមមុខនឹងរលកទី២ ដូច្នេះបើសិនជាពួកគេមិនចាត់វិធានការចាំបាច់ទេ នោះយើងនឹងបានឃើញរលកទី៣នៅដើមឆ្នាំក្រោយនេះ ៕
-
ឥណ្ឌាអះអាងថា រយៈពេល០២ខែទៀត ខ្លួននឹងបញ្ចប់ការធ្វើតេស្តវ៉ាក់សាំង Covid-19 តំណាក់កាលចុងក្រោយ
ឥណ្ឌា៖ សារព័ត៌មានរ៉យទ័រចុះផ្សាយនៅថ្ងៃចន្ទនេះថា ឥណ្ឌាប្រកាសថា វ៉ាក់សាំងប្រឆាំង COVID-19 ដែលកំពុងស្ថិតក្នុងការធ្វើតេស្តលើមនុស្សក្នុងតំណាក់កាលទី ៣ ដែលជាតំណាក់កាលចុងក្រោយនោះ គឺនឹងចេញជាលទ្ធផលយ៉ាងយូរ០២ខែទៀត ។ ការអភិវឌ្ឍវ៉ាក់សាំងនេះ កំពុងប្រព្រឹត្តទៅក្រោមកិច្ចសហការរវាងក្រុមហ៊ុនរដ្ឋឥណ្ឌា ICMR និងក្រុមហ៊ុនឯកជន ប៉ារ៉ាត បាយអូធិច ដោយក្រុមហ៊ុនទាំងពីរបានអះអាងរួមគ្នាថា នៅរយៈយ៉ាងឆាប់១ខែ ឬយ៉ាងយូរ២ខែទៀត ការធ្វើតេស្តវ៉ាក់សាំង Covid-19 របស់ឥណ្ឌា មានឈ្មោះថា កូវ៉ាស៊ីន នឹងចេញលទ្ធផល ។ ហើយបើសិនវ៉ាក់សាំងដែលត្រូវបានធ្វើតេស្តលើអ្នកស្ម័គ្រចិត្ត២ម៉ឺន៦ពាន់នាក់ខាងលើនេះទទួលបានជោគជ័យ នោះឥណ្ឌារំពឹងថា នឹងធ្វើការផលិតក្នុងទ្រង់ ទ្រាយធំ ហើយចែកចាយក្នុងប្រទេសខ្លួនជាចម្បង ដោយផ្តោតសំខាន់លើមន្ត្រីដែលបម្រើការងារផ្នែកសុខាភិបាល និងមន្ត្រីពាក់ព័ន្ធដទៃទៀត ដែលជាអ្នកប្រឈមមុខដោយផ្ទាល់ជាមួយ COVID-19 ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៥៩លាននាក់ ក្នុងនោះស្លាប់ជាង១លាន៣៩ម៉ឺននាក់ និងជាសះស្បើយជិត៤១លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៨លាន៩៨ម៉ឺន៥៩ករណី ក្នុងនោះមានអ្នកជម្ងឺសរុបចំនួន១លាន៣៩ម៉ឺន៣ពាន់៥៣៧នាក់ស្លាប់ និង ជាសះស្បើយឡើងវិញសរុបចំនួន៤០លាន៧៦ម៉ឺន៣ពាន់៩៥០នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២១ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១២លាន៥៨ម៉ឺន៨ពាន់៦៦១នាក់ ស្លាប់ចំនួន២៦ម៉ឺន២ពាន់៦៩៦នាក់ និងជាសះស្បើយចំនួន៧លាន៤៥ម៉ឺន២ពាន់៥៤០នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន១៤ម៉ឺន៣១២នាក់ ស្លាប់ចំនួន១៣ម៉ឺន៣ពាន់៧៧៣នាក់ និងជាសះស្បើយ៨លាន៥៦ម៉ឺន១ពាន់៤៤៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៧ម៉ឺន១ពាន់៤០១នាក់ ស្លាប់១៦ម៉ឺន៩ពាន់១៩៧នាក់ និងជាសះស្បើយ៥លាន៤៣ម៉ឺន២ពាន់៥០៥នាក់ ៕
-
នៅថ្ងៃនេះ កម្ពុជាមិនមានអ្នកឆ្លងជំងឺកូវីដ-១៩ថ្មីនោះទេ ហើយក៏មិនមានអ្នកជាសះស្បើយបន្ថែមទៀតដែរ
ក្រសួងសុខាភិបាល៖ យោងតាមក្រសួងសុខាភិបាលនៅព្រឹកថ្ងៃ២៣វិច្ឆិកានេះ បានឲ្យដឹងថា គេមិនបានរកឃើញករណីឆ្លងជំងឺកូវីដ-១៩ថ្មីនោះទេនៅថ្ងៃ២២វិច្ឆិកាឆ្នាំ២០២០។ ដូច្នេះ គិតមកដល់ព្រឹកថ្ងៃ២៣វិច្ឆិកាឆ្នាំ២០២០ កម្ពុជាមានអ្នកឆ្លងជំងឺកូវីដ-១៩សរុប៣០៦នាក់។ នៅថ្ងៃ២៣ ក្រសួងសុខាភិបាលបានបញ្ជាក់ថា មិនមានអ្នកជាសះស្បើយពីជំងឺកូវីដ-១៩នោះឡើយ ដែលនាំឲ្យអ្នកជាសះស្បើយសរុបមានចំនួន២៩៥នាក់ និងនៅសល់១១នាក់តែប៉ុណ្ណោះកំពុងសម្រាកព្យាបាលនៅមន្ទីរពេទ្យ៕
-
នាយករដ្ឋមន្រ្តីកាណាដាអំពាវនាវអោយពលរដ្ឋខ្លួនទាំងអស់ ធ្វើអ្វីៗគ្រប់យ៉ាងដើម្បីប្រយុទ្ធប្រឆាំងនឹង Covid-19 ដែលកាន់តែអាក្រក់ខ្លាំង
កាដាណា៖ នាយករដ្ឋមន្រ្តីកាណាដាលោក ចាស្ទីន ទ្រូដូ នៅថ្ងៃសុក្រនេះថ្លែងថា ប្រទេសរបស់លោកបាននិងកំពុងស្ថិតក្នុងស្ថានភាពជាប់គាំង ស្របពេលដែលការឆ្លងរាតត្បាតនៃជម្ងឺ Covid-19 កាន់តែអាក្រក់ឡើងៗ នេះបើតាមសារព័ត៌មានស៊ីនហួរនៅថ្ងៃទី២១ ខែវិច្ឆិកា ឆ្នាំ២០២០ ។ លោក ចាស្ទីន ទ្រូដូ បានថ្លែងប្រាប់ប្រជាជនកាណាដាក្នុងទីក្រុងអ៊ុតតាវ៉ា ក្នុងអំឡុងសន្និសិទកាសែតមួយថា យើងពិតជាប្រឈមនឹងគ្រោះថ្នាក់ នៅពេលដែលឃើញករណីឆ្លងមេរោគកើនឡើង… មន្ទីរពេទ្យស្ទើរតែមិនអាចទ្រាំទ្របាន ហើយមនុស្សជាទីស្រលាញ់បានស្លាប់ទៅៗ ។ ដូច្នេះយើងត្រូវតែធ្វើអ្វីៗគ្រប់យ៉ាង តាមដែលអាចធ្វើទៅបាន ដើម្បីទប់ស្កាត់ជម្ងឺ Covid-19 ក៏ដូចជាបញ្ឈប់ការរីករាលដាលនៃវីរុសក៏កាចសាហាវមួយនេះ ។ សូមបញ្ជាក់ថា គិតត្រឹមថ្ងៃទី២១ ខែវិច្ឆិកានេះ នៅទូទាំងប្រទេសកាណាដាមានអ្នកឆ្លងជម្ងឺ Covid-19 សរុបមានចំនួន៣២ម៉ឺន៧១៩ករណី ក្នុងនោះមានអ្នកស្លាប់សរុប១ម៉ឺន១ពាន់៣៣៤នាក់ និងអ្នកជាសះស្បើយឡើងវិញសរុប២៥ម៉ឺន៦ពាន់៦៤៦នាក់ ៕
-
កូនប្រុសច្បងរបស់ប្រធានាធិបតីអាមេរិកលោក ដូណាល់ ត្រាំ ធ្វើតេស្តវិជ្ជមានជំងឺ Covid-19
អាមេរិក៖ សារព័ត៌មានស៊ីនហួរចុះផ្សាយនៅថ្ងៃសៅរ៍នេះថា កូនប្រុសច្បងរបស់ប្រធានាធិបតីអាមេរិកលោក ដូណាល់ ត្រាំ គឺលោក ដូណាល់ ត្រាំ ចេអ័រ ត្រូវបានធ្វើតេស្តរកឃើញមានផ្ទុកជំងឺ Covid-19 កាលពីដើមសប្តាហ៍នេះ និងកំពុងស្ថិតក្នុងការព្យាបាលដាច់ដោយឡែក ។ ស្របពេលជាមួយគ្នានោះដែរ អ្នកនាំពាក្យរបស់លោក ដូណាល់ ត្រាំ ចេអ័រ បានបញ្ជាក់ថា កូនប្រុសច្បងរបស់ប្រធានាធិបតីអាមេរិករូបនេះ មិនមានចេញរោគសញ្ញាអ្វីឡើយ ដោយវាមានន័យថា អការៈរបស់លោកគឺស្ថិតក្នុងកម្រិតស្រាល ។ គួរបញ្ជាក់ងផងដែរថា លោក លោក ដូណាល់ ត្រាំ ចេអ័រ គឺជាកូនជាទី២ហើយរបស់លោកប្រធានាធិបតី ត្រាំ ត្រូវបានធ្វើតេស្តវិជ្ជមានជំងឺ COVID-19 បន្ទាប់ពីកូនប្រុសពៅរបស់លោក ដូណាល់ ត្រាំ គឺ បារ៉ុន ដែលមានវ័យ១៤ឆ្នាំ ដែលបានឆ្លងវីរុសនេះកាលពីដើមខែតុលាកន្លងទៅ ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៥៨លាននាក់ ក្នុងនោះស្លាប់ជាង១លាន៣៧ម៉ឺននាក់ និងជាសះស្បើយជាង៤០លាន១០ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៧លាន៩០ម៉ឺន៩ពាន់៩៩១ករណី ក្នុងនោះមានអ្នកជម្ងឺសរុបចំនួន១លាន៣៧ម៉ឺន៧ពាន់៧៤៥នាក់ស្លាប់ និង ជាសះស្បើយឡើងវិញសរុបចំនួន៤០លាន១០ម៉ឺន៨ពាន់២៥៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២១ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១២លាន២៧ម៉ឺន៤ពាន់៧២៦នាក់ ស្លាប់ចំនួន២៦ម៉ឺន២៨៣នាក់ និងជាសះស្បើយចំនួន៧លាន៣១ម៉ឺន៦ពាន់៣២៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៥ម៉ឺន៦១៣នាក់ ស្លាប់ចំនួន១៣ម៉ឺន២ពាន់៧៦៤នាក់ និងជាសះស្បើយ៨លាន៤៧ម៉ឺន៨ពាន់១២៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន២ម៉ឺន១៦៤នាក់ ស្លាប់១៦ម៉ឺន៨ពាន់៦៦២នាក់ និងជាសះស្បើយ៥លាន៤២ម៉ឺន២ពាន់១០២នាក់ ៕