-
សហភាពអឺរ៉ុប និងក្រុមហ៊ុនផលិតឱសថអាមេរិក ព្រមទាំងអាល្លឺម៉ង់ឈានដល់កិច្ចព្រមព្រៀងផ្គត់ផ្គង់វ៉ាក់សាំងចំនួន៣០០លានដូស
អ៊ឺរ៉ុប៖ សារព័ត៌មានរ៉យទ័រចុះផ្សាយនៅថ្ងៃពុធនេះថា គណៈកម្មការអឺរ៉ុប និងក្រុមហ៊ុនផលិតឱសថអាមេរិក ភីហ្វីហ្សឺ និងក្រុមហ៊ុនផលិតឱសថអាល្លឺម៉ង់ បាយអូអិនធិច បានឈានដល់កិច្ចព្រមព្រៀង ក្នុងការផ្គត់ផ្គង់វ៉ាក់សាំង COVID-19 រហូតដល់៣០០លានដូស ។ ក្រុមហ៊ុនផលិតឱសថអាមេរិក ភីហ្វីហ្សឺ និងក្រុមហ៊ុនផលិតឱសថអាល្លឺម៉ង់ បាយអូអិនធិច ក៏មានកិច្ចព្រមព្រៀងដាច់ដោយឡែកជាមួយសហរដ្ឋអាមេរិកផងដែរ សម្រាប់ទិញវាក់សាំង COVID-19 ក្នុងទឹកប្រាក់ចំនួន១.៩៥ពាន់លានដុល្លារកាលពីដើមឆ្នាំ២០២០ ។ ដោយឡែកនៅក្រោមកិច្ចព្រមព្រៀងរបស់សហភាពអឺរ៉ុបវិញ ប្រទេសចំនួន២៧នៅប្លុកអអឺរ៉ុប មានសិទ្ធិទិញបាន២០០លានដូស ហើយមានជំរើសក្នុងការទិញ ១០០លានផ្សេងទៀត ហើយបើតាមក្រុមហ៊ុនផលិតឱសថទាំងពីរនេះ ការដឹកជញ្ជូនវ៉ាក់សាំងនឹងត្រូវធ្វើឡើងនាបំណាច់ឆ្នាំ២០២០នេះ ៕
-
ប្រេស៊ីលបើកភ្លើងខៀវអោយក្រុមហ៊ុនផលិតឱសថចិន Sinovac បន្តការសាកល្បងវ៉ាក់សាំង Covid-19 ក្នុងប្រទេសរបស់ខ្លួនឡើងវិញ
ប្រេស៊ីល៖ អាជ្ញាធរសុខាភិបាលប្រេស៊ីល នៅថ្ងៃពុធនេះ បានបើកភ្លើងខៀវអោយក្រុមហ៊ុនផលិតឱសថចិន សាយណូវ៉ាក់-បាយអូធិច បន្តការសាកល្បងវ៉ាក់សាំងប្រឆាំង Covid-19 នៅក្នុងប្រទេសរបស់ខ្លួនឡើងវិញ នេះបើតាមសារព័ត៌មានរ៉យទ័រនៅថ្ងៃទី១២ ខែវិច្ឆិកា ឆ្នាំ២០២០ ។ អាជ្ញាធរសុខាភិបាលប្រេស៊ីល Anvisa បញ្ជាក់ថា ឥឡូវនេះពួកគេបានទទួលព័ត៌មានលម្អិតបន្ថែមទៀត អំពីលក្ខណៈនៃឧប្បត្តិហេតុមិនល្អ ដែលនាំឲ្យបញ្ឈប់ការធ្វើតេស្តវ៉ាក់សាំង CoronaVac របស់ចិន កាលពីថ្ងៃចន្ទសប្តាហ៍នេះនោះហើយ និងថា ព័ត៌មានទាំងនោះ គឺគ្រប់គ្រាន់ដើម្បីអនុញ្ញាតឲ្យបន្តការធ្វើតេស្តវ៉ាក់សាំងឡើងវិញបាន ។ សូមបញ្ជាក់ថា ការអនុញ្ញាតអោយបន្តការធ្វើតេស្តវ៉ាក់សាំងរបស់ចិនក្នុងប្រទេសប្រេស៊ីលខាងលើនេះ បានកើតមានឡើងស្របពេលដែលមន្រ្តីសុខភាពសាធារណៈប្រេស៊ីលនិយាយថា ឧប្បត្តិហេតុមិនល្អ ដែលនាំឲ្យស្លាប់អ្នកទទួលស្ម័គ្រចិត្តចូលរួមធ្វើតេស្ត ដែលប៉ូលីសកំពុងស៊ើបអង្កេតនោះថា ជាការធ្វើអត្តឃាតខ្លួនឯងទេ មិនមានការជាប់ទំនាក់ទំនងជាមួយវ៉ាក់សាំងនោះទេ ៕
-
សហរដ្ឋអាមេរិកបន្តរកឃើញអ្នកឆ្លង Covid-19 ថ្មីៗជាង១៣ម៉ឺននាក់ថែមទៀតក្នុងរយៈពេល២៤ម៉ោង
អាមេរិក៖ សហរដ្ឋអាមេរិកត្រូវបានគេមើលឃើញពីរបាយការណ៍កើនឡើងយ៉ាងគំហុកនៃករណីឆ្លងជម្ងឺ Covid-19 ចាប់តាំងពីដើមខែវិច្ឆិកាកន្លងមក ហើយគិតត្រឹមថ្ងៃព្រហស្បតិ៍សប្តាហ៍នេះ សហរដ្ឋអាមេរិកនៅតែឈរលេខរៀងទី១ ដោយមានអ្នកឆ្លងសរុបចំនួន១០លាន៧០ម៉ឺន៨ពាន់៦៣០នាក់ ស្លាប់ចំនួន២៤ម៉ឺន៧ពាន់៣៩៧នាក់ និងជាសះស្បើយចំនួន៦លាន៦៤ម៉ឺន៨ពាន់៦៧៩នាក់ នេះបើតាមសារព័ត៌មាន CGTN នៅថ្ងៃទី១២ ខែវិច្ឆិកា ឆ្នាំ២០២០ ។ តួយ៉ាងនៅថ្ងៃពុធនេះ (ម៉ោងក្នុងតំបន់) សហរដ្ឋអាមេរិកបានកត់ត្រាថ្មីពីករណីឆ្លងថ្មីៗនៃជំងឺ COVID-19 សរុបរហូតដល់១៣ម៉ឺន២ពាន់៣៧៤ករណី និងអ្នកស្លាប់ថ្មីៗចំនួន១ពាន់៣១៤នាក់បន្ថែមទៀតក្នុងរយៈពេល២៤ម៉ោង ។ ជាច្រើនថ្ងៃមកហើយដែលសហរដ្ឋអាមេរិកបានរាយការណ៍អំពីការបំបែកកំណត់ត្រា នៃចំនួនអ្នកឆ្លង COVID-19 ថ្មីៗក្នុងមួយថ្ងៃលើសជាង១០ម៉ឺននាក់ ។ សូមបញ្ជាក់ថា ការធ្វើបាតុកម្ម ការប្រមូលផ្តុំគ្នា និងការតវ៉ាដ៏ចម្រូងចម្រាស់ ដោយមិនបានអនុវត្តវិធានការសុវត្ថិភាព ត្រូវបានគេជឿជាក់ថា ជាកត្តាចម្បងៗដែលជំរុញអោយករណីឆ្លងថ្មីៗនៃជម្ងឺ COVID-19 កើនឡើងយ៉ាងគំហុកបែបនេះ ៕
-
ម៉ាឡេស៊ីព្យាករណ៍ថា ឧស្សាហកម្មអាកាសចរណ៍ទំនងជាត្រូវការពេល០៣ឆ្នាំដើម្បីងើបចេញពីវិបត្តិ COVID-19
ម៉ាឡេស៊ី៖ ក្រុមហ៊ុនអាកាសចរណ៍នៅម៉ាឡេស៊ី អាចត្រូវការពេលវេលា០៣ឆ្នាំ ដើម្បីទទួលបានភាពល្អប្រសើរឡើងវិញពីវិបត្តិ COVID-19 ដោយផ្អែកលើការផ្ទុះឡើងនៃវីរ៉ុសនៅក្នុងប្រទេស និងក្រៅប្រទេស នេះបើតាមក្រសួងដឹកជញ្ជូនម៉ាឡេស៊ី ចេញផ្សាយដោយសារព័ត៌មានរ៉យទ័រនាថ្ងៃទី១១ ខែវិច្ឆិកា ឆ្នាំ២០២០ ។ ក្រុមហ៊ុនអាកាសចរណ៍នៅទូទាំងពិភពលោក ត្រូវទទួលរងផលប៉ះពាល់ដោយ សារតែការរីករាលដាលនៃជម្ងឺ COVID-19 ដោយសារតែរដ្ឋាភិបាលប្រទេសនានាបានបិទព្រំដែន ហើយជើងហោះហើរត្រូវបានផ្អាក ដើម្បីទប់ស្កាត់ករណីឆ្លងវីរុសដ៏កាចសាហាវមួយនេះ ។ បើតាមរដ្ឋមន្ត្រីក្រសួងដឹកជញ្ជូន លោក Wee Ka Siong គណៈកម្មការអាកាសចរណ៍ម៉ាឡេស៊ី MAVCOM បានកែសម្រួលការព្យាករណ៍ សម្រាប់ចរាចរណ៍អ្នកដំណើរនៅឆ្នាំ២០២០នេះ ។ គណៈកម្មការអាកាសចរណ៍ម៉ាឡេស៊ីបានរំពឹងថា ចំនួនអ្នកធ្វើដំណើរនឹងមានការធ្លាក់ចុះរហូតដល់៧៥.៦ភាគរយ ដែលមានចំនួនត្រឹមតែ២៦.៦លាននាក់ បើប្រៀបធៀបទៅនឹងចំនួន១០៩.២លាននាក់ នៃអ្នកធ្វើដំណើរដែលមានកាលពីឆ្នាំ២០១៩កន្លងទៅ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៥២លាននាក់ ក្នុងនោះស្លាប់ជិត១លាន២៩ម៉ឺននាក់ និងជាសះស្បើយជាង៣៦លាន៦៧ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥២លាន៤២ម៉ឺន៩ពាន់៥៧០ករណី ក្នុងនោះមានអ្នកជម្ងឺសរុបចំនួន១លាន២៨ម៉ឺន៩ពាន់៤៨៣នាក់ស្លាប់ និង ជាសះស្បើយឡើងវិញសរុបចំនួន៣៦លាន៦៧ម៉ឺន៣ពាន់៩៣៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១២ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១០លាន៧០ម៉ឺន៨ពាន់៦៣០នាក់ ស្លាប់ចំនួន២៤ម៉ឺន៧ពាន់៣៩៧នាក់ និងជាសះស្បើយចំនួន៦លាន៦៤ម៉ឺន៨ពាន់៦៧៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៨លាន៦៨ម៉ឺន៤ពាន់៣៩នាក់ ស្លាប់ចំនួន១២ម៉ឺន៨ពាន់១៦៥នាក់ និងជាសះស្បើយ៨លាន៦ម៉ឺន៤ពាន់៥៤៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៥លាន៧៤ម៉ឺន៩ពាន់៧នាក់ ស្លាប់១៦ម៉ឺន៣ពាន់៤០៦នាក់ និងជាសះស្បើយ៥លាន៦ម៉ឺន៤ពាន់៣៤៤នាក់ ៕
-
ថ្ងៃនេះមិនមានករណីវិជ្ជមានវីរុសកូវីដ-១៩ និងមិនមានអ្នកជាសះស្បើយថ្មីទេ
-
ឯកឧត្តម ប្រាក់ សុខុន ៖ ស្ថានភាពសុខភាពរបស់ខ្ញុំគឺ នៅធម្មតា ក្រោយការជួបជាមួយរដ្ឋមន្ត្រីការបរទេសហុងគ្រីរយៈពេល១០ថ្ងៃកន្លងមក
-
សម្ដេចតេជោបញ្ជាក់ថា គ្មានគម្រោងបិទរាជធានីភ្នំពេញ និងការហាមឃាត់ការធ្វើដំណើរពីខេត្តមួយទៅខេត្តមួយនោះទេ
ថ្មីៗនេះមានការបំផុសពាក្យចចាមអារាម និងចាយចាយតគ្នាក្នុងបណ្ដាញសង្គមហ្វេសប៊ុកថា រដ្ឋាភិបាលមានគម្រោងបិទរាជធានីភ្នំពេញ និងខេត្តមួយចំនួន និងការបំផុសឲ្យពលរដ្ឋទិញស្បៀងទុកនោះជាដើម។ នៅព្រឹកថ្ងៃទី១២វិច្ឆិកាឆ្នាំ២០២០នេះ ទំព័រហ្វេសប៊ុកផ្លូវការរបស់សម្ដេចតេជោ ហ៊ុន សែន បានច្រានចោលចំពោះពាក្យចចាមអារាមទាំងនោះ។ ទំព័រហ្វេសប៊ុកររបស់សម្ដេចតេជោ បានាសរសេរថា បងប្អូនជនរួមជាតិជាទីគោរពស្រឡាញ់! ថ្មីៗនេះមានមនុស្សអាក្រក់មួយចំនួនបានបំផុសពាក្យចចាមអារាមថារាជរដ្ឋាភិបាលនឹងបិទរាជធានីភ្នំពេញ និងហាមឃាត់ការធ្វើដំណើរពីខេត្តមួយទៅកាន់ខេត្តមួយ។ ក្នុងឋានៈជាប្រមុខរាជរដ្ឋាភិបាល ខ្ញុំសូមបញ្ជាក់ថានឹងមិនមានការបិទប្រទេស ឬរាជធានីខេត្ត ឬតំបន់ណាមួយនោះទេ។ ការឃោសនាអកុសលរបស់ពួកអាក្រក់ទាំងនេះ សំដៅធ្វើឲ្យ ប្រទេសមានចលាចលទំនិញឡើងថ្លៃ ប្រជាជនរស់នៅមិនបានស្ងប់ចិត្តដើម្បីពួកគេគេងចំណេញខាងនយោបាយតែប៉ុណ្ណោះ។ បញ្ហាសំខាន់ក្នុងការប្រយុទ្ធជាមួយជំងឺកូវីដ-១៩នៅពេលនេះគឺប្រជាជនគ្រប់រូបការពារខ្លួនតាមការណែនាំរបស់ក្រសួងសុខាភិបាល ពិសេសការពាក់ម៉ាស់ ការលាងដៃ ការមិនជួបជុំប្រមូលផ្តុំ ការរក្សាគម្លាតសុវត្ថិភាព។ល។ សម្រាប់ការពាក់ម៉ាស់ដែលកាលពីម្សិលមិញនេះខ្ញុំបានបញ្ជាឲ្យយបញ្ចេញម៉ាស់ក្រណាត់ចំនួន២លានម៉ាស់ជូនទៅសាលារាជធានីភ្នំពេញដើម្បីចែកជូនប្រជាជនក្រីក្រ។ នគរបាលចរាចរណ៍ក៏នឹងជូនម៉ាស់សម្រាប់អ្នកជិះកង់ ជិះម៉ូតូដែលមិនបានពាក់ម៉ាស់។ សូមបងប្អូនពាក់ម៉ាស់ទាំងអស់គ្នាដើម្បីយើងឈានទៅបញ្ចប់ព្រិត្តិការណ៍៣វិច្ឆកាឲ្យបានឆាប់ដើម្បីនាំប្រទេសមកកាន់ភាពប្រក្រតីដូចមុនថ្ងៃ៣ វិច្ឆិកា ២០២០ វិញ។ សម្រាប់បងប្អូនដែលបាននឹងកំពុងធ្វើចត្តាឡីស័កនៅតាមផ្ទះត្រូវបន្តធ្វើឲ្យបានហ្មត់ចត់នឹងសូមអាជ្ញាធរមូលដ្ឋានតាមដានត្រួតពិនិត្យនឹងជួយដោះស្រាយជីវភាពសម្រាប់គ្រួសារក្រីក្រដែលពួកគាត់មិនអាចចេញប្រកបរបររកស៊ីបានក្នុងពេលធ្វើចត្តាឡីស័ក។ ត្រូវផ្តល់ស្បៀងអាហារជូនពួកគាត់កុំឲ្យពួកគាត់ខ្វះស្បៀងអាហារក្នុងពេលធ្វើចត្តាឡីស័ក។ សូមជូនពរបងប្អូនជនរួមជាតិជួបតែសេចក្តីសុខសេចក្តីចំរើន៕ ប្រភព៖ ទំព័រហ្វេសប៊ុកររបស់សម្ដេចតេជោ
-
រដ្ឋមន្រ្តីសុខាភិបាលអេស្ប៉ាញបញ្ជាក់ថា វ៉ាក់សាំង Covid-19 របស់ក្រុមហ៊ុនផលិតឱសថអាមេរិក ភីហ្វីហ្សឺ នឹងផ្តល់អោយអេស្ប៉ាញនៅដើមឆ្នាំ២០២១
អេស្ប៉ាញ៖ អេស្ប៉ាញនឹងទទួលបានវ៉ាក់សាំង COVID-19 ដំបូងបង្អស់របស់ខ្លួន ពីក្រុមហ៊ុនផលិតឱសថអាមេរិក ភីហ្វីហ្សឺ ដែលសហការជាមួយក្រុមហ៊ុនផលិតឱសថអាល្លឺម៉ង បាយអូអិនធិច នៅដើមឆ្នាំ២០២១ ស្ថិតក្រោមកិច្ចព្រមព្រៀងមួយ ដែលកំពុងចរចាដោយសហភាពអឺរ៉ុប នេះបើតាមក្រសួងសុខាភិបាលអេស្ប៉ាញ ចេញផ្សាយដោយសារព័ត៌មានរ៉យទ័រនៅថ្ងៃទី១១ ខែវិច្ឆិកា ឆ្នាំ២០២០ ។ ជាមួយគ្នានេះ រដ្ឋមន្រ្តីក្រសួងសុខាភិបាលអេស្ប៉ាញ លោក សាលវ៉ាដឺ អ៊ីលឡា បានថ្លែងនៅក្នុងកញ្ចក់ទូរទស្សន៍រដ្ឋ TVE ថា ប្រទេសរបស់លោកនឹងទទួលបានវ៉ាក់សាំង COVID-19 ដែលមានប្រសិទ្ធិភាពនេះចំនួន២០លានដូស ដែលវាគ្រប់គ្រាន់នឹងអាចចាក់លើមនុស្សចំនួន១០លាននាក់ដោយឥតគិតថ្លៃ ។ រដ្ឋមន្រ្តីក្រសួងសុខាភិបាលអេស្ប៉ាញរូបនេះ បានសង្កត់ធ្ងន់ថា ការចាក់វ៉ាក់សាំងនេះ នឹងចាប់ផ្ដើមធ្វើឡើងពីខែមេសា ដល់ខែឧសភា ឆ្នាំ២០២១ ដូច្នេះការប្រយុទ្ធប្រឆាំងនឹងជំងឺ COVID-19 នៅអេស្ប៉ាញ នឹងឈានដល់ដំណាក់កាលមួយដែលប្រសើរឡើង ៕
-
រដ្ឋមន្ត្រីកសិកម្ម ឯកឧត្តម វេង សាខុន ប្រកាសលើកពេលអាពាហ៍ពិពាហ៍កូនរបស់លោក ដោយសារវិបត្តិកូវីដ-១៩
តាមគម្រោង អាពាហ៍ពិពាហ៍រវាងកូនប្រុសរបស់លោករដ្ឋមន្ត្រីក្រសួងកសិកម្ម ជាមួយកូនស្រីលោកចាយ បូរិន អ្នកតំណាងរាស្ត្រមណ្ឌលត្បូងឃ្មុំគ្រោងនឹងធ្វើឡើងនៅថ្ងៃទី២០ វិច្ឆិកា ឆ្នាំ២០២០ខាងមុខនេះ។ នៅលើទំព័រហ្វេសប៊ុករបស់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១១ វិច្ឆិកា ឆ្នាំ២០២០នេះ បានចេញជូនដំណឹង ប្រកាសលើកពេលរៀបអាពាហ៍ពិពារហ៍កូនរបស់លោកទៅពេលក្រោយវិញ។ ក្នុងសេចក្ដីជូនដំណឹងបានបញ្ជាក់ថា ដោយសារមានព្រឹត្តិការណ៍៣វិច្ឆិកា ពិធីរៀបអាពាហ៍ពិពារហ៍កូន របស់លោក ដែលគ្រោងនឹងប្រព្រឹត្តទៅនៅថ្ងៃសុក្រទី២០ ខែវិច្ឆិកា ឆ្នាំ២០២០ នៅមជ្ឈមណ្ឌលសន្និបាតនិងពិព័រណ៌កោះពេជ្រ (អគារ F) ត្រូវលើកទៅពេលក្រោយវិញ។ សូមជម្រាបថាឯកឧត្តម វេង សាខុន ជារដ្ឋមន្ត្រីមួយរូប ក្នុងចំណោមរដ្ឋមន្ត្រី ថ្នាក់ដឹកនាំ មន្ត្រីរាជការ និងប្រជាពលរដ្ឋជាង១េពាន់នាក់ផ្សេងទៀត ដែលបានប៉ះពាល់ក្នុងព្រឹត្តិការណ៍៣វិច្ឆិកា ហើយលោក និងភរិយា កំពុងធ្វើចត្តាឡីស័កផងដែរ៕