ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្ញើសារនៅរសៀលថ្ងៃទី៩ វិច្ឆិកា ឆ្នាំ២០២០ ថា៖ លទ្ធផល គឺអវិជ្ជមានទាំងអស់ គឺជាលទ្ធផលល្អសម្រាប់ដំណាក់កាលទី២ក្នុងចំណោម៤ដំណាក់កាល ។ សម្ដេចបញ្ជាក់ថា ខ្ញុំត្រូវធ្វើចត្តាឡីស័កបន្តទៀត នឹងរង់ចាំការធ្វើតេស្តជាលើកទី៣នៅថ្ងៃទី១៤ វិច្ឆិកា និងលើកទី៤ នៅថ្ងៃទី១៨ វិច្ឆិកា ។ សារទាំងស្រុងរបស់ សម្តេចតេជោ ហ៊ុន សែន បន្តថា «ខ្ញុំកំពុងរង់ចាំលទ្ធផលនៃការធ្វើតេស្តបងប្អូនជិត ៩០០ នាក់ផ្សេងទៀតដែលបានប៉ះពាល់ដោយផ្ទាល់ឬដោយប្រយោលពីព្រឹត្តិការណ៍ ដែលខ្ញុំសូមដាក់ឈ្មោះថា (ព្រឹត្តិការណ៍ ៣វិច្ឆិកា)។ ព្រឹត្តិការណ៍ (៣វិច្ឆិកា) នឹងត្រូវបិទបញ្ចប់នៅក្រោយពេលដែលមនុស្សប្រមាណ៩០០នាក់ដឹងថាវិជ្ជមានឬ អវិជ្ជមានដែលត្រូវការពេលប្រមាណ៣សប្តាហ៍ទៀត។ ដើម្បីកំរិតកុំឲ្យមនុស្សកើនឡើង តម្រូវឲ្យអ្នកដែលបាននិងកំពុងធ្វើចត្តាឡីស័កកុំចេញទៅជួបជាមួយមនុស្សផ្សេងទៀត។ ប្រសិនជួបជាមួយអ្នកណាត្រូវយកអ្នកនោះមកធ្វើតេស្តនិងធ្វើចត្តាឡីស័កថែមទៀត ដែលនឹងធ្វើឲ្យកាន់តែលំបាកប្រើពេលកាន់តែយូរមនុស្សកាន់តែច្រើន។ ដើម្បីបញ្ជៀសករណីដូចដែលខ្ញុំលើកឡើងខាងលើ ខ្ញុំសុំចេញបទបញ្ជាឲ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាលពិនិត្យតាមដានគ្រប់មនុស្សដែលបាននិងកំពុងធ្វើចត្តាឡីស័ក ប្រសិនពួកគាត់អនុវត្តន៍មិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័កតាមទីកន្លែងដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាល ឬកងរាជអាវុធហត្ថឲ្យបានហ្មត់ចត់។ នេះគឺជាគន្លឹះក្នុងការឈានទៅបញ្ចប់ព្រឹត្តិការណ៍ ៣វិច្ឆិកា ឲ្យបានឆាប់តាមរយៈកុំឲ្យកើនចំនួនមនុស្សពាក់ព័ន្ធដែលនាំដល់អូសពេលវេលាកាន់តែវែង។ សូមកុំឲ្យកំទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់យើង សូមជួយពន្លត់ភ្លើង និង សុំកុំអង្គុយបក់ផ្សែង។…

យោងតាមសសេចក្ដីប្រកាសពព័ត៌មានរបស់ក្រសួងការបរទេសកម្ពុជា នៅថ្ងៃទី៩វិច្ឆិកានេះ បានឲ្យដឹងថា អ្នកការទូតកម្ពុជាចំនួនពីរនាក់ និងបុគ្គលិកក្នុងស្រុកចំនួនពីរនាក់ នៃស្ថានឯកអគ្គរាជទូតកម្ពុជាប្រចាំសាធារណរដ្ឋបារាំង បាធ្វើតេស្ដសំណាកទទួលបានលទ្ធផល វិជ្ជមានកូវីដ-១៩៕

ក្រសួងសុខាភិបាល៖ រដ្ឋមន្ត្រីក្រសួងការបរទេស និងពាណិជ្ជកម្មហុងគ្រី បានបំពេញទស្សនកិច្ចនៅកម្ពុជានៅថ្ងៃសទី៣វិច្ឆិកាឆ្នាំ២០២០ ហើយលោកត្រូវបានប្រទេសថៃរកឃើញថា មានផ្ទុកវីរុសកូវីដ-១៩នៅថ្ងៃសទី៤វិច្ឆិកាឆ្នាំ២០២០ នៅពេលដែលលោកបន្តបំពេញទស្សនកិច្ចនៅប្រទេសថៃ។ ក្រសួងសុខាភិបាលនៅថ្ងៃទី៩វិច្ឆិកានេះបានបញ្ជាក់ថា ការធ្វើតេស្ដអ្នកប៉ះពាល់ជាមួយលោករដ្ឋមន្ត្រីក្រសួងការបរទេស និងពាណិជ្ជកម្មហុងគ្រី នៅថ្ងៃសទី៨វិច្ឆិកាឆ្នាំ២០២០ មានចំនួន៥២នាក់ ដែលទទួលបានលទ្ធផលពីវិទ្យាស្ថានប៉ាស្ទ័រកម្ពុជា គឺអវិជ្ជមានទាំងអស់។ ដូច្នេះចំនួនសរុបអ្នកប៉ះពាល់ទាំងអស់មានចំនួន៩៤៤នាក់ ដែលបានមកធ្វើតេស្ដពីថ្ងៃទី៤ដល់ថ្ងៃទី៨វិច្ឆិកាឆ្នាំ២០២០ ក្នុងចំណោមនោះមានបុរសម្នាក់ជាអង្គរក្សផ្ទាល់របស់គណៈប្រតិភូហុងគ្រី មានវិជ្ជមានវីរុសកូវីដ-១៩ និងកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ជាមួយគ្នានោះ ក្រសួងសុខាភិបាលបានណែនាំឲ្យអ្នកដែលប៉ះពាល់ទាំងអស់ដែលមានលទ្ធផលតេស្ដលើកទី១ អវិជ្ជមានវីរុសកូវីដ-១៩ ត្រូវបន្តធ្វើចត្តាឡីស័កនៅតាមគេហដ្ឋានឲ្យបានត្រឹមត្រូវតាមការណែនាំរបស់ក្រសួងសុខាភិបាល ហើយត្រូវត្រលប់មកធ្វើតេស្ដវិញចំនួន៣ដងទៀត នៅវិមានមិត្តភាពទីស្ដីការគណៈរដ្ឋមន្ត្រី ដែលមានរៀបចំទីតាំងយកវត្ថុសំណាកសម្រាប់ធ្វើតេស្ដរកវីរុសកូវីដ-១៩ ចាប់ពីម៉ោង៧ព្រឹក ។ ការយកសំណាក នឹងត្រូវយកលើកទី២នៅថ្ងៃទី៩វិច្ឆិកាឆ្នាំ២០២០, លើកទី៣នៅថ្ងៃ១៤វិច្ឆិកាឆ្នាំ២០២០ និងលើកទី៤ នៅថ្ងៃទី១៨វិច្ឆិកាឆ្នាំ២០២០៕

ក្រសួងសុខាភិបាល៖ យោងតាមសេចក្ដីប្រកាសព័ត៌មានរបស់ក្រសួងសុខាភិបាលបានឲ្យដឹងថា នៅព្រឹកថ្ងៃទី៩វិច្ឆិកាឆ្នាំ២០២០ ករណីឆ្លងថ្មីទាំងពីរនាក់នោះ គឺជាបុរសជនជាតិខ្មែរ ម្នាក់មានអាយុ២៩ឆ្នាំ មានអសយដ្ឋាននៅស្រុកកៀនស្វាយ ខេត្តកណ្ដាល និងម្នាក់ទៀតអាយុ៣៨ឆ្នាំ មានអសដ្ឋាននៅក្រុងដូនកែវ ខេត្តតាកែវ។ អ្នកទាំងពីរនាក់នោះ បានធ្វើដំណើរមកពីប្រទេសជប៉ុន បានបន្តជើងហោះហើរនៅប្រទេសកូរ៉េខាងត្បូង និងបានមកដល់ប្រទេសកម្ពុជានៅថ្ងៃទី២៦តុលាឆ្នាំ២០២០។ ការរកឃើញករណីវិជ្ជមាននោះ គឺខណៈដែលគេធ្វើតេស្ដវត្ថុសសំណាកលើទី២របស់ពួកគេ នៅថ្ងៃទី១៣នៃរយៈពេលធ្វើចត្តាឡីស័ករបស់ពួកគេរយៈពេល១៤ថ្ងៃ។ ជាលទ្ធផលដែលផ្ដល់ដោយវិទ្យាស្ថានប៉ាស្ទ័រកម្ពុជា នារាជធានីភ្នំពេញ បានបញ្ជាក់ថា ពួកគេមានវិជ្ជមានវីរុសកូវីដ-១៩ ហើយពួកគេត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។ ក្រសួងសុខាភិបាលបានបញ្ជាក់ថា តាមជើងយន្តហោះជាមួយបុរសពីរនាក់ខាងលើ ពេលមកដល់កម្ពុជា បានធ្វើតេស្ដលើកទី១ ដោយទទួទលបានលទ្ធផលវិជ្ជមានវីរុសកូវីដ-១៩ចំនួន២នាក់ផងដែរ ក្នុងនោះម្នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងម្នាក់ទៀតបានជាសះស្បើយ។ រីឯអ្នកដំណើរចំនួន៣៥នាក់ផ្សេងទឪត ដែលលទ្ធផលអវិជ្ជមានវីរុសកូវីដ-១៩ នៅពេលនោះ ត្រូវបានដាក់ឲ្យធ្វើចត្តាឡីស័កនៅសណ្ឋាគារ២កន្លែងនៅរាជធានីភ្នំពេញ និងនៅវិទ្យាល័យពោធិ៍ចិនតុង។ កម្ពុជាមានអ្នកឆ្លងវីរុសកូវីដ-១៩សរុបចំនួន២៩៧នាក់ ក្នុងនោះបានជាសះស្បើយចំនួន២៨៨នាក់ និងនៅសល់៩នាក់កំពុងសម្រាកព្យាបាលនៅមន្ទីរពេទ្យ៕

រដ្ឋមន្ត្រីក្រសួងការបរទេស និងពាណិជ្ជកម្មហុងគ្រី បានបំពេញទស្សនកិច្ចនៅកម្ពុជានៅថ្ងៃសទី៣វិច្ឆិកាឆ្នាំ២០២០ ហើយលោកត្រូវបានប្រទេសថៃរកឃើញថា មានផ្ទុកវីរុសកូវីដ-១៩នៅថ្ងៃសទី៤វិច្ឆិកាឆ្នាំ២០២០ នៅពេលដែលលោកបន្តបំពេញទស្សនកិច្ចនៅប្រទេសថៃ។ ក្រសួងសុខាភិបាលនៅថ្ងៃទី៥វិច្ឆិកានេះ បានបញ្ជាក់ថា ក្រោយពីទទួលបានសេចក្ដីជូនព័ត៌មាន ស្ដីពីករណីវិជ្ជមានវីរុសកូវីដ-១៩ របស់លោករដ្ឋមន្ត្រីក្រសួងការបរទេស និងពាណិជ្ជកម្មហុងគ្រី ក្នុងពេលដែលលោកកំពុងបំពេញបេសកកម្មផ្លូវការនៅប្រទេសថៃ នៅថ្ងៃសទី៤វិច្ឆិកាឆ្នាំ២០២០ ក្រសួងសុខាភិបាលកម្ពុជា បានធ្វើការស្រាវជ្រាវភ្លាមៗ ដើម្បីរកអ្នកដែលបានប៉ះពាល់ជាមួយលោករដ្ឋមន្ត្រី ក្នុងរយៈពេលដែលបានធ្វើទស្សនកិច្ចផ្លូវការនៅប្រទេសកម្ពុជា កាលពីថ្ងៃទី៣វិច្ឆិកាឆ្នាំ២០២០កន្លងទៅ និងបានយកវិត្ថុសំណាកអ្នកដែលប៉ះពាល់ទៅវិភាគ នៅវិទ្យាស្ថានប៉ាស្ទ័រកម្ពុជា។ ក្រសួងសុខាភិបាលបានបញ្ជាក់ថា គិតត្រឹមម៉ោង១១យប់ថ្ងៃទី៤វិច្ឆិកា អ្នកប៉ះពាល់សរុបចំនួន៦២៨នាក់ ត្រូវបានធ្វើតេស្ដសំណាកដោយវិទ្យាស្ថានប៉ាស្ទ័រកម្ពុជា ដែលទទួលបានលទ្ធផលអវិជ្ជមានវីរុសកូវីដ-១៩ទាំងអស់គ្នា។ ក្រសួងសុខាភិបាលបានបញ្ជាក់ទៀតថា នៅថ្ងៃទី៥វិច្ឆិកាឆ្នាំ២០២០ ការធ្វើតេស្ដអ្នកប៉ះពាល់លោករដ្ឋមន្ត្រីក្រសួងការបរទេស និងពាណិជ្ជកម្មហុងគ្រី មានចំនួន២១២នាក់ ក្នុងនោះមានជនជាតិហុងគ្រីម្នាក់ផងដែរ ហើយទទួលបានលទ្ធផលអវិជ្ជមានវីរុសកូវីដ-១៩ទាំងអស់គ្នា។ ដូច្នេះចំនួនសរុបអ្នកប៉ះពាល់ទាំងអស់មាន៨៤០ បានធ្វើតេស្ដ សម្រាប់ថ្ងៃទី៤និងទី៥វិច្ឆិកា ដោយទទួលបានលទ្ធផលអវិជ្ជមានវូរុសកូវីដ-១៩ទាំងអស់។ ជាមួយគ្នានោះ ក្រសួងសុខាភិបាលបានណែនាំឲ្យអ្នកដែលប៉ះពាល់ទាំងអស់ដែលមានលទ្ធផលតេស្ដលើកទី១ អវិជ្ជមានវីរុសកូវីដ-១៩ ត្រូវបន្តធ្វើចត្តាឡីស័កនៅតាមគេហដ្ឋានឲ្យបានត្រឹមត្រូវតាមការណែនាំរបស់ក្រសួងសុខាភិបាល ហើយត្រូវត្រលប់មកធ្វើតេស្ដវិញចំនួន៣ដងទៀត នៅវិមានមិត្តភាពទីស្ដីការគណៈរដ្ឋមន្ត្រី ដែលមានរៀបចំទីតាំងយកវត្ថុសំណាកសម្រាប់ធ្វើតេស្ដរកវីរុសកូវីដ-១៩ ចាប់ពីម៉ោង៧ព្រឹក ។ ការយកសំណាក នឹងត្រូវយកលើកទី២នៅថ្ងៃទី៩វិច្ឆិកាឆ្នាំ២០២០, លើកទី៣នៅថ្ងៃ១៤វិច្ឆិកាឆ្នាំ២០២០ និងលើកទី៤ នៅថ្ងៃទី១៨វិច្ឆិកាឆ្នាំ២០២០៕