អង់គ្លេស៖ រាល់អ្នកដំណើរទាំងអស់ចូលមកកាន់អង់គ្លេសពីក្រៅប្រទេស នឹងត្រូវប្រឈមនូវការធ្វើចត្តាឡីស័ក ឬនៅដាច់ដោយឡែកពីគេរយៈពេល១៤ថ្ងៃ ខណៈរដ្ឋាភិបាលនឹងផ្តល់ព័ត៌មានលំអិតនាពេលក្រោយទៀត នេះបើតាមមន្រ្តីជាន់ខ្ពស់មួយរូបរបស់អង់គ្លេស និងត្រូវបានចុះផ្សាយនៅថ្ងៃ២៣ ខែឧសភា ឆ្នាំ២០២០ ។ ច្បាប់នៃការធ្វើចត្តាឡីស័កខាងលើនេះ នឹងត្រូវអនុវត្តចំពោះការមកដល់របស់អ្នកដំណើរអន្តរជាតិទៅកាន់ចក្រភពអង់គ្លេស ហើយក៏រួមបញ្ចូលទាំងជនជាតិអង់ គ្លេសផ្ទាល់ផងដែរ ដែលវិលត្រឡប់មកប្រទេសវិញ ខណៈច្បាប់នេះនឹងចាប់ផ្តើមអនុវត្តន៍ពីថ្ងៃទី០៨ ខែមិថុនាតទៅ នេះបើតាមរដ្ឋមន្រ្តីមាតុភូមិអង់គ្លេសលោកស្រី ព្រីទី ផាថែល ។ សូមជម្រាបថា នៅទូទាំងចក្រភពមានចំនួនអ្នកឆ្លងជម្ងឺ COVID-19 សរុបកើនឡើងដល់២៥ម៉ឺន៤ពាន់១៩៥ករណី ក្នុងនោះមានអ្នកជម្ងឺ៣ម៉ឺន៦ពាន់៣៩៣នាក់ស្លាប់ និងជាសះស្បើយឡើងវិញមិនទាន់មានព័ត៌មាននៅឡើយទេ ៕

ចិន៖ ការធ្វើតេស្តវ៉ាក់សាំង COVID-19 របស់ប្រទេសចិន ជាបឋមត្រូវបានរកឃើញថា មានសុវត្ថិភាព និងអាចបង្កើតឲ្យមានអង់ទីករប្រឆាំង COVID-19 នៅក្នុងខ្លួនមនុស្សបាន នេះបើតាមសារព័ត៌មានស៊ីនហួរនៅថ្ងៃទី២២ ខែឧសភា ឆ្នាំ២០២០ ។ ការរកឃើញនេះ គឺជាលទ្ធផលប្រកបដោយក្តីសង្ឃឹម ដើម្បីបន្តឆ្ពោះទៅរកការសម្រេចបានជាផ្លូវការនូវវ៉ាក់សាំងប្រឆាំង COVID-19 ដែលមានប្រសិទ្ធភាព និងសុវត្ថិភាពមួយរយភាគរយ ។សូមជម្រាបថា នាពេលថ្មីៗនេះ ក្រុមហ៊ុនផលិតឱសថអាម៉េរិក Moderna ក៏បានប្រកាសពីដំណឹងល្អផងដែរ នោះគឺលទ្ធផលបឋមនៃការធ្វើតេស្តវ៉ាក់សាំង COVID-19 របស់ពួកគេ ទទួលបានលទ្ធផលវិជ្ជមាន ៕

បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥លាន៣០ម៉ឺន៤ពាន់៣៣ករណី ក្នុងនោះមានអ្នកជម្ងឺសរុបចំនួន៣៤ម៉ឺន៤នាក់ស្លាប់ និង ជាសះស្បើយឡើងវិញសរុបចំនួន២លាន១៥ម៉ឺន៨ពាន់៥៦៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometer នៅថ្ងៃទី២៣ ខែឧសភា ឆ្នាំ២០២០ ។ បច្ចុប្បន្នជម្ងឺ COVID-19 ដែលត្រូវបានអង្គការសុខភាពពិភពលោក WHO ប្រកាសចាត់ទុកជា «ជំងឺរាតត្បាតជាសកល» នោះ បានវាយលុកចូលដល់ប្រទេស និង ដែនដីសរុបចំនួន២១៣ហើយនៅទូទាំងសកលលោក ។ ខាងក្រោមនេះជាឈ្មោះ និង លេខរៀងនៃបណ្តាប្រទេសដែលមានចំនួនអ្នកស្លាប់ និង ឆ្លងជម្ងឺ COVID-19 ច្រើនជាងគេ៖ ១-សហរដ្ឋអាម៉េរិក ចំនួនអ្នកឆ្លងកើនឡើងដល់១លាន៦៤ម៉ឺន៥ពាន់៩៤ករណី ក្នុងនោះមានអ្នកជម្ងឺសរុប៩ម៉ឺន៧ពាន់៦៤៧នាក់ស្លាប់ និងអ្នកជាសះស្បើយឡើងវិញសរុប៤០ម៉ឺន៣ពាន់២០១នាក់ ។ ២-ប្រេស៊ីល ចំនួនអ្នកឆ្លងកើនឡើងដល់៣៣ម៉ឺន២ពាន់៣៨២ករណី ក្នុងនោះមានអ្នកជម្ងឺសរុប២ម៉ឺន១ពាន់១១៦នាក់ស្លាប់ និងអ្នកជាសះស្បើយឡើងវិញសរុប១៣ម៉ឺន៥ពាន់៤៣០នាក់ ។ ៣-រុស្ស៊ី ចំនួនអ្នកឆ្លងកើនឡើងដល់៣២ម៉ឺន៦ពាន់៤៤៨ករណី ក្នុងនោះមានអ្នកជម្ងឺសរុប៣ពាន់២៤៩នាក់ស្លាប់ និងអ្នកជាសះស្បើយឡើងវិញសរុប៩ម៉ឺន៩ពាន់៨២៥នាក់ ។ ៤-អេស្ប៉ាញ ចំនួនអ្នកឆ្លងកើនឡើងដល់២៨ម៉ឺន១ពាន់៩០៤ករណី ក្នុងនោះមានអ្នកជម្ងឺសរុប២ម៉ឺន៨ពាន់៦២៨នាក់ស្លាប់ និងអ្នកជាសះស្បើយឡើងវិញសរុប១៩ម៉ឺន៦ពាន់៩៥៨នាក់ ។ ៥-អង់គ្លេស ចំនួនអ្នកឆ្លងកើនឡើងដល់២៥ម៉ឺន៤ពាន់១៩៥ករណី ក្នុងនោះមានអ្នកជម្ងឺសរុប៣ម៉ឺន៦ពាន់៣៩៣នាក់ស្លាប់…

សហរដ្ឋអាម៉េរិក៖ លោក ដូណាល់ ត្រាំ បានគូសបញ្ជាក់ដោយសង្កត់ធ្ងន់ថា សហរដ្ឋអាម៉េរិកនឹងមិនបិទទ្វារម្តងទៀតឡើយ ក្នុងករណីមានរលកទី២ នៃការឆ្លងរាតត្បាតពីមេរោគ COVID-19 នេះបើតាមសារព័ត៌មាន CGTN នៅថ្ងៃទី២២ ខែឧសភា ឆ្នាំ២០២០ ។ ការអះអាងបែបនេះរបស់លោក ដូណាល់ ត្រាំ ធ្វើឡើងអំឡុងដំណើរទស្សនកិច្ចនៅឯរោងចក្ររបស់ក្រុមហ៊ុនហ្វ័ដ ក្នុងរដ្ឋមីឈីហ្គេន នៅថ្ងៃព្រហស្បត្តិ៍ម្សិលមិញ ខណៈដែលក្រុមអ្នកជំនាញសុខាភិបាលអាម៉េរិក បានព្រមានអំពីលទ្ធភាពនៃរលកឆ្លងរាតត្បាតខ្លាំងជាលើកទីពីរ នៅរដូវស្លឹកឈើជ្រុះ ឬរដូវរងាខាងមុខ ។ យ៉ាងណាមិញ បណ្តារដ្ឋទាំង៥០របស់សហរដ្ឋអាមេរិកបានប្រកាសពីផែនការចាប់ផ្តើមបន្ធូរបន្ថយការរឹតបន្តឹង ដើម្បីទប់ស្កាត់ការឆ្លងរាតត្បាតនៃជម្ងឺ COVID-19 ដោយរដ្ឋទាំងអស់នោះ មានគោលដៅបើកទ្វារសេដ្ឋកិច្ចឡើងវិញក្នុងល្បឿនខុសៗគ្នា ។ គួរបញ្ជាក់ផងដែរថា គិតត្រឹមថ្ងៃទី២២ ខែឧសភា ឆ្នាំ២០២០ នៅទូទាំងប្រទេសមហាអំណាចពិភពលោកមួយនេះ មានចំនួនអ្នកឆ្លងវីរុសកូរ៉ូណាសរុបកើនឡើងដល់១លាន៦២ម៉ឺន១ពាន់១៩៦ករណី ក្នុងនោះមានអ្នកជម្ងឺ៩ម៉ឺន៦ពាន់៣៥៩នាក់ស្លាប់ និងអ្នកជាសះស្បើយឡើងវិញសរុប៣៨ម៉ឺន២ពាន់២៤៤នាក់ ៕

ថៃ៖ ប្រទេសថៃនឹងបន្តអូសបន្លាយពេលដាក់រដ្ឋក្នុងគ្រាអាសន្នបន្ថែមទៀត ដោយ សារតែការឆ្លងរាតត្បាតនៃមេរោគ COVID-19 រហូតដល់ចុងខែមិថុនាខាងមុខ ដើម្បីរក្សាករណីឆ្លងថ្មីៗឱ្យស្ថិតក្រោមការគ្រប់គ្រង ខណៈរដ្ឋាភិបាលកំពុងរៀបចំបន្ធូរបន្ថយការរឹតបន្តឹងបន្ថែមទៀត នេះបើតាមសារព័ត៌មាន CNA នៅថ្ងៃទី២២ ខែឧសភា ឆ្នាំ២០២០។ ផ្សារទំនើប និងអាគារស្នាក់នៅជាច្រើននឹងបើកដំណើរការឡើងវិញនាថ្ងៃចុងសប្តាហ៍ បន្ទាប់ពីត្រូវបានបិទទ្វារអស់រយៈពេល០២ខែ ដោយសារតែអត្រាឆ្លងជម្ងឺ COVID-19 បានថមថយចុះវិញ ប៉ុន្តែបារកម្សាន្ត ក្លឹបរាត្រី រោងភាពយន្ត សួនកុមារ និងកន្លែងលេងកីឡានៅតែបន្តស្ថិតក្រោមការរឹតត្បិតនៅឡើយ ។ សូមជម្រាបថា គិតត្រឹមថ្ងៃទី២២ ខែឧសភា ឆ្នាំ២០២០ នៅទូទាំងប្រទេសថៃ មានចំនួនអ្នកឆ្លងវីរុសកូរ៉ូណាសរុបកើនឡើងដល់៣ពាន់៣៧ករណី ក្នុងនោះមានអ្នកជម្ងឺ៥៦នាក់ស្លាប់ និងអ្នកជាសះស្បើយឡើងវិញសរុប២ពាន់៩១០នាក់ ៕

ចិន៖ នាយករដ្ឋមន្រ្តីចិនលោក លី ខឺឈាង បានដាក់ចេញនូវផែនទីបង្ហាញផ្លូវសម្រាប់ប្រទេសចិន ដើម្បីជំនះឧបសគ្គនានាដែលបង្កឡើងដោយជម្ងឺ COVID-19 នៅថ្ងៃសុក្រនេះ នៅពេលផ្តល់របាយការណ៍ការងាររបស់រដ្ឋាភិបាលដែលមិនមានគោលដៅជាក់លាក់ចំពោះកំណើនសេដ្ឋកិច្ចសម្រាប់ឆ្នាំ២០២០ ប៉ុន្តែបានរាប់បញ្ចូលនូវវិធានការណ៍ដើម្បីគាំទ្រដល់អាជីវកម្ម និងការងារ នេះបើតាមសារព័ត៌ មាន CGTN នៅថ្ងៃទី២២ ខែឧសភា ឆ្នាំ២០២០ ។ នាឱកាសនោះ លោក លី ខឺឈាង បានរាយការណ៍អំពីការងាររដ្ឋាភិបាលក្នុងរយៈពេលមួយឆ្នាំកន្លងទៅជូនមហាសន្និបាត និង លើកឡើងសេចកី្តស្នើចំពោះការងារឆ្នាំនេះ ព្រមទាំងលើកជូនឱ្យមហាសន្និបាតពិនិត្យពិភាក្សា ។ ក្រៅពីនេះមហាសន្និបាតនៅមានរបៀបវារៈពីរ ដែលពាក់ព័ន្ធនឹងការងារតាក់តែងច្បាប់ គឺពិនិត្យពិភាក្សាសេចក្តីព្រាងច្បាប់ក្រមរដ្ឋប្បវេណីដំបូងរបស់ប្រទេសចិន ព្រមទាំងសេចកី្តព្រាងច្បាប់ស្តីពីការបង្កើតរបបច្បាប់ និងយន្តការអនុវត្តឱ្យបានពេញលេញ សម្រាប់គាំពារសន្តិសុខនៃតំបន់រដ្ឋបាលពិសេសហុងកុង ។ សូមជម្រាបថា មហាសនិ្នបាតប្រចាំឆ្នាំ នៃសភាតំណាងប្រជាជនទូទាំងប្រទេសចិន បានប្រារព្ធធ្វើនៅរដ្ឋធានីប៉េកាំង នៅក្នុងថ្ងៃសុក្រនេះ ដោយអ្នកដឹកនាំបក្ស និងរដ្ឋ ព្រមទាំងលោក ស៊ី ជីនភីង ប្រធានរដ្ឋចិន ក៏មានវត្តមានផងដែរ។ ក្នុងពិធីបើកនៅថ្ងៃដដែល មុនដំបូងអង្គប្រជុំគ្រប់រូបបានឈរស្មឹងស្មាត ដើម្បីរំលែកទុក្ខវីរៈជនដែលបានពលីជីវិត ក្នុងការប្រយុទ្ធប្រឆាំងនឹងជំងឺកូវីដ១៩ និងអ្នកស្លាប់ដោយសារជំងឺនេះ ។ តំណាងប្រជាជនទូទាំងប្រទេសចិន ចំនួន២.៨៩៧រូបបានចូលរួមពិធីបើក ដែលសមស្របនឹងការកំណត់ខាងច្បាប់…

ជប៉ុន៖ សេដ្ឋកិច្ចជប៉ុនបានធ្លាក់ចុះក្នុងអត្រាប្រចាំឆ្នាំ៣.៤ភាគរយគិតចាប់ពីខែមករា ដល់ខែមីនាកន្លងមក នេះបើតាមទិន្នន័យរបស់រដ្ឋាភិបាល និងត្រូវបានចុះផ្សាយដោយសារព័ត៌មាន CGTN នាពេលថ្មីៗ ។ បើតាមទិន្នន័យផ្លូវការនោះ ប្រទេសជប៉ុនបានធ្លាក់ចូលក្នុងវិបត្តិសេដ្ឋកិច្ចលើកដំបូងរបស់ខ្លួនចាប់តាំងពីឆ្នាំ ២០១៥ ដោយប្រទេសមានសេដ្ឋកិច្ចធំបំផុតទីបីនៅលើពិភពលោកមួយនេះ បានធ្លាក់ចុះ០.៩ភាគរយនៅក្នុងត្រីមាសទី១ឆ្នាំនេះ ខណៈជប៉ុនកំពុងទប់ទល់នឹងវិបត្តិCOVID-19 ។ ការធ្លាក់ចុះនៃផលិតផលក្នុងស្រុកសរុបនេះ បានកើតមានឡើងបន្ទាប់ពីការធ្លាក់ចុះ១.៩ ភាគរយនៅក្នុងត្រីមាសទី៤ ឆ្នាំ២០១៩ ខណៈការដំឡើងពន្ធ និង ព្យុះទីហ្វុងបានវាយប្រហារប្រទេសជប៉ុនយ៉ាងខ្លាំង សូម្បីមុនពេលដែលជំងឺរាតត្បាតបានបង្ខំឱ្យបិទទ្វារសេដ្ឋកិច្ចភាគច្រើនទៅទៀត ។ សូមជម្រាបថា វិស័យទេសចរណ៍ជប៉ុនបានធ្លាក់ចុះ៩០ភាគរយ ស្របពេលដែលឧស្សាហកម្ម និងពាណិជ្ជកម្មបានជាប់គាំង ហើយវីរុសកូរ៉ូណាក៏បានបង្ខំឱ្យមានការពន្យារពេលព្រឹត្តិការណ៍អូឡាំពិកទីក្រុងតូក្យូ ឆ្នាំ២០២០នេះផងដែរ ដែលគេមើលឃើញថា ជាការជំរុញដល់សេដ្ឋកិច្ច ៕ធ.ដ

អង់គ្លេស៖ ការិយាល័យជាតិស្ថិតិរបស់ចក្រភពអង់គ្លេស បានអោយដឹងថា មានពលរដ្ឋអង់គ្លេសជាង៨៥ម៉ឺន៦ពាន់នាក់បានដាក់ពាក្យសុំជំនួយរដ្ឋពេលអត់ការងារ កាលពីខែមេសាឆ្នាំ២០២០ ដែលនេះជាចំនួនច្រើនបំផុតក្នុងរយៈពេលជិត២៥ឆ្នាំ នេះបើតាមសារព័ត៌មាន CAN នាពេលថ្មីៗ ។ ចំនួនខែមេសាខាងលើនេះ ធ្វើឲ្យតួលេខអ្នកអត់ការងារសរុបនៅអង់គ្លេស កើនឡើងដល់២.១លាននាក់ ។ បើតាមសេដ្ឋវិទូនោះ ស្ថានភាពអត់ការងារនៅអង់គ្លេសអាចធ្ងន់ធ្ងរជាងនេះ ប្រសិនបើរដ្ឋាភិបាលមិនបានបង្កើតកម្មវិធីរក្សាការងារ ដោយរដ្ឋចេញប្រាក់ខែឲ្យការងារមួយចំនួននោះទេ ។ សូមជម្រាបថា អត្រាអត់ការងារនៅចក្រភពអង់គ្លេស កាលពីខែមេសា ឆ្នាំ២០២០នេះ មានចំនួន៣.៩ភាគរយ ហើយរំពឹងថា នឹងអាចកើនឡើងដល់១០ភាគរយត្រឹមត្រីមាសទី៣នៃឆ្នាំ២០២០នេះ ប៉ុន្តែតួលេខនេះ នៅតែទាបជាងអត្រាអត់ការងារនៅសហរដ្ឋអាម៉េរិក ដែលត្រឹមខែមេសាមកនេះ បានកើនឡើងដល់១៤.៧ភាគរយឯណោះ ៕ធ.ដ  

ក្រសួងសុខាភិបាល៖ សេចក្តីព័ត៌មានរបស់ក្រសួងសុខាភិបាល នៅថ្ងៃទី២២ ខែឧសភា ឆ្នាំ២០២០នេះ អោយកែតម្រូវដំណើរការឡើងវិញនូវិស័យកីឡាជាជំហានៗ៕

វៀតណាម៖ ក្រសួងសុខាភិបាលវៀតណាមបានឲ្យដឹងថា ពុំមានករណីឆ្លងថ្មី នៃជំងឺកូវីដ១៩ក្នុងសហគមន៍អស់រយៈពេល៣៥ថ្ងៃមកនេះ។ មកទល់ពេលនេះ វៀតណាមមានអ្នកជំងឺកូវីដ១៩ ចំនួន៣២៤ករណី ជាសះស្បើយ ២៦៦នាក់ កំពុងសម្រាកព្យាបាលចំនួន៥៨នាក់។ ក្រៅពីនេះ មានមនុស្ស១៣០០០នាក់ត្រូវបានដាក់ឲ្យដាច់ដោយឡែក ដើម្បីតាមដានសុខភាព និងពុំមានអ្នកស្លាប់ដោយសារជំងឺកូវីដ១៩ នៅប្រទេសវៀតណាម នៅឡើយទេ។ អ្វីគួរឲ្យកត់សម្គាល់ ពលរដ្ឋវៀតណាមប្រមាណ២៤០នាក់ ជាប់គាំងនៅប្រទេសមីយ៉ាន់ម៉ា បានវិលត្រលប់ចូលមាតុប្រទេសវិញហើយ កាលពីម្សិលមិញ ក្រោយពេលដែលពលរដ្ឋវៀតណាមជិត៣០០នាក់ ទើបតែត្រលប់មកពីប្រទេសថៃផងដែរ៕ធ.ដ