មណ្ឌលគិរី៖ ក្រុមហ៊ុន Socfin Cambodia ដែលជាក្រុមហ៊ុនឯកជនគ្រប់គ្រងចម្ការកៅស៊ូ បានប្រគល់សម្ភារបរិក្ខាវេជ្ជសាស្រ្ត ដែលជាឧបករណ៍សម្រាប់វាស់កម្តៅអេឡេចត្រូនិចចំនួនប្រាំ ជូនទៅដល់មន្ទីរសុខាភិបាលខេត្តមណ្ឌគិរី ។ ឧបករណ៍វេជ្ជសាស្រ្តទាំងនេះ ត្រូវបានទទួលដោយវេជ្ជបណ្ឌិត ប៊ុន សួរ ដែលជាប្រធានមន្ទីរសុខាភិបាលខេត្តមណ្ឌលគីរី ហើយនឹងត្រូវដាក់ឲ្យប្រើប្រាស់ក្នុងការបង្ការនៃការរីករាលដាលនៃជំងីផ្លូវដង្ហើមដ៏កាចសាហាវនេះ ក៏ដូចជាដើម្បីដោះស្រាយស្ថានភាពសុខភាពនាពេលបច្ចុប្បន្ន ។ ក្រៅពីសកម្មភាពដែលបានអនុវត្តន៍ក្នុងការបង្ការ នៃការរីករាលដាលនៅក្នុងចម្ការរបស់ខ្លួន ក្នុងលើកកម្ពស់ការយល់ដឹងពីសំណាក់និយោជិករបស់ខ្លួន ក្រុមហ៊ុន Socfin Cambodia ក៏កំពុងពង្រឹងកិច្ចសហការយូរអង្វែងជាមួយមន្ទីរសុខាភិបាលក្នុងតំបន់ផងដែរ។ ការគាំទ្រដល់សេវាសាធារណៈដើម្បីផ្តល់ផលប្រយោជន៍ដល់សហគមន៍មូលដ្ឋាន គឺជាឆន្ទៈរបស់ក្រុមហ៊ុនក្នុងការចូលរួមក្នុងទំនួលខុសត្រូវចំពោះសង្គម គឺចាប់មានតាំងពីការឈានជើងចូលរបស់ខ្លួន នៅក្នុងព្រះរាជាណាចក្រតាំងពីលើកដំបូងមកម្លេះ។ លោក Jef Boedt អគ្គនាយក ប្រតិបត្តិទូទៅនៃក្រុមហ៊ុន Socfin Cambodia បានមានប្រសាសន៍ថា“ សេវាសុខាភិបាលសាធារណៈកំពុងត្រូវបានរៀបចំក្នុងការការពារពីជម្ងឺផ្លុវដង្ហើមដ៏កាចសាហាវ កូវីត១៩មួយនេះ គឺតាមរយៈការណែនាំរបស់ក្រសួងសុខាភិបាល ក៏ដូចជាក្នុងការតាមដានពីស្ថានភាពសុខភាពរបស់ខ្លួន និងការប្រុងប្រយ័ត្នជាមួយមនុស្សនៅជុំវិញខ្លួនផងដែរ ។ ក្រុមហ៊ុនរបស់យើងមានគោលបំណងគាំទ្រដល់រដ្ឋាភិបាលកម្ពុជា និងសេវាសាធារណៈក្នុងការកាត់បន្ថយផលប៉ះពាល់អវិជ្ជមានរបស់វីរុស ហើយនឹងការការពារពីការរីករាលដាលនៅក្នុងខេត្តទាំងមូល ពោលគឺតាមរយៈការផ្តល់សម្ភារវេជ្ជសាស្រ្តអេឡិចត្រូនិច សម្រាប់វាស់កម្តៅដល់មន្ទីរសុខាភិបាលខេត្តសម្រាប់ធ្វើការសម្របសម្រួល ក្នុងការស្វែករក និងតាមដានករណី ដែលនឹងអាចកើតមានពីការរីករាលដាលនៃជំងឺនេះ ។ កិច្ចប្រជុំនេះក៏ជាឱកាសមួយសម្រាប់ លោកវេជ្ជបណ្ឌិត ប៊ុន សួរ…

បារាំង៖ អ្នកជំងឺ COVID-19 ចំនួន២៤០នាក់បន្ថែមទៀតបានស្លាប់គិតត្រឹមរយៈពេល២៤ម៉ោងប៉ុណ្ណោះ ដែលប្រការនេះ នាំឲ្យតួលេខមនុស្សបាត់បង់ជីវិតសរុបកើនឡើងដល់១.១០០នាក់ នៅទូទាំងប្រទេស នេះបើតាមសារព័ត៌មាន CNA ដកស្រង់ប្រភពពីអាជ្ញាធរសុខាភិបាលបារាំង នៅថ្ងៃទី២៥ ខែមីនា ឆ្នាំ២០២០ ។ ប្រភពដដែលបានឱ្យដឹងទៀតថា តួលេខអ្នកស្លាប់ជាផ្លូវការខាងលើនេះគឺត្រូវបានរាប់ចំពោះមនុស្សដែលបានស្លាប់ដោយសារវីរុស COVID-19 នៅក្នុងមន្ទីរពេទ្យនានាទូទាំងប្រទេសប៉ុណ្ណោះ ខណៈអ្នកដែលបាត់បង់ជីវិតនៅតាមមណ្ឌលចាស់ជរានោះ គឺមិនទាន់ត្រូវបានរាប់បញ្ចូលនៅឡើយទេ ។ ដោយឡែកក្រៅពីតួលេខអ្នកស្លាប់នោះ ចំនួនអ្នកឆ្លងមេរោគ COVID-19 នៅទូទាំងប្រទេសបារាំងក៏បានកើនឡើងដល់២២.៣០០ករណីផងដែរ ក្នុងនោះអ្នកជំងឺ ១០.១៧៦នាក់កំពុងសម្រាកព្យាបាលនៅមន្ទីរពេទ្យ ហើយ២.៥១៦នាក់នៅក្នុងចំណោមនោះទៀត កំពុងស្ថិតក្នុងការសង្គ្រោះបន្ទាន់ ៕

រុស្ស៊ី៖ ចំនួនសរុបនៃអ្នកឆ្លងមេរោគ COVID-19 នៅទូទាំងប្រទេសរុស្ស៊ី រហូតមកទល់នឹងពេលនេះ បានកើនឡើងពី៥៧នាក់ ដល់៤៩៥ករណីហើយ ក្នុងនោះមានអ្នកជំងឺសរុប២២នាក់ បានជាសះស្បើយឡើងវិញ នេះបើតាមសារព័ត៌មាន RT នៅថ្ងៃទី២៥ ខែមីនា ឆ្នាំ២០២០ ។ ជាវិធានការបង្ការ និងទប់ស្កាត់បន្ទាន់នោះ រុស្ស៊ីបានសម្រេចឲ្យបិទក្លិបកម្សាន្ត រោងកុន និងកន្លែងជួបជុំបែបកម្សាន្តមួយចំនួនទៀតនៅទូទាំងប្រទេសជាបណ្តោះអាសន្ន ដើម្បីជាវិធានការក្តៅបន្ថែមទៀត ក្នុងការទប់ស្កាត់ការឆ្លងរាលដាល នៃវីរុស COVID-19 ។ បន្ថែមលើនេះ ប្រជាជនដែលមកពីប្រទេសរងគ្រោះធ្ងន់ធ្ងរដោយសារតែជម្ងឺផ្លូវដង្ហើមថ្មីនេះ ហើយចូលមកកាន់ប្រទេសរុស្ស៊ីនោះ អាជ្ញាធររុស្ស៊ីនឹងតម្រូវឱ្យស្នាក់នៅដាច់ដោយឡែកពីគេសិន ដើម្បីពិនិត្យសុខភាពស្របតាមស្តង់ដា ៕

ហ្វីលីពីន៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ សម្រេចចុះហត្ថលេខាលើច្បាប់ពិសេសមួយ ដែលនឹងផ្តល់សិទ្ធិអំណាចដល់រូបលោកនូវអំណាចបម្រុង ដែលចាំបាច់អនុវត្តន៍វិធានការជាបន្ទាន់ ដើម្បីដោះស្រាយបញ្ហារាតត្បាតនៃជម្ងឺ COVID-19 នេះបើតាមសារព័ត៌មានស៊ីនហួរ នៅថ្ងៃទី២៥ ខែមីនា ឆ្នាំ២០២០ ។ ទន្ទឹមគ្នា បើតាមអ្នកនាំពាក្យវិមានប្រធានាធិបតីហ្វីលីពីន លោក សាល់វ៉ាដឺ ផេនេឡូ ច្បាប់នេះនឹងផ្តល់អំណាចដល់លោក ឌូទើតេ ដើម្បីអនុវត្តន៍គោលនយោបាយជាតិប្រកបដោយប្រសិទ្ធភាព ក្នុងការទប់ស្កាត់មេរោគ COVID-19 ។ បន្ថែមលើនេះ ច្បាប់ខាងលើក៏នឹងជួយពន្លឿននីតិវិធីនានា ដែលមានជាប់ពាក់ព័ន្ធនឹងបញ្ហាCOVID-19 ផងដែរ ក្នុងនោះរួមមានការទទួលស្គាល់ឧបករណ៍ធ្វើតេស្ត ជួយសម្រួលដល់ការធ្វើតេស្តរោគភ្លាមៗលើករណីដែលសង្ស័យ និងផ្តល់ប្រាក់ឧបត្ថមបន្ទាន់ដល់គ្រួសារដែលមានប្រាក់ចំណូលទាបជាដើម ។ សូមជម្រាបថា រហូតមកទល់នឹងពេលនេះ ហ្វីលីពីនបានកត់ត្រាអ្នកឆ្លងមេរោគ COVID-19 ចំនួន៥៥២ករណីនៅទូទាំងប្រទេស ក្នុងនោះមានអ្នកជំងឺ៣៥នាក់ បាត់បង់ជីវិត ខណៈអ្នកជំងឺ២០នាក់ ទៀតបានជាសះស្បើយឡើងវិញ ៕

សហរដ្ឋអាម៉េរិក៖ សហរដ្ឋអាម៉េរិកទំនងជានឹងក្លាយជាចំណុចកណ្ដាលសកលថ្មីនៃការឆ្លងរាតត្បាតរបស់វីរុស COVID-19 ខណៈករណីឆ្លងនៅក្នុងប្រទេសមហាអំណាចផុតលេខមួយនេះ ហាក់ដូចមិនមានភាពធូរស្រាលឡើយ នេះបើតាមការព្រមានរបស់អង្គការសុខាភាពពិភពលោក WHO និងត្រូវបានចុះផ្សាយដោយ សារព័ត៌មានរ៉យទ័រ នៅថ្ងៃទី២៤ ខែមីនា ឆ្នាំ២០២០ ។ ទន្ទឹមគ្នា អ្នកនាំពាក្យអង្គការសុខាភាពពិភពលោក WHO លោកស្រី Margaret Harris បានថ្លែងប្រាប់អ្នកយកព័ត៌មានថា បច្ចុប្បន្ន យើងបានឃើញករណីឆ្លងកើនឡើងយ៉ាងគំហុគនៅក្នុងសហរដ្ឋអាម៉េរិក… ដូច្នេះរឿងនេះ វាអាចនឹងកើតឡើង ។ ការព្រមានបែបនេះរបស់អង្គការសុខាភាពពិភពលោក WHO បានកើតមានឡើងស្របពេលដែលចំនួនអ្នកឆ្លងមេរោគ COVID-19 នៅទូទាំងសកលលោក បានកើនឡើងច្រើនជាង៣៧ម៉ឺន៧ពាន់ករណីនៅទូទាំងប្រទេស និងដែនដីចំនួន១៩៤ ខណៈអ្នកជំងឺច្រើនជាង១ម៉ឺន៦ពាន់៥០០នាក់បានបាត់បង់ជីវិត ៕

អេស្ប៉ាញ៖ អ្នកជំងឺចំនួន៥១៤នាក់ បន្ថែមទៀតបានស្លាប់នៅទូទាំងប្រទេសអេស្ប៉ាញ គិតត្រឹមរយៈពេល២៤ម៉ោងប៉ុណ្ណោះ ដែលប្រការនេះធ្វើឱ្យតួលេខសរុបនៃអ្នកស្លាប់កើនដល់២.៦៩៦នាក់ ខណៈអ្នកឆ្លងវីរុសសរុបវិញ ក៏បានកើនឡើងដល់៤ម៉ឺនករណីផងដែរ នេះបើតាមសារព័ត៌មាន CNA ដកស្រង់ប្រភពពីរដ្ឋាភិបាលអេស្ប៉ាញ នៅថ្ងៃទី២៤ ខែមីនា ឆ្នាំ២០២០ ។ ស្របពេលដែលអាជ្ញាធរសុខាភិបាលអេស្ប៉ាញ ចាត់វិធានការធ្វើតេស្តរកឃើញអ្នកផ្ទុកវីរុសថ្មីទៀតនោះ ចំនួនមនុស្សដែលរកឃើញវិជ្ជមានចំពោះជម្ងឺ COVID-19 បានកើនឡើងជិត២០ភាគរយ ដល់ចំនួន៣ម៉ឹន៩ពាន់៦៧៣ករណី នេះបើតាមប្រភពពីក្រសួងសុខាភិបាលអេស្ប៉ាញ ។ ទន្ទឹមគ្នា តួលេខសរុបនៃអ្នកស្លាប់ដោយសារជម្ងឺផ្លូវដង្ហើមថ្មីនេះ ក៏បានកើនឡើងដល់២៣.៥ភាគរយផងដែរ គិតចាប់ពីថ្ងៃទី២៣ ខែមីនា ឆ្នាំ២០២០ ។ អត្រាកំណើនខាងលើនេះ បានបង្ហាញឱ្យដឹងស្របពេលដែលរដ្ឋាភិបាលរបស់នាយករដ្ឋមន្រ្តីអេស្ប៉ាញលោក Pedro Sanchez កំពុងព្យាយាមស្នើឱ្យសភាអនុម័តការពន្យាពេលប្រកាសដាក់រដ្ឋក្នុងគ្រាមានអាសន្នបន្ថែមរយៈពេល ២ សប្តាហ៍ទៀត ពោលគឺរហូតដល់ថ្ងៃទី១១ ខែមេសាខាងមុខ ក្នុងគោលបំណងទប់ស្កាត់ការឆ្លងរាលដាលនៃវីរុស COVID-19 ៕

កូរ៉េខាងត្បូង៖ ប្រធានាធិបតីកូរ៉េខាងត្បូងលោក មូន ជេអ៊ីន បានបង្កើនកញ្ចប់ថវិកាសង្គ្រោះសេដ្ឋកិច្ចដល់១០០លានលានវ៉ុន ឬស្មើនឹង៨០ពាន់លានដុល្លារ ដើម្បីជួយសង្គ្រោះក្រុមហ៊ុនដែលរងគ្រោះដោយសារមេរោគ COVID-19 ក៏ដូចជាជួយទប់ទីផ្សារភាគហ៊ុន និងមូលបត្រ នេះបើតាមសារព័ត៌មានយ៉ុនហាប់ នៅថ្ងៃទី២៤ ខែមីនា ឆ្នាំ២០២០ ។ នាអំឡុងកិច្ចប្រជុំស្តីពីគោលនយោបាយសេដ្ឋកិច្ចគ្រាអាសន្ន លោក មូន ជេអ៊ីន បានបញ្ជាក់ថា ថវិកាទាំងនេះ រួមមានប្រាក់២៩.១លានលានវ៉ុន ជាកំចីដល់បណ្តាក្រុមហ៊ុនខ្នាតតូច និងមធ្យម ហើយ២០លានលានវ៉ុនទៀតនឹងប្រើសំរាប់ទិញមូលបត្រ រួមទាំងឯកសាររបស់ក្រុមហ៊ុនដែលប្រឈមបញ្ហាឥណទាន ។ បច្ចុប្បន្ន បណ្តាក្រុមហ៊ុនកូរ៉េខាងត្បូងកំពុងតស៊ូដើម្បីរស់ចំពេលដាក់ខ្លួននៅឯកោ ដោយសារតែបណ្តាភោជ្ជនីយដ្ឋាន សណ្ឋាគារ ក្រុមហ៊ុនអាកាសចរណ៍ និងឧស្សាហកម្មកម្សាន្តត្រូវបានបិទទ្វារ ។ សូមបញ្ជាក់ថា ចំនួនសរុបនៃអ្នកឆ្លងមេរោគ COVID-19 នៅទូទាំងប្រទេសកូរ៉េខាងត្បូង បន្តកើនឡើងដល់៩.០៣៧ករណី ក្នុងនោះមានអ្នកជំងឺ១២០នាក់បានស្លាប់ និង៣.៥០៧នាក់ទៀតជាសះស្បើយទាំងស្រុង ៕

ឥណ្ឌា៖ ឥណ្ឌានឹងដាក់ចេញនូវវិធានការបិទប្រទេសទាំងមូលរយៈពេល២១ថ្ងៃ ចាប់ពីថ្ងៃទី២៤ ខែមីនា ឆ្នាំ២០២០តទៅ ស្ថិតក្នុងគោលបំណងទប់ស្កាត់ការឆ្លងរាលដាលនៃវីរុស COVID-19 នេះបើតាមនាយករដ្ឋមន្ត្រីឥណ្ឌា លោក ណារិនដ្រា ម៉ូឌី និងត្រូវបានចុះផ្សាយដោយសារព័ត៌មាន Bloomberg ។ ការប្រកាសបែបនេះរបស់លោក ម៉ូឌី ត្រូវបានធ្វើឡើងក្នុងគ្រាដែលប្រទេសឥណ្ឌាមានអ្នកឆ្លងវីរុស COVID-19 ចំនួន៤៨២ករណី គិតត្រឹមថ្ងៃទី២៣ ខែមីនា ក្នុងនោះមាន៩នាក់បានស្លាប់ ខណៈអ្នកជំនាញសុខាភិបាលព្រមានថា ករណីឆ្លងអាចនឹងមានច្រើនជាងនេះ ។ ជាវិធានការបង្ការ និងទប់ស្កាត់ការរីករាលនៃវីរុស COVID-19 បន្ទាន់នោះ អាជ្ញាធរឥណ្ឌាបានសម្រេចចិត្តដាក់ចេញបំរាមលើការជួបជុំមនុស្សច្រើនជាង៥នាក់ នៅតាមរដ្ឋជាច្រើននៅក្នុងប្រទេស ៕

សិង្ហបុរី៖ សងិ្ហបុរីបានរាយការណ៍ពីករណីឆ្លងថ្មីនៃមេរោគ COVID-19 ចំនួន៤៩ករណីបន្ថែមទៀតនៅថ្ងៃទី២៤ ខែមីនានេះ ក្នុងនោះមាន៣២ករណីនាំចូលមកពីក្រៅប្រទេស ដែលប្រការនេះ ធ្វើឱ្យប្រទេសអាស៊ីមួយនេះ មានអ្នកឆ្លងសរុបកើនដល់៥៥៨ករណី នេះបើតាមសារព័ត៌មាន CNA ។ ក្រសួងសុខាភិបាលសិង្ហបុរី MOH បានឱ្យដឹងនៅក្នុងរបាយការណ៍ប្រចាំថ្ងៃរបស់ខ្លួនថា ភាគច្រើននៃករណីឆ្លងថ្មីមកពីក្រៅប្រទេសខាងលើនេះ គឺហូរចូលមកពីចក្រភពអង់គ្លេស ក្នុងនោះ៥ករណីនាំចូលពីសហរដ្ឋអាម៉េរិក ខណៈករណីឆ្លងផ្សេងទៀតធ្វើដំណើរមកពីម៉ាឡេស៊ី បារាំង ឥណ្ឌូនេស៊ី និងអូស្រ្តាលី ។ ក្រៅពីករណីឆ្លងថ្មីខាងលើនេះ ក៏មានអ្នកជំងឺចំនួន១៥៦នាក់ផ្សេងទៀតបានជាសះស្បើយទាំងស្រុងផងដែរ ។ ជាវិធានការទប់ស្កាត់បន្ទាន់នោះ ចាប់ពីថ្ងៃទី២៧ ខែមីនា តទៅនេះ អ្នកដំណើរទាំងអស់ ដែលអនុញ្ញាតឲ្យចូលប្រទេសសិង្ហបុរី ក្នុងនោះរួមមានទាំងពលរដ្ឋសិង្ហបុរីដែលរស់នៅទីនោះ និងអ្នកកាន់ប័ណ្ណស្នាក់នៅរយៈពេលវែង គឺត្រូវតែបំពេញទម្រង់បែបបទប្រកាសពីស្ថានភាពសុខភាពរបស់ពួកគេជាមុន តាមប្រព័ន្ធអនឡាញ ។ បន្ថែមលើនេះ ពលរដ្ឋសិង្ហបុរីទាំងអស់ ដែលត្រឡប់មកពីអង់គ្លេស និងសហរដ្ឋអាម៉េរិកវិញ នឹងត្រូវបានអាជ្ញាធរជូនដំណើរភ្លាមៗ ចេញពីអាកាសយានដ្ឋានទៅកាន់សណ្ឋាគារ ដើម្បីអនុវត្តន៍វិធានការស្នាក់នៅដាច់ដោយឡែកពីគេ រយៈពេល១៤ថ្ងៃ ដើម្បីទប់ស្កាត់ការរីករាលដាលនៃវីរុស COVID-19 ៕ …

ភ្នំពេញ៖ ក្នុងពិធីជួបសំណេះសំណាលជាមួយគ្រូពេទ្យសម្ដេចតេជោប្រឆាំងកូវីត-១៩ ចំនួន ៤២២នាក់ នៅព្រឹកថ្ងៃទី២៥ ខែមីនា ឆ្នាំ២០២០ នាវិមានសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា នៅកម្ពុជា រកឃើញអ្នកកេីត COVID-19 ថ្មីលេីជនជាតិបារាំង ២នាក់បន្ថែមទៀត នៅខេត្តព្រះសីហនុ  ដែលនាំឲ្យកេីនសរុបឡេីងដល់ ៩៣នាក់ ក្នុងនោះ ក៏មានអ្នកជាសះស្បើយចំនួន ៦នាក់ផងដែរ ៕