សៀមរាប៖ អ្នកចិញ្ចឹមកង្កែបជាច្រើនកំពុងត្អូញត្អែរពីបញ្ហាកង្កែបគ្មានទីផ្សារ ដោយសារតែមានការនាំចូលច្រើនពីប្រទេសវៀតណាមមានតម្លៃធូរថ្លៃជាងកង្កែបក្នុងស្រុក និងកត្តាមួយទៀតដោយសារតែការកើនឡើងសារជាថ្មីនៃជំងឺកូវីដ១៩ ធ្វើឲ្យគ្មានភ្ញៀវទេសចរណ៍ ទើបការលក់កង្កែបមិនបានទាល់តែសោះ ។ លោក សុវណ្ណារ៉ា អ្នកចិញ្ចឹមកង្កែបក្នុងខេត្តសៀមរាបបានអោយដឹងថា កង្កែបកំពុងតែមិនមានទីផ្សារ ដោយសារការនាំចូលកង្កែបពីវៀតណាមមកលក់កម្ពុជា ធ្វើឲ្យអតិថិជនដែលធ្លាប់ទិញកង្កែបក្នុងស្រុក បែរត្រឡប់ទៅទិញកង្កែបវៀតណាមវិញ ក្រោមហេតុផលកង្កែបវៀតណាមមានតម្លៃធូរថ្លៃជាងកង្កែបក្នុងស្រុក ។ លោកបន្តថា កង្កែបក្នុងស្រុកលក់ចេញតម្លៃចន្លោះ៥,៥០០រៀលទៅ៦,០០០រៀលក្នុងមួយគីឡូក្រាម ប៉ុន្ដែតម្លៃចន្លោះ៦,០០០រៀល គឺជាតម្លៃខាតដើមរួចទៅហើយ ទោះបីតម្លៃប៉ុណ្ណឹងក៏មិនមានអតិថិជនទិញនោះដែរ ។ ចំណែកឯកង្កែបនាំចូលចន្លោះតែ ៣០០០ទៅ៤០០០រៀលតែប៉ុណ្ណោះ ។ លោកបន្ថែមថា អ្នកចិញ្ចឹមកង្កែបនៅក្នុងខេត្តសៀមរាប កំពុងមានបញ្ហាទាំងនេះដូចគ្នា កង្កែបសល់ពេញស្រះ ចំណែកដើមទុនចំណាយច្រើន និងមិនមានចំណូលធ្វើឲ្យគ្រប់គ្នា ប្រឈមនឹងការខាតបង់ច្រើន ព្រោះលក់មិនចេញពិតមែន ប៉ុន្ដែត្រូវតែផ្ដល់ចំណី និងការថែទាំដល់កង្កែបដដែល ។ កង្កែបពេញអាយុលក់តាំងពីខែមីនាមកម្ល៉េះ ប៉ុន្ដែរហូតមកដល់ខែមិថុនាហើយ នៅតែមិនអាចលក់ចេញដដែល ។ សម្រាប់អ្នកចិញ្ចឹមគ្មានអ្វីក្រៅពីការស្នើសុំឲ្យខាងភាគីពាក់ព័ន្ធ និងសមាគមវារីវប្បករនៅកម្ពុជាជួយរកទីផ្សារកង្កែប ដើម្បីឲ្យមានការលក់ចេញឲ្យបាន ព្រោះបើគ្មានទីផ្សារបែបនេះ លំបាកដល់អ្នកចិញ្ចឹម ៕

ភ្នំពេញ៖ របាយការណ៍របស់ក្រសួងពាណិជ្ជកម្មបានអោយដឹងថា កម្ពុជាបាននាំចេញផលិត ផលសរុបទៅឡាវបានចំនួនជិត៨០ម៉ឺនដុល្លារ ខណៈដែលឡាវនាំចូលផលិតផលមកកម្ពុជាវិញបានជិត៤៤លានដុល្លារក្នុងរយៈពេល៤ខែ ឆ្នាំ២០២១នេះ ។ បើតាមរបាយការណ៍ខាងលើនេះ កសិផល ឬផលិតផលដែលកម្ពុជានាំចេញទៅប្រទេសឡាវមានដូចជា សត្វរស់ ផលិតផលនៃរោងចក្រកិនម្សៅម៉ាលត៍ សម្លៀកបំពាក់ ក្រណាត់ ស្រោមជើង ស្បែកជើង និងវត្ថុធ្វើពីដែក ឬដែកថែបផ្សេងទៀត ។ ហើយក្នុងនេះចំណូលដែលកម្ពុជាទទួលបានច្រើនជាងគេនោះ គឺការនាំចេញសត្វរស់ ដែលបានផ្តល់ចំណូលរហូតដល់២៦ម៉ឺន៥ពាន់ដុល្លារ ។ ទន្ទឹមនឹងនេះ កម្ពុជាក៏មានការនាំចូលពីឡាវវិញផងដែរ ដែលទំហំនៃការនាំចូលមានរហូតទៅដល់៤៣.៨៤លានដុល្លារនៅក្នុងរយៈពេល៤ខែឆ្នាំ២០២១នេះ ។ ផលិតផលដែលឡាវនាំចូលមកកម្ពុជាមានដូចជា កាហ្វេ តែ ម៉ាត់តេ និងគ្រឿងទេស ថ្នាំជក់ និងផលិតផលពីថ្នាំជក់ ព្រមទាំងគ្រឿងបរិភោគកែច្នៃផ្សេងៗទៀត ។ គួរកត់សម្គាល់ គិតមកដល់ឆ្នា២០២១នេះទំនាក់ទំនងរវាងកម្ពុជា និងឡាវមានរយៈពេល៦៥ឆ្នាំហើយ ហើយទំនាក់ទំនងរយៈពេល៦៥ឆ្នាំកន្លងមកនេះ ភាគីទាំងពីរទទួលបាននូវចំណងមិត្តភាពប្រពៃណី និងកិច្ចសហប្រតិបត្តិការដ៏ល្អប្រសើរ ដោយឈរលើស្មារតីនៃភាពជាអ្នកជិតខាងល្អ សាមគ្គីភាព និងការយោគយល់គ្នាទៅវិញទៅមក នេះបើយោងតាមសារលិខិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ៕

ភ្នំពេញ៖ ឯកឧត្តម ​ជុក ជំនោរ ​អ្នកនាំពាក្យក្រសួងទេសចរណ៍បានអោយដឹងថា កម្ពុជា​មានគម្រោងនឹងបើកទទួលភ្ញៀវទេសចរ​ដែលបានចាក់វ៉ាក់សាំង​រួចនៅត្រីមាសទី ៤ ឆ្នាំ​ ២០២១នេះ ​។​ ក្រុមការងារក្រសួងទេសចរណ៍ដឹកនាំដោយឯកឧត្តម សុខ សង្វារ អនុរដ្ឋលេខាធិការក្រសួងទេសចរណ៍ និងក្រុមការងារក្រសួងសុខាភិបាលដឹកនាំដោយឯកឧត្តម ឈី ហុង អនុរដ្ឋលេខាក្រសួងសុខាភិបាលបានជួបពិភាក្សាគ្នាបន្ត អំពីការកែសម្រួលឯកសារទស្សនាទានកញ្ចប់ទស្សនកិច្ចទេសចរណ៍វ៉ាក់សាំងកូវីដ-១៩នាដើមសប្តាហ៍នេះ ។ នេះជាលើកទី២ហើយដែលអ្នកជំនាញនៃក្រសួងទាំងពីរកែសម្រួលជាមួយគ្នា ដើម្បីជំរុញឲ្យឯកសារនេះមានភាពល្អប្រសើរឡើង ។ ឯកឧត្តម ​ជុក ជំនោរ បន្តថា ​ចេញពីកិច្ចពិភាក្សារវាងក្រសួងទេសចរណ៍ និងក្រសួងសុខាភិបាល ក្រុមការងារជំនាញក្រសួងទេសចរណ៍នឹងយកនូវអ្វីដែលជាវិធានការសុវត្តិភាពរបស់ក្រសួងសុខាភិបាល និងធាតុចូលសំខាន់ៗមករៀបចំជាជាឯកសារទស្សនទាន ដើម្បីដាក់ចូលទៅអន្តរក្រសួងប្រយុទ្ធប្រឆាំងកូវីដ១៩ ដើម្បីពិភាក្សានឹងស្នើសុំសេចក្ដីសម្រេចទៅប្រមុខរាជរដ្ឋាភិបាលទៅតាមស្ថានភាពជាក់ស្ដែង ។ ឯកឧត្តមបន្ថែមថា ជាមួយស្ថានភាពបច្ចុប្បន្ននេះ មិនថាកម្ពុជាទេ ពិភពលោកទាំងមូលលំបាកនឹងនិយាយឲ្យចំថាតើត្រីមាសទី៤នៅពេលណា?ខែណា? ប៉ុន្តែបច្ចុប្បន្នយើងគួរគិតជាទស្សនទានទាំងអស់គ្នាថា យើងព្យាយាមទាំងអស់គ្នាក្នុងការរៀបចំឯកសារឲ្យគ្រប់ជ្រុងជ្រោយ ទាំងវិធានសុវត្តិភាពរបស់ក្រសួងសុខាភិបាល និងវិធានការរបស់ក្រសួងទេសចរណ៍ជាមួយការវិវត្តនៃជំងឺកូវីដ១៩​នេះ ។ ដូច្នេះក្នុងអំឡុងពេលត្រីមាសទីបួនអាចនិយាយបានថា វាចាប់ពីខែ១០ ខែ១១ និងខែ១២ ដែលក្នុង អំឡុងនេះ បើស្ថានភាពអំណោយផល ហើយការគ្រប់គ្រងកូវីដ១៩ក្នុងពិភពលោកគ្រប់គ្រងបានកាន់តែល្អប្រសើរដំណើរការចាក់សាំងកាន់តែរលូនទៅមុខ កម្ពុជាអាចបិទបញ្ចប់នូវព្រឹត្តិ ការណ៍សហគមន៍ ២០ កុម្ភៈឆាប់…

ព្រះសីហនុ៖ កំពង់ផែ​ស្វយ័ត ក្រុងព្រះសីហនុ បានដាក់​ចេញ​ផែនការ​អភិវឌ្ឍរយៈពេល​វែង ក្រោយ​ឆ្នាំ ២០៣០ ដើម្បី​ពង្រឹង និង​ពង្រីក​សមត្ថភាព នៃ​ការផ្តល់សេវាជូន​អតិថិជន ក្នុងនោះ​រួមមានគម្រោង​កសាងចំណត​កុងតឺន័រ​ទី​៤ ប្រវែង១.៣០០ម៉ែត្រគុណ​នឹង៥៥០ម៉ែត្រ ចំណត​កុងតឺន័រ​ទី​៣ ប្រវែង១.០៥០ម៉ែត្រ គុណ​នឹង៥៥០ម៉ែត្រ ចំណតកុងតឺន័​រថភ្លើង ប្រវែង២៥០ម៉ែត្រគុណ​នឹង១.៧០០ម៉ែត្រ អភិវឌ្ឍន៍​តំបន់​រដ្ឋបាល និង​សេដ្ឋកិច្ច៥៤ហិកតា និង​តំបន់​គយ​ត្រួតពិនិត្យ​ទំនិញ ប្រវែង៦៥០ម៉ែត្រគុណ​នឹង២០០ម៉ែត្រ​ ។​ ​ដោយឡែកផែនការ​អភិវឌ្ឍរយៈពេល​ខ្លីឆ្នាំ​២០១៧-២០២៥ កំពង់ផែ​ស្វយ័ត ក្រុងព្រះសីហនុ មាន​ផែនការ​អភិវឌ្ឍ​កំពង់ផែ​ទឹក​ជ្រៅ ចំណត​កុងតឺន័រ ជម្រៅ១៤,៥ម៉ែត្រ ក្នុងនោះគម្រោង​កសាង​កំពង់ផែទឹក​ជ្រៅ ចំណត​កុងតឺន័រជំហាន​ទីមួយ ប្រវែង៣៥០ម៉ែត្រ ជំហាន​ទី​ពីរ ប្រវែង ៣០០ម៉ែត្រ និង​ជំហាន​ទី​បី ប្រវែង៣០០ម៉ែត្រ ​។​ សូមជម្រាបថា កំពង់ផែ​ស្វយ័ត ក្រុងព្រះសីហនុ បាន​ចូល​ទីផ្សារមូល​ប​ត្រ​កម្ពុជា បោះផ្សាយ លក់​ភាគហ៊ុនបាន​បញ្ចុះតម្លៃ ១០% នៃ​តម្លៃ​សេវា​លើកដាក់​កុងតឺន័រ និង​បាន​អភិវឌ្ឍ​ចំណត កំពង់ផែ​ពហុ​បំណង​ ។​ ​ដោយឡែកទាក់ទង​ការងារ​អាជីវកម្ម និង​ហិរញ្ញវត្ថុឆ្នាំ​២០២០ បើធៀប​នឹង​ឆ្នាំ​២០១៩វិញ កំពង់ផែស្វយ័ត ក្រុងព្រះសីហនុ មាន​ទំនិញ​ឆ្លងកាត់ចំនួន៦លាន៦០ម៉ឺន១ពាន់៨០៤តោន កើនឡើង 0,៨៣%…