អាមេរិក៖ សេដ្ឋកិច្ចរបស់សហរដ្ឋអាមេរិកកាន់តែខិតជិតការស្ទុះងើបឡើងវិញស្ទើរទាំងស្រុងនៅក្នុងត្រីមាសទី១ ឆ្នាំ២០២១នេះ ដោយកម្មវិធីចាក់វ៉ាក់សាំងបង្ការជំងឺ Covid-19 គឺជាផ្នែកជំរុញដ៏សំខាន់របស់រដ្ឋាភិបាល និងការស្ទុះងើបឡើងវិញប្រកបដោយស្ថេរភាពនៅក្នុងទីផ្សារការងារ ដែលបានជួយយ៉ាងច្រើនពីផលប៉ះពាល់ដោយសារវិបត្តិកូវីដ១៩ ។ក្រសួងពាណិជ្ជកម្មអាមេរិកបានឲ្យដឹងថា ការកើនឡើងនៃផលិតផលក្នុងស្រុកសរុប GDP នៅត្រីមាសទី១ឆ្នាំនេះ បានឆ្លុះបញ្ចាំងពីសេដ្ឋកិច្ចបន្តងើបឡើងវិញ ការបើកពាណិជ្ជកម្មឡើងវិញ និងការឆ្លើយតបរបស់រដ្ឋាភិបាលនៅតែបន្តពាក់ព័ន្ធនឹងជំងឺកូវីដ១៩ ។ បញ្ហានៅតែបន្តមាន ចំនួនមនុស្សដាក់ពាក្យសុំអត្ថប្រយោជន៍ពីភាពអត់ការងារធ្វើ នៅតែមានកម្រិតខ្ពស់ជារៀងរាល់សប្តាហ៍ ។ បើតាមក្រសួងការងារអាមេរិកនោះ មនុស្ស៥៥៣ពាន់នាក់បានដាក់ពាក្យសុំអត្ថប្រយោជន៍កាលពីសប្តាហ៍កន្លងទៅ ដោយចំនួននេះធ្លាក់ចុះយ៉ាងខ្លាំង ប៉ុន្តែវានៅជិត២ដងនៃកម្រិតមុនផ្ទុះជំងឺកូវីដ១៩រាតត្បាត និងទីផ្សារការងារបានធ្លាក់ចុះ៨.៤លាន ។គួរបញ្ជាក់ថា កម្មវិធីចាក់វ៉ាក់សាំងយ៉ាងលឿន ការបើកអាជីវកម្មឡើងវិញ និងកញ្ចប់ថវិកាជំរុញចំនួន១.៩ប៊ីលានដុល្លាររបស់រដ្ឋបាលលោកប្រធានាធិបតី ចូ បៃដិន បានបង្កើនទំនុកចិត្តអតិថិជន និងជំរុញឲ្យសេដ្ឋកិច្ចងើបឡើងវិញគួរឲ្យចាប់អារម្មណ៍ ។ រដ្ឋាភិបាលអាមេរិកបានបញ្ចេញទឹកប្រាក់ទៅពលរដ្ឋខ្លួនចំនួន៩០លាននាក់ក្នុងខែមីនាកន្លងទៅ និងទំនុកចិត្តអតិថិជនឥឡូវនេះបានឈានដល់កម្រិតមុនពេលជំងឺកូវីដ១៩វាយប្រហារ ដោយការងើបឡើងវិញសម្រាប់រយៈពេល៤ខែជាប់គ្នា ៕ ប្រភព៖ CNBC

អេស្ប៉ាញ៖ ប្រទេសអេស្ប៉ាញគ្រោងនឹងបើកស្វាគមន៍អ្នកទេសចរបរទេស ដែលមានលិខិតបញ្ជាក់សុខភាពកូវីដ-១៩ឌីជីថលចាប់ពីខែមិថុនាខាងមុខនេះតទៅ ។រដ្ឋមន្ត្រីទេសចរណ៍អេស្ប៉ាញលោក ហ្វើណិនដូ វ៉ាល់ដេស (Fernando Valdés) បាននិយាយក្នុងកិច្ចប្រជុំក្រុមប្រឹក្សាទេសចរណ៍ និងការធ្វើដំណើរពិភពលោកនៅប្រទេសម៉ិចស៊ីកូក្នុងសប្តាហ៍នេះថា កម្មវិធីដែលអ្នកទេសចរអាចបង្ហាញពីការចាក់វ៉ាក់សាំង ការតេស្តអវិជ្ជមាន ឬជាសះស្បើយពីកូវីដ-១៩ អាចបង្ហាញពីមូលដ្ឋានគ្រឹះដែលអាចធ្វើដំណើរបាន ។ លោកបន្ថែមថា អេស្ប៉ាញនឹងចូលរួមក្នុងកម្មវិធីវិញ្ញាបនប័ត្រឌីជីថលសាកល្បងមួយនៅខែឧសភាខាងមុខ ហើយអាចនឹងរួចរាល់ ដើម្បីទទួលភ្ញៀវទេសចរអន្តរជាតិនៅត្រឹមខែមិថុនា ឆ្នាំ២០២១នេះ ។គួរបញ្ជាក់ថា ប្រទេសអេស្ប៉ាញដែលពឹងផ្អែកលើវិស័យទេសចរណ៍ប្រមាណ១២%នៃផលិតផលក្នុងស្រុកសរុប (GDP) បានឈរលំដាប់លេខ៤នៃប្រទេសដែលទទួលរងប៉ះពាល់ដោយជំងឺកូវីដ-១៩ធ្ងន់ធ្ងរបំផុតក្នុងពិភពលោក ៕ ប្រភព៖ The Guardian