ភ្នំពេញ៖ នៅព្រឹកថ្ងៃសៅរ៍  ទី២៤  ខែមេសា  ឆ្នាំ២០២១  ក្រុមការងារលេខាធិការដ្ឋានបាននាំយកអំណោយ ដ៏ថ្លៃថ្លារបស់  ឯកឧត្តម  ហ៊ុន  ម៉ានី  ប្រធានសហភាពសហព័ន្ធយុវជនកម្ពុជា  ទៅចែកជូនដល់បងប្អូនក្រុមគ្រួសារបងប្អូនប្រកបរបរសេដ្ឋកិច្ចក្រៅប្រព័ន្ធដែលមានជីវភាពខ្វះខាត ស្ថិននៅក្នុងខណ្ឌសែនសុខ ពោធិ៍សែនជ័យ និងខណ្ឌទួលគោក សរុបចំនួន២០៥ គ្រួសារ ដើម្បីចូលរួមរំលែកការលំបាកនៅក្នុងជីវភាពប្រចាំថ្ងៃ ពិសេសនៅស្ថានការណ៍ដែលរាជធានីភ្នំពេញ និងក្រុងតាខ្មៅស្ថិតនៅក្នុងតំបន់បិទខ្ទប់ដើម្បីស្កាត់ការឆ្លងរីករាលដាលជំងឺកូវីដ-១៩​ នៅក្នុងសហគមន៍២០ កុម្ភៈ ដែលនៅតែបន្តអូសបន្លាយរហូតមកទល់និងពេលបច្ចុប្បន្ននេះ។ នៅក្នុងឱកាសនេះ បងប្អូនក្រុមគ្រួសារបងប្អូនប្រកបរបរសេដ្ឋកិច្ចក្រៅប្រព័ន្ធ សូមថ្លែងអំណគុណឥតឧបមាចំពោះ ឯកឧត្តម​ ហ៊ុន​ ម៉ានី​ ប្រធាន​ស.ស.យ.ក​ ដែលបានយកចិត្តទុកដាក់ដល់ពួកគាត់ ដើម្បីជួយសម្រួលជីវភាពក្នុងដំណាក់កាលដ៏លំបាកនេះ។ គួរបញ្ជាក់ថា អំណោយផ្តល់ជូនបងប្អូនក្រុមគ្រួសារបងប្អូនប្រកបរបរសេដ្ឋកិច្ចក្រៅប្រព័ន្ធ នៅក្នុងឱកាសនេះរួមមាន៖  អង្គរ  ២០kg, មី  ១កេស,  ត្រីខ  ១យួរ,  និងទឹកស៊ីអៀវ ១យួរផងដែរ។

ខេត្តកណ្ដាល៖ ព្រឹកថ្ងៃទី២៤ ខែមេសា ឆ្នាំ២០២១ ឯកឧត្តម គង់ សោភ័ណ្ឌ អភិបាលខេត្តកណ្ដាល អញ្ជើញចុះពិនិត្យទីតាំងបោះដុំបន្លែ សម្រាប់ផ្គត់ផ្គង់ក្នុងភូមិសាស្រ្តក្រុងតាខ្មៅ ដែលមានទីតាំងស្ថិតនៅជាប់ផ្លូវជាតិលេខ២១ ភូមិទួលក្រសាំង សង្កាត់ស្វាយរលំ ក្រុងតាខ្មៅ ខេត្តកណ្ដាល។ សូមបញ្ជាក់ថា ផ្សារបោះដុំបន្លែនេះ សម្រាប់បងប្អូនប្រជាកសិករ នៅស្រុកកៀនស្វាយ ស្រុកស្អាង និងស្រុកកោះធំ ដែលមានកសិផល ហើយមិនមានទីផ្សារសម្រាប់លក់ ពួកគាត់អាចយកបន្លែរបស់ពួកគាត់ មកដាក់លក់ដុំនៅទីនេះ សម្រាប់ធ្វើការចែកចាយផ្គត់ផ្គង់ដល់ភូមិសាស្ត្រក្រុងតាខ្មៅទាំងមូល។